Beékúnyi eékúnyi cá bɛfala
4
1 Elilé ŋa kɔɔna bɔmbányɛ bɔmbányɛ yɛ́sɛ :
Ɔ mɔɔ́sɛ́ me elime,
baacɔ a bɔ́mɔtɛ́ ká bɔ́ bɛ́yuátáka olumitinine anyía bábɔ́ lɔ́kɔ́mákɛ́na ne bililé bí munéŋéne ne nyiékúnyi e nyí ŋe húle ná *bɛɛbɛ́ bí bililé.
2 Baacɔ bá tɔbɛ́mbɛ túfendí ké bú beébe nenisiki ohónyí ne munéŋéne ;
tɔcɔɔ́cɔ́ tɔ́ ɛtɛ́má tɔ́ baacɔ eébé áŋa túweékúnénú.
3 Aáná bé ŋe bú eékúnyi anyía nyɛtɔ́nɔ́ áŋa nyɛɛbɛ́,
ta ɔnyíá bɛnyɛ́ma bɛ́ ɔnyíá a bɛ́mɔtɛ́,
yiíyi anyía Bandɔ́mɛsɛ́ ŋeé kétíki bɛnyɛ́ma bɛ́ ɔnyíá eébí anyía belumitinine *Kilís ;
beébe eébé bé ŋe bú menyi taaká,
bé biíbi nyíáka,
bé iínjíékine Bandɔ́mɛsɛ́ bitéŋíti.
4 Yááŋa anyía bɛnyɛ́ma bikime abɛ́ Bandɔ́mɛsɛ́ ŋeé kétíki áŋa bɛmbányɛ,
bɔkɔ bú owoomboko tɛ á bá hɔ́á ;
aáná ɔɔcɔ á nyɛmána wu ɔnyíáka bɔkɔ bukime,
wu iínjíékine Bandɔ́mɛsɛ́ bitéŋíti.
5 Na Bɛsana abɛ́ Bandɔ́mɛsɛ́ ŋaá kɔ́ɔnaka na ɔbɛ́cɔ́kɔ́lɛ́na ewú tu ŋe sú wuúci bɛ́cɔ́kɔ́lɛ́na ŋeé fúúmínyi bɛnyɛ́ma bɛ́ ɔnyíá bikime.
Ambányɛ yɛ́ munyiɔnɔ yí Yésus Kilís
6 Eékúnyíki bɔnɔ́ɔnyia bé olumitinine bɛsana eébí,
aáná ɔ kɔ́ɔ́ bá ambányɛ yɛ́ munyiɔnɔ yí Yésus *Kilís,
á kɔmaka a Bɛsana bɛ́ Bandɔ́mɛsɛ́ ebí tu ŋe sú lumitinine,
ɔlata na ambányɛ yí nyiékúnyi anyɛ́ ɔ ŋɔɔ́ látɛ́na.
7 Mbá e kine ɔbɛ́lɔ́kɔ́ma tuhélúméke tɔ́ buáyá e tú ti ŋé bíléníne Bandɔ́mɛsɛ́.
Cɔbá ne buúse o obíínjie o olíhe háyɛ Bandɔ́mɛsɛ́ ŋeé léne.
8 Obíínjie o onyíényi cɛɛ́tɔ anyía ciá kɛndaka ŋɔ yɔɔ́lɔ nyɛnamá ;
mbá nyibíínjie anyɛ́ ɔɔcɔ ŋe bíínjie o olíhe háyɛ Bandɔ́mɛsɛ́ ŋeé léne ŋɔ yɔɔ́lɔ buéŋí ɔ ɔhɔla,
anyía ɔɔcɔ oócí kéé líhéke bɔmbányɛ o olíhe ú aámbáya,
yó líhéke tɔ́na bɔmbányɛ ɔɔ́ yɔɔ́sɔɔ́sɔ yí olíhe yí ekúlú ekime.
9 Buhúnyi eébú áŋa taaká ci buhúnyi,
bá ŋáá nyɛmána bé o buúbu háya ɔ ɔtɛ́má noómi.
10 Yááŋa anyía tu ŋe sú bíyébi,
tú bɛ́kákátáka ɔ ɔnyiɔ buólí anyía tú ma sɔ́ háya mɔŋɔlɛ́ ná Bandɔ́mɛsɛ́ a wáŋa wɔɔ́sɔ,
wuúci Munohi baacɔ bekime,
ª hɔlákáhɔ́láka mu eebe a bá ŋa bɔ́ háya mɔŋɔlɛ́ né Kilís.
11 Bɛsana eébí ɔ́ɔ nyɛmána wu owoónyísíkínyi ɔlaana baacɔ,
é beébe eékúnyíki.
12 Ɔɔcɔ tɛ ɔ bábɛ́na anyía ɔ waánáŋa ɔɔ́nɔmbɔ́ ;
asana ɔ́mɔtɛ́,
bámɔ́kɔ́nɛ́na nuketi enú belumitinine Kilís ŋa bɔ́ látɛ́na ɔ ɔtáŋa awɔ́ ɔ ŋɔɔ́ táŋa,
o olíhe ewú o ŋoó líhe,
e nyiléne enyí o ŋoó léne bɔsɔ́ɔ́kɔ́,
a mɔŋɔlɛ́ amá ɔ ŋɔɔ́ háya ná Bandɔ́mɛsɛ́,
ne ofúúméne ewú o ŋoó fúúméne.
13 Ɔ ɔkɔɔ́háma a buɔ́sɛ́ abɔ́ ɛ ká mɛ faaya,
bíínjie na makɛ́nda ɔ ɔfana Ciɔɔ́ŋɛ́ cɛ́ Bandɔ́mɛsɛ́ haála ahá baacɔ á bɔ́ŋa,
ª beébe lébéke,
é beébe eékúnyíki.
14 Atɛ bábɛ́na yaála yí nuubo yɛ́ Bandɔ́mɛsɛ́,
yiíyi yɛ́ ŋa lɛcana ne ekúlú eyí *behémúnyi bɛsana bá Bandɔ́mɛsɛ́ ŋa bɔ́ kɔ́ɔnaka yɔ́ɔ́wɔ asana ne ekúlú eyí bekendisi hiɔ́bɔ hí belumitinine ŋa bɔ́ ɔ táláka aabá a aatɔ́ ɔ ɔ kuɔŋɔ́ sáyabɛna.ª
15 Bíínjie ɔ ɔlátɛ́na bɛsana eébí ne úúwe ɔtɛ́má okime,
aáná baacɔ bekime ká bɔ́ lɛca anyía ɔ ŋɔɔ́ kɔma e buólí bɔ́ Bandɔ́mɛsɛ́ noómi.
16 Limíne ne ciéhíhi,
bíkékényíki o otúme oówo o olíhe ú bɛ́muátá ɔ ɔkɔɔ́háma a bɛsana ebí o ŋoó weékúnyi baacɔ.
A nyɛkɛlaka eényí o kóó nohiki baacɔ a bá ŋa bɔ́ lɔ́kɔ́ma bɛsana abɛ́ ɔ ŋɔɔ́ kɔɔna ;
kuɔŋɔ́ bɛ́muátá wɔ́ nɔhɔ tɔ́na.