11
1 Ɛ́ɛhɛ́ énu mi ketíkínyínyi háyɛ yaŋɔ́ i ŋe mí ketinyinyi Kilís aámɛ a nyɛbɛ́kɛ́lɛ́na.
Indélímínyínyi a abɛ́bándána cá ɛbɛ́cɔ́kɔ́lɛ́na
2 Ɛ ŋa mɛ́ banɔ́ lémbi anyía nu tɛ ŋá nɔ́ mɛ bɛ́hɔ́ya,
nu látákɛ́na bɔmbányɛ bɔmbányɛ abɛ́kɛ́lɛ́na acɛ́ ɛ ŋa mɛ́ banɔ́ eékúnyíki.
3 Mbá ta híáná,
énu menyí anyía *Kilís ŋe téŋínyi ɔnɔ́mɔcɔ́ okime;
ª ɔnɔ́mɛ téŋgínyi oónyí,
Bandɔ́mɛsɛ́ é téŋgínyi Kilís.
4 Ɛ́ɛhɛ́ yááŋa anyía ɔnɔ́mɔcɔ́ okime awɔ́ u ŋá bɛ́cɔ́kɔ́lɛ́na,
ta anyía u ŋé húlinyi baacɔ Bɛsana bɛ́ Bandɔ́mɛsɛ́ na atamba a aatɔ́,
ŋaá bábɛ́na Kilís,
uuyé Otéŋí.
5 Mbá oónjú okime awɔ́ u ŋa bɛ́cɔ́kɔ́lɛ́na,
ta anyía u ŋé húlinyi baacɔ Bɛsana bɛ́ Bandɔ́mɛsɛ́ aatɔ́ etémbí,
ŋa bábɛ́na ɔnɔ́mɛ,
anyía búáŋa bɔkɔ búmɔtɛ́ háyɛ ú ma bɛ́ásáka aatɔ́.ª
6 Aáná,
oónjú okime awɔ́ u tɛ ŋá bɛ́háya wáŋgɛ́sɛ a aatɔ́,
wá bɛ́ásáka aatɔ́ aná.
Mbá háyɛ yááŋa aatɔ́ ɔlama ne oónjú anyía wá bɛ́sɔ́mbáka tuhúnyi,
ta anyía wá bɛ́ásáka aatɔ́,
wá bɛ́háya wáŋgɛ́sɛ a aatɔ́ aná !
7 Ɔnɔ́mɔcɔ́ tɛ ɔ́mɔ nyɛmana wu ɔbɛ́háya atamba a aatɔ́ anyía wáŋa ihúényínyí cɛ Bandɔ́mɛsɛ́,
wuúci tɔ́na núáyɛ́ nuúmi.
Mbá oónjú áŋa yáaŋa nuúmi nɔ́ ɔnɔ́mɛ.
8 Yááŋa anyía Bandɔ́mɛsɛ́ tí ómo hiíte yuúhé yí oónjú o oketi ɔnɔ́mɔcɔ́,
mbá u ŋe kéti oónjú ne yuúhé yɛ́ ɔnɔ́mɔcɔ́;ª
9 híáná Bandɔ́mɛsɛ́ tí ómo kéti ɔnɔ́mɔcɔ́ a asana ne oónjú,
mbá oónjú a asana na ɔnɔ́mɔcɔ́.
10 Ɛ́ɛhɛ́ oónjú á nyɛ́mana wu ɔbɛ́háya wáŋgɛ́sɛ a aatɔ́ a asana ne *bililé bɛ́ masɔ́ma bɛ́ Bandɔ́mɛsɛ́ ;
bú ŋo tóŋínyi anyía ɔnɔ́mɔcɔ́ ú ŋé wuúci téŋínyi.
11 Mbá ta híáná,
i indélímínyínyi ci úúsú olíhe eé buúse bú Otéŋí a Waáŋá,
yááŋa anyía ɔnɔ́mɔcɔ́ tɛ́ka,
oónjú tɛ́ka ;
híáná tɔ́na,
oónjú tɛ́ka,
ɔnɔ́mɔcɔ́ tɛ́ka.
12 Yááŋa anyía Bandɔ́mɛsɛ́ ŋe kéti oónjú ne yuúhé yɛ́ ɔnɔ́mɔcɔ́ ;
mbá oónjú ú ŋeé bíéne ɔnɔ́mɔcɔ́.
Bukime eébú húlúkúne ná Bandɔ́mɛsɛ́.
13 Aá taaká,
énu búlúnéke asana eéyé,
banɔ́ bɛ́muátá,
núá mɛ laána :
Tɛ́ka bú tɛ á bá bɔmbányɛ anyía oónjú á bɛ́cɔ́kɔ́lɔ́kɛ́na Bandɔ́mɛsɛ́ aatɔ́ etémbí e ?
14 Nyɛbá nyɛ́ baacɔ bɛ́muátá ŋaá banɔ́ eékúnyi anyía búáŋa aatɔ́ ɔlama anyía ɔnɔ́mɔcɔ́ é cehísíki tuhúnyi a aatɔ́.
15 Mbá,
né oónjú tuhúnyi a tucaha ŋeé wuúci iínjie nuúmi anyía Bandɔ́mɛsɛ́ ŋeé wuúci iínjíé tuhúnyi anyía túé wuúci húéke aatɔ́ háyɛ bɔlaka.
16 Mbɔ́kɔ ɔɔcɔ a wɔmɔtɛ́ ŋa cɔ́ba ne buúse o osuŋunyi asana eéyé,
wé menyí anyía tu naŋa tu tɛ asɔ́ bɛ́kɛ́lɛ́na aáná náásɔ́,
ta tuɔ́bɔ tú belumitinine tɔ́ Bandɔ́mɛsɛ́.
Nyɛnamá nyɛ́ ɔnyíá bɛnyɛ́ma bɛ́ ɔnyíá bɛ́ Bandɔ́mɛsɛ́
17 Baláamɛ,
a bɛsana a bɛ́ ŋa lɛ́ca túánɔ́ tutúle,
ɛ ŋa mɛ́ aamba ɔtáŋa asana eeye ayɛ́ ɛ tɛ ámɛ bá wu ɔ banɔ́ lémbíki e yiíyi :
Yááŋa anyía,
ekúlú ayɛ́ nu ŋa nɔ́ bɛ́bándána ɔ ɔbɛ́cɔ́kɔ́lɛ́na Bandɔ́mɛsɛ́,
na anyía núánɔ́ látákɛ́na ambányɛ yɛ́ nyɛbɛ́kɛ́lɛ́na,
nu ŋa nɔ́ kɛ́la yáaŋa bɔ kɛla bibébékénú bɛ́ bɛsana.
18 Yí buúse,
ɛ ŋaá mɛ lɔ́kɔ́ma bá kɔ́ɔnaka báyɛ ekúlú ayɛ́ núánɔ́ bɛ́bándákána,
eetíé ŋaá banɔ́ sálɔtɔna.
Búáŋa háyɛ anyía bɛ́mɔtɛ́ bɛsana abɛ́ bá ŋa banɔ́ kɔɔnɛna áŋa taaká.
19 Aá taaká,
mɔsalɔtɔnana ŋá nyɛmana mú ɔbá aanɔ́ ɛ ɛkatɛ́katɛ́,
anyía mbá bé menyí taaká cí bebíínjie o olumitinine noómi.
20 Aáná,
náánɔ́ aámbáya,
ekúlú ayɛ́ nu ŋa nɔ́ bɛ́bándána,
tɛ́ cáŋa tɔ́na bɛnyɛ́ma bɛ́ ɔnyíá bɛ́ Bandɔ́mɛsɛ́ nu ŋa nɔ́ nyíá.
21 Ekúlú yɛ́ ɔnyíá á háma,
hú naányɛ́ ŋe lúúsínyi ɔnyíá bíáyɛ́ bɛnyɛ́ma bɛ́ bɛ́muátá,
ª u tɛ táta bɔsɔ́ɔ́kɔ́,
ɔ ɔkɔɔ́háma ayɛ́ bɔ́mɔtɛ́ baacɔ ŋa bɔ́ lɔ́bɔ ɛcaná,
a bɔ́mɔtɛ́ tɔ́na híólóko meluku.
22 Yaŋɔ́ ɛsɛ,
nua nɔ́ŋa ne meébe na ma ɔnyíáka na ma ɔmúákɛ́na hɔ́á e ?
Mbá anyána aná e ?
Nu ŋa nɔ́ bábɛ́na bɔ bábɛ́na hiɔ́bɔ hí belumitinine Bandɔ́mɛsɛ́ ayɛ́ʼ,
bu lemisi nú ŋe nú lémisi basɔ́kásɔ́ka aatɔ́ e ?
Yámɛ kɔɔna aátɛ́ yí etémbí aná ?
Yámɛ banɔ́ lémbíkí ayɛ́ʼ ?
Eéʼeé,
ta buɔ́sɛ́ !
23 Yááŋa anyíaʼo,
nyiékúnyi anyɛ́ ɛ ŋa mɛ́ banɔ́ eékúnyíkí,
i ŋe mí nyiínyi lɔ́kɔ́máká né Otéŋí a Waáŋá.
Eé buutú ebú bé ŋeé wuúci fiimbie,
Otéŋí a Waáŋá Yésus ŋeé hiíte eléti,ª
24 u ŋé iínjíé Bandɔ́mɛsɛ́ bitéŋíti,
u ŋé yiíyi bákáka,
mbá ɔsɛ :
« Ciamɛ cɛɛ́tɔ eeci a cɛ́áŋa ciínjíénú a yáánɔ́ asana.
Énu hiíte,
núá nyíáka ;
énu búle kɛla híáná ɔ ɔ mɛ bɛ́táá. »
25 Híáná,
e elime cɛ ɔnyíá,
u ŋeé hííte hindeŋé hí meluku,
mbá ɔsɛ :
« Meluku eeme áŋa yɔɔ́sɔɔ́sɔ yɛ́ nyɛlata yɛ́ Bandɔ́mɛsɛ́,
yiíyi maamɛ manɔ́ŋɔ́ ŋé yoónyísínyi.
Énu hiíte,
núá muákɛ́na ;
énu búle kɛla híáná bikúlú bikime ebí nu ŋe nú meéme muána nu mɛ bɛ́tááka. »
26 Aáná bú ŋo tóŋínyi anyía ekúlú ekime ayɛ́ nu ŋa nɔ́ nyíá eléti eeye,
nu muákɛ́na meluku eeme,
nu ŋe nú húlinyi baacɔ asana yí owé ú Otéŋí a Waáŋá ɔ ɔkɔɔ́háma a nyíáyɛ́ nyɛkahálɔ́mɔ́na.
27 Yaátɛ́ asana,
ɔɔcɔ okime awɔ́ u káá nyíáka eléti,
ta anyía yɔ́ múakɛna hindeŋé hí meluku me Otéŋí a Waáŋá a nyɛnamá a nyɛ́ tɛ a bá nyɛnyɛmánánɔ́,
u káá bá na nyɛkua a asana na cɛɛ́tɔ na manɔ́ŋɔ́ me Otéŋí a Waáŋá.
28 Ɛ́ɛhɛ́ aná,
ekúlú ekime ayɛ́ ɔɔcɔ ŋaá nyíá eléti eéyé,
u múákɛ́na meluku eémé,
wu ɔ caŋa bíbúlúnéke bɔmbányɛ bɔmbányɛ e úúyé ɔtɛ́má noómi.
29 Yááŋa anyía ɔɔcɔ okime awɔ́ u káá nyíáka,
yɔ́ muákɛ́na tɛ́ka ne omenyi bɔmbányɛ anyía cɛɛ́tɔ ci Otéŋí a Waáŋá cɛ́áŋa,
u ŋaá nyíá,
u múákɛ́na nyíáyɛ́ nyɛkála nyɛ́ bɛ́muátá.
30 Yaátɛ́ asana eéyé na bɔkɔnɔ́kɔ́nɔ beéŋí na baacɔ bá bɛfɛ́kɛ́,
tɛ́ka na ɔmbana me bú nyíóyóko aanɔ́ ɛ ɛkatɛ́katɛ́,
ɔmbana ú baacɔ weéŋí wéékúne tɔ́na.
31 Mbɔ́kɔ tu naŋa tuesú bíbúlúnéke basɔ́ bɛ́muátá,
Bandɔ́mɛsɛ́ tɛ a bá tɔ́na wu ɔ basɔ́ kélísiki.
32 Otéŋí a Waáŋá naŋa wá basɔ́ kélísíki anyía wá basɔ́ bɔ́nɔ́sɛ́áka ɔ ɔkɛla anyía buɔ́sɛ́ ebú u kéé kélísíki ɔmɛsɛ́,
u tɛ basɔ́ bɔsɔnɛna nyɛkua ɔlɔŋɔ na bɔsɔ́ɔ́kɔ́ bé etémbí.
33 Baláamɛ,
ánɔ kɛláka anyíaʼo,
ekúlú ekime ayɛ́ nuanɔ́ bɛ́bándákána ɔnyíá bɛnyɛ́ma bɛ́ ɔnyíá bɛ́ Bandɔ́mɛsɛ́,
ánɔ tátákánána.
34 Mbá,
mbɔ́kɔ ɛcaná ŋa núana ɔɔcɔ a wɔmɔtɛ́,
u ŋá nyɛmána wu ɔ cáŋa nyíáka e úúyé ooki ;
aáná ekúlú ayɛ́ nuánɔ́ bɛ́bándákána,
Bandɔ́mɛsɛ́ tɛ banɔ́ bɔsɔnɛna nyɛkua a nyíánɔ́ nyɛkɛla.
A bɛsana a bɛ́mɔtɛ́,
i ké mí biíbi cikíliékéne ekúlú ayɛ́ ɛ ká mɛ́ faáya.