Bɛsana bí etémbí a asana ne Efúúménénú yí Elilé
14
1 Ánɔ bɛ́kɛ́ndákɛ́na oléne bɔsɔ́ɔ́kɔ́.
Ɔtɛ́má á banɔ́ hámɔ́kɔ́nɛ́na tɔ́na ɔ ɔbɔ́ŋɔ makɛ́nda emé *Efúúménénú yí Elilé ŋé yíínjie baacɔ ma ɔkɛlaka bɛsana,
hɔlákáhɔ́láka me ohémúkúnyínyi baacɔ bɛsana abɛ́ Bandɔ́mɛsɛ́ ŋá banɔ́ tóŋínyi.
2 Yááŋa anyíaʼo,
mutáŋa indimenyí cɛ́ ɛtáŋa tɛ ŋá táŋa ná baacɔ mbá ná Bandɔ́mɛsɛ́,
ananyía baacɔ tɛ ŋá bɔ́ lɔ́kɔ́ma ɔtáŋa awɔ́ mu ŋaá táŋa.
Mu ŋaá táŋa bɛsana a bɛnambákánɔ́ a makɛ́nda me Efúúménénú yí Elilé.
3 Mbá muhémúnyínyi baacɔ bɛsana abɛ́ Bandɔ́mɛsɛ́ ŋé wuúci tóŋínyi ŋaá táŋa ná baacɔ ananyía mu ŋe kíndísi úúbú olumitinine,
mu beébe ciekinyi,
mu beébe kíndísíki ɛtɛ́má.
4 Mutáŋa indimenyí cɛ́ ɛtáŋa ŋeé bíkíndísi muúmu bɛ́muátá o olumitinine noómi ;
muhémúnyínyi baacɔ bɛsana abɛ́ Bandɔ́mɛsɛ́ ŋeé wuúci tóŋínyi ŋee kíndísi hiɔ́bɔ hí belumitinine ɔ ɔwɔɔ́nɛ́na o olumitinine noómi.
5 Bú ŋeé mi bíléníne buéŋí anyía núánɔ́ táŋáka banɔ́ bekime indimenyí cɛ́ ɛtáŋa,
mbá bú ŋa hɔ́la o mi bíléníne anyía núénú hémúkúnyínyi baacɔ bɛsana abɛ́ Bandɔ́mɛsɛ́ ŋaá banɔ́ tóŋínyi.
Muhémúnyínyi baacɔ bɛsana ŋa hɔ́la mutáŋa indimenyí cɛ́ ɛtáŋa,
hú asɛ́ muáŋa mu ohembulekine bɔsɔ́ɔ́kɔ́ ɛtáŋa eécí ɔ ɔkɛla anyía hiɔ́bɔ hí belumitinine ɔ́ɔ́nɔkɛna.
6 Aámbáya,
báámɛ benyíinyí,
nyiɔ́lɔ nyɛ́ yaátɛ́ ya mɛ́ŋa wu ɔ banɔ́ héléníne mbɔ́kɔ ɛ ŋa mɛ́ banɔ́ táŋɛ́na indimenyí cɛ́ ɛtáŋa e ?
Ya mɛ́ŋa wu ɔ banɔ́ ɔ́ɔ́lɔ́kɔ mbɔ́kɔ ɛ ŋa mɛ́ banɔ́ cíbúníne bɛsana abɛ́ Bandɔ́mɛsɛ́ á mɛ́ nambɔnakɛna,
ta anyía ɛ ŋa mɛ́ kɛla anyía núénú ményi bɛsana a bɛ́mɔtɛ́.
Ya mɛ́ŋa wu ɔ banɔ́ ɔ́ɔ́lɔ́kɔ tɔ́na mbɔ́kɔ ɛ ŋa mɛ́ banɔ́ hémúnyínyi bɛsana,
ta anyía ɛ ŋa mɛ́ banɔ́ eékúnyi nyiékúnyi a nyɛ́mɔtɛ́ na ɔtáŋa ewú nu ŋe nú ményi bɔmbányɛ bɔmbányɛ.
7 Yááŋa híáná bɔkɔ búmɔtɛ́ na bɛnyɛ́ma bɛ́ bunɔ́kɔ́ eebi,
ne ololí na nɔlɔ́ŋɔ́.
Mbɔ́kɔ bé ŋeé fúme bu fúme ololí,
bá kɔ́ndɔ́lɔ́kɔ bu kɔ́ndɔ́lɔ́kɔ nɔlɔ́ŋɔ́,
anyána ɔɔcɔ áŋa wu omenyi aátɛ́ ololí eéyé ta anyía nɔlɔ́ŋɔ́ eénú ŋa kɔɔna e ?
8 Híáná bɔkɔ búmɔtɛ́,
mbɔ́kɔ musúbe hikóló ti ŋé sóbi bɔmbányɛ biité,
ta ɔɔcɔ tɛ káá bɛ́tábɔ́nákɛ́na biité.
9 *Híáná yááŋa tɔ́na náánɔ́ !
Mbɔ́kɔ nu ŋa nɔ́ táŋa indimenyí cɛ́ ɛtáŋa,
anyána baacɔ a bɔ́ŋa bé omenyi aátɛ́ nu ŋa nɔ́ táŋa e ?
Cíínú ɛtáŋa eécí áŋa etémbí ne etémbí.
10 A taaká,
ɛtáŋa áŋa ciéŋí ɔ ɔmɛsɛ́,
ciíci tɔ́na anamánamá.
Ta ɔ́mɔtɛ́ tɛ á bá awɔ́ ta ɔɔcɔ tɛ á bá wu ɔlɔ́kɔ́máka.
11 Mbɔ́kɔ ɔɔcɔ ŋaá mɛ táŋɛ́na indimenyí cɛ ɔtáŋa,
ya mɛ́ŋa okenyí nááyá,
wuúci tɔ́na okenyí náámɛ.
12 Híáná yááŋa tɔ́na náánɔ́.
Ánɔ bɛ́kɛ́ndákɛ́na ɔbɔ́ŋɔ na ɔtɛ́má okime makɛ́nda emé Efúúménénú yí Elilé ŋé yíínjie baacɔ ma ɔkɛlaka bɛsana.
Ánɔ kɛláka aáná ekúlú ekime anyía bú ŋaá banɔ́ bíléníne,
mbá ánɔ hɔláka ɔwaamba ɔbɔ́ŋɔ makɛ́nda e mé ŋé kéndisi hiɔ́bɔ hí belumitinine.
13 Yaátɛ́ asana ɔɔcɔ okime awɔ́ u ŋaá táŋa indimenyí cɛ́ ɛtáŋa ŋá nyɛmána wu ɔbɛ́cɔ́kɔ́lɔ́kɛ́na Bandɔ́mɛsɛ́ anyía wé wuúci iínjíé makɛ́nda me ocíbúnékíne bɔsɔ́ɔ́kɔ́ ɛtáŋa eécí.
14 Yááŋa anyía ekúlú ayɛ́ ɛ ŋaá mɛ bɛ́cɔ́kɔ́lɛ́na Bandɔ́mɛsɛ́ i indimenyí cɛ́ ɛtáŋa,
aá taaká úúmi ɔtɛ́má ŋeé wuúci bɛ́cɔ́kɔ́lɛ́na,
mbá maamɛ mɔsɔŋɛ́ tɛ ŋɔ́ɔ́ nyiɔ buólí.ª
15 Mbá yámɛ kɛla aátɛ́ aná e ?
Ɛ ká mɛ́ bɛ́cɔ́kɔ́lɔ́kɛ́na Bandɔ́mɛsɛ́ a nyɛnamá enyí Efúúménénú yí Elilé ŋeé mi tóŋínyi,
mbá i wuúci bɛ́cɔ́kɔ́lɔ́kɛ́na tɔ́na na maamɛ mɔsɔŋɛ́.
I ké mí wuúci hákɛ́nɛ́na maŋana emé Efúúménénú yí Elilé ŋeé mi tóŋínyi,
mbá i wuúci hákɛ́nɛ́na tɔ́na maŋana ɔ ɔtáŋa awɔ́ ɛ ŋaá mɛ lɔ́kɔ́ma bɔmbányɛ bɔmbányɛ.
16 Yááŋa anyía,
mbɔ́kɔ i ŋeé mi íínjie Bandɔ́mɛsɛ́ bitéŋíti hí e úúmi ɔtɛ́má noómi i indimenyí cɛ́ ɔtáŋa,
mɔhɔlahɔla tɛ á bá mu ɔkɔɔna anyía « Híáná yááŋa » a nyiámɛ nyiínjie nyɛ́ Bandɔ́mɛsɛ́ bitéŋíti anyɛ́ u tɛ ŋá lɔ́kɔ́ma ta bɔ lɔ́kɔ́ma.
17 Aá taaká,
nyiínjie nyɛ́ Bandɔ́mɛsɛ́ bitéŋíti eényí aáná áŋa nyɛmbányɛ buéŋí,
mbá nyɛ́ tɛ ŋɔ́ yɔ́ɔ́lɔ bɔsɔ́ɔ́kɔ́ buúse bukime.
18 I ŋeé mi iínjie Bandɔ́mɛsɛ́ bitéŋíti anyía ɛ ŋaá mɛ táŋa indimenyí cɛ́ ɛtáŋa ɔ ɔ banɔ́ hɔla,
banɔ́ bekime.
19 Mbá,
ɛ ɛkatɛ́katɛ́ ci hiɔ́bɔ hí belumitinine,
bú ŋa hɔ́la o mi bíléníne anyía yémi eékúnyíki baacɔ hú ne mehúnyi matáánɔ amá bá ŋa bɔ́ lɔ́kɔ́ma bɔmbányɛ bɔmbányɛ na anyía yémi beébe cúáka eetú ne mehúnyi meéŋí i indimenyí cɛ́ ɛtáŋa.
20 Baláamɛ,
nuti bíhíítéke háyɛ banásɛ́ e nyicíbúne nyɛ́ bɛsana,
mbá énu bíhíítéke háyɛ *baáŋá.
A asana a yɛ́ ŋa lɛca nyɛkɛla nyɛ́ bɔɔbɛ́,
ánɔ bámɔ́kɔ́na háyɛ banásɛ́,
tɛ́ka na hɛkɔma hɛ́ ɔ banɔ́ túme.
21 Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Ná baacɔ a bá ŋa bɔ́ táŋa indimenyí cɛ́ ɛtáŋa,
bá táŋáka ɛtáŋa cɛ́ mɔnɔŋɔ me etémbí,
ɛ ká mɛ́ hɔlɛna ɔ ɔtáŋáka ná baacɔ bá bunɔŋɔ eebu,
mbá ta híáná bá tɛ́ ká bɔ́ mɛ lɔ́kɔ́ma,
te butíkítíki.
Buhúnyi bú Otéŋí a Waáŋá eébú. »*
22 Bú ŋo tóŋínyi anyía indimenyí cɛ́ ɛtáŋa áŋa hibílícínyínyí ahɛ́ Bandɔ́mɛsɛ́ ŋé yiínjie baacɔ a bá tɛ ŋá bɔ́ háya mɔŋɔlɛ́ né *Kilís ɔ ɔkɛla anyía bébú menyi anyía bá tɛ ábɔ́ bá e úúnu ɔlɔŋɔ ;
hɛ́ tɛ á bá a asana na bɔsɔ́ɔ́kɔ́ e bé ne meé bú lúmitinine.
Mbá ohémúnyínyi baacɔ bɛsana áŋa hibílícínyínyí ahɛ́ Bandɔ́mɛsɛ́ ŋé yiínjie baacɔ e bé ne meé bú lúmitinine.
Hɛ́ tɛ á bá a asana na bɔsɔ́ɔ́kɔ́ e bé ti ŋé bú lúmitinine.
23 Mbɔ́kɔ a nyíánɔ́ nyɛbɛ́bándána nyɛ́ hiɔ́bɔ hí belumitinine,
banɔ́ bekime nu ŋa nɔ́ táŋa indimenyí cɛ́ ɛtáŋa ;
aáná na baacɔ a bá tɛ ŋá bɔ́ háya mɔŋɔlɛ́ né Yésus na bahɔlahɔla bá hɔ́á,
bá ŋa bɔ́ kɔɔna anyía nua nɔ́ŋa bɛála.
24 Mbá,
mbɔ́kɔ banɔ́ bekime nu ŋe nú hémúnyínyi baacɔ Bɛsana bɛ́ Bandɔ́mɛsɛ́,
ekúlú ayɛ́ na baacɔ a bá tɛ ŋá bɔ́ háya mɔŋɔlɛ́ né Yésus na bahɔlahɔla bá hɔ́á,
bɛsana abɛ́ nu ŋa nɔ́ kɔ́ɔna kéé beébe tóŋgínyi cáábɔ́ anana,
bíó beébe kákálákɛ́na ɛ ɛtɛ́má.
25 Aáná bíábɔ́ bɛsana bí injibí bɛ́ ɔtɛ́má kéé bítóŋgínyi a miányɛ́,
bó túméke eŋéndu ɔ ɔmɛsɛ́,
bé íínjíékíne Bandɔ́mɛsɛ́ bitéŋíti,
bá kɔ́ɔnaka báyɛ :
« Bandɔ́mɛsɛ́ áŋa taaká aanɔ́ ɛ ɛkatɛ́katɛ́ ! »
Ciasɔ́ mbuumu ŋeé bíléníne Bandɔ́mɛsɛ́
26 Baláamɛ,
mbá aátɛ́ yámɛ banɔ́ laána aná e ?
Ekúlú ayɛ́ banɔ́ belumitinine,
nu ŋa nɔ́ bɛ́bándána o onyemi Bandɔ́mɛsɛ́,
ɔɔcɔ a wɔmɔtɛ́ aanɔ́ ɛ ɛkatɛ́katɛ́ áŋa wu ɔbá na buŋana bɔ́ ɔhákɛ́na ;
a wɔmɔtɛ́ na asana yí oweékúnyíki bɔsɔ́ɔ́kɔ́,
a wɔmɔtɛ́ na asana yɛ́ ɔnambɔnɛna bɔsɔ́ɔ́kɔ́,
a wɔmɔtɛ́ ne indimenyí cɛ ɔtáŋa,
a wɔmɔtɛ́ tɔ́na na makɛ́nda me ocíbúnékíne bɔsɔ́ɔ́kɔ́ ɔtáŋa oócí.
Bɛsana eébí bikime ŋá nyɛmána bɛ́ ɔwɔɔ́lɔ́kɔ baacɔ ɔ ɔwɔɔ́nɛ́na o olumitinine noómi.
27 Ekúlú yɛ́ ɔtáŋáka indimenyí cɛ́ ɛtáŋa á háma,
hú baacɔ béfendí ta anyía bátátɔ́ ábɔ́ nyɛ́mana bá ɔtáŋáka,
mbá ɔmɔtɛ́ ɔmɔtɛ́.
Ɔɔcɔ wu ocíbúnékíne bɔsɔ́ɔ́kɔ́ ɛtáŋa eécí ŋá nyɛmána ɔbá hɔ́á.
28 Mbɔ́kɔ ɔɔcɔ we ocíbúnékíne bɔsɔ́ɔ́kɔ́ ɛtáŋa eécí tɛ á bá,
batáŋa indimenyí cɛ́ ɛtáŋa ŋá bɔ́ nyɛ́mana bé olésíkínyi mbuumu a nyɛbɛ́bándána noómi,
bá táŋáka ne e cííbú ɛtɛ́má noómi na ná Bandɔ́mɛsɛ́.
29 A aháŋá ne behémúnyínyi baacɔ Bɛsana bɛ́ Bandɔ́mɛsɛ́,
baacɔ béfendí ta anyía bátátɔ́ ábɔ́ nyɛ́mana bé ohémúkúnyínyi ;
bɔsɔ́ɔ́kɔ́ belumitinine ábɔ́ lɔ́kɔ́máka,
bá aákɔ́nákɛ́na bɛsana eébí e bé ŋé beébe hémúnyínyi,
anyía bábɔ́ lɛ́ca mbɔ́kɔ bɛsana eébí áŋa taaká.
30 Mbɔ́kɔ Bandɔ́mɛsɛ́ ŋaa námbɔ́nɛ́na ɔɔcɔ a wɔmɔtɛ́ asana a yɛ́mɔtɛ́ ekúlú ayɛ́ sɔ́ɔ́kɔ́ ŋaá táŋa,
ooci awɔ́ á bá waá táŋáka ŋá nyɛ́mána wu olésíkínyi mbuumu o o wuúci lɔ́kɔ́ma.
31 Yááŋa anyía banɔ́ bekime nua nɔ́ŋa nu ohémúkúnyínyi bɔsɔ́ɔ́kɔ́ Bɛsana bɛ́ Bandɔ́mɛsɛ́,
mbá ɔmɔtɛ́ ɔmɔtɛ́,
ɔ ɔkɛla na anyía ɔɔcɔ okime aá banɔ́ á áákɔ́nákɛ́na bɔkɔ a búmɔtɛ́,
tɔ́na anyía wá yɔ́ɔ́nɛ́na o olumitinine noómi.
32 Behémúnyínyi baacɔ Bɛsana bɛ́ Bandɔ́mɛsɛ́ ŋá bɔ́ nyɛ́mána bé omenyi bɔmbányɛ makɛ́nda emé Elilé ŋeé beébe iínjie me ohémúkúnyi bɛsana.
33-34 Yááŋa anyía ciasɔ́ mbuumu ŋeé bíléníne Bandɔ́mɛsɛ́,
tɛ́ cáŋa hikókó.
A cáánɔ́ abɛ́bándána,
beénjú ŋá bɔ́ nyɛ́mána bé olésíkínyi mbuumu i iŋetí a cɛ ŋaá bɛ́kɛ́la ɔ tuɔ́bɔ tú belumitinine tukime ;
bá tɛ táŋa anyía bɔ́ tɛ ɔ́mɔ bɔ́ nyɛ́mana bá ɔtáŋáka.
Bá ŋá bɔ́ nyɛ́mána bá ɔbá ne nyikéke,
háyɛ bikotí ŋá kɔ́ɔna.
35 Mbɔ́kɔ oónjú ŋa yáamba omenyi asana a yɛ́mɔtɛ́,
wé bícónyíki ɔnɔ́mɛ o ooki.
Bú tɛ á bá bɔmbányɛ anyía oónjú é súmbísi nyɛbɛ́bándána ne úúyé ɔtáŋa.ª
36 Nu ŋe nú ményi anyía Bɛsana bɛ́ Bandɔ́mɛsɛ́ ti ómó túme náánɔ́,
ta anyía hú banɔ́ bímuócí nu ŋe nú biíbi menyi.
37 Mbɔ́kɔ ɔɔcɔ a wɔmɔtɛ́ ŋaá bɛ́táá anyía wáŋa na makɛ́nda emé *Efúúménénú yí Elilé ŋé wuúci iínjie ta anyía makɛ́nda me ohémúkúnyínyi baacɔ Bɛsana bɛ́ Bandɔ́mɛsɛ́,
wé menyi anyía asana eeye ayɛ́ ɛ ŋaá mɛ ɔ́ɔ́ŋɔ ŋeé húle né Otéŋí a Waáŋá.
38 Mbɔ́kɔ u ti ŋé léne omenyi aáná,
Bandɔ́mɛsɛ́ tɛ á bá wu o wuúci menyi tɔ́na.