Tua sɔ́ŋa a ciasɔ́ciasɔ́ e elime ci Kilís
5
1 *Kilís ŋaá basɔ́ háŋɔ́náka taaká taaká a buɔ́lɛ́ bú *bikotí,
ananyía mbá tuásɔ́ bámɔ́kɔ́na buúse bukime a ciasɔ́ciasɔ́.
Ánɔ bɛ́kɛ́ndákɛ́na aná olimine a cianɔ́cianɔ́ ekúlú ekime,
nɔtɛ bɛ́nyɛ́anɛna tɔ́na anyía ɔɔcɔ a wɔmɔtɛ́ á háná banɔ́ hélúmúnyi a buɔ́lɛ́ bɔ́ bɔkɔ a búmɔtɛ́.
2 Yaŋɔ́ Bóol,
ɛ ŋa mɛ́ banɔ́ láana anyía :
Mbɔ́kɔ nu ŋe nú lúmítíne anyía bá banɔ́ áácáka anyía nuenu fúúmékéne eé buúse bɔ́ Bandɔ́mɛsɛ́,
asana eyí Kilís ŋa kɛ́láka tɛ ŋáa banɔ́ ɔɔ́lɔ buúse bukime.
3 Ɛ ŋaá mɛ hálɔ́mɔ́nɛ́na ɔ banɔ́ laana anyía ɔɔcɔ okime awɔ́ á bɛ́áca ŋá nyɛmána wu ɔlátákɛ́na bɔmbányɛ bɔmbányɛ bikotí bí etémbí bikime.
4 Banɔ́ eebe abá nu ŋa nɔ́ bɛ́táá anyía nua nɔ́ŋa nú ɔbá bɛtálɛ́mánánɔ́ bɛ́ baacɔ eé buúse bɔ́ Bandɔ́mɛsɛ́ anyía nyɛlátɛ́na nyí bikotí bí *Besuif,
énu menyi anyía nú ma nɔ́ aálɔ́nána ne Kilís ;
yááyɛ́ yaála yí nuubo tɛ á bá yɛ́ ɔ háná bá náánɔ́.
5 A yáásɔ́ aháŋá,
tu ŋa sɔ́ tátá na mɔŋɔlɛ́ anyía makɛ́nda me *Efúúménénú yí Elilé ma kaá basɔ́ télímíkínyi bifúúménénú bɛ́ baacɔ eé buúse bɔ́ Bandɔ́mɛsɛ́ª anyía tu ŋa sɔ́ háya mɔŋɔlɛ́ né Kilís.
6 Yááŋa anyía ɔ ɔɔcɔ okime a wáŋa e nyimónjóló ne Yésus Kilís,
te wuúci ɔbɛ́ácánɔ́ te wuúci iindú,
bú ti ŋé wuúci ɔɔ́lɔ ta bɔkɔ.
Bɔkɔ a bɔ́ ŋɔ yɔɔ́lɔ áŋa hɛ́ anyía wá bá ne olumitinine ɔ ɔtɛ́má noómi ewú ú ŋe wuúci kɛla anyía wé lénéke bɔsɔ́ɔ́kɔ́.
7 Buáyá,
e nyitúme nyí úúnú olumitinine,
nu ŋa nɔ́ bá nuanɔ́ látákɛ́na bɛsana bɔmbányɛ ;
mbá aányɛ́ u ŋaá banɔ́ léké ɔcɔba ne buúse ɔ ɔlátɛ́na taaká cɛ́ bɛsana eébí e ?
8 I ŋe mí bíkéti anyía tɛ́ cáŋa Bandɔ́mɛsɛ́ u ŋa kɛ́láka aáná,
anyía i ŋe mí menyi anyía wuúci u ŋaá banɔ́ lɔ́ŋɔ́kɔ́.
9 Tɛ́ka nu ŋe nú menyi ɛnjaba a cɛ́ ŋa kɔɔna anyía :
« Meŋuŋeŋúŋé me enutisi oŋuŋe ŋe nutisi oŋuŋe a wɔtɔ́bɔ́kɔ́nɔ́ okimekime » e ? ª
10 A asana ayɛ́ tua sɔ́ŋa balatánɔ́ e nyimónjóló ne Otéŋí a Waáŋá na banɔ́,
i ŋe mí bíkéti anyía nu ŋa nɔ́ bɛ́táá bɔkɔ búmɔtɛ́ háyɛ yaŋɔ́.
Bá kɔ́ɔ́ bɔ́nɔ́sɛ́á ɔɔcɔ okime awɔ́ u ŋa kɛla anyía cíínú ɛtɛ́má á bɛ́nyíáka,
ta u cáŋa á bá nyɛnamá nyɛ́ ɔɔcɔ nyɛ́ háányɛ́.
11 Banɔ́ báámɛ benyíinyí,
a náámɛʼo :
Mbɔ́kɔ ya mɛánáŋa o oweékúnyi baacɔ anyía bá bɛ́ácáka o ofúúméne,
mbá anyíatɛ́ aná bá yánáŋa ɔ ɔcɔba ne buúse o o mi tekese e ?
Mbɔ́kɔ yiíyi aáná,
keyé owé ú Yésus ɔ ɔmbásá ɔ ɔmuaná tɛ ŋa háná e yébi ta ɔɔcɔ.
12 I ŋeé mi léne anyía baacɔ a bá ŋa bɔ́ banɔ́ túŋulinyi bá ka bɛ́ákáka,
mbɔ́kɔ bé ŋe bú léne.
13 Mbá a yáánɔ́ aháŋá,
banɔ́ báámɛ benyíinyí,
énu menyí anyía Bandɔ́mɛsɛ́ u ŋaá banɔ́ lɔ́ŋɔ́kɔ́ anyía núánɔ́ bámɔ́kɔ́na a cianɔ́cianɔ́.
Ɛ́ɛhɛ́ yááŋa anyía nuti bíkétíki anyía nua nɔ́ŋa nuo búle kɛla bɛsana a bɛ́ ŋa banɔ́ bíléníne anyía nua nɔ́ŋa a cianɔ́cianɔ́.
Mbá énu lénékénéne,
nu ɔɔ́lɔ́kɔ́nɔ́nɔ,
14 ananyía bikotí bikime ŋa ka látana o okotí eeye ɔ́mɔtɛ́ :
« Lénéke sɔ́ɔ́kɔ́ háyɛ o ŋoó léne ciɔwɔ cɛɛ́tɔ cɛ bɛ́muátá. »*
15 Mbá mbɔ́kɔ nu ŋa nɔ́ nɔ́mánána,
nu nyíákánána,
énu bíkékényíki anyía nua nɔ́ŋa nú ɔmanakanana banɔ́ na banɔ́.
16 Ɛ ŋa mɛ́ banɔ́ láana anyía ánɔ nyɛána Efúúménénú yí Elilé é kendísíki cíínú ilíhe ;
aáná nu tɛ ká háná anɔ́ kɛla bɛsana a bɛ́ ŋa banɔ́ bíléníne.
17 Bɛsana a bɛ́ ŋa hámɛ́na ɔɔcɔ ɔ ɔtɛ́má a aháŋá ne olíhe ú imehú ŋa yaálɔ́nána na bɛsana a bɛ́ ŋa hámɛ́na ɔɔcɔ ɔ ɔtɛ́má a aháŋá ne olíhe ú Elilé ;
anamá cá bɛsana eécé éfendí ŋaá nua ɛcálɛ e cíínú ɛtɛ́má noómi,
cá tɛ banɔ́ iínjíé ohónyí wú ɔkɛlaka bɔkɔ ebú nu ŋe nú léne.
18 Mbɔ́kɔ Efúúménénú yí Elilé yí ŋé kéndisi cíínú ilíhe,
nu tɛ anɔ́ bá nú ɔ háná bá e butéŋí bú bikotí noómi.
19 Bɛsana a bɛ́ ŋa hámɛ́na ɔɔcɔ ɔ ɔtɛ́má a aháŋá ne olíhe ú imehú tɛ ŋá nánɔnua ;
bɛ́áŋa anyía na ɛnjɔkɔ́nɔ́nɔ,
na mɔnyɔ́kɔ́lɔ́,
na mafala,
20 ne onyemi bɛbɔ́kɔ́bɔ́kɔ,
na ɔkɛla maŋála,
ne muliŋenene,
na ɛsáká,
na yɔɔtɛ,
ne tuliŋéliŋe,
na bɛhɔnɔnɔ,
na mɔbɛ́sálɔ́tɔ́na,
21 na yaáká yí eése,
na nyɛ-tɛ-lɔ́kɔ́mána,
ne ohíólo meluku,
ne tuuhú,
na anamánamá cé ihúényínyí cɛ́ bɛsana eébí.
Ɛ ŋa mɛ́ banɔ́ láákɛ́na,
ɛ ŋaá mɛ hálɔ́mɔ́nɛ́na ɔ ɔ banɔ́ láana ɛsɛ́ :
Baacɔ a bá ŋa bɔ́ kɛla anamá cá bɛsana eécé tɛ ká bɔ́ lɛca anyána Bandɔ́mɛsɛ́ ŋeé téŋínyi baacɔ.
22 Mbá Elilé ŋa kɛ́la anyía baacɔ ábɔ́ bá ne nulénéne,
ne obíléne,
ne mbuumu,
ne oweéhínyínyi,
na ambányɛ yɛ́ ɔtɛ́má,
na yaála yí nuubo,
bá hákɛ́na mɔŋɔlɛ́ náábɔ́,
23 ne nuhóhi,
na nyɛnɔ́mátána nyɛ́ bɛsana.
Bikotí ti ŋé líŋine anamá cá bɛsana eécé.
24 Yááŋa anyía,
baacɔ a bá bɔ́ŋa e nyimónjóló ne Yésus Kilís ne me bú ményisiki bɛsana bikime bí olíhe ú imehú e bí ŋe beébe hámɛ́na ɛ ɛtɛ́má ;
búáŋa háyɛ anyía bé me bú biíbi aátákɛ́na ɔ ɔmbásá ɔ ɔmuaná.
25 Efúúménénú yí Elilé yɛ́ ŋa basɔ́ iínjie olíhe ;
yaátɛ́ asana túásɔ́ nyɛmána tú o búle kanda a mááyɛ́ makɛ́nda noómi.
26 Túá nyɛána ɔkɛla bumálá,
ne oliŋine bɔsɔ́ɔ́kɔ́,
tu beébe aákákɛ́na tɔ́na.