Obíkíilie bɛbɔ́kɔ́bɔ́kɔ
10
1 Báámɛ benyíinyí,
yááŋa anyíaʼo,
ɛ ŋa mɛ́ aamba anyía núénú menyi asana a yɛ́ ŋaá bɛ́kɛ́láka ne cíísú sɔ́kɔ́nɔ́ e ekúlú yí *Moyís.
Bandɔ́mɛsɛ́ ŋeé beébe kandákána bekime ɔ ɔlɔndɔ́ noómi,
ª beébe bekime ŋa bɔ́ látɛ́na nuɔmɔ́ e Nubólótoto.ª
2 Aáná aná,
bú ŋo tóŋínyi háyɛ anyía Bandɔ́mɛsɛ́ ŋeé beébe ootókíne na ɔ ɔlɔndɔ́ ne e menyífé noómi ɔ ɔkɛla anyía bábɔ́ bámɔ́kɔ́na balatánɔ́ e nyimónjóló ne Moyís.
3 Bekime ŋa bɔ́ nyíáka nyɛnamá nyɛ́mɔtɛ́ nyɛ́ bɛnyɛ́ma bɛ́ ɔnyíá bí Elilé,ª
4 bɔ́ múáka,
beébe bekime,
nyɛnamá nyɛ́ ɔmúá nyɛ́mɔtɛ́ nyí Elilé.
Yááŋa anyía bá ŋa bɔ́ múáká menyífé a má ŋaá háma a nyɛndányɛ́ nyí Elilé noómi.
Nyiínyi nyɛ́ ŋaá bá ɔlɔŋɔ ne beébe.
Nyɛ́ ŋaá bá *Kilís bɛ́muátá.ª
5 Ta híáná,
beéŋí eé beébeª ti ómo bú bíléníne Bandɔ́mɛsɛ́ ;
yaátɛ́ asana bé ŋe bú wéékúné i iisí cɛ ɔsɛ́bɛ́á noómi.
6 Bɛsana eébí bikime áŋa tubílícínyínyí a tɔ́ ŋaá basɔ́ ɔ́ɔlɔ anyía tu tɛ bámɔ́kɔ́na na ɛcaná ɔ ɔkɛla bɛsana a bɛɛbɛ́ háyɛ beébe.
7 Nuti nyemíki bɛbɔ́kɔ́bɔ́kɔ i iŋetí cɛ báábɔ́ baacɔ a bɔ́mɔtɛ́,
háyɛ búáŋa buɔ́ŋɔ́kɔ́nɔ́ anyía :
« Baacɔ bá bunɔŋɔ ŋe bú límékíne ɔ ɔmɛsɛ́,
bɔ́ nyíáka,
bɔ́ múákɛ́na,
nyɛhatɔkɔna eényí a macakɔna. »*
8 Tu tɛ bɛ́nyɛ́ánáka ɛ ɛnjɔkɔ́nɔ́nɔ noómi háyɛ báábɔ́ baacɔ ɔ bɔ́mɔtɛ́ ŋa bɔ́ bɛ́nyɛ́ánáka ;
yaátɛ́ asana baacɔ tɔ́sɛ́na nyitíne na ɛ́tátɔ́ ŋe bú wéékúné ɔ buɔ́sɛ́ búmɔtɛ́.ª
9 Tu tɛ tɔ́kɔ́kɔ Otéŋí a Waáŋ᪠háyɛ báábɔ́ baacɔ a bɔ́mɔtɛ́ ŋe bú wuúci tɔ́kɔ́kɔ́.
Yaátɛ́ asana mɔɔ́hɔ ŋeé beébe tááká,
bó wéékúne.
10 Nuti bícúcúlékíne Bandɔ́mɛsɛ́ háyɛ báábɔ́ baacɔ a bɔ́mɔtɛ́ ŋe bú wuúci bícúcúlékíné.
Yaátɛ́ asana *elilé yɛ́ bɔsɔ́ma ŋeé beébe ɔ́ɔ́nɔ́kɔ.ª
11 Bɛsana eébí bikime e bí ŋeé beébe hámɔ́kɔ́nɛ́na áŋa tubílícínyínyí a tɔ́ ŋaá basɔ́ ɔ́ɔlɔ anyía túésú bíkékényiki.
Bé ŋeé tuútu ɔɔ́ŋɔ́kɔ́ ɔ ɔ basɔ́ eékúnyíki basɔ́ eebe abá tua sɔáŋa hoóhi na nyɛkahálɔ́mɔ́na nyí Otéŋí a Waáŋá.
12 Ɛ́ɛhɛ́ ɔɔcɔ ewú ú ŋe ményi anyía wáŋa tálɛ́mɛ́na ɛndánáka bɔmbányɛ,
wé bíkékényíki anyía u tɛ kua,
hú túum !
13 Énu menyí anyía muɔ́kɛ́tánana mukime amɔ́ nu ŋa nɔ́ ɔɔ́ndɛ́mána,
baacɔ bekime naŋa bébú muúmu ɔɔ́ndɛ́mákána.
Aá Bandɔ́mɛsɛ́,
wuúci,
u ŋé nyióyísínyi úúyé ɔtáŋa ;
aáná u ti ké yóókóto anyía Sátan á banɔ́ ɔɔ́kɛ́tákɛ́na ɔ ɔhɔla máánɔ́ makɛ́nda.
Ekúlú ayɛ́ u ŋaá banɔ́ ɔɔ́kɛ́tɛ́na,
Bandɔ́mɛsɛ́ káá banɔ́ íinjie makɛ́nda ne me oweéhíkínyínyi,
ne me o muúmu yáka.
14 Ɛ́ɛhɛ́ aná,
banɔ́ báámɛ benyíinyí bá ɔtɛ́má,
énu bíkíilíéke bɛbɔ́kɔ́bɔ́kɔ.
15 I ŋeé mi bíkéti anyía ɛ ŋaá mɛ táŋa ná baacɔ a bá bɔ́ŋa na mɔsɔŋɛ́ a bɛɛtɔ́ ;
énu bílúmíkínyi bɔmbányɛ,
banɔ́ bɛ́muátá,
mbá nu sɔ́mbɔ́tɔ́na mbɔ́kɔ asana ayɛ́ ɛ ŋa mɛ́ kɔɔna áŋa taaká.
16 Ekúlú ayɛ́ tu ŋa sɔ́ múána meluku e hindeŋé ehí tu ŋe sú íinjie bitéŋíti ná Bandɔ́mɛsɛ́,
tɛ́ka tua sɔáŋa balatánɔ́ e nyimónjóló a manɔ́ŋɔ́ me Kilís e ?
Ekúlú ayɛ́ tu ŋa sɔ́ bákána eléti,
tɛ́ka tua sɔáŋa balatánɔ́ e nyimónjóló a cɛɛ́tɔ ci Kilís e ?
17 Eléti áŋa hú ɔ́mɔtɛ́.
Ta ayɛ́ tua sɔ́ŋa basɔ́ beéŋí,
tu ŋe sú yiíyi nyíá basɔ́ bekime ;
bú ŋo tóŋínyi anyía tua sɔ́ŋa cɛɛ́tɔ hú ɛmɔtɛ́.
18 Ánɔ lɛcá hibílícínyínyí eehi a bɔnyɛ *Islayɛ́l :
Ekúlú ayɛ́ bá ŋa bɔ́ nyíá onyiké ú butúké a bábɔ́ sɔ́mbɛ́na Bandɔ́mɛsɛ́,
bá ŋa bɔ́ látana beébe bekime,
bɔ́ bá e nyimónjóló ne wuúci.ª
19 Ɛ ŋa mɛ́ aamba ɔ banɔ́ láana anyía ne bitúké a bá ŋa sɔ́mbɛ́na e esíéké ne esíéké bɛ́muátá tɛ ŋɔ́ yɔ́ɔ́lɔ ta bɔkɔ.
20 Mbá énu menyí anyía bitúké ebí be-ti-menyí Bandɔ́mɛsɛ́ naŋa bábɔ́ sɔ́mbákɛ́na e nyinyemi,
tɛ́ cáŋa ná Bandɔ́mɛsɛ́ bá náŋa bébú biíbi sɔ́mbákɛ́na,
ª mbá ná bɛɛbɛ́ bí bililé.
Buátɛ́ bɔkɔ,
i ti ŋé mí léne,
te butíkítíki,
anyía núánɔ́ látákána e nyimónjóló na bɛɛbɛ́ bí bililé.ª
21 Nu tɛ anɔ́ bá nú ɔkɛlaka anyía banɔ́ a bɔ́mɔtɛ́ nu muákɛ́na meluku e hindeŋé hɛ́ Bandɔ́mɛsɛ́,
nu muákɛ́na tɔ́na a hɛ́ *bɛɛbɛ́ bí bililé.
Híáná tɔ́na,
nu tɛ anɔ́ bá nú ɔkɛlaka anyía nu nyíékínyi na Bandɔ́mɛsɛ́,
nu nyíékínyi tɔ́na na bɛɛbɛ́ bí bililé.
22 Mbɔ́kɔ tu ŋa sɔ́ kɛ́la aáná,
tɛ́ka tu ŋa sɔ́ aamba anyía Bandɔ́mɛsɛ́ á basɔ́ lóbísíkínyi e ?
Wuúci u ŋaá kɛ́nda buéŋí ɔ ɔ basɔ́ hɔla.
Ánɔ kɛláka bɔkɔ bukime o owiínjie Bandɔ́mɛsɛ́ nuúmi
23 Ya mɛ́ŋa na makɛ́nda ma ɔkɛlaka bɔkɔ bukime,
mbá tɛ́ cáŋa bɔkɔ bukime bú ŋɔ́ yɔɔ́lɔ.
Ya mɛ́ŋa na makɛ́nda ma ɔkɛlaka bɔkɔ bukime,
mbá tɛ́ cáŋa bɔkɔ bukime bú ŋó yoónyísínyi olumitinine ú ɔɔcɔ.
24 Ɔɔcɔ okime ŋá nyɛmána wu ɔ cáŋa aambaka bɔmbányɛ bɔ́ bɔsɔ́ɔ́kɔ́ na anyía wá yaámbáka búáyɛ́ bɔmbányɛ bɔ́ bɛ́muátá.
25 Nua nɔ́ŋa na makɛ́nda ma ɔnyíáka onyiké okime awɔ́ nuánɔ́ kúana bé túéke oó nyionyí,
nuti líkíme a asana na túánɔ́ tɔcɔɔ́cɔ́ tɔ́ ɛtɛ́má,
26 ananyía Otéŋí a Waáŋá wáŋa na ɔmɛsɛ́ na bɛnyɛ́ma bikime a bɛ́áŋa noómi.ª
27 Mbɔ́kɔ ɔɔcɔ awɔ́ u tɛ ŋáa háya mɔŋɔlɛ́ né Yésus *Kilís ŋɔ́ yɔ́ɔ lɔ́ŋɔ́kɔ ɔ ɔkɔɔ́nyíá,
ª búɔ́ kuɔŋɔ́ bílénékíne anyía ɔ́ɔ cɔba,
nyíáka bɔ nyíáka bɔkɔ bukime ebú wé yóo wiínjie tɛ́ka na ɛmbataka a asana na hɛcɔɔ́cɔ́ hɛ́ ɔtɛ́má.
28 Mbá asana ɔ́mɔtɛ́,
ɔɔcɔ ɔ́ yɔ́ɔ laana anyía onyiké ú ɛnyama ooci bá má sɔ́mbɛ́na e esíéké,
ɔ tɛ ɔ́mɔ nyɛ́mana wu ɔnyíáka ɔ ɔkɛla anyía e ti kúfítínyi ɔɔcɔ e wé yóo woókísi na a asana na hɛcɔɔ́cɔ́ hɛ́ ɔtɛ́má.
29 A asana na hɛcɔɔ́cɔ́ hɛ́ ɔtɛ́má eéhí ahɛ́ ɛ ŋaá mɛ táŋa tɛ ŋɔ́ yɔ́ɔ lɛca,
mbá hɛ́ ŋa lɛca hú ɔɔcɔ oócí.
Mbá anyíatɛ́ nyiámɛ nyɛbá nyɛ́ ɔkɛlaka bɔkɔ bukime e bú ŋeé mi bíléníne áŋa a asana na hɛcɔɔ́cɔ́ hɛ́ ɔtɛ́má hí etémbí e ?
30 Mbɔ́kɔ i ŋeé mi iínjie Bandɔ́mɛsɛ́ bitéŋíti a bɛnyɛ́ma abɛ́ ɛ ŋaá mɛ nyíá,
mbá anyíatɛ́ aná bá ŋaá mɛ táŋɛ́na ?
31 Ta aátɛ́ ɔ ŋɔ́ɔ nyíá,
ta aátɛ́ ɔ ŋɔ́ɔ múána,
ta bɔkɔ bú etémbí bɔ́ yaátɛ́ ɔ ŋɔ́ɔ kɛla,
buúbu kɛláka o owiínjie Bandɔ́mɛsɛ́ nuúmi.
32 Mbá atɛ kɛla asana a yááŋa yí okúfítínyi te *Besuif,
ta *Bakɛlɛ́k,
ta baacɔ bá hiɔ́bɔ hí belumitinine hɛ́ Bandɔ́mɛsɛ́.
33 Énu mi ketíkínyínyi,
yaŋɔ́ awɔ́ ɛ ŋaá mɛ bɛ́kána ɔkɛla bɔkɔ bukime anyía yémi bílénékíne baacɔ bekime.
Ɛ ŋaá mɛ́ aamba bɔmbányɛ bɔ́ baacɔ bekime o o beébe nohiki,
na anyía yámɛ aambaka búámɛ bɔmbányɛ bɔ́ bɛ́muátá.