Olumitinine ewú ú ŋó nóhi baacɔ
15
1 Baláamɛ,
aámbáya ɛ ŋa mɛ́ aamba ɔ banɔ́ obítéési asana yɛ́ Ambányɛ yɛ́ Ɛsɔ́ma ayɛ́ ɛ ŋa mɛ́ banɔ́ húlíkínyi,
nuó yiíyi lumitinine.
I ŋe mí menyi anyía nua nɔ́ŋa bɔɔ́nɛ́nánɔ́ e yiíyi.
2 Mbɔ́kɔ nu ŋa nɔ́ cɔba ne buúse o o yiíyi lumitinine bɔkɔ búmɔtɛ́ háyɛ i ŋe mí yiíyi banɔ́ húlíkínyi,
ne yiíyi eéyé Bandɔ́mɛsɛ́ káá banɔ́ nóhiki.
Mbɔ́kɔ tɛ́ cáŋa aáná,
keyé nu ŋe nú lúmítíníne etémbí ne etémbí.
3 Yááŋa anyíaʼo,
yaŋɔ́ ɛ ŋa mɛ́ banɔ́ húlíkínyi bɛsana bí buúse bɛ́ makɛ́nda abɛ́ ɛ ŋa mɛ́ lɔ́kɔ́máka,
yaŋɔ́ bɛ́muátá ;
biíbi bɛ́áŋa anyía :
*Kilís ŋe keé wééne aasɔ́ a maabɛ́ háyɛ yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ ;
4 bé ŋeé wuúci nyie e enyie,
a matátɔ́ Bandɔ́mɛsɛ́ yó wuúci héényi o owé,
háyɛ yááŋa tɔ́na yɔɔ́ŋɔ́kɔ́nɔ́.
5 U ŋeé bítóŋínyi né Bíel ;
e elime,
yó bítóŋínyi tɔ́na ná bááyɛ́ *baákɔ́nɛ́na bɔ́ɔ́hátá ne béfendí.ª
6 E elime eécí,
a bɔ́mɔtɛ́ baacɔ bé uúsú olumitinine,
bá hɔ́laka hɔ́ndɛ́tɛ ɛ́táánɔ,
ŋe bú wuúci lɛcaka ekúlúkúlu ɔ́mɔtɛ́ haála hɔ́mɔtɛ́ ;
bɔ́mɔtɛ́ ne meé bú wéékúne,
mbá beéŋí á búánáŋa o olíhe aasɔ́ ɛ ɛkatɛ́katɛ́.
7 E elime eécí u ŋeé bítóŋínyi tɔ́na ná Sáak ;
yó bítóŋínyi tɔ́na ná baacɔ bá ɛndɔ́ma bé etémbí bekime.
8 Ɛ́ɛhɛ́ e elime cɛ baacɔ eébé bekime,
nyisíké mi bítóŋínyi eényí náámɛ,
yaŋɔ́ háyɛ yɔɔnɔbɔ.ª
9 Aá taaká,
ya mɛ́ŋa hɛcɔɔ́cɔ́ hɛ́ bɔtɔhɔ a baacɔ bá ɛndɔ́ma bekime.
Ɛ tɛ ɔ́mɔ nyɛ́mana ooci awɔ́ bááŋa bá ɔlɔ́ŋɛ́ta anyía ɔɔcɔ u ɛndɔ́ma u Bandɔ́mɛsɛ́,
a asana eyí i ŋe mí tekéséke hiɔ́bɔ hí belumitinine Kilís.
10 Mbá ta híáná,
Bandɔ́mɛsɛ́ ŋa mɛ́ sayábɛ́na,
nyiámɛ nyɛbɛ́cáŋa eényí ooci awɔ́ ya mɛ́ŋa aámbáya.
Aáná yááyɛ́ yaála yí nuubo eyí u ŋeé mi tóŋínyí tɛ a bá buólí bú nubókó.
Eéʼeé,
ya mɛ́ŋa ɔnyiɔ́kɔ́nɔ́ ne nuubo eénú yaandándá yí buólí a yɛ́ á hɔ́la bɔ́ baacɔ bá ɛndɔ́ma bé etémbí bekime.
Aá taaká,
tɛ́ cáŋa yaŋɔ́ bɛ́muátá ɛ ŋa mɛ́ nyiɔ́kɔ buólí eébú,
mbá yaála yí nuubo yɛ́ Bandɔ́mɛsɛ́ a yɛ́áŋa náámɛ.
11 Aáná aná,
ta yɛ́ cáŋa á bá anyía yaŋɔ́ í ŋé mi húlínyi baacɔ Ambányɛ yɛ́ Ɛsɔ́ma,
ta anyía baacɔ bá ɛndɔ́ma bé etémbí,
bú ti ŋé yébínyi.
Bɔkɔ búmɔtɛ́ tu ŋe sú húlínyi baacɔ ;
bɔkɔ búmɔtɛ́ eébú nu ŋe nú lumitinine tɔ́na.
Baacɔ ká bɔ́ háányuaka e biwéewé
12 Ɛ́hɛ́ɛ !
Basɔ́,
tu ŋe sú húlinyi baacɔ anyía Bandɔ́mɛsɛ́ ŋeé héényi Yésus *Kilís e biwéewé,
mbá anyána aná baacɔ ɔ bɔ́mɔtɛ́ aanɔ́ ɛ ɛkatɛ́katɛ́ ŋa bɔ́ kɔɔna báyɛ biwéewé tɛ́ ká háányuaka e ?
13 Mbɔ́kɔ a taaká biwéewé naŋa bɛ́ tɛ́ á háányúa,
keyé te Kilís tɔ́na tɛ ɔ́mɔ háányua e biwéewé.
14 Híáná,
mbɔ́kɔ Kilís tɛ ɔ́mɔ háányua e biwéewé,
keyé nyihulinyi enyí tu ŋe sú húlinyi baacɔ ɛsɔ́ma áŋa e etémbí ne etémbí ;
úúnú olumitinine tɔ́na etémbí.
15 Híáná tɔ́na,
mbɔ́kɔ biwéewé naŋa bɛ́ tɛ́ á háányúa,
keyé bú ŋa lɛ́cana anyía tua sɔ́ŋa aná háyɛ bambasɔ́mbásɔ bá bɛfala eé buúse bɔ́ Bandɔ́mɛsɛ́ ekúlú ayɛ́ tu ŋa sɔ́ hɛ́má anyía u ŋeé héényi Yésus Kilís o owé,
yiíyi anyía u tɛ ɔ́mɔ kɛ́la aáná.
16 Mbá mbɔ́kɔ baacɔ naŋa bá tɛ abɔ́ háányúa o owé,
keyé Bandɔ́mɛsɛ́ ti ómo héenyi te Kilís o owé aná !
17 Híáná,
mbɔ́kɔ Bandɔ́mɛsɛ́ ti ómo héenyi Kilís o owé,
keyé úúnú olumitinine tɛ a kɛla ta bɔkɔ.
Bandɔ́mɛsɛ́ tɛ ŋáá banɔ́ nyɛ́ánɛnɛna máánɔ́ maabɛ́ aná.
18 Híáná tɔ́na,
Bandɔ́mɛsɛ́ ti kéé nóhíki baacɔ e bé ŋe bú wéékúne beébe e nyimónjóló ne Kilís.
19 Mbɔ́kɔ hú o olíhe ú ɔmɛsɛ́ ooci wuúci ne wuúci tu ŋa sɔ́ háya mɔŋɔlɛ́ né Kilís ɔmanɔ́,
keyé tua sɔ́ŋa aná bahanahana bá baacɔ a bábɔ́ hɔ́laka baacɔ bé etémbí bekime.
20 Mbá tɛ́ cáŋa aáná.
Aá taaká Kilís áŋa ɔhaanyúánɔ́ e biwéewé ;
aáná Bandɔ́mɛsɛ́ ŋa cáŋacáŋa o wuúci heenyi e biwéewé anyía háyɛ wáŋa ɔtɔ́mɔtɔ́mɔ a bɔkɔ bukime,
wé tóŋínyi anyía bɔsɔ́ɔ́kɔ́ e bé ŋe bú wéékúne ká bɔ́ háányuaka tɔ́na.
21 Yááŋa anyíaʼo,
bɔkɔ búmɔtɛ́ háyɛ ɔɔcɔ ɔmɔtɛ́ wuúci u ŋeé hélénine baacɔ owé ɔ ɔmɛsɛ́,
híáná tɔ́na ɔɔcɔ ɔmɔtɛ́ u ŋa kɛ́lá anyía baacɔ á haanyúáka e biwéewé.
22 Ɛ́ɛhɛ́,
háyɛ bɔnyɛ *Átam bukime ŋe bú wé a nyíáyɛ́ nyɛkɛla,
híáná tɔ́na eebe bekime a bá bɔ́ŋa e nyimónjóló ne Kilís ká bɔ́ háányɔtɔkɔna háyɛ wuúci.
23 Asana ɔ́mɔtɛ́,
hú naányɛ́ u káá háanyua a yááyɛ́ ekúlú ;
Kilís ɔtɔ́mɔtɔ́mɔ,
bááyɛ́ baacɔ bó síké háanyuaka buɔ́sɛ́ bɔ́ nyíáyɛ́ nyɛkahálɔ́mɔ́na.
24 E elime eécí,
bɛsana bikime káá mánɔkɔna ɛ́cɛ Kilís me ményisiki metéŋí mé bililé mekime,
na báábɔ́ betéŋí,
na máábɔ́ makɛ́nda áyá,
yó hélúmúnyínyi butéŋí né Ooci a wáŋa wuúci Síkíne,
wuúci Bandɔ́mɛsɛ́.
25 Bú ŋá nyɛmana anyía Kilís e téŋginyi ɔ ɔkɔɔ́háma ayɛ́ u káá tálákɛ́na bááyɛ́ beliŋine bekime akɔlɔ́ a bɛɛtɔ́.ª
26 Muliŋine mu nyibíóndísínyi o omenyisi káá bá owé.
27 Yááŋa yɔɔ́ŋɔ́kɔ́nɔ́ anyía « Bandɔ́mɛsɛ́ ŋe yiínjíé Kilís makɛ́nda me otéŋgínyi bɛnyɛ́ma bikime ».
* Mbɔ́kɔ yááŋa aáná,
bú ŋo tóŋínyi o motóndóló anyía Muínjie makɛ́nda eémú tɛ a bá noómi.
28 Ɛkákɛ́la ú ma kɛla anyía Kilís é téŋgínyi bɛnyɛ́ma bikime,
yó biíbi tálákɛ́na akɔlɔ́,
uuyé Ɔɔ́nɔ́ oócí kéé bílóosi eé buúse bú Muínjie makɛ́nda eémú.
Aáná Bandɔ́mɛsɛ́ káá bá hú wuúci okimekime a bɛnyɛ́ma bekime.
29 Ánɔ lɛcá,
baacɔ a bɔ́mɔtɛ́ ŋe bú bíótókíne a asana na bɛlɔ́ŋɔ́ ;
mbá anyíatɛ́ bá ŋa bɔ́ kɛ́láka aáná mbɔ́kɔ aá taaká biwéewé tɛ ká bɔ́ háanyuaka e ?
Mbá anyíatɛ́ tɔ́na aná ɔbɛ́kándɔ́na *obíótíne a asana na bɛlɔ́ŋɔ́ awɔ́ ú tɛ ŋɔ yɔ́ɔ́lɔ ta bɔkɔ e ?
30 Aáná anyíatɛ́ basɔ́ bɛ́muátá,
tú ma sɔ́ támbáka bɛamba bí owé mɔɔ́sɛ́ mekime e ?
31 Baláamɛ,
ɔ mɔɔ́sɛ́ mekime me úúmi olíhe ɛ na maá mɛ bɛ́háya owé a ambalá.
Yááŋa taaká aáná bɔkɔ búmɔtɛ́ háyɛ bɔɔcɔ abɔ́ ya mɛ́ŋa ne buúbu na banɔ́ anyía tua sɔ́ŋa e nyimónjóló ne Otéŋí a Waáŋá Yésus Kilís áŋa taaká.
32 Ɛ ŋa mɛ́ nuáka aaha ɛ Ɛfɛ́ɛsɛ na baacɔ i iŋetí cɛ ɛnyama cí biciké.
ª Mbɔ́kɔ hú a nyɛbɛ́táá nyɛ́ baacɔ ɛ ŋa mɛ́ kɛláka aáná,
aátɛ́ ɛ ŋaá mɛ hɔ́má aná,
mbɔ́kɔ biwéewé tɛ ŋá háányua e ?
Ɛ ŋaá mɛ banɔ́ túmíne yáaŋa ɛnjaba eeci a cɛ ŋa kɔɔna cɛsɛ :
« Túá nyíáka,
túá múákɛ́na anyía nɔɔyá tu ké sú wéekúne ! »
33 Énu bíkékényíkiʼo,
nɔtɛ tákáka mekendinyi na bakɛla maabɛ́,
anyía « Imbíketí imbíketí hɛkɔlɔ́kɔ́lɔ́ hú mbiásɛ. »ª
34 Ánɔ ka hálɔ́mɔ́kɔ́na a cianɔ́cianɔ́ háyɛ yɛ́ ŋaá bɛ́amba,
nɔtɛ háná kɛlaka bɛsana a bɛɛbɛ́.
Yááŋa anyía baacɔ a bɔ́mɔtɛ́ náánɔ́ ti ŋé bú menyinyi na Bandɔ́mɛsɛ́ ;
ééʼ,
asana ayɛ́ ɛ́ ŋaá mɛ táŋa aaha áŋa a yáánɔ́ aatɔ́ ɔlama.
Cɛɛ́tɔ cɛ ɔɔcɔ awɔ́ á háányua e biwéewé
35 Aáná bɔ́mɔtɛ́ baacɔ ŋa bɔ́ báta báyɛ :
« Mbá anyána Bandɔ́mɛsɛ́ kéé héenyiki biwéewé e ?
Anyána cɛɛ́tɔ cɛ ɔɔcɔ awɔ́ á háanyua e biwéewé káá lɛ́cakana e ? »
36 Mbɔ́kɔ ɔɔcɔ ŋa bata nyɛnamá nyɛ́ ɛmbataka eényí aáná,
ɛ́cɛ anyía wáŋa yaála.
Menyí anyíaʼo :
Buohó bukime abɔ́ ɔ ŋɔɔ́ wɔɔ́nɔ e esíéné ŋá nyɛmána bú ɔ cáŋa fɔnɔkɔ ;
e elime eécí bú o síke lɔa.
37 Ekúlú ayɛ́ ɔ ŋɔɔ́ wɔɔ́nɔ ta ɛmbásɛ́kɛ mbá ta bɔkɔ bú etémbí,
nyiíse nyɛ́ bɔkɔ ɔ ŋɔɔ́ wɔɔ́nɔ,
tɛ́ cáŋa indíné ikimekime.
38 E elime eécí,
Bandɔ́mɛsɛ́ ŋe yíinjie buohó eébú indíné ecí u ŋe léne owiínjie ;
buohó bukime na nyíáyɛ́ nyɛnamá nyí indíné.
39 Yááŋa anyíaʼo,
bɔkɔ bukime e bú ŋeé líhe áŋa na cíáyɛ́ cɛɛ́tɔ hú yóʼ.
Aáná cɛɛ́tɔ cɛ baacɔ áŋa náányíá,
cɛ ɛnyama náányia,
ci tunonyí náányíá,
cɛ tuɔfɔ́ náányia tɔ́na.
40 Aáná cɛɛ́tɔ cɛ Ɔmuaná áŋa hɔ́á,
cɛ ɔmɛsɛ́ tɔ́na hɔ́á ;
nyɛlɛcana nyɛ́ cɛɛ́tɔ cɛ Ɔmuaná áŋa náányíá ;
nyɛ́ cɛɛ́tɔ cɛ ɔmɛsɛ́ náányia.
41 Nu ŋe nú ményi anyía nyɛlɛcana nyɛ́ ɔɔ́cɔ́ áŋa náányíá,
nyí oólí náányia,
nyí tunjoti náányia tɔ́na ;
te tunjoti tuútu ne tuútu ŋa nɔ́ma náányíá náányia.
42 Híáná bú káá bá a nyɛhaanyua nyí biwéewé.
Omime awɔ́ bá naŋa bé nyie áŋa na cɛɛ́tɔ a cɛ́ naŋa ciɔ fɔ́nɔkɔ ;
a nyɛhaanyua nyí biwéewé cɛɛ́tɔ eécí káá bá ɛndɛfɔnɔ́ cɛ cɛɛ́tɔ.
43 Omime awɔ́ bá naŋa bé nyíé ŋe yiínjíéne aatɔ́ ɔlama,
ɔ́ tɛ kɛ́nda ;
omime a wɔhaanyúánɔ́ káá bá ne nuúmi,
ú kɛ́ndáka.
44 Bá naŋa bé nyíeke cɛɛ́tɔ ci imehú ;
ekúlú ayɛ́ cɛ́ á háanyua,
cɛáŋa cɛɛ́tɔ ci Elilé.
Mbɔ́kɔ cɛɛ́tɔ ci imehú cɛ aatɔ́ ɔlama áŋa hɔ́á,
cɛɛ́tɔ ci Elilé ci nuúmi áŋa tɔ́na hɔ́á.
45 Yaátɛ́ asana yááŋa yɔɔ́ŋɔ́kɔ́nɔ́ anyía :
« Ɔɔcɔ u buúsebuúse,
*Átam,
ŋaá bɛ́cáŋá hɛtányɛ́ e hí ŋé líhe ;
Átam u obíóndísínyi á yáaŋa Elilé e yí ŋé yiínjié olíhe ».*
46 Mbá ta híáná,
tɛ́ cáŋa cɛɛ́tɔ ci Elilé cɛ ŋá cáŋa ;
mbá ci imehú ;
e elime cɛɛ́tɔ ci Elilé cɛ́ɔ láta.
47 Bé ŋe kétíki ɔɔcɔ u buúsebuúse na bɛcɛ́bɛ́,
buátɛ́ bɔkɔ wáŋa ɔɔcɔ u ɔmɛsɛ́ ;
ɔɔcɔ u obíóndísínyi ŋeé húlé ɔ Ɔmuaná.
48 Baacɔ bekime bá ɔmɛsɛ́ a bɔ́ŋa i iŋetí ci ooci ewú bé ŋe kétíki na bɛcɛ́bɛ́,
bá Ɔmuaná bekime a bɔ́ŋa i iŋetí ci Ooci ewú u ŋeé húlé ɔ Ɔmuaná.
49 Aáná tua sɔ́ŋa aámbáya i iŋetí cɛ ɔɔcɔ ooci ewú bé ŋe kétíki na bɛcɛ́bɛ́ ;
búmɔtɛ́ buɔ́sɛ́ tu ká sɔ́ hɔ́áka ɔɔcɔ Ooci ewú u ŋeé húlé ɔ Ɔmuaná.
50 Baláamɛ,
asana ayɛ́ ɛ ŋa mɛ́ kɔɔna áŋa anyíaʼo,
ɔɔcɔ a wáŋa ne imehú na manɔ́ŋɔ́ tɛ a bá wu ɔbɔ́ŋɔ nuafa haála ahɛ́ Bandɔ́mɛsɛ́ ŋe téŋínyi baacɔ ;
híáná tɔ́na,
ta bɔkɔ e bú ŋe wé tɛ a bá bú ɔbɛ́cáŋa indiwé.
51 Ánɔ lɔ́kɔ́ma,
yámɛ banɔ́ láana asana yí injibí,
yááŋa indiitie ;
tu ti ké sú wéékúne basɔ́ bekime ;
asana ɔ́mɔtɛ́,
basɔ́ bekime tu ká sɔ́ hɛ́ŋakɛna nyɛlɛcana,
52 hí e hikúlúkúlú,
hú kéli !
Ekúlú ayɛ́ ɛsɛ́bɛ́ káá bɛ́lɛ́ta nyɛmana,
biwéewé bikime káá háányuaka céŋícéŋi ;
aáná basɔ́ a bɔɔ́sɔ tu ká sɔ́ hɛ́ŋakɛna nyɛlɛcana.
53 Yááŋa anyíaʼo,
ciasɔ́ cɛɛ́tɔ cɛ ɔfɔnɔ káá bɛ́cáŋa ɛndɛfɔnɔ́ ;
ci owéékúne cíɔ bɛ́cáŋa indiwé.
54 Ekúlú ayɛ́ cɛɛ́tɔ cɛ ɔfɔnɔ eécí káá bɛ́cáŋa ɛndɛfɔnɔ́,
ci owéékúne cíɔ bɛ́cáŋa indiwé,
aáná buhúnyi eebu a búáŋa bú ɔɔ́ŋɔ́kɔ́nɔ́ ké bínyíóyísínyi,
búáŋa anyía :
« Nyɛyáka ma mɛ́na owé buúse bukime. »*
55 Owé eé,
nyíɔ́wɔ nyɛyáka nyiényí aná e ?
Owé eé,
nyíɔ́wɔ nyɛkɔŋɔ́ nyiényí aná e ? *
56 Nyɛkɔŋɔ́ nyí owé áŋa bɔɔbɛ́ ;
makɛ́nda ma bɔɔbɛ́ áŋa e *bikotí bɛ́ Bandɔ́mɛsɛ́ noómi.ª
57 Mbá basɔ́,
tú iínjíékíne Bandɔ́mɛsɛ́ bitéŋíti,
wuúci ú ma kɛ́la anyía túásɔ́ yákáka e elime ci uusú Otéŋí a Waáŋá Yésus *Kilís.
58 Ɛ́ɛhɛ́,
banɔ́ báámɛ benyíinyí bá ɔtɛ́má,
nɔtɛ bɛ́nyɛ́ánɛ́na,
ánɔ bɛ́kɛ́ndákɛ́na mɔɔ́sɛ́ mekime ;
nu ɔɔ́nɔ́kɛ́na bɔ ɔɔ́nɔ́kɛ́na ɔ ɔhɔla ɛ ɛtɛ́má e buólí bú Otéŋí a Waáŋá noómi,
nu menyukune anyía buólí ebú nu ŋe nú wuúci nyiɔnɔ tɛ káá bá buólí bú nubókó.