Asana yí nyiínjie nyɛ́ ɔwɔɔ́lɔ belumitinine bé Yelúsalɛm
16
1 A asana ne nyiínjie nyɛ́ ɔwɔɔ́lɛ́ta hiɔ́bɔ hí belumitinine hí *Yelúsalɛm,
ánɔ kɛláka tɔ́na háyɛ ɛ ŋa mɛ́ laakɛ́na tuɔ́bɔ tú belumitinine *Kilís tɔ́ Kalasi.
2 Ɔɔcɔ okime aá banɔ́ á kɛlá anyía a buɔ́sɛ́ bɔ́ sɔ́ndɛ bukime,
u ŋá nyɛmána wu ɔbɛ́bátɛ́na e úúyé ooki bɔkɔ bú owiínjie háyɛ nyíáyɛ́ nyɛbɔ́ŋɔ áŋa,
ɔ ɔkɛla anyía bá tɛ́ táta ɔbánda hú ekúlú ayɛ́ ɛ́ ma kaá mɛ háma.
3 Aáná,
a nyiámɛ nyɛkaáháma,
ɛ ká mɛ́ ɔɔ́ŋɔ́kɔ nufule a asana ne nyiínjie eényí,
mío nuúnu cumeke ná baacɔ ebé nu ké nú lúmitine anyía bá ka cɔbána eé Yelúsalɛm.
4 Mbɔ́kɔ yááŋa ambányɛ anyía yaŋɔ́ bɛ́muátá yámɛ́ nyɛmana wu ɔcɔba,
tu ká sɔ́ bá ɔlɔŋɔ.
Ɛkanda ecí Bóol ŋá yáamba ɔkandaka
5 Ɛ ká mɛ́ hɔlɛna a Masɛtuán ɔ ɔfaaya náánɔ́.
Yááŋa anyía ɛ ŋá mɛ́ nyɛmána wu ɔsɔ́mbɔ́tɔ́nɛ́na i iisí cɛ Masɛtuán ɔ ɔkɔɔ́ banɔ́ lɛ́ca.
6 Yáakɛlá i ké mí líhíte na banɔ́,
ta anyía i ké mí huliki ekúlú yí buume ekimekime,
ª anyía nuánɔ́ mɛ ɔɔ́lɛ́ta ɔcɔbana uumi ɔkanda ne buúse.
7 Yááŋa anyía,
ɛ tɛ ŋá mɛ aamba anyía yámɛ banɔ́ hɔ́la ondíóŋóli e úúmi ɔkanda oócí.
Ya mɛ́ŋa na mɔŋɔlɛ́ anyía i ké mí líhíte nyɛnamá nyí ekúlú na banɔ́,
mbɔ́kɔ Otéŋí a Waáŋá ŋé lumítíne.
8 Mbá ta híáná,
ɛ ká mɛ́ lɔbɔ ɛ Ɛfɛ́ɛsɛ ɔ ɔkɔɔ́háma buɔ́sɛ́ bɔ́ Baŋtɛkót,
9 ananyía yaandándá yí ehélé yɛ́ ɔnyiɔkɔ búámɛ buólí áŋa ebítóŋínyínyi hɔ́á.
Ta yɛ́ cáŋa á bá aáná,
be-mi-nuusi á bɔ́ŋa betekénú.
10 Timoté á faáya náánɔ́,
énu wuúci káha bɔmbányɛ ɔkɛla anyía wá lɔ́kɔ́ma osoomo ;
yááŋa anyía u ŋɔ nyíɔnɔ Otéŋí a Waáŋá buólí háyɛ yaŋɔ́.
11 Ɔɔcɔ ti wuúci bábɛ́na aná.
Énu wuúci ɔ́ɔ́lɔ́kɔ yáaŋa ɔkɛla anyía wá ka hálɔ́mɔ́na tɔ́na mbuumu náámɛ,
ananyía na yaŋɔ́ na báásɔ́ benyíinyí bé olumitinine tu ŋe sú wuúci táta aaha.
12 A aháŋá ne uusú onyíinyí Abólos,
tua sɔ́ŋa baásánákánɔ́ buéŋí ne wuúci,
mío wuúci bata anyía wá faáya náánɔ́,
ɔlɔŋɔ na báásɔ́ benyíinyí a bɔ́mɔtɛ́ bé olumitinine.
Asana ɔ́mɔtɛ́,
u tɛ ŋá yáamba ɔkɛla aáná aámbáya.
U ké fúle á fáaya ɛ́cɛ ú mɔɔ́ bɔ́ŋɔ ambányɛ yí ekúlú.
13 Ánɔ bámɔ́kɔ́na bɔɔ́sɔ,
banɔ́ bɔɔ́nɛ́nánɔ́ o olumitinine noómi.
Ánɔ bámɔ́kɔ́na na bɔnɔ́mɔcɔ́,
nu kɛ́ndáka.
14 Ánɔ kɛláka bɛsana bikime ne nulénéne.
15 Báámɛ benyíinyí,
nu ŋe nú ményi anyía na Ɛsɛtɛfánas na ciayɛ́ ciíbe cɛ baacɔ á bɔ́ŋa belumitinine *Kilís bé buúsebuúse i iisí cɛ Akayí,
bó bíínjíékíne buéŋí ɔ ɔwɔɔ́lɔ bɔsɔ́ɔ́kɔ́ belumitinine.
Yɛ́mɔtɛ́ asana eeye ɛ́ ŋá mɛ banɔ́ láana aná :
16 Ánɔ lɔ́kɔ́mákɛ́na na nyɛnamá nyɛ́ baacɔ eényí ne eebe bekime a bá ŋa bɔ́ nyiɔ buólí bɔkɔ búmɔtɛ́ ne beébe.
17 Ya mɛ́ŋa háyɛ nyitíne nyí bilúŋe anyía na Ɛsɛtɛfánas,
na Fɔlɛtunatus,
na Akayíkus á bɔ́ŋa aaha náámɛ.
ª Bá ŋa bɔ́ banɔ́ bɛ́hɛ́ŋa ɔ ɔ mɛ ɔ́ɔ́lɔ.
18 Yááŋa anyía bé ŋe bú mi hélúmúnyi ɔtɛ́má a tɔɔna i iŋetí acɛ́ bá ŋá bɔ́ banɔ́ hélúmúkúnyi tɔ́na ɛtɛ́má.
Énu menyí aná olémbi nyɛnamá nyɛ́ baacɔ eényí.
19 Tuɔ́bɔ tú belumitinine a túáŋa i iisí cɛ Asi ŋaá banɔ́ téŋi.
Na Akílas,
ne Bilisíle,
ne belumitinine a bá náŋa bábɔ́ bɛ́bándákána e úúbú ooki,
bekime eébé ŋa bɔ́ banɔ́ téŋi buéŋí e nyimónjóló ne Otéŋí a Waáŋá.
20 Báásɔ́ benyíinyí bekime bé olumitinine ŋa bɔ́ banɔ́ téŋi.
Énu bíémbíkínyínyi banɔ́ na banɔ́ e nulénéne nú nyiinyí noómi.
21 Yaŋɔ́ Bóol,
yaŋɔ́ bɛ́muátá ɛ ŋa mɛ́ banɔ́ ɔɔ́ŋɛ́na bitéŋíti eebi ne úúmi ɔɔbɔ́ ú bɛ́muátá.
22 Mbɔ́kɔ ɔɔcɔ ti ŋé léne Otéŋí a Waáŋá,
bá ŋá nyɛ́mana bé o wuúci lɔmɔkɔ.
ªMalana ta.ª
23 Yésus á banɔ́ sayábákɛ́na.
24 Ɛ ŋa mɛ́ banɔ́ léne banɔ́ bekime abá nua nɔ́ŋa e nyimónjóló ne Yésus Kilís.