Anyána Timoté á nyɛmána wu olíhéke
5
1 Uumi ɔɔ́nɔ́,
mbɔ́kɔ elunyí yɛ́ ɔnɔ́mɔcɔ́ ŋá kɛ́la asana a yaabɛ́,
eti wuúci kákálɛ́na na nyɛŋána nyikime,
mbá wuúci hɔ́ŋɔ́náka háyɛ ɔɔtɛ́.
Lébéke bɛnɔ́kɔ́ bɛ́ baacɔ háyɛ bɔnɔ́ɔnyia a banɔ́mɔcɔ́.
2 Hɔ́ŋɔ́náka bilunyí bí beénjú háyɛ bɔɔnyia,
indíkíné ci beénjú háyɛ bɔnɔ́ɔnyia e beénjú tɔ́na ;
nyɛkɛla eényí nyikime á bámɔ́kɔ́na nyɛtálɛ́mánánɔ́ eé buúse bɔ́ Bandɔ́mɛsɛ́.
3 Sókóbíki ne nyikéke bisíké bí beénjú a bɛ́áŋa taaká cí bisíké.
4 Mbá mbɔ́kɔ esíké a yɛ́mɔtɛ́ áŋa na baáná ta anyía banana a bá bɔ́ŋa bakɔmákánɔ́,
bá ŋa bɔ́ nyɛmána bá ɔ cáŋa aákɔ́nákɛ́na ɔlɔ́kɔ́mɛ́na bíábɔ́ bibíényi,
bé biíbi sókóbíki anyía híáná bíábɔ́ bibíényi ŋe bú beébe tétényíki buáyá.
Nyɛkɛla eényí ŋeé bíléníne Bandɔ́mɛsɛ́.
5 Esíké a yááŋa ɔlɔbɔ́nɔ́ taaká esíké,
yiíyi tɛ́ka na ɔɔcɔ wu o wuúci sókóbíki,
esíké eéyé áŋa ɔháyánɔ́ mɔŋɔlɛ́ ná Bandɔ́mɛsɛ́ ;
u ŋeé wuúci bɛ́cɔ́kɔ́lɛ́na mɔɔ́sɛ́ mekime ne nebutúé na nabuɔ́sɛ́ anyía wé wuúci ɔɔ́lɛ́ta.
6 Asana ɔ́mɔtɛ́,
esíké eyí olíhe ú ɔmɛsɛ́ a yánáŋa o obíléníne áŋa ewéénú,
ta yɛ́ cáŋa á bá anyía yɛ́ ŋa húánáná yɔɔ́sɔ.
7 Bɛsana eébí ɔ́ɔ nyɛmána wu owoókísíki baacɔ eébé anyía ta ɔɔcɔ ti beébe kákálɛ́na.
8 Yááŋa anyía ɔɔcɔ ewú u ti ŋé sókóbi bááyɛ́ baacɔ hɔlákáhɔ́láka bá ciayɛ́ ciíbe ma bɛ́sáŋɔ́na olumitinine ú Yésus,
wáŋa ɔɔbɛ́ ɔ ɔhɔla mu-ti-lumitinine bɛ́muátá.
9 Esíké ayɛ́ nu ŋa nɔ́ aamba ɔwɔɔ́ŋɔ ɔ ɔlɔŋɔ ú bisíké abɛ́ hiɔ́bɔ hí belumitinine ŋɔ yɔɔ́lɔ ŋá nyɛmána yɛ́ ɔ cáŋa bá na tuɔŋɔ etíne átátɔ́,
yiíyi yɛ́ ŋɔɔ́ tɔ́nɔ́ hú nyɛtɔ́nɔ́ nyɛ́mɔtɛ́.ª
10 Yɛ́ ŋa nyɛmána yɛ́ ɔbá oónjú awɔ́ baacɔ ŋé bú lémbi nyíáyɛ́ nyɛbɛ́kɛ́lɛ́na,
wuúci u ŋeé sókóbíki bááyɛ́ baáná bɔmbányɛ,
yɔ́ káháka bekenyí e úúye ooki,
yɔ́ súáka akɔlɔ́ cé belumitinine Yésus,
ª yɔ́ wɔɔ́lɔ́kɔ baacɔ e muuyé,
yɔ́ kɛ́laka bɛmbányɛ bɛ́ bɛsana ekúlú ekime.
11 A asana ne bisíké a bɛ́ a yánáŋa indíkíné cí beénjú,
ɛ ŋa mɛ́ ɔ láana anyía eti biíbi ɔ́ɔ́ŋɔ e nufule,
ananyía ɔcɔba nyɛtɔ́nɔ́ áŋa wu ɔ háná beébe bílénékíne buɔ́sɛ́,
bɔ́ hámɔ́kɔ́na o olumitinine.
12 Mbɔ́kɔ bɛ́ ŋa kɛlaka aáná,
bé ké biíbi kákálákɛ́na anyía bí ŋe kine ɔlátɛ́na cáábɔ́ esúŋe.
13 Asana a yɛ́mɔtɛ́ áŋa anyía mbɔ́kɔ o ŋoó biíbi ɔɔ́ŋɔ́kɔ,
bɛ́ tɛ ká háná ɔ nyiɔ buólí,
bío bíhélínyi o húle kanda hí eé meébe hí eé meébe,
bɛ́ ɔ bá ne tukókó,
bɛ́ táŋgɛ́na baacɔ,
bɛ́ kɔɔ́náka bɛsana abɛ́ bɔ́ tɛ ɔ́mɔ bɔ́ nyɛmána bá ɔkɔɔnaka.
14 Yaátɛ́ asana nyiámɛ nyiléne áŋa anyía bisíké a bɛ́ a yánáŋa indíkíné cí beénjú ŋá nyɛmána bɛ́ ɔtɔ́nɔ́kɔ ;
bí bíénéke baáná,
bí tétényíki maabɔ́ meébe ma baacɔ,
ananyía ba-basɔ́-nuusi tɛ basɔ́ táŋɛ́na.
15 Yááŋa anyía bɛ́mɔtɛ́ bisíké na maá bɔ́ nánaka ohónyí,
bɛ́ɔ látákɛ́na Sátan.
16 Mbɔ́kɔ mulumitinine e muénjú a mɔ́mɔtɛ́ áŋa ne bisíké bí beénjú a bɛ́áŋa a ciayɛ́ ciíbe cɛ baacɔ,
u ŋá nyɛmána wu o biíbi sókóbíki,
u ti túéhínyi hiɔ́bɔ hí belumitinine bɔlamɔ́ eébú.
Aáná belumitinine ké bú sókóbíki bisíké bí beénjú a bɛ́áŋa taaká cí bisíké.
17 Bekendisi hiɔ́bɔ hí belumitinine a bá ŋa bɔ́ nyiɔ búábɔ́ buólí bɔmbányɛ,
hɔlákáhɔ́láka bɔsɔ́ɔ́kɔ́ e bé mé bú bíínjie muuyé ne o ohulinyi baacɔ Ambányɛ yɛ́ Ɛsɔ́ma ne o beébe eékúnyi bɛsana,
bá ŋa nyɛmána bé o beébe kékéke bikúlú bífendíª ɔ ɔhɔla bɔsɔ́ɔ́kɔ́ bé etémbí.
18 Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Bá tɛ ŋɔ́ɔ́ yɔɔ́tɔ́kɛ́na káwɔ cɛ masáŋá ɛmɔ́má »* yiíyi tɔ́na anyía « Munyiɔnɔ ŋá nyɛmána mu ɔnɔhɔkɛna a búáyɛ́ buólí. »*
19 Atɛ caŋácáŋa olumitine asana ayɛ́ bá sɔ́mɛ́na mukendisi hiɔ́bɔ hí belumitinine a mumɔtɛ́,
mbɔ́kɔ baacɔ béfendí ta bátátɔ́ tɛ ŋá bɔ́ háya ɛmbasɔ́.*
20 Baacɔ a bá ŋa bɔ́ cɔ́ba ne buúse ɔ ɔkɛla bɔɔbɛ́,
beébe bɔmɔ́kɛ́na ɛ ɛkatɛ́katɛ́ cɛ baacɔ bekime ananyía bɔsɔ́ɔ́kɔ́ bé etémbí é búle ebú líkíme ɔkɛla bɔɔbɛ́.
21 Ɛ ŋa mɛ́ ɔ bɛ́cɔ́kɔ́lɛ́na eé buúse na bɔ́ Bandɔ́mɛsɛ́ ne bú Yésus *Kilís,
ne bú *bililé bɛ́ masɔ́ma bɛ́ Bandɔ́mɛsɛ́ a bɛtáfákánɔ́,
ɛsɛ́ :
Látákɛ́na bɛsana eébí abɛ́ ɛ́ ŋa mɛ́ ɔ laákɛ́na.
Atɛ kamɛ́na ɔɔcɔ asana anyía o ŋoó wuúci menyi,
mbá á nyɛána mebeé.
22 Atɛ aáŋálɛ́na ɔ ɔtála ɔɔcɔ aabá a aatɔ́ o o wuúci télímínyi e nyilimíné hú anyía ɔyá ma yá.
Atɛ aáláka bɔɔbɛ́ bɔ́ ɔɔcɔ ;
bítétényíki kuɔŋɔ́ bɛ́muátá ofúúménénú.
23 Nyɛána o búle múána hú menyífé,
a múátɛ́tákɛ́na meluku a asana ne úúwe ɔkála ú nuuhú anyía a tɛ háná lɔ́kɔ́ma ɔkála a tɔɔna.
24 Maabɛ́ ma baacɔ a bɔ́mɔtɛ́ ŋa lɛ́cana a miányɛ́ te bé ti ŋée beébe kélísi ;
mbá baacɔ a bɔ́mɔtɛ́,
bá ŋa nyɛmána bá ɔ cáŋa beébe kélísíki,
e elime eécí bá ŋa lɛca anyía bá ŋá bɔ́ kɛ́láka bɔɔbɛ́.
25 Híáná ambányɛ yí buólí ŋa lɛ́cana a miányɛ́ tɔ́na,
te bé ti ŋé tényí e buúbu lɛca,
bú tɛ á bá bú olimine ekúlú yeéŋí bunámbánɔ́ tɛ́ka ne obítóŋie a miányɛ́.