Nyɛbɛ́kɛ́lɛ́na nyí Bóol
9
1 Yaŋɔ́ ɛsɛ,
ya mɛ́ŋa na makɛ́nda ma ɔkɛlaka bɔkɔ bukime ebú i ŋeé mi léne ɔkɛla e ?
Yaŋɔ́ ɛsɛ,
ya mɛ́ŋa ɔɔcɔ u ɛndɔ́ma u Yésus,
uusú Otéŋí a Waáŋá e ?
Yaŋɔ́ ɛsɛ,
i ŋe mí wuúci lɛcaka na cáámɛ eése e ?
Yaŋɔ́ ɛsɛ,
banɔ́ bɛ́muátá nua nɔ́ŋa buólí bɔ́ cáámɛ aabá cá bɛ́muátá né Otéŋí a Waáŋá noómi e ?
Mbá anyána aná e ?
2 Mbɔ́kɔ baacɔ a bɔ́mɔtɛ́ ti ŋé bú lumitine anyía ya mɛ́ŋa ɔɔcɔ u ɛndɔ́ma,
tɛ́ka banɔ́ bɛ́muátá nu ŋe nú menyi anyía ya mɛ́ŋa aáná a asana ayɛ́ nua nɔ́ŋa hibílícínyínyí hɛ́ búámɛ buólí bɔ́ ɛndɔ́ma o olíhe ewú i ŋeé mi líhe né Yésus Kilís e ?
3 Ánɔ lɔ́kɔ́ma nyiámɛ nyɛkála eé buúse bɔ́ ba-mɛ-táŋɛ́na.
4 Yaŋɔ́ ɛsɛ́,
tua sɔ́ŋa na makɛ́nda ta ma ɔnyíáka ta ma ɔmúákɛ́na bɔkɔ bukime abɔ́ bá basɔ́ nama e ?
5 Yaŋɔ́ ɛsɛ́,
tua sɔ́ŋa na makɛ́nda ma ɔbátɛ́na ɔmɔtɛ́ a báásɔ́ benyíinyí e beénjú bé olumitinine e,
tú húlé wuúci kandakana háyɛ bɔsɔ́ɔ́kɔ́ baacɔ bá ɛndɔ́ma i iŋetí ci ne benyíinyí bé Otéŋí a Waáŋá ne ci Bíel e ?
6 Mbá anyána yááŋa anyía hú basɔ́ bímuócí,
na yaŋɔ́ na *Baanábas,
túásɔ́ nyɛmána tu ɔnyiɔkɔ buólí na cáásɔ́ aabá cá bɛ́muátá,
mbá tu nyíáka e ?
7 Ánɔ mɛ laana,
yámɛ lɔ́kɔ́ma !
Ɔɔcɔ awɔ háányɛ́ u na mɔɔ́ nyíɔ́kɛna bucénji,
u bɛ́námáka wuúci bɛ́muátá e ?
Ta anyía aányɛ́ u na mɔɔ́ nyíɔkɔ esíéné,
yɔ́ lɔ́bɔ u tɛ nyíá bɛnyɛ́ma bí esíéné eéyé e ?
Ta anyía tɔ́na aányɛ́ u ne meé sókóbíki bitúké,
yɔ́ lɔ́bɔ u tɛ muá mabána amá wá kámáka e bitúké eébí e ?
8 Bɛsana eébí bikime ebí í me mí hiítekine tubílícínyínyí tɛ a bá hú a nyɛbɛ́táá nyɛ́ baacɔ nyiínyi ne nyiínyi ;
mbá te *bikotí bɛ́muátá bí *Moyís ŋe tóŋínyi aáná bɔkɔ búmɔtɛ́.
9 Aáná yááŋa yɔ́ɔ́ŋɔ́kɔ́nɔ́ e nufule nú bikotí anyía :
« Atɛ háya ɛmɔ́má e nyuúté nyɛ́ káwɔ ekúlú ayɛ́ cɛáŋa o oweénde iŋeŋé.
»* Nu ŋe nú kéti yáakɛlá anyía Bandɔ́mɛsɛ́ ŋaá bɛ́ákɛ́na hú olíhe ú káwɔ bímuócí e ?
10 Ɛ́ɛ,
aá taaká yáásɔ́ aháŋá yɛ́ bɛ́muátá u ŋaá táŋa aáná ;
a yáásɔ́ yááŋa yɔ́ɔ́ŋɔ́kɔ́nɔ́ anyía munyiɔ esíéné ŋɔɔ́ nyiɔ na mɔŋɔlɛ́ mekime anyía u káá nyíáka,
muénde iŋeŋé ŋe yéende tɔ́na na mɔŋɔlɛ́ anyía u kɔ́ɔ́ bɔ́ŋɔ núáyɛ́ nuafa.
11 Yaŋɔ́ ɛsɛ́,
tu ŋé sú miékíne moohó me Elilé náánɔ́ e ?
Mbá aátɛ́ a yaabɛ́ yááŋa anyía tu tɛ asɔ́ sáŋa nuafa númɔtɛ́ nɔ́ bɛnyɛ́ma bí imehú náánɔ́ e ?
12 Ɔ́kɔ,
tɛ́ka baacɔ a bɔ́mɔtɛ́ á bɔ́ŋa na makɛ́nda ma ɔtátáka bɛmbányɛ bɛ́ bɛnyɛ́ma náánɔ́ e ?
Aá taaká,
basɔ́ túásɔ́ nyɛ́mana tú ɔhɔla ɔkɛla aáná.
Mbá asana ɔ́mɔtɛ́,
tu tɛ ɔ́mɔ sɔ banɔ́ báta ta buɔ́sɛ́ bɔkɔ a búmɔtɛ́ abɔ́ tu ŋá sɔ́ bá na makɛ́nda ma ɔbata ;
tu ŋe sú eéhínyínyi yáaŋa muuyé mukime ɔ ɔkɛla anyía tu ti kuusi asana a yɛ́mɔtɛ́ a yɛ́ yááŋa yɛ́ ɔkɛla anyía baacɔ tɛ cɔba ne buúse o ohulinyi bɔsɔ́ɔ́kɔ́ Ambányɛ yɛ́ Ɛsɔ́ma yí Yésus *Kilís.
13 Nu ti ŋé nú ményi anyía bɔnyiɔnɔ bé *Ciíbe cɛ Bandɔ́mɛsɛ́ ŋa bɔ́ nɔ́hɛna e buólí eébú e ?
Híáná tɔ́na,
bɔnyiɔnɔ bé nyindúmé nyí nyiluli nyiínjie ŋɔ́ nɔ́hɛna a bɛnyɛ́ma bɛ́ hɔ́á.ª
14 Híáná Otéŋí a Waáŋá ŋaá tákákɛ́ná,
yɔ́ kɔ́ɔna a asana ne behulinyi baacɔ Ambányɛ yɛ́ Ɛsɔ́ma,
bá ŋá bɔ́ nyɛmana bá ɔnɔhɔkɛna a asana na Ambányɛ yɛ́ Ɛsɔ́ma eéyé.ª
15 Aá yaŋɔ́ʼo,
i ti ómó tóŋínyi makɛ́nda eémé ta buɔ́sɛ́ ;
aáná ta ɛ ŋa mɛ́ banɔ́ ɔ́ɔ́ŋɛ́na asana eéyé aaha,
bú tɛ a kɛla anyía yámɛ banɔ́ bataka bɛnyɛ́ma eébí.
Bɔmbányɛ náámɛ anyía yémi wé ɔ ɔhɔla anyía ɔɔcɔ á mɛ ááŋɛ́na nuúmi anɔ́ ya mɛ́ŋa ne nuúnu a asana eéyé.
16 Yááŋa anyíaʼo,
ohulinyi baacɔ Ambányɛ yɛ́ Ɛsɔ́ma tɛ a bá náámɛ háyɛ asana yí ohiitekine nuúmi mbá,
wáŋa yáaŋa yaandándá yɛ́ asana a yááŋa e mi eékínyínyi anyía yámɛ nyɛmána wu ɔkɛlaka efule tɛ́ka ;
yááŋa anyía mbɔ́kɔ i ti ŋé mí húlínyi baacɔ Ambányɛ yɛ́ Ɛsɔ́ma,
mahana buéŋí na yaŋɔ́.
17 Mbɔ́kɔ yaŋɔ́ ɛ ŋaá mɛ háŋáká ohulinyi baacɔ Ambányɛ yɛ́ Ɛsɔ́ma,
keyé ɛ ŋá mɛ nyɛmána na bɛnamá ;
mbá yááŋa anyía ya mɛ́ŋa oweékínyínyi o buúbu kɛla ananyía búáŋa bɔlamɔ́ ebú bé ŋeé mi túéhínyí bu mi túéhínyi.
18 Ɛ́ɛhɛ́ bíámɛ bɛnamá á nyɛ́mana bɛ́ ɔbá hú ohulinyi baacɔ Ambányɛ yɛ́ Ɛsɔ́ma etémbí ne etémbí,
ɛ tɛ batá bɔkɔ ebú yiíyi bɛ́muátá ŋeé mi iínjíé makɛ́nda me o buúbu báta.
19 Yááŋa anyía ta yɛ́ cáŋa á bá anyía ɛ tɛ ámɛ bá a buɔ́lɛ́ bɔ́ ɔɔcɔ a wɔmɔtɛ́,
í me mí oofine a buɔ́lɛ́ bɔ́ baacɔ bekime ɔ ɔkɛla anyía yémí bísúékíne ɔmbana ú baacɔ weéŋí ɔ ɔhɔla né Kilís.
20 Ya mɛ́ŋa anyía,
ekúlú ayɛ́ ya mɛ́ŋa ɛ ɛkatɛ́katɛ́ ci *Besuif,
i ŋeé mi líhe i iŋetí cɛ ɔɔcɔ u Besuif,
ɔ ɔkɛla anyía yémí beébe bísúékíne né Otéŋí a Waáŋá.
Yááŋa anyía,
ɛ ɛkatɛ́katɛ́ cɛ balátɛ́na bikotí bí Moyís,
i ŋeé mi líhe i iŋetí ci ooci awɔ́ u ŋa látɛ́na bikotí eébí ;
yiíyi anyía ɛ tɛ́ ámɛ bá e butéŋí bú bikotí,
ɛ ŋa mɛ́ kɛla aáná ɔ ɔkɛla anyía yémí beébe bísúékíne né Otéŋí a Waáŋá.
21 Mbá,
ekúlú ayɛ́ ya mɛ́ŋa ɛ ɛkatɛ́katɛ́ cɛ baacɔ a bá tɛ́ ŋa bɔ́ látɛ́na bikotí bí Moyís,
i ŋeé mi líhe i iŋetí cɛ baacɔ eébé ɔ ɔkɛla tɔ́na anyía yémí beébe bísúékíne,
yiíyi anyía ɛ tɛ ámɛ bá ooci awɔ́ u tɛ ŋá látɛ́na bikotí bɛ́ Bandɔ́mɛsɛ́ ;
yááŋa anyía ɛ ŋaá mɛ látɛ́na bikotí bí Kilís.
22 Ekúlú ayɛ́ ya mɛ́ŋa ɛ ɛkatɛ́katɛ́ cɛ baacɔ a bá tɛ́ ŋá bɔ́ ɔ́ɔ́nɛ́na o olumitinine noómi,
i ŋeé mi líhe tɔ́na a ciabɔ́ iŋetí ɔ ɔkɛla anyía yémí beébe bísúékíne.
Aáná i ŋe mí hiite olíhe ú ɔɔcɔ okime,
ta waá bá anyána,
ɔ ɔkɛla anyía yémí bísúékíne ɔ bɔ́mɔtɛ́ i ihényí ikime anyía bá nɔ́hɔ́kɔ.
23 Ɛ ŋa mɛ́ kɛla bɛsana bikime eébí a asana ne ohulikinyi baacɔ bɔmbányɛ Ambányɛ yɛ́ Ɛsɔ́ma,
ɔ ɔkɛla anyía yámɛ bá na nuafa ta yaŋɔ́ tɔ́na.
24 Nu ŋe nú ményi anyía ekúlú ekime ayɛ́ baacɔ á bɔ́ŋa e biseŋinyinyi bɛ́ ɔtɛ́tá ɔɔ́ yɔɔ́mbɔ yɛ́ macakɔna,
beéŋí ŋa bɔ́ cábɛna,
mbá hú ɔɔcɔ ɔmɔtɛ́ u naŋa waá háma ɔmbalaŋɛ́ ɔ ɔkɛla anyía wá bɔ́ŋɔ bɛnamá.
Ɛ́ɛhɛ́ ɛ ŋa mɛ́ banɔ́ laana anyía ánɔ bɛ́kɛ́ndɛ́na a nyɛnamá anyɛ́ baacɔ á bɔ́ŋa ɔ ɔtɛ́tá,
ɔ ɔkɛla anyía núénú híítéke ta banɔ́ tɔ́na bɛnamá.
25 Beseŋinyinyi bɛ́ ɔtɛ́tá bekime á bɔ́ŋa ne bikotí a bɛnatákánɔ́;
ª bá ŋa bɔ́ cáŋa ɔlátɛ́na ɔ ɔbɛ́tábɔ́nɛ́na biseŋinyinyi,
ɔ ɔkɛla anyía muútí okime á háma ɔmbalaŋɛ́,
bó hiíteke bɛnamá.
Mbá bɛnamá ebí bé ŋeé beébe nama áŋa bɛnamá bí ekéti yí ekúlú.
A náásɔ́,
tu ŋá sɔ́ bɛ́tábɔ́na ohiite bɛnamá bí ekúlú ekime.
26 Yaátɛ́ asana,
yaŋɔ́ ɛ ŋa mɛ́ cabɛna mbá ɛ tɛ cabɛ́na anyía ɔyá ma yá,
i ŋeé mi túméne tɔ́na bikútú,
mbá i ti túméne hú anyía ɔyá ma yá.
27 I ŋeé mi kéli yaŋɔ́ bɛ́muátá ciamɛ cɛɛ́tɔ buéŋí,
í me mí ciíci oofinyi a buɔ́lɛ́ anyía yaŋɔ́ ewú i ŋe mí húlíkínyi baacɔ Ambányɛ yɛ́ Ɛsɔ́ma,
Bandɔ́mɛsɛ́ ti mi bínéŋítínyi.