3
1 E elime,
tu tɛ ɔ́mɔ sɔ́ bá tú ɔ háná céényi ɔtáta omenyi anyána nú ŋe nú líhe ;
yaátɛ́ asana túɔ lɛca bɔmbányɛ anyía túásɔ́ lɔ́bɔ basɔ́ bímuócí a bálɛ́ka cɛ Atɛ́na.
2 Híáná tu ŋa sɔ́ tɔ́má Timoté anyía wá banɔ́ ɔɔ́lɔ́kɔ,
u banɔ́ kíndísíki ɛtɛ́má o olumitinine noómi.
Wáŋa uusú onyíinyí u buólí,
wuúci munyiɔnɔ mɔ Bandɔ́mɛsɛ́;
ª u ŋe húlinyi baacɔ Ambányɛ yɛ́ Ɛsɔ́ma a yɛ́ ŋa lɛ́ca Yésus Kilís.
3 Aáná ta ɔɔcɔ ɔmɔtɛ́ aá banɔ́ tɛ káá nákamɛna muuyé.
Nu ŋe nú ményi banɔ́ bɛ́muátá bɔmbányɛ bɔmbányɛ anyía Bandɔ́mɛsɛ́ ŋe lúmitine anyía muuyé o oofine e úúsú olíhe,
basɔ́ belumitinine Yésus.
4 Yááŋa anyía,
ekúlú ayɛ́ tu ŋa sɔ́ bá aanɔ́ a maabána,
tu ŋa sɔ́ banɔ́ óókísíki anyía tu ká sɔ́ lɛ́caka muuyé ;
híáná bú ŋa bɛ́kɛ́láka,
banɔ́ bɛ́muátá nu ŋe nú ményi.
5 Buátɛ́ bɔkɔ ɛ ŋaá mɛ tɔ́má Timoté anyía wé menyí anyána úúnú olumitinine áŋa,
anyía ɛ tɛ ɔ́mɔ́ bá wu ɔ háná céényi ɔtáta omenyi bɛsana eébí.
Ɛ ŋaá mɛ bá yémi líkíméke anyía Sátan áŋa wu ɔ banɔ́ kɔ́kɔnaka,
búásɔ́ buólí búɔ́ bɛ́cáŋa bú nubókó.
6 Mbá aámbáya,
ta híáná ayɛ́ Timoté maá ka hálɔ́mɔ́na aaha,
weé húlúkúne náánɔ́,
ª ú maá basɔ́ bíkétíkínyi bɛsana a bɛ́ ŋaá basɔ́ íínjie obíléne ɛ ɛtɛ́má a asana ne úúnú olumitinine ne nulénéne enú nu ŋe nú lénéne.
Ú maá basɔ́ láákɛna ɔsɛ nu ŋa nɔ́ basɔ́ bɛ́táá ne nulénéne ɛ ɛtɛ́má bikúlú bikime ;
ɔsɛ nu ŋa nɔ́ aamba ɔkɔɔ́ basɔ́ téŋíti,
bɔkɔ búmɔtɛ́ háyɛ basɔ́ tɔ́na tu ŋa sɔ́ aamba ɔkɔɔ́ banɔ́ téŋíti.
7 Yaátɛ́ asana,
ta yɛ́ cáŋa á bá muasɔ́ muuyé ne úúsú ɔtɛ́má ɔnua a yáánɔ́ asana,
benyíinyí,
tu ŋa sɔ́ bɔ́ŋɔ makɛ́nda ɛ ɛtɛ́má.
Yááŋa taaká anyía úúnú olumitinine ú ŋaá basɔ́ kíndisi ɛtɛ́má.
8 Ɛ́ɛhɛ́ nú ma háná anɔ́ basɔ́ hélúmúnyi ɛtɛ́má aámbáya,
anyía nú me nú bíínjie na makɛ́nda ɔ ɔlátɛ́na Otéŋí a Waáŋá.
9 Nyɛnamá nyí bitéŋíti bɛ́ yaátɛ́ aná tua sɔ́ŋa tú owiínjíékíne Bandɔ́mɛsɛ́ a yáánɔ́ asana o obíléne okime awɔ́ nu ŋa nɔ́ basɔ́ iínjie eéyé e buúse e ?
10 Ne nebutúé na nabuɔ́sɛ́ tu ŋe sú wuúci bɛ́cɔ́kɔ́lɛ́na,
tu tɛ tɔmbɔ,
anyía wé lumítíne anyía tú ka sɔ́ banɔ́ téŋíti basɔ́ bɛ́muátá,
túɔ́ banɔ́ eékúnyíki bɛsana ebí nu ti ŋé nú menyi a asana ne úúnú olumitinine.
11 Ɛ́ɛhɛ́ tu ŋa sɔ́ bɛ́cɔ́kɔ́lɛ́na Síkíne Bandɔ́mɛsɛ́ wuúci bɛ́muátá,
tu bɛ́cɔ́kɔ́lɛ́na Otéŋí a Waáŋá Yésus anyía bá basɔ́ tóŋínyi ohónyí wú ɔfaaya náánɔ́.
12 Otéŋí a Waáŋá á banɔ́ sólínyínyi nulénéne enú nu ŋe nú lénéne banɔ́ na banɔ́,
nu lénéke tɔ́na baacɔ bekime háyɛ núásɔ́ nulénéne anɔ́ tu ŋa sɔ́ banɔ́ léne.
13 Aáná u kéé kíndísíki cíínú ɛtɛ́má anyía núánɔ́ bámɔ́kɔ́na befúúménénú tɛ́ka na hɛkɔma eé buúse bú Síkíne Bandɔ́mɛsɛ́,
ekúlú eyí Otéŋí a Waáŋá Yésus ká ka hálɔ́mɔ́na ɔlɔŋɔ na bááyɛ́ baacɔ bekime.ª