Bóol ŋeé lébe belumitinine
4
1 Yaátɛ́ asana,
báámɛ benyíinyí bá ɔtɛ́má,
énu limíne aná balatákánɔ́ bɔɔ́nɛ́nánɔ́ né Otéŋí a Waáŋá noómi.
Ɛ ŋa mɛ́ banɔ́ léne buéŋí,
yaŋɔ́ na ɛcaná cɛ ɔ banɔ́ lɛ́cɔtɔna.
Nu ŋa nɔ́ kɛla anyía yémi bílénéke buéŋí,
nu mi iínjíékíne bɔɔcɔ.
2 Ɛ ŋa mɛ́ bɛ́cɔ́kɔ́lɛ́na báámɛ benyíinyí eebe,
ne Efóti na Sɛ́ntíce,
ª anyía bá bámɔ́kɔ́na na nyɛlɔ́kɔ́mána ne Otéŋí a Waáŋá.
3 Ɔɔ́ kuɔŋɔ́ yáámɛ́ ekendinyi yí buólí,
ª ɛ ŋɔ mɛ́ ɔ bata anyía óo beébe ɔɔ́lɛ́ta a nyɛlɔ́kɔ́mána eényí ;
beénjú eébé ŋa bɔ́ núáka ɛcálɛ ɔlɔŋɔ na yaŋɔ́ e nyihulinyi nyɛ́ Ambányɛ yɛ́ Ɛsɔ́ma a baacɔ,
ta Kɛ́lɛ́maŋ áyá ɔlɔŋɔ na baacɔ bé etémbí abá tu ŋá sɔ́ nyiɔ́kɔ buólí ɔlɔŋɔ ɔ́mɔtɛ́.
Beébe eébé cáábɔ́ eénye áŋa cɔɔ́ŋɔ́kɔ́nɔ́ e nufule nú olíhe.ª
4 Énu bílénéke buéŋí ekúlú ekime né Otéŋí a Waáŋá noómi.
Ɛ ŋaá mɛ hálɔ́mɔ́nɛ́na ɔkɔɔna anyía énu bílénéke buéŋí !
5 Baacɔ bekime ŋá bɔ́ nyɛ́mana bé omenyi nyíánɔ́ nyilimíné nyí mbuumu.
Nu bɛ́tááka anyía Otéŋí a Waáŋá ŋa ka hálɔ́mɔ́kɔ́na hí aámbáya.
6 Nɔtɛ áákɛ́na ta bɔkɔ,
mbá ánɔ laakɛ́na Bandɔ́mɛsɛ́ bɛsana bikime a bɛ́ ŋa banɔ́ yébi,
nu wuúci iínjíékíne bitéŋíti ekúlú ekime eyí nu ŋe nú wuúci bɛ́cɔ́kɔ́lɛ́na.
7 Aáná mbuumu cɛ Bandɔ́mɛsɛ́ a cɛ́ ŋa hɔ́la bɛsana bikime abɛ́ baacɔ ŋa bɔ́ lɔ́kɔ́ma,
bé menyukune,
kéé tétényíki ne cíínú ɛtɛ́má ne cíínú ibíkéti e nyimónjóló ne Yésus *Kilís.
8 Aánáʼo,
báámɛ benyíinyí,
asana ayɛ́ míɔ cɔba o obíóndísínyi ɔ banɔ́ laana áŋa anyíaʼo :
Nu ŋá nɔ́ nyɛmána nú ɔbɛ́tááka e cíínú ɛtɛ́má noómi bɔkɔ bukime a búáŋa taaká,
buúbu baacɔ ŋe bú kéké,
bé buúbu nyemiki ;
nu bɛ́tááka bɔkɔ bukime a búáŋa bufúúménénú,
buúbu baacɔ ŋe bú léne bé lémbíki,
nu bɛ́tááka tɔ́na a búáŋa bɔmbányɛ,
buúbu baacɔ naŋa bébú béétíki.
9 Bɛsana abɛ́ ɛ ŋa mɛ́ banɔ́ eékúnyíki,
núó biíbi lɔ́kɔ́máka,
yémi biíbi táŋáka,
núó biíbi lɛcaka,
yémi biíbi látákɛ́na,
énu biíbi látákɛ́na ;
aáná Bandɔ́mɛsɛ́ káá bámɔ́kɔ́nɛ́na náánɔ́,
yɔ́ banɔ́ iínjíékíne ciayɛ́ mbuumu.
Bóol ŋe yíinjie belumitinine bé Filibí bitéŋíti
10 Ɛ́ɛ,
ya mɛ́ŋa háyɛ nyitíne nyí bilúŋe né Otéŋí a Waáŋá noómi anyía nu ŋá háná anɔ́ mɛ bɛ́táá e cíínú ɛtɛ́má.
Aá taaká nu naŋa nuanɔ́ mɛ bɛ́tááka buáyá mbá,
ohónyí wú o mi tóŋínyi ɔbɛ́táá oócí tɛ ɔ́mɔ́ bá.
11 Ta háyɛ ɛ ŋa mɛ́ táŋa aáná,
yɛ́ tɛ á bá anyía bɔkɔ a búmɔtɛ́ ŋaá bá búá mɛ bɛ́ámbákɛna.
Yááŋa anyíaʼo,
ɛ ŋaá mɛ áákɔ́nákɛ́ná obíléne e nyilimíné nyikime.
12 Ɛ́cɛ anyía i ŋe mí menyi olíhe te ekúlú yí mecíli,
te ekúlú yɛ́ bɛnyɛ́ma biéŋí.
Na a bɛhaála bikime na a bɔkɔ bukime i ŋeé mi hélínyi olíhe tɛ́ka ne muuyé,
ta yaŋɔ́ weécénú,
ta yaŋɔ́ ɛcaná,
ta yaŋɔ́ na bɛnyɛ́ma biéŋí,
ta yaŋɔ́ tɛ́ka ne biíbi.
13 Ya mɛ́ŋa wu oweéhíkínyi bɛsana eébí bikime a makɛ́nda me Ooci ewú u ŋeé mí kíndísi.
14 Ta híáná,
nua nɔ́ŋa bakɛlákánɔ́ ambányɛ yɛ́ asana anyía nua nɔ́ŋa behiiténú nuafa eémi e muuyé.
15 Banɔ́ baacɔ bé Filibí,
banɔ́ bɛ́muátá nu ŋe nú menyi bɔmbányɛ anyía ekúlú ayɛ́ ɛ ŋa mɛ́ hatɔ́na a Masɛtuán,
ª míɔ hɔla,
e nyitúme nyí ohulinyi baacɔ Ambányɛ yɛ́ Ɛsɔ́ma,
ta hiɔ́bɔ hí belumitinine a hɛ́mɔtɛ́ tɛ ɔ́mɔ mɛ ɔɔ́lɛ́ta na bɔkɔ,
ɛ tɛ ŋáá bá hú híínú bímuócí.
Nu ŋe nú híítéke nuafa nuéŋí ta aámɛ a bɔmbányɛ te eémi e bunyímé.
16 Hú banɔ́ bímuócí nu ŋa nɔ́ mɛ ɔɔ́lɔ́kɔ,
yaŋɔ́ a Tɛsaloníke ;
bikúlú bífendí nu ŋa nɔ́ mɛ tɔ́mɛ́na bɛnyɛ́ma a bɛ́ ŋaá bá bɛ́á mɛ bɛ́ámbákɛ́na.
17 Bu tɛ á bá anyía ɛ ŋa mɛ́ aamba anyía baacɔ é mi iínjíékíne bɛnyɛ́ma mbá,
bú ŋa hɔ́la o mi bíléníne anyía Bandɔ́mɛsɛ́ á banɔ́ námaka a nyíánɔ́ nyiínjie.
18 Ya mɛ́ŋa ɔlɛ́cákánɔ́ bɛnyɛ́ma bikime abɛ́ nu ŋa nɔ́ mɛ tɔ́mɔ́kɔ́nɛ́na ná Ɛbafólótit,
míɔ mɛnaka maatá.
Aámbáya,
ya mɛáŋa na bɛnyɛ́ma biéŋí ɔ ɔhɔla nyɛnamá a nyɛ́ ŋa mɛ bɛ́ámbɛ́na.
Bɛnyɛ́ma eébí áŋa i iŋetí cɛ *abɛ́sámbá eyí bé ŋe lúlinyi Bandɔ́mɛsɛ́,
yó yiíyi lumitine,
yí númbeke bɔmbányɛ ɔ ɔhɔla.
Ekúlú ayɛ́ yɛ́ ŋaá bata ɔ Ɔmuaná,
yí bílénékíne Bandɔ́mɛsɛ́.
19 Ciamɛ Bandɔ́mɛsɛ́ káá banɔ́ iínjíékíne bɛnyɛ́ma bikime a bɛ́ ŋa banɔ́ bɛ́ámbɛ́na,
anyía wáŋa na bɔnɔ́mɛ bú muómóomo.
U káá hɔ́lɛna né Yésus *Kilís ɔ ɔ banɔ́ biíbi iínjíékíne.
20 Nuúmi á bámɔ́kɔ́na ná ciasɔ́ Síkíne Bandɔ́mɛsɛ́ e bikúlú bikime ne bikúlú bikime,
híáná yááŋa.