4
1 Asana ayɛ́ ɛ ŋa mɛ́ áamba anyía núánɔ́ lɔ́kɔ́ma bɔmbányɛ áŋa anyía :
Ɔɔ́nɔ́ okime a wá nyɛmána wu ɔbá na nuafa a bɛnyɛ́ma bí síkíne ŋeé líhe i iŋetí ci olíhe ú yɔɔ́lɛ́,
ta yɛ́ cáŋa á bá anyía nuafa eénú áŋa núáyɛ́ nukime.
2 Ekúlú ayɛ́ wa yánáŋa ɔɔ́nɔmbɔ́,
wáŋa e butéŋí bɔ́ baacɔ e bé ŋe bú wuúci tétényi ;
bé kéndisiki bíáyɛ́ bɛsana ɔ ɔkɔɔ́háma ekúlú eyí síkíne ŋaá sɔ́mbɔ́tɔ́na anyía wá bá na núáyɛ́ nuafa.ª
3 Híáná búáŋa tɔ́na náásɔ́,
anyía ekúlú ayɛ́ tu ŋa sɔ́ bá ɛ́cɛ tu tɛ ŋá sɔ́ háyá mɔŋɔlɛ́ né Kilís,
tu ŋa sɔ́ bá tua sɔánáŋa i iŋetí cɛ banásɛ́ ;
tu ŋa sɔ́ bá a buɔ́lɛ́ bɔ́ abɛ́kɛ́lɛ́na cé ilumitinine cá baacɔ.
4 Ɛ́makɛ́la ekúlú ayɛ́ Bandɔ́mɛsɛ́ bɛ́muátá ŋaá sɔ́mbɔ́tɔ́na á kaáháma,
u ŋá tɔ́ma uuyé Ɔɔ́nɔ́,
yó ko bíbíéne a tɔɔna tú oónjú ;
u ŋe líhéké a nyɛbɛ́kɛ́lɛ́na nyí bikotí bí Besuif,
5 ananyía mbá wá háŋɔ́náka eebe a bá bɔ́ŋa bɛɔ́lɛ́ bí bikotí eébí,
túɔ́ bámɔ́kɔ́na basɔ́ bekime baáná bá Bandɔ́mɛsɛ́.
6 Asana e yí ŋo tóŋínyi anyía nua nuáŋa baáná bá Bandɔ́mɛsɛ́ áŋa anyía :
Bandɔ́mɛsɛ́ ŋaá basɔ́ nyióyísíkínyi Elilé yí uuyé Ɔɔ́nɔ́ ɛ ɛtɛ́má noómi ;
yiíyi yɛ́ ŋa kɔ́ɔna okelú ɔ ɔmuaná anyía « Ába !
»,ª ɛ́cɛ anyía « Taatá. »
7 Ɛ́ɛhɛ́ bú ŋo tóŋínyi anyía nu tɛ anɔ́ bá tɔ́na bɛɔ́lɛ́ bɛ́ abɛ́kɛ́lɛ́na cé ilumitinine cá baacɔ,
mbá nua nuáŋa aná bááyɛ́ baáná.
A asana ayɛ́ nua nuáŋa baáná bá Bandɔ́mɛsɛ́,
nua nɔ́ŋa na nuafa a bíáyɛ́ bɛnyɛ́ma anyía núáyɛ́ nuubo.
8 Buáyá,
ekúlú ayɛ́ nu ŋa nɔ́ bá ɛ́cɛ nu ti ŋé nú menyi Bandɔ́mɛsɛ́,
nu ŋa nɔ́ bámɔ́kɔ́ná bɛɔ́lɛ́ bɛ́ bɛbɔ́kɔ́bɔ́kɔ a bɛ́ tɛ ɔ́mɔɔ́ bá taaká cɛ Bandɔ́mɛsɛ́.
9 Mbá aámbáya ayɛ́ nua nuáŋa o omenyinyi na Bandɔ́mɛsɛ́,
anyána yááŋa tɔ́na anyía nuánɔ́ hálɔ́mɔ́kɔ́na ɔlátɛ́na abɛ́kɛ́lɛ́na cé ilumitinine cá baacɔª a cɛ́ tɛ á bá na makɛ́nda,
cɛ́ tɛ ɔɔ́lɔ ta bɔkɔ e ?
Anyíatɛ́ nu ŋa nɔ́ áamba ɔ háná bá bíábɔ́ bɛɔ́lɛ́ e ?
10 Nu ŋe nú bíínjie ɔ ɔlátɛ́na manáka ma mɔɔ́sɛ́ a mɔ́mɔtɛ́,
ne me iílí a cɛ́mɔtɛ́,
ne me bikúlú a bɛ́mɔtɛ́ bɛ́ hiɔŋɔ,
na ma tuɔŋɔ a túmɔtɛ́ tɔ́na.ª
11 Ɛ ŋaá mɛ bɛ́ákɛ́na buéŋí a yáánɔ́ asana,
anyía muuyé emú i ŋe mí hiitéke ɔ ɔnyiɔ buólí náánɔ́ tɛ bɛ́cáŋa buólí bú nubókó.
12 Baláamɛ,
ɛ ŋa mɛ́ banɔ́ bɛ́cɔ́kɔ́lɛ́na anyía ánɔ bámɔ́kɔ́na na nyɛbɛ́kɛ́lɛ́na anyɛ́ ɛ ŋa mɛ́ bá ne nyiínyi náánɔ́.
Nu tɛ ɔ́mɔ nɔ́ mɛ kɛla bɔɔbɛ́ ta búmɔtɛ́.
13 Nu ŋa nɔ́ bɛ́táá anyía ekúlú ayɛ́ ɛ ŋa mɛ́ cáŋacáŋa ɔ banɔ́ húlinyi Ambányɛ yɛ́ Ɛsɔ́ma,
ɛ ŋa mɛ́ bá yámɛ kɔnɔkɔ.
14 Ta yɛ́ cáŋa á bá anyía nu ŋa nɔ́ lɔ́kɔ́máka muuyé aámɛ a asana anyía ɛ ŋa mɛ́ bá yámɛ kɔnɔkɔ,
nu ti ómo nú mi kényéme,
banɔ́ te o mi omboko.
Mbá nu ŋa nɔ́ mɛ káhá bɔmbányɛ i iŋetí cɛ nyɛkáha bɔmbányɛ nyí *elilé yɛ́ bɔsɔ́ma yɛ́ Bandɔ́mɛsɛ́.
Yɛ́ ŋaá bá háyɛ anyía Yésus Kilís bɛ́muátá nu ŋa nɔ́ káha bɔmbányɛ.
15 Etéeyé ekúlú nu ŋa nɔ́ bá ne obíléne weéŋí.
Mbá anyíatɛ́ nu tɛ ŋá háná enú bíléne aámbáya e ?
Yaŋɔ́ bɛ́muátá i ŋe mí menyi bɔmbányɛ anyía e ekúlú eéyé,
mbɔ́kɔ banɔ́ ne ohónyí wú ɔbɛ́sɔ́mɔ́kɔ eése anyía nuénú mi iínjíékíne,
keyé nu ŋa nɔ́ bɛ́sɔ́mɔ́kɔ.ª
16 Ánɔ mɛ laana aámbáya aná,
ya mɛáŋa muanɔ́ muliŋine anyía ɛ ŋa mɛ́ banɔ́ laana taaká e ?
17 Nyɛlatana anyɛ́ baacɔ eébéª ŋá bɔ́ áamba ɔlatana na banɔ́ ne munéŋéne tɛ á bá nyɛmbányɛ buúse bukime,
mbá bá ŋa bɔ́ áamba yáaŋa anyía bábɔ́ banɔ́ aálɔ́na na yaŋɔ́,
mbá nu bá ɔlɔŋɔ ne beébe.
18 Búáŋa bɔmbányɛ anyía baacɔ á latákána na bɔsɔ́ɔ́kɔ́ ;
mbá nyɛlatana eényí ŋá nyɛmána nyɛ́ ɔbá bikúlú bikime,
ta yaŋɔ́ aanɔ́ ɛ ɛkatɛ́katɛ́,
ta yaŋɔ́ tɛ́ka.
19 Ééʼ,
banɔ́ báámɛ baáná bá ɔtɛ́má !
Ya mɛáŋa ɔ háná lɔ́kɔ́ma muuyé a yáánɔ́ asana i iŋetí ci muuyé mu inúmí ci oónjú.
I ké mí muúmu lɔ́kɔ́máka aáná ɔ ɔkɔɔ́háma ekúlú eyí Kilís kéé téŋgínyi bɔmbányɛ bɔmbányɛ e cíínú ilíhe noómi,
núó lúmitekinine hú bɛsana abɛ́ u ŋaá kɛ́láka.ª
20 Ya mɛ́ŋa na ɛcaná buéŋí cɛ́ ɔbámɔ́kɔ́na aanɔ́ ɛ ɛkatɛ́katɛ́ aámbáya,
ananyía mbá yémi menyí bɔmbányɛ anyána ya mɛ́ŋa wu ɔ banɔ́ láakɛna bɛsana eébí anyía bú ŋeé mi yébi buéŋí ;
ɛ tɛ háná ményi ta aátɛ́ ya mɛ́ŋa wu ɔ banɔ́ láakɛna tɔ́na.
21 Isíʼo,
banɔ́ abá nua nuánáŋa o oléne olíhe a buɔ́lɛ́ bú bikotí,
ánɔ mɛ laána,
yámɛ lɔ́kɔ́ma :
Nu tɛ ŋá nɔ́ lɔ́kɔ́ma bɔmbányɛ aátɛ́ bikotí ŋaa kɔɔna ayɛ́ʼ anyána e ?
22 Tɛ́ka yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía Abɛ́laham ŋaá bá na baáná a banɔ́mɔcɔ́ béfendí e ?
U ŋeé bíéné ooci ne yoombi,
yó bíéné a wɔmɔtɛ́ ne oónyí.
Nyiínyi nyí yoombi ŋaá bá anyía Akáal,
bɔ́ lɔ́ŋɔ́kɔ oónyí anyía Sáala.ª
23 Ɔɔ́nɔ́ ewú u ŋeé bíbíéne ne yoombi ŋeé bíbíéne háyɛ baáná bé etémbí bekime naŋa bébú bíbíénéke,
mbá ɔɔ́nɔ́ ewú u ŋeé bíbíéne ne oónyí ŋeé bíbíéné ɛ ɛndána acɛ́ Bandɔ́mɛsɛ́ ŋeé wuúci bɛ́tánɛ́ná.ª
24 Asana eéyé áŋa hibílícínyínyí e hí ŋo tóŋínyi anyía :
Beénjú eébé béfendí á bɔ́ŋa alatana cé membénú éfendí.
Yoombi Akáal ŋo tóŋínyi nyɛlatana nyí bumbénú anyɛ́ Bandɔ́mɛsɛ́ ŋaá látána ne *Moyís a nɔkɔndɔ nú Sinayi ɔ ɔmuaná.
Bááyɛ́ baáná á bɔ́ŋa bɛɔ́lɛ́.
25 Akáal oócí áŋa tɔ́na nyiínyi nyɛ́ nɔkɔndɔ nú Sinayi i iisí cɛ Alabi ;
u ŋo tóŋínyiª bálɛ́ka ci Yelúsalɛm cɛ aámbáyaª a cɛ́áŋa ɔ buɔ́lɛ́,
ª na bááyɛ́ baáná áyá.
26 Mbá Yelúsalɛm cɛ Ɔmuaná ŋeé líhe a ciayɛ́ciayɛ́ háyɛ Sáala ;
ciáŋa ciasɔ́ iinyí.
27 A asana ne Yelúsalɛm eécí,
Ciɔɔ́ŋɛ́ cɛ́ Bandɔ́mɛsɛ́ ŋaá kɔ́ɔna cɛ́sɛ :
« Kuɔŋɔ́,
ahúátá yí oónjú ewú o ti ómoó bíéne baáná,
bílénéke ;
kuɔŋɔ́ ewú o ti ómo númi ta buɔ́sɛ́,
biolikinyi,
anyía oónjú awɔ́ ɔnɔ́mɛ ŋaá bɛ́yúata kéé bíénéke baáná beéŋí
ɔ ɔhɔla oónjú awɔ́ ɔnɔ́mɛ ŋaá bá weé lénéke. »*
28 Aá banɔ́ baláamɛ,
nua nɔ́ŋa taaká cɛ́ baáná bá Bandɔ́mɛsɛ́ háyɛ ciayɛ́ ɛndána ŋaá bá ;
nua nɔ́ŋa háyɛ *Isak awɔ́ Bandɔ́mɛsɛ́ ŋaá bɛ́tánɛ́ná Abɛ́laham anyía u kéé bíéne.
29 Buáyá,
etéeyé ekúlú,
ɔɔ́nɔ́ ewú é bíbíéné háyɛ baáná bé etémbí bekime ŋaá bá weé tékeseke ɔɔ́nɔ́ ewú é bíbíéné a makɛ́nda ma ɛndána ci Elilé yɛ́ Bandɔ́mɛsɛ́.
Búáŋa tɔ́na híáná aámbáya.
30 Yááŋa anyía Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ :
« Ɔɔ́ŋɔ́kɛ́na ne yoombi ne uuyé ɔɔ́nɔ́ áyá,
anyía ɔɔ́nɔ́ u yoombi tɛ ɔ́mɔ nyɛmána wu ɔbá na nuafa a bɛnyɛ́ma bɛ́ ciayɛ́ síkíne ;
hú ɔɔ́nɔ́ u oónyí wá nyɛmána wu ɔbá na bɛnyɛ́ma eébí. »*
31 Aáná baláamɛ,
basɔ́ bekime tu tɛ asɔ́ bá baáná bé yoombi a bá bɔ́ŋa e butéŋí bú bikotí ;
tua sɔ́ŋa baáná bé oónyí a wáŋa a ciayɛ́ciayɛ́.