6
1 Báámɛ benyíinyí,
mbɔ́kɔ yɛ́ ŋá banɔ́ hámɛ́na anyía nuánɔ́ cuánɛ́na ɔɔcɔ a wɔmɔtɛ́ waá kɛ́laka asana a yaabɛ́,
banɔ́ ebé Elilé ŋá banɔ́ kéndisi nuánɔ́ nyɛmána nú okoó wuúci hálámánána o ohónyí a wɔmbányɛ ;
ánɔ kɛláka aáná ne nuhóhi,
mbá nú bíkékényíki ɔkua a bɔɔbɛ́ eébú.
2 Ánɔ ɔ́ɔ́lɔ́kɔ́nɔ́ e ekúlú yí muuyé.
Mbɔ́kɔ nu ŋa nɔ́ kɛ́la aáná,
nu ká nɔ́ látákɛ́na okotí yí Kilís.
3 Mbɔ́kɔ ɔɔcɔ a wɔmɔtɛ́ ŋe bíhíite háyɛ ɔɔcɔ a waáŋá,
yiíyi anyía u tɛ á bá ta bɔkɔ,
u ŋe bínéŋe.
4 Ɔɔcɔ okime é búlúnéke nyíáyɛ́ nyɛbɛ́kɛ́lɛ́na nyɛ́ bɛ́muátá.
Mbɔ́kɔ u ŋa lɛ́ca anyía nyɛ́áŋa nyɛmbányɛ,
wá bá na bɔɔcɔ eé wuúci bɛ́muátá,
tɛ́ cáŋa anyía u ŋa hɔ́láka bɔsɔ́ɔ́kɔ́ a nyɛbɛ́kɛ́lɛ́na,
5 ananyía ɔɔcɔ okime káá bɛ́túáhɛ́na búáyɛ́ bɔlamɔ́ wuúci bɛ́muátá eé buúse bɔ́ Bandɔ́mɛsɛ́.
6 Ɔɔcɔ okime ewú bé ŋe yeékúnyi Bɛsana bɛ́ Bandɔ́mɛsɛ́ ŋá nyɛmána wu owiínjíékíne ɔɔcɔ ewú u ŋeé wuúci eékúnyi nuafa a númɔtɛ́ nɔ́ bíáyɛ́ bɛnyɛ́ma bikime.
7 Nuti bínéŋéke,
bá náŋa bé ti é féníne Bandɔ́mɛsɛ́.
Bá naŋa bá bándáka bɛyɔyɛ́ hú a nyɛnamá nyɛ́ bɛnyɛ́ma anyɛ́ bɔ́ yɔɔ́nɔ́kɔ.
8 *Híáná yááŋa a baacɔ :
Ɔɔcɔ awɔ́ u ŋa kɛla bɛsana e bí ŋeé wuúci hámɛ́na ɔ ɔtɛ́má a aháŋá ne olíhe ú imehú kéé wé ;
mbá ɔɔcɔ awɔ́ u ŋa kɛla bɛsana e bí ŋeé wuúci hámɛ́na ɔ ɔtɛ́má a aháŋá ne olíhe ú Elilé kéé líhéke yɔɔ́sɔɔ́sɔ yí olíhe yí ekúlú ekime e yí ŋe húle né Elilé.
9 Túá cɔbá ne buúse ɔ ɔkɛla bɛmbányɛ bɛ́ bɛsana,
tu tɛ tɔmbɔ,
anyía tu ké sú híiteke bɛmbányɛ bɛ́ bɛnyɛ́ma ɛ́cɛ ekúlú ma nyɛ́mana.
10 Yaátɛ́ asana,
túá bɛ́kɛ́ndɛ́na aámbáya ayɛ́ ekúlú áŋa ambányɛ ɔ ɔkɛla bɔmbányɛ a baacɔ bekime,
hɔlákáhɔ́láka né eebe a bá bɔ́ŋa báásɔ́ benyíinyí bé olumitinine Kilís.
11 Ánɔ lɛcá aámbáya háyɛ ɛ ŋa mɛ́ banɔ́ ɔɔ́ŋɛ́na na bɛandándá bɛ́ ciɔɔ́ŋɛ́ ne úúmi ɔɔbɔ́ ú bɛ́muátá.
12 Baacɔ a bá ŋa bɔ́ aamba obíléníne baacɔ bekime,
beébe bá ŋa bɔ́ banɔ́ eékínyi anyía nuánɔ́ bɛ́ácáka.
Bá tɛ ŋá bɔ́ áamba anyía baacɔ é beébe tékéséke,
anyía mbɔ́kɔ bé ŋe bú húlinyi baacɔ anyía owé ú Kilís ɔ ɔmbásá ŋo nóhínyi,
keyé bé kéé beébe tekeseke.ª
13 Baacɔ eébé a bá ŋa bɔ́ bɛ́áca tɛ ŋá bɔ́ látɛ́na beébe bɛ́muátá bikotí bí Besuif bikime.
Bá ŋa bɔ́ áamba anyía núánɔ́ bɛ́ácáka ananyía mbá bébú bíbéétíki eé buúse bɔ́ baacɔ a yáánɔ́ asana.
14 Aámɛ a aháŋá,
i ti ŋé mí bíbééti ;
ɛ́ maá mɛ háya yáaŋa maamɛ mɔŋɔlɛ́ né uusú Otéŋí a Waáŋá Yésus Kilís ewú u ŋeé wé aámɛ a asana ɔ ɔmbásá.
A asana eéyé ya mɛ́ŋa owéénú a asana na ɔmɛsɛ́ ;
ɔmɛsɛ́ owéénú aámɛ a asana.
15 Yááŋa anyía bú tɛ ŋɔ́ yɔɔ́lɔ buúse bukime,
ta ɔɔcɔ á bá ɔbɛ́ácánɔ́ ta waá bá iindú.
Bɔkɔ a bɔ́ ŋɔ yɔɔ́lɔ áŋa hú anyía ɔɔcɔ á bá yɔɔ́sɔɔ́sɔ yɛ́ ɔɔcɔ.
16 Bandɔ́mɛsɛ́ á sáyábákɛ́na baacɔ bekime a bá ŋa bɔ́ látɛ́na ohónyí oócí ne eebe a bá bɔ́ŋa taaká cɛ́ baacɔ bá Bandɔ́mɛsɛ́ ;
wé beébe iínjíékíne tɔ́na mbuumu ɛ ɛtɛ́má noómi.
17 O otúme aámbáya ɛ tɛ ŋá háná ámɛ áamba anyía ɔɔcɔ é mi yébíki tɔ́na.
Yááŋa anyía ɛndɔ́l᪠a cɛ́áŋa aámɛ a cɛɛ́tɔ ŋo tóŋínyi anyía ya mɛ́ŋa bɔkɔ bú Yésus.
18 Báámɛ benyíinyí,
Otéŋí a Waáŋá Yésus Kilís á banɔ́ sayábákɛ́na banɔ́ bekimeʼo.
Híáná yááŋa.