6
1 Belumitinine bekime a bá bɔ́ŋa bɛɔ́lɛ́ ŋa bɔ́ nyɛmána bá ɔlɛcaka báábɔ́ *baáŋá ne nyikéke nyikime a nyɛ́ ŋá bɛ́amba,
ananyía baacɔ ti sulísi te nyiínyi nyɛ́ Bandɔ́mɛsɛ́ ta bɛsana ebí tu ŋe sú eékúnyi baacɔ.
2 Mbɔ́kɔ báábɔ́ baáŋá eébé ŋa bɔ́ háya mɔŋɔlɛ́ né Kilís,
bɔ́ tɛ ɔ́mɔ bɔ́ nyɛmána bé o beébe bábákɛ́na,
bá kɔɔnaka anyía bá bɔ́ŋa báábɔ́ benyíinyí bé olumitinine.
Mbá,
bá ŋá bɔ nyɛmána bé o beébe nyiɔkɛna buólí ɔ ɔhɔla nyinyiɔ nyɛ́ buáyá anyía bá bɔ́ŋa belumitinine,
bé beébe lénéke tɔ́na.
Ne beékúnyi eékúnyi cá bɛfala ne beléne mɔɔnyɛ́ buéŋí
Bɛsana eébí ɔ́ɔ nyɛmána wu oweékúnyíki baacɔ,
é beébe oókísíki anyía bá kɛláka.
3 Mbɔ́kɔ ɔɔcɔ áŋa ne nyiékúnyi nyí etémbí,
yó kine olumitinine ta bɛmbányɛ bɛ́ bɛsana bí uusú Otéŋí a Waáŋá Yésus *Kilís,
ta nyíásɔ́ nyiékúnyi a asana na ambányɛ yɛ́ nyɛbɛ́kɛ́lɛ́na eé buúse bɔ́ Bandɔ́mɛsɛ́,
4 ɔɔcɔ oócí áŋa na bumálá ;
u ti ŋé menyi ta bɔkɔ bú etémbí,
ɛ tɛ ŋáa bá hú na bɛhɔnɔnɔ na ɛsáká cí etémbí ne etémbí.
Ciíci cí ŋe yiínjie baacɔ na bɛáká,
na bɛhɔnɔnɔ,
na muɔ́mbɔ́nána,
na ɔbɛ́táá anyía bɔsɔ́ɔ́kɔ́ ŋeé beébe kɛláka bɔɔbɛ́.
5 Bé ŋe bú súŋunyinyi,
bá tɛ tɔmbɔ,
anyía cííbú ibíkéti áŋa ɛɛbɛ́ :
Bé ti túné menyi taaká.
Bé ŋe bú keti yáakɛlá anyía,
mbɔ́kɔ bá ŋa bɔ́ látɛ́na abɛ́kɛ́lɛ́na cé olumitinine,
bá ŋa bɔ́ cɔ́baka ɔ ɔhɔ́máka mɔɔnyɛ́ meéŋí.
6 Aá taaká nyibíínjie ɔ ɔlátɛ́na olumitinine áŋa na yaandándá yɛ́ ɔhɔ́ma,
mbɔ́kɔ ɔɔcɔ ŋeé bíléníne nyɛnamá nyɛ́ bɛnyɛ́ma anyɛ́ wáŋa ne nyiínyi.
7 Yááŋa anyía tu ŋa sɔ́ faáya ɔ ɔmɛsɛ́ aabá éfendí,
híáná tu ká sɔ́ halɔ́mɔ́kɔ́na tɔ́na aabá éfendí.
8 Aáná mbɔ́kɔ tua sɔ́ŋa na bɛnyɛ́ma bɛ́ ɔnyíáka na bɔlaka bɔ́ ɔlaŋaba,
nyɛnamá eényí ŋaá basɔ́ nyɛmána.
9 A aháŋá na baacɔ a bá ŋa bɔ́ aamba bɔnɔ́mɛ buéŋí,
Sátan áŋa wu o beébe kɔ́kɔ́náka,
yɔ́ kɛla anyía bábɔ́ kuakɔnaka a yááyɛ́ abɔkɔ noómi,
bɔ́ búle bɛ́táá hú oléne bɛsana na bɛ́ buála na a bɛɛbɛ́ e bí ŋé beébe súéténe ne e bunyímé ne o owé noómi.
10 Yááŋa anyía,
oléne mɔɔnyɛ́ buéŋí ŋeé bíéne anamánamá ekime cá bɛɛbɛ́ bɛ́ bɛsana.
Aáná baacɔ a bɔ́mɔtɛ́ e bé ŋe bú bíínjíékíne o oléne mɔɔnyɛ́ ŋa bɔ́ bɛ́yuátáka olumitinine,
cííbú ɛtɛ́má bɛ́nyíáka buéŋí a asana eéyé.
Ilébé cɛ́ nyɛmána
11 Ɔ́ɔ kuɔŋɔ́,
munyiɔnɔ Bandɔ́mɛsɛ́,
sámbáka bɛsana eébí bikime ;
bɛ́kɛ́ndákɛ́na ekúlú ekime ɔ ɔbá atálɛ́mánánɔ́ yɛ́ ɔɔcɔ,
é líhéke háyɛ Bandɔ́mɛsɛ́ ŋé léne,
mbá á cɔbá ne buúse ne o olumitinine *Kilís,
ne o oléne bɔsɔ́ɔ́kɔ́,
eéhíkínyínyi bɛsana,
a aambáka mbuumu na bɔsɔ́ɔ́kɔ́ tɔ́na.
12 Ɛ ŋa mɛ́ ɔ láana anyía nuáka bɛmbányɛ bí biité bí olumitinine,
mbá é tímbíé bɔmbányɛ yɔɔ́sɔɔ́sɔ yí olíhe yí ekúlú ekime ;
yiíyi Bandɔ́mɛsɛ́ ŋɔ yɔ́ɔ bɛ́tánɛ́na ekúlú ayɛ́ ú ŋɔ yɔ́ɔ lɔ́ŋɔ́kɔ,
wɔ́ɔ táŋáka bɛmbányɛ bɛ́ bɛsana ebí o ŋoó lumítíníne eé buúse bɔ́ bambasɔ́mbásɔ beéŋí.ª
13 Ɛ ŋa mɛ́ ɔ laana ne eé buúse bɔ́ Bandɔ́mɛsɛ́,
Mulíhísi bɛnyɛ́ma bikime,
ne eé buúse bú Yésus Kilís awɔ́ u ŋaá táŋáka na taaká ikime eé buúse bɔ́ Kɔ́mɛ́na Bílat,
ɛsɛ́ :
14 Látákɛ́na *bikotí bí olumitinine bikime e bufúúménénú noómi,
baacɔ tɛ ɔ kákálɛ́na ɔ ɔkɔɔ́háma a nyɛkahálɔ́mɔ́na nyí uusú Otéŋí a Waáŋá Yésus Kilís.
15 U ká ká hálɔ́mɔ́na a ambányɛ yí ekúlú ayɛ́ Bandɔ́mɛsɛ́ ŋaá táná.
Bandɔ́mɛsɛ́ oócí Alámakɛ́nda,
wuúci hicéme hɛ́ bɔmbányɛ,
Otéŋí u betéŋí bekime,
Waáŋá u *baáŋá bekime.
16 Wuúci bímuócí ú ŋe líhe bikúlú bikime,
u ti wé ;
u ŋeé límine aá yaandándá yí eese ayɛ́ ɔɔcɔ tɛ a bá wu obíkósíti né yiíyi.
Ta ɔɔcɔ tí ŋéé wuúci lɛca,
ta ɔɔcɔ tɛ́ ŋáá bá wu o wuúci lɛca tɔ́na ;
wuúci u ŋé téŋínyi ekúlú ekime,
wuúci baacɔ ábɔ́ nyɛmána bé onyemiki,
híáná yááŋa.
17 Láákɛ́na ɛnɔ́mɛ cɛ́ baacɔ anyía cí ti bíbéétíki,
cɛ́ tɛ hákɛ́na mɔŋɔlɛ́ a bɔnɔ́mɛ,
anyía búáŋa bú ɔsɔla.
Mbá cɛ́á hákɛ́na mɔŋɔlɛ́ ná Bandɔ́mɛsɛ́ bímuócí anyía ú ŋaá basɔ́ iínjie bɛnyɛ́ma bikime biéŋí anyía tuésú biíbi bílénékíne.
18 Ciíci laákɛ́na anyía cɛ́á kɛláka bɛmbányɛ bɛ́ bɛsana biéŋí,
cɛ́ bámɔ́kɔ́na na bɔnɔ́mɛ buéŋí a ambányɛ yɛ́ nyɛkɛla nyɛ́ bɛsana.
Cɛ́ ŋá nyɛmána cɛ́ ɔbá ne nuubo,
cí iínjíékine bɔsɔ́ɔ́kɔ́ bɛnyɛ́ma.
19 Mbɔ́kɔ cɛ́ ŋaá kɛla aáná,
cɛ́ ŋa bɛ́bátɛ́nɛ́na taaká cɛ bɔnɔ́mɛ a bɔ́ tɛ ŋáá mána e bikúlú a bɛ́ ŋa fáakɔna ;
aáná cɛ́ káá bá na taaká ci olíhe.
20 Timoté,
tétényíki bɔmbányɛ bɔkɔ ebú bó ŋo yóo cuméke,
mbá á sámbáka ne tukókó tú etémbí ne etémbí e tú ŋe núúsi olumitinine,
ne isuŋí e cí ŋo tóŋínyi omenyi a wɔ́mɔtɛ́ awɔ́ ú tɛ á bá taaká.
21 Yááŋa anyía bɔ́mɔtɛ́ baacɔ ŋa bɔ́ bɛ́táá báyɛ bá bɔ́ŋa na nyɛnamá nyí omenyi eényí ;
buátɛ́ bɔkɔ bá tɛ ŋá háná ebú lumitinine bɛsana ebí tu ŋé sú lumitinine.
Bandɔ́mɛsɛ́ á banɔ́ sayábákɛ́naʼo !