Buólí bɔ́ Bandɔ́mɛsɛ́ ebú Bóol ŋɔɔ́ nyiɔkɔ a Tɛsaloníke
2
1 Baláamɛ,
yááŋa anyía nu ŋe nú menyi bɔmbányɛ banɔ́ bɛ́muátá anyía nyíásɔ́ nyɛkaáháma náánɔ́ tɛ ɔ́mɔ́ bá etémbí.
2 Nu menyukune tɔ́na anyía bá ŋa cáŋa á basɔ́ ɔɔmbɔ́náka a bálɛ́ka ci Filibí;
ª túɔ́ lɔ́kɔ́máka muuyé.
Ta híáná,
ayɛ́ ba-basɔ́-nuusi ŋa bɔ́ bá beéŋí,
Bandɔ́mɛsɛ́ ŋaá basɔ́ iínjíé makɛ́nda ma ɔ banɔ́ húlikinyi yááyɛ́ Ambányɛ yɛ́ Ɛsɔ́ma.
3 Ambányɛ yɛ́ Ɛsɔ́ma ayɛ́ tú ŋa sɔ́ bá tuesú húlikinyi baacɔ bekime tɛ ɔ́mɔ́ bá nyɛnana,
yɛ́ tɛ ɔ́mɔ́ bá ta asana yɛ́ mɔnyɔ́kɔ́lɔ́,
te yí munéŋéne.ª
4 Mbá tu naŋa tuesú húlikinyi baacɔ hú bɛsana abɛ́ Bandɔ́mɛsɛ́ ŋe léne.
Bandɔ́mɛsɛ́ ŋá lɛ́cáka anyía tua sɔ́ŋa baacɔ bá mɔŋɔlɛ́,
yɔ́ basɔ́ cúmeke yááyɛ́ Ambányɛ yɛ́ Ɛsɔ́ma,
anyía túésú yiíyi hulíki,
tɛ́ cáŋa o obílénékíne baacɔ mbá,
o bíléníne Bandɔ́mɛsɛ́,
wuúci u ŋe ményi cíísú ɛtɛ́má.
5 Nu ŋe nú ményi bɔmbányɛ anyía ta buɔ́sɛ́ tu tɛ ŋá sɔ́ kɔ́ɔna asana te yí munéŋéne,
ta yɛ́ ɛŋɔŋɔ,
ta yɛ́ ɔ basɔ́ iínjie bɔkɔ a búmɔtɛ́ ;
ta Bandɔ́mɛsɛ́ bɛ́muátá ŋe ményi aáná.
6 Tu tɛ ɔ́mɔ sɔ́ aamba ta buɔ́sɛ́ anyía ta banɔ́,
ta baacɔ bé etémbí á basɔ́ iínjíékíne nuúmi.
7 Tu ŋa sɔ́ banɔ́ tóŋínyi búásɔ́ bɔɔcɔ,
ª basɔ́ baacɔ bá ɛndɔ́ma bé Kilís,
mbá tu ŋe sú bílóósi ɔ ɔmɛsɛ́,
túó límine mbuumu aanɔ́ ɛ ɛkatɛ́katɛ́ háyɛ iinyí ŋe sókóbi bááyɛ́ baáná.ª
8 Tu ŋa sɔ́ banɔ́ lénéké buéŋí,
buátɛ́ bɔkɔ tu ŋa sɔ́ lɛca bɔmbányɛ ɔ ɔ banɔ́ húlinyi Ambányɛ yɛ́ Ɛsɔ́ma yɛ́ Bandɔ́mɛsɛ́,
túɔ́ bámɔ́kɔ́na hoóhi ne owiínjie úúsú olíhe a yáánɔ́ asana.
Ánɔ lɛcá,
tu ŋa sɔ́ banɔ́ lénéké buéŋí ɔ ɔhɔla.
9 Baláamɛ,
tɛ́ka nua núánáŋa ɔ ɔbɛ́táá na muasɔ́ muuyé ne buólí abɔ́ tu ŋá sɔ́ bá tuasɔ́ nyíɔkɔ ne nebutúé na nabuɔ́sɛ́ anyía tu ti yébi ɔɔcɔ ɔmɔtɛ́ aá banɔ́ a asana na bɛnyɛ́ma bɛ́ ɔnyíá e ?
Yaátɛ́ ekúlú eéyé tu ŋa sɔ́ banɔ́ húlíkínyi ne uúsú ɔtɛ́má okime Ambányɛ yɛ́ Ɛsɔ́ma e yí ŋeé húle ná Bandɔ́mɛsɛ́.
10 Nu ŋe nú ményi bɔmbányɛ bɔmbányɛ,
ta Bandɔ́mɛsɛ́ áyá,
anyía úúsú olíhe aanɔ́ ɛ ɛkatɛ́katɛ́,
banɔ́ belumitinine,
ŋaá bá ɔmbányɛ,
wuúci ɔtálɛ́mánánɔ́,
tɛ́ka na hɛkɔma a hɛ́mɔtɛ́.
11 Nu menyukune tɔ́na anyía tu ŋa sɔ́ ɔ́ɔ́lɔ́kɔ́ ɔɔcɔ okime aá banɔ́ háyɛ síkíne cɛ baáná ŋɔ yɔ́ɔ́lɔ bááyɛ́ baáná bá bɛ́muátá.
12 Basɔ́,
tu ŋa sɔ́ bá tuasɔ́ banɔ́ kíndísíki ɛtɛ́má,
tu banɔ́ bɛ́cɔ́kɔ́lɔ́kɛ́nɛ́na Bandɔ́mɛsɛ́ bikúlú bikime anyía núénú líhéke háyɛ ú ŋé léne,
mbá wuúci ú ŋaá banɔ́ lɔ́ŋɔ anyía núénú hiíte nuafa na a búáyɛ́ Butéŋí na a núáyɛ́ nuúmi.
13 Yááŋa anyía tu ŋe sú íínjie Bandɔ́mɛsɛ́ bitéŋíti bikúlú bikime a asana eeye tɔ́na :
Ekúlú ayɛ́ tu ŋa sɔ́ banɔ́ húlíkínyí Bɛsana bɛ́ Bandɔ́mɛsɛ́,
nu ŋe nú biíbi káhá bɔmbányɛ e cíínú ɛtɛ́má háyɛ taaká cɛ́ bɛsana e bí ŋe húle ná Bandɔ́mɛsɛ́,
tɛ́ cáŋa háyɛ e bí ŋe húle ná baacɔ.
Híáná bɛ́áŋa taaká taaká Bɛsana bɛ́ Bandɔ́mɛsɛ́.
Bɛsana eébí ŋaá banɔ́ íínjie makɛ́nda ɛ ɛtɛ́má,
banɔ́ belumitinine.
14 Baláamɛ,
nu ŋa nɔ́ hɔ́á tuɔ́bɔ tú belumitinine Bandɔ́mɛsɛ́ tú iisí ci *Yuté a tɔ́ ŋaá hákɛ́ná mɔŋɔlɛ́ né Yésus *Kilís.
*Besuif ŋe bú tuútu tékéséke.
Aámbáya báánɔ́ baacɔ ŋa bɔ́ banɔ́ tékése tɔ́na bɔkɔ búmɔtɛ́.ª
15 Besuif a bɔ́mɔtɛ́ eébé ŋa bɔ́ ɔ́ɔ́nɔ́kɔ́ *behémúnyi bɛsana bá Bandɔ́mɛsɛ́ bá buáyá ;
e elime eécí a bɔ́mɔtɛ́ ŋa bɔ́ ɔ́ɔ́nɔ́kɔ́ Yésus,
ɔ mɔɔ́sɛ́ eeme a bɔ́mɔtɛ́ tɔ́na ŋa bɔ́ basɔ́ tékése.
ª Bá ŋa bɔ́ kɛ́la bɛsana e bí ti ŋéé bíléníne Bandɔ́mɛsɛ́,
bá bɔ́ŋa beliŋine bá baacɔ bekime.
16 Bá ŋá sɛ́ bábɔ́ basɔ́ koti ohulinyi baacɔ a bá tɛ ábɔ́ bá Besuif Bɛsana bɛ́ Bandɔ́mɛsɛ́,
biíbi bíáŋa bí o beébe nohiki.
Híáná bá ma háná ábɔ́ kɛla bɔɔbɛ́ e bú mo nyíóyísínyi ɔmbana ú maabɛ́ me etémbí amá bá naŋa bábɔ́ kɛ́láka.
* Mbá e elime,
Bandɔ́mɛsɛ́ meé beébe lóbísíkínyi.
Bóol ŋa yáamba ɔkɔlɛ́cɛtɔ́na belumitinine
17 Baláamɛ,
a yáásɔ́ aháŋá,
ekúlú ayɛ́ tu ŋa sɔ́ aálɔ́náná na banɔ́ ne eése a yɛ́mɔtɛ́ ekúlú,
tu tɛ háná lɛcana,
tu ŋa sɔ́ bá tuasɔ́ banɔ́ bɛ́tááka ɔ ɔtɛ́má noómi.
Tu ŋa sɔ́ bá tuasɔ́ bɛ́tááka buéŋí anyía tu ká sɔ́ faáya ɔ ɔkɔɔ́ banɔ́ lɛca.
18 Yááŋa anyía tu ŋa sɔ́ bá tuesú lénéke ɔkɔɔ́ banɔ́ lɛca.
Yaŋɔ́ bɛ́muátá Bóol,
ɛ ŋaá mɛ bɛ́kánáka bikúlú biéŋí ɔfaaya náánɔ́,
mbá *Sátan ŋa bɛ́kɛ́ŋɛ́lɛ́ákána o ohónyí.
19 Aá taaká,
tu ŋe sú lénéke ɔkɔɔ́ banɔ́ lɛca aáná,
anyía banɔ́ tɔ́na nu ŋa nɔ́ kɛ́la anyía tua sɔ́ŋa tú ɔmɔ́ŋɔluaka na mɔŋɔlɛ́,
ne obíléne,
ne nuúmi eé buúse bú Otéŋí a Waáŋá a nyíáyɛ́ nyɛkahálɔ́mɔ́na.
20 Taaká,
tua sɔ́ŋa ne nuúmi,
tu bílénéke anyía yáánɔ́ asana.