3
1 Aámbáya,
banɔ́ báámɛ benyíinyí bé olumitinine,
énu bílénéke buéŋí anyía nua nuáŋa e nyimónjóló ne Otéŋí a Waáŋá.
Atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́
Ɛ tɛ ŋá mɛ tɔmbɔ ɔ banɔ́ ɔ́ɔ́ŋɛ́na bɛsana abɛ́ ɛ naŋa yámɛ banɔ́ ɔ́ɔ́ŋɔ́kɛ́na buáyá anyía cíínú ɛtɛ́má tɛ bɛ́nyíáka.
2 Énu bíkékényíki na bakɛla bɛsana bɛ́ mɔnyɔ́kɔ́lɔ́,
bá bɔ́ŋa ɛnyama,
bá bɛ́ácáka bɔ bɛ́ácáka.ª
3 Yááŋa anyía basɔ́ tua sɔ́ŋa baacɔ bá Bandɔ́mɛsɛ́ a bá na maá bɔ́ bɛ́ácáka taaká cɛ nyɛbɛ́áca ;
aáná tu ŋe sú wuúci nyemi na yááyɛ́ Elilé,
túɔ́ bá na bɔɔcɔ anyía tua sɔ́ŋa e nyimónjóló ne Yésus *Kilís.
Nááyá tú ma sɔ́ háya mɔŋɔlɛ́,
tɛ́ cáŋa o olíhe ú imehú,
4 yiíyi anyía yaŋɔ́ bɛ́muátá ooci maamɛ mɔŋɔlɛ́ ŋaá bá o olíhe ú imehú.
Yááŋa anyía mbɔ́kɔ baacɔ a bɔ́mɔtɛ́ ŋa bɔ́ bɛ́táá anyía bá bɔ́ŋa bɔ́ hákɛ́na mɔŋɔlɛ́ o olíhe ú imehú,
mbá anyána na yaŋɔ́ e ?
5 Yaŋɔ́ ooci ewú nu ŋe nú menyi,
bá ŋaá mɛ́ aacá ɔ mɔɔ́sɛ́ manamanyɛ́ ma nyiámɛ nyibíbíéne,
yaŋɔ́ yeéti yí *Islayɛ́l a hɛnyɛ́nɔ́ hɛ́ Bɛnsamɛ́ŋª,
taaká ci ebíényi yí Ebélé.
A asana na nyɛlátɛ́na nyí bikotí,
ya mɛ́ŋa ɔɔcɔ u Bafalisiɛ́ŋ.
6 I ŋe mí tekéséké baacɔ bá hiɔ́bɔ hí belumitinine Kilís a asana na nyíámɛ́ nyiléne nyí uúsú olumitinine e nyiwééné ;
mío líhéke tɛ́ka na hɛkɛ́bɛ́lɛ a asana na atálɛ́mánánɔ́ yí olíhe eé buúse bɔ́ Bandɔ́mɛsɛ́.
7 Ta híáná,
bɛsana eébí bikime abɛ́ ɛ ŋaá mɛ bá yamɛ́ nɔhɔkɛna,
i ŋe mí biíbi bɛ́yúátáka bikime a asana ne Kilís.
8 Aáná i ti ŋé mí biíbi lɛcá ta háyɛ bɔkɔ a búmɔtɛ́ a asana ne nyimenyinyi ne Yésus Kilís,
uumi Otéŋí a Waáŋá.
I ŋe mí lumítíne ɔbɛ́yúata bukime a yááyɛ́ asana ;
i biíbi lɛcaka i iŋetí ci tuubí ananyía mbá yámɛ hɔ́ma Kilís,
9 míɔ bámɔ́kɔ́na e nyimónjóló ne wuúci bɔmbányɛ bɔmbányɛ.
Yaŋɔ́ bɛ́muátá ɛ tɛ ŋá mɛ bɛ́táá ɔbá atálɛ́mánánɔ́ yɛ́ ɔɔcɔ a nyiámɛ nyɛlátɛ́na nyí *bikotí.
A asana ayɛ́ ɛ ŋaá mɛ háyá mɔŋɔlɛ́ né Kilís,
ɛ́ɛhɛ́ ya mɛ́ŋa atálɛ́mánánɔ́ yɛ́ ɔɔcɔ.
Bandɔ́mɛsɛ́ u ŋé télímínyi ɔɔcɔ okime awɔ́ u ŋaá háya mɔŋɔlɛ́ né Kilís atálɛ́mánánɔ́ yɛ́ ɔɔcɔ eéyé eé buúse.
10 Bɔkɔ a bɔ́ ŋaá mɛ hámɛ́na ɔ ɔtɛ́má,
buúbu ɛ ŋa mɛ́ aamba,
áŋa anyía yémi menyinyi ne Yésus,
wuúci wáŋa na makɛ́nda ma nyɛhaanyua nyí biwéewé ;
míɔ lɔ́kɔ́máka tɔ́na muuyé a ciayɛ́ iŋetí,
mbá owé mi hiite háyɛ wuúci ;
11 ɔ ɔkɛla anyía,
mbɔ́kɔ búáŋa bu ɔbɛ́kɛ́láka,
yámɛ háanyua tɔ́na nyɛhaanyua nyí biwéewé.ª
Ɔcabɛna ɔ ɔkɔɔ́háma a nyɛmana nyɛ́ ɔtɛ́tá
12 I ti ŋé mi bíkéti anyía ɛ́ maá ká mɛ háma a nyɛmana,
ta anyía ya mɛáŋa atálɛ́mánánɔ́ yɛ́ ɔɔcɔ ɔ ɔhɔla.
Mbá ɛ naŋa yámɛ bɛ́kɛ́ndákɛ́na ɔcɔba ne buúse o okohíite bɛnamá bɛ́ ɔtɛ́tá oócí,
anyía Yésus *Kilís ne meé mí hiite háyɛ uuyé ɔɔcɔ.
13 Eéʼeé,
báámɛ benyíinyí !
I ti ŋé mi bíkéti anyía ya mɛáŋa na bɛnamá eébí.
Mbá asana ɔ́mɔtɛ́ ayɛ́ ɛ ŋa mɛ́ aamba áŋa anyía ɛ tɛ háná bɛ́táá bɛsana a bɛ́kɛ́lákánɔ́ bɛ́ ciamɛ elime ;
ɛ ŋaá mɛ bɛ́kɛ́ndɛ́na ɔlɛca hú bɛsana a bɛ́áŋa eémi eé buúse.
14 Aáná ɛ ŋa mɛ́ cabɛna ɔ ɔkɔɔ́háma a nyɛmana,
ananyía yámɛ hɔ́máka bɛnamá abɛ́ Bandɔ́mɛsɛ́ ŋaá basɔ́ lɔ́ŋɔ o ohiiteke ɔ Ɔmuaná,
tɔ́ hɔlakɛna né Yésus Kilís.
15 Aá basɔ́ bekime abá tua súáŋa tɔkɔ́kɔ́sɛ́tánɔ́ tɔ́ baacɔ,
tu ŋá sɔ́ nyɛ́mana tú ɔbámɔ́kɔ́na na nyɛnamá nyɛ́ nyɛbɛ́táá eényí nyɛ́mɔtɛ́ ;
ta híáná,
mbɔ́kɔ baacɔ bé etémbí náánɔ́ ŋa bɔ́ bɛ́táá náányia,
Bandɔ́mɛsɛ́ káá banɔ́ tóŋínyi eese a asana eeye.
16 Ta yɛ́ cáŋa á bá anyána,
tu ŋa sɔ́ nyɛ́mana tú ɔcɔba ne buúse ɔlɔŋɔ ɔ́mɔtɛ́ i indélímínyínyi ecí tú ne meé sú hiite ɔ ɔkɔɔ́háma aámbáya.
17 Benyíinyí,
énu mi kétíkínyínyi banɔ́ bekime,
ánɔ látákɛ́na nyɛkɛla nyɛ́ baacɔ a bá ŋa bɔ́ bɛ́kɛ́lɛ́na háyɛ na yaŋɔ́ na baláamɛ.
18 Ɛ naŋa yámɛ banɔ́ láakɛna buáyá,
ɛ ŋa háná ámɛ hálɔ́mɔ́nɛ́na ɔ banɔ́ laana aámbáya na bɛlɛlá e eése anyía,
baacɔ beéŋí ŋa bɔ́ bɛ́kɛ́lɛ́na nyɛbɛ́kɛ́lɛ́na e nyí ŋo tóŋínyi anyía bá bɔ́ŋa beliŋine Kilís,
wuúci u ŋeé wé ɔ ɔmbásá ɔ ɔmuaná.
19 Nyíábɔ́ nyibíóndísínyi áŋa bunyímé ;
bá ŋa bɔ́ bɛ́táá hú túábɔ́ tɔɔna,
bé tuútu nyemiki i iŋetí cɛ ciabɔ́ bandɔ́mɛsɛ́;
ª aáná bɔkɔ a bɔ́ á nyɛ́mana o beébe iinjie aatɔ́ ɔlama,
eé buúbu eébú bá ŋa bɔ́ háya núábɔ́ nuúmi noómi,
bá bɛ́tááka hú bɛsana bɛ́ ɔmɛsɛ́ ooci.
20 Aá basɔ́,
búásɔ́ bunɔŋɔ áŋa ɔ Ɔmuaná,
aá haála ehé Otéŋí a Waáŋá Yésus Kilís,
muasɔ́ Munohi,
áŋa.
Tu ŋa sɔ́ táta na mɔŋɔlɛ́ mekime anyía wá ka hálɔ́mɔ́na.
21 Wuúci u káá kɛla anyía ciasɔ́ cɛɛ́tɔ cɛ mahana e cí ŋe wé á bɛ́cáŋa cɛɛ́tɔ ci nuúmi i iŋetí cɛ ciayɛ́ cɛɛ́tɔ.
U káá kɛlaka aáná a mááyɛ́ makɛ́nda e mé ŋe téŋínyi bɛnyɛ́ma bikime.