Nufule nú buúse enú Bóol ŋɔ yɔɔ́ŋɔ́kɛ́ná belumitinine bá
Tɛsaloníke
1
1 Yaŋɔ́ Bóol,
ɛ ŋa mɛ́ ɔɔ́ŋɔ nufule eenu.
Tua sɔ́ŋa ne Sílas ne Timoté ;
ɛ ŋa mɛ́ banɔ́ nuúnu ɔ́ɔ́ŋɛ́na,
banɔ́ hiɔ́bɔ hí belumitinine *Yésus hɛ́ bálɛ́ka cɛ Tɛsaloníke.
ª Nua nɔ́ŋa baacɔ bé Síkíne *Bandɔ́mɛsɛ́,
banɔ́ tɔ́na bé Otéŋí a Waáŋá Yésus Kilís.
Bandɔ́mɛsɛ́ á banɔ́ sáyábɛ́na,
wá banɔ́ íínjíé mbuumu ɛ ɛtɛ́má noómi.
Bóol ŋeé yiínjie Bandɔ́mɛsɛ́ bitéŋíti
2 Tu naŋa tuesú iínjíékíne Bandɔ́mɛsɛ́ bitéŋíti eenú eé buúse,
banɔ́ bekime,
ekúlú ekime eyí tu ŋe sú wuúci bɛ́cɔ́kɔ́lɛ́na.
3 Yááŋa anyía tu ŋa sɔ́ bɛ́táá búánɔ́ buólí ekúlú ekime ayɛ́ tu ŋa sɔ́ bɛ́cɔ́kɔ́lɛ́na ciasɔ́ Síkíne Bandɔ́mɛsɛ́,
anyía nu ŋe nú lumitinine,
nu lɛcaka muuyé o o wuúci léne ;
tu ŋa sɔ́ bɛ́táá tɔ́na háyɛ nú me nú óónyísínyi maanɔ́ mɔŋɔlɛ́ né Otéŋí a Waáŋá Yésus *Kilís.ª
4 Benyíinyí,
tu ŋe sú ményi anyía Bandɔ́mɛsɛ́ ŋaá banɔ́ lénéké,
yɔ́ banɔ́ lɔ́tɔkɔ,
anyía nuánɔ́ bámɔ́kɔ́nɛ́na bááyɛ́ baacɔ.
5 Tu ŋe sú ményi aáná,
anyía tu tɛ ɔ́mɔ sɔ́ banɔ́ húlikinyi Ambányɛ yɛ́ Ɛsɔ́ma hú ne nyuúté,
mbá a makɛ́nda me *Efúúménénú yí Elilé,
tu menyukune anyía bɛsana eébí áŋa taaká.
Banɔ́ bɛ́muátá,
nu ŋe nú ményi yáásɔ́ ambányɛ yɛ́ nyɛbɛ́kɛ́lɛ́na,
ekúlú ayɛ́ tu ŋa sɔ́ bá aanɔ́ ɛ ɛkatɛ́katɛ́ a asana na búánɔ́ bɔmbányɛ.
6 Nu ŋa nɔ́ basɔ́ kétíkínyínyi,
núo kétikinyinyi tɔ́na Otéŋí a Waáŋá Yésus.
Ekúlú eyí nu ŋe nú lumitinine,
nu ŋa nɔ́ lɛcá muuyé buéŋí ;
ta híáná,
nu ŋa nɔ́ lɔ́kɔ́máka bɛsana bɛ́ Bandɔ́mɛsɛ́ ne obíléne ewú ú ŋe húle né Efúúménénú yí Elilé.
7 Yaátɛ́ asana nua núáŋa hibílícínyínyí ehí belumitinine Kilís bekime na bá Masɛtuánª na bá Akayíª ábɔ́ nyɛmána bá ɔlátáka.
8 Yááŋa anyía baacɔ bekime á bɛhaála bikimeª á bɔ́áŋa o omenyi Ambányɛ yɛ́ Ɛsɔ́ma e yí ŋe húle náánɔ́,
tɛ́ cáŋa hú na a Masɛtuán na a Akayí.
Mbá anyía baacɔ eébé bekime ŋa bɔ́ lɔ́kɔ́máka bé bíketiki anyána nu ŋa nɔ́ háya mɔŋɔlɛ́ ná Bandɔ́mɛsɛ́.
Bú tɛ ŋɔ́ yɔɔ́lɔ anyía túá háná esú bíketiki aaha.
9 Beébe bɛ́muátá bekime ŋe bú bíkétíkínyi baacɔ na anyána nu ŋa nɔ́ basɔ́ káha,
ekúlú ayɛ́ tu ŋga sɔ́ háma náánɔ́ na anyána nu ŋe nú kínéke onyemi bɛbɔ́kɔ́bɔ́kɔ,
núɔ bɛ́kɔ́ŋɔ́nákɛ́na ɛtɛ́má o onyemi taaká cɛ Bandɔ́mɛsɛ́ a wáŋa wɔɔ́sɔ.
10 Bé ŋe bú ményi tɔ́na anyía nu ŋa nɔ́ táta nyɛkahálɔ́mɔ́na nyí Yésus,
Ɔɔ́nɔ́ u Bandɔ́mɛsɛ́,
weé húlúkúne haála ahɛ́ Bandɔ́mɛsɛ́ áŋa.
Wuúci Bandɔ́mɛsɛ́ ŋeé héényi e biwéewé,
anyía wá basɔ́ kétúnyíki basɔ́ bekime a nyɛkála nyɛ́ Bandɔ́mɛsɛ́ a nyɛ́ ŋa fáakɔna.ª