Ambányɛ yɛ́ Ɛsɔ́ma yí Yésus Kilís a waátákɛ́nánɔ́ ɔ ɔmbásá
2
1 Aá yaŋɔ́ʼo,
baláamɛ,
ekúlú ayɛ́ ɛ ŋgaá mɛ faáya náánɔ́ ɔ ɔkɔɔ́ banɔ́ námbɔ́nɛ́na injibí cɛ́ Bɛsana bɛ́ Bandɔ́mɛsɛ́,
ª ɛ tɛ ɔ́mɔɔ́ bɛ́kɛ́lɛ́na bɛnatákánɔ́ bí mehúnyi,
ta ɔtáŋa ú injiŋé.
2 Mbá ɛ ŋa mɛ́ cáŋa ɔsɔ́mbɔ́tɔ́na hú omenyi asana ɔ́mɔtɛ́ :
Ɔ banɔ́ húlinyi Yésus *Kilís,
wuúci a waátákɛ́nánɔ́ ɔ ɔmbásá ɔ ɔmuaná.
3 Yaŋɔ́ bɛ́muátá,
ekúlú ayɛ́ ɛ ŋaá mɛ bá náánɔ́,
ɛ ŋaá mɛ bá na makasa,
ne bulíkílíki ɔ ɔtɛ́má,
ɛ nakámáka hú bakɔ bakɔ bakɔ.
4 Ta híáná,
ekúlú ayɛ́ ɛ ŋa mɛ́ bá yámɛ táŋáka na baacɔ,
ɛ ŋa mɛ́ banɔ́ húlikinyi Ambányɛ yɛ́ Ɛsɔ́ma ;
ɛ tɛ ɔ́mɔ́ bɛ́kɛ́lɛ́na tusiŋítí tɔ́ ɔtáŋa tú omenyi ú baacɔ o obísúékíne baacɔ o olumitinine ;
mbá,
makɛ́nda me Elilé ma ŋaá bá me yoónyísíkínyínyi bɛsana eébí,
5 ɔ ɔkɛla anyía uúnú olumitinine ti bítímbíníne o omenyi ú baacɔ,
mbá a makɛ́nda ma Bandɔ́mɛsɛ́.
Injiŋé cɛ Bandɔ́mɛsɛ́
6 Yiíye anyía omenyi tú ŋe sú húlinyi bɛɔ́nɛ́nánɔ́ bí belumitinine *Kilís ;
ú tɛ á bá ú hɛɛya eehi,
ta ú *baáŋá bá hɛɛya eehi,
anyía Bandɔ́mɛsɛ́ kéé beébe menyisiki bekime.
7 Tu ŋa sɔ́ námbɔnɛna baacɔ injibí ci omenyi ú Bandɔ́mɛsɛ́.
Wuúci Bandɔ́mɛsɛ́ ŋaá cáŋa ɔsɔ́mbɔ́tɔ́na feeké ɛ́cɛ u ti ŋé keti na ɔmɛsɛ́ na ɔmuaná ɔ ɔkɛla anyía tuésu hiíte yaáláka eéyé e nuúmi.
8 Ta waáŋá ɔmɔtɛ́ a baáŋá bá ɔmɛsɛ́ tí ómó menyi omenyi oócí.
Mbɔ́kɔ bébú menyi,
keyé bɔ́ tɛ ɔ́mɔɔ́ bɔ́ waátɛ́na ɔ ɔmbásá ɔ ɔmuaná Otéŋí a Waáŋá.
ª Wáŋa onyíóyónó ne nuúmi hú mbiɔ́kɛ.
9 Háyɛ yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Bandɔ́mɛsɛ́ ŋaá tábɔ́nákɛ́na baacɔ e bé ŋe bú wuúci léne bɔkɔ ebú nyiíse tɛ ŋáá lɛca ta buɔ́sɛ́,
ootú tɛ lɔ́kɔ́ma ta buɔ́sɛ́,
aatɔ́ tɛ bɛ́táá ta buɔ́sɛ́ ».*
10 Bandɔ́mɛsɛ́ nyi buúbu basɔ́ námbɔ́nɛ́na eényí e elime cɛ yááyɛ́ Elilé.
Yááŋa anyía Elilé ŋe ményi ocíbúne bɛsana bikime bɔmbányɛ bɔmbányɛ,
ta a bɛ́áŋa i injibí cɛ́ bɛsana bɛ́ Bandɔ́mɛsɛ́ noómi.
11 Ta ɔɔcɔ a bɔnyɛ baacɔ ti ŋéé ményi aátɛ́ yááŋa ɔ ɔtɛ́má ú ɔɔcɔ noómi,
ɛ tɛ ŋáa bá hú elilé yɛ́ ɔɔcɔ a yááŋa nááyá ;
híáná tɔ́na ta ɔɔcɔ ti ŋéé ményi aátɛ́ Bandɔ́mɛsɛ́ ŋá bɛ́táá,
ɛ tɛ ŋáa bá Elilé yɛ́ Bandɔ́mɛsɛ́ bɛ́muátá.
12 Aá basɔ́,
Elilé ayɛ́ tua sɔ́ŋa ne yiíyi tɛ á bá yɛ́ baacɔ bá hɛɛya eehi,
mbá yááŋa Elilé ayɛ́ Bandɔ́mɛsɛ́ ŋaá basɔ́ iínjíé ɔ ɔkɛla anyía túésú ményi anyána Bandɔ́mɛsɛ́ ŋaá basɔ́ bóosi.
13 Ɛ́ɛhɛ́ basɔ́ tu ŋe sú yiíyi eékúnyi a baacɔ,
tɛ́ cáŋa ne mehúnyi me tusiŋítí tɔ́ ɔtáŋa tɔ́ baacɔ,
mbá tu ŋe sú eékúnyi baacɔ bé Elilé ne mehúnyi emé Elilé yɛ́ Bandɔ́mɛsɛ́ ŋá basɔ́ eékúnyi.
Aáná tu ŋe sú búlúníne baacɔ a bá bɔ́ŋa ne Elilé yɛ́ Bandɔ́mɛsɛ́ taaká cɛ́ Bɛsana bí Elilé.ª
14 Mbá ɔɔcɔ u bɔtɔhɔ ti ŋéé lúmitine buúse bukime Bɛsana bí Elilé yɛ́ Bandɔ́mɛsɛ́,
anyía bɛ́áŋa nááyá háyɛ bɛsana bɛ́ buála ;
u tɛ á bá wu omenyi o biíbi lɔ́kɔ́ma bɔmbányɛ,
ananyía hú ɔɔcɔ a wáŋa ne Elilé bímuócí wáŋa wu o biíbi búlúnéke.
15 Mbá ɔɔcɔ ewú Elilé yɛ́ Bandɔ́mɛsɛ́ ŋe kéndi wáŋa wu obúlúnéke bɛsana bikime ;
mbá ta ɔɔcɔ tɛ bɔ́ŋɔ ohónyí ú o wuúci búlúnéke.
16 Aáná yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Aányɛ́ wáŋa wu omenyi nyɛbɛ́táá nyí Otéŋí a Waáŋá ɔ ɔkɛla anyía wé wuúci hɔŋɔ́náka e ?
»* Aá basɔ́,
tua sɔ́ŋa na nyɛbɛ́táá nyí Kilís.