Nyɛnamá nyí olíhe e nyí ŋe bíléníne Bandɔ́mɛsɛ́
4
1 Ɛ ŋa mɛ́ aamba okuenyinyi ɔ banɔ́ láana,
banɔ́ báámɛ benyíinyí,
anyía tu ŋa sɔ́ banɔ́ eékúnyíkí anyána nuánɔ́ nyɛ́mana nu olíhéke a nyɛnamá anyɛ́ nua nɔ́ŋa nu obílénékíne Bandɔ́mɛsɛ́.
Ɛ́ɛ,
yááŋa taaká anyía nua nuáŋa o olíhe aáná.
Mbá aámbáya tu ŋa sɔ́ banɔ́ báta,
tu tɛ tɔmbɔ,
eé nyiínyi nyí Yésus anyía anɔ́ cɔbá ne buúse o olíhe híáná ɔ ɔhɔla.
2 Nú ŋe nú ményi bɛsana abɛ́ tu ŋa sɔ́ banɔ́ éékúnyíkí a asana na makɛ́nda me Yésus.
3 Nyiléne nyí Bandɔ́mɛsɛ́ áŋa anyía núánɔ́ bámɔ́kɔ́na befúúménénú eéyé eé buúse,
ɛ́cɛ anyía núánɔ́ nyɛ́ánáka ɛnjɔkɔ́nɔ́nɔ.
4 Ɔɔcɔ okime aá banɔ́ é menyí otimbie bɔmbányɛ nyíáyɛ́ nyɛtɔ́nɔ́ ne e bufúúménénú ne e nuúmi noómi.ª
5 Nɔtɛ bɛ́nyɛ́ána anyía ibíkéti a cɛɛbɛ́ á banɔ́ kéndísíki.
Be-ti-menyí Bandɔ́mɛsɛ́ bá naŋa bábɔ́ kɛlaka aáná.ª
6 Ta ɔɔcɔ ɔmɔtɛ́ aá banɔ́ tɛ aambɛ́na sɔ́ɔ́kɔ́ asana buúse bukime a asana eéyé,
anyía Bandɔ́mɛsɛ́ kéé yébíki bɔɔbɛ́ baacɔ a bá ŋa bɔ́ kɛla aáná ;
tu na maá sɔ́ banɔ́ oókísíki asana eéyé bɔmbányɛ bɔmbányɛ.
7 Yááŋa anyía Bandɔ́mɛsɛ́ ŋaá basɔ́ lɔ́ŋɔ́kɔ́ ;
tɛ́ cáŋa a asana yɛ́ mɔnyɔ́kɔ́lɔ́,
mbá a asana yɛ́ ɔbá befúúménénú eéyé eé buúse.
8 Yaátɛ́ asana yááŋa anyía ɔɔcɔ é kiné ɔlátɛ́na esúŋe eécé,
tɛ́ cáŋa hú ɔɔcɔ u ŋa bábɛ́na,
mbá u ŋa bábɛ́na Bandɔ́mɛsɛ́,
Mu-banɔ́-iínjíé *Efúúménénú yí Elilé.
9 A asana ayɛ́ nu ŋe nú léne bɔsɔ́ɔ́kɔ́ belumitinine,
bú tɛ ŋɔ́ yɔ́ɔ́lɔ tɔ́na anyía yá háná ámɛ banɔ́ ɔ́ɔ́ŋɔ́kɛ́na,
ananyía Bandɔ́mɛsɛ́ na maá banɔ́ eékúnyíki anyía nuénú lénékénéne.
10 Aá taaká nua nuáŋa o oléne benyíinyí bé olumitinine bekime bá Masɛtuán ikime.
Mbá ta híáná,
ánɔ cɔbá ne buúse ɔ ɔkɛla aáná ɔ ɔhɔla.
11 Ánɔ aambáka ohónyí okime wú olíhéke e mbuumu noómi,
nu látákɛ́na hú bíánɔ́ bɛsana bɛ́ bɛ́muátá ;
nu nyiɔkɔ buólí na cáánɔ́ aabá cá bɛ́muátá,
háyɛ tu na maá sɔ́ cáŋa ɔ banɔ́ láakɛna.
12 Aáná be-ti-lumítíníne Yésus ké búle abɔ́ banɔ́ kéké.
Nɔtɛ lɛ́báka ta bɔkɔ ná ɔɔcɔ.
Otéŋí a Waáŋá Yésus ká ka hálɔ́mɔ́na
13 Buamɛ eé,
tu ŋa sɔ́ aamba anyía núénú ményi bɔmbányɛ asana a yɛ́ ŋa lɛ́ca eebe e bé ne meé bú wéékúne,
anyía ɛtɛ́má tɛ banɔ́ nuá háyɛ cɛ́ ŋaá nua baacɔ bé etémbí a bá tɛ ábɔ́ bá na mɔŋɔlɛ́ ɔ yɔɔ́sɔɔ́sɔ yí olíhe yí ekúlú ekime.
14 Tu ŋe sú lúmitinine anyía Yésus ŋeé wé,
yɔ́ háanyua e biwéewé.
Yaátɛ́ asana énu menyí tɔ́na anyía Bandɔ́mɛsɛ́ kéé héényutune baacɔ e biwéewé anyía bábɔ́ bámɔ́kɔ́na ne Yésus,
beébe eébé bé ŋe bú lúmitekinine ɛ́cɛ bé ti ŋe bú wéékúne.
15 Asana ayɛ́ túɔ́ cɔba ɔ ɔ banɔ́ laana aámbáya áŋa anyía Otéŋí a Waáŋá ŋe yéékúnyíkí baacɔ anyía buɔ́sɛ́ abɔ́ u ká ka hálɔ́mɔ́na,
basɔ́ abá tu ká sɔ́ bá tua suanaŋa bɔɔ́sɔ,
tú tɛ ká sɔ́ cáŋacaŋa ɔhatɔna na bɔsɔ́ɔ́kɔ́ e bé ŋe bú wéékúné.
16 Buɔ́sɛ́ eébú okelú káá bɛ́átábɔ́tɔ́na,
mutéŋínyi *bililé bɛ́ masɔ́ma bɛ́ Bandɔ́mɛsɛ́ yɔ́ táŋɛ́ta okelú ɔ ɔmuaná,
ɛsɛ́bɛ́ cɛ Bandɔ́mɛsɛ́ cɛ́ɔ táŋɛ́ta ;
aáná Otéŋí a Waáŋá kéé húle ɔ Ɔmuaná,
baacɔ bekime e bé ŋe bú wéékúné,
beébe e nyimónjóló ne *Kilís,
ká bɔ́ cáŋacaŋa ɔhaanyuaka e biwéewé.
17 E elime eécí,
Bandɔ́mɛsɛ́ káá basɔ́ bándáka basɔ́ ɔ bɔɔ́sɔ bekime ɔlɔŋɔ na bɔsɔ́ɔ́kɔ́ eébé a bɛlɔndɔ́ noómi ;
aáná tu ká ká sɔ́ ɔ́ɔ́ndɛ́mákánána ne Otéŋí a Waáŋá ɔ ɔmuaná,
túɔ́ bá ɔlɔŋɔ ne Otéŋí haála ahá wáŋa ekúlú ekime.
18 Yaátɛ́ asana énu kíndísíkínyínyi banɔ́ na banɔ́ a bɛsana eébí.