Nufule nú buúse enú Bóol ŋɔ yɔɔ́ŋɔ́kɛ́ná belumitinine bá
Kɔlɛ́ɛntɛ
Bitéŋíti
1
1 Yaŋɔ́ Bóol,
*Bandɔ́mɛsɛ́ ŋaá háŋá ɔ mɛ lɔ́ŋɛ́ta anyía yámɛ bá *ɔɔcɔ u ɛndɔ́ma u *Yésus *Kilís.
Tua sɔ́ŋa na yaŋɔ́ ne uusú onyíinyí u olumitinine,
Sosotɛ́n.ª
2 Tu ŋa sɔ́ banɔ́ ɔ́ɔ́ŋɛ́na nufule eenu,
banɔ́ abá nua nɔ́ŋa hiɔ́bɔ hí belumitinine Bandɔ́mɛsɛ́ hɛ́ Kɔlɛ́ɛntɛ,
banɔ́ abá Bandɔ́mɛsɛ́ ŋɔɔ́ lɔ́tɔ́kɔ ɔ ɔbá e nyimónjóló ne Yésus Kilís.
U ŋaá banɔ́ fúúmínyí ɔlɔŋɔ ne eebe bekime a bɛhaála bikime e bé ŋe bú nyémi nyiínyi nyí uusú Otéŋí a Waáŋá Yésus Kilís,
wáŋa ne uubú Otéŋí a Waáŋá ne uusú áyá.
3 Na ciasɔ́ Síkíne Bandɔ́mɛsɛ́ ne uusú Otéŋí a Waáŋá Yésus Kilís bá banɔ́ sayábákɛ́na,
bá banɔ́ iínjíékíne mbuumu e cíínú ɛtɛ́má noómi.
Bandɔ́mɛsɛ́ ŋaá basɔ́ bóosi e elime ci Yésus Kilís
4 Ɛ naŋa yémi iínjíékíne ciamɛ Bandɔ́mɛsɛ́ª bitéŋíti ekúlú ekime a asana ayɛ́ u ŋaá banɔ́ bóósíki e elime ci Yésus Kilís.
5 Yááŋa anyía nua nɔ́ŋa e nyimónjóló ne wuúci ;
aáná Bandɔ́mɛsɛ́ áŋa ɔ banɔ́ nyɛ́hɛ́tɛ́nánɔ́ bɛmbányɛ bɛ́ bɛsana bikime,
na ɔ ɔtáŋa ne o omenyi áyá,
6 anyía Ambányɛ yɛ́ Ɛsɔ́ma yí Yésus *Kilís ayɛ́ tú ŋá sɔ́ banɔ́ húlíkínyi áŋa yɔɔ́nɛ́nánɔ́ na makɛ́nda e cíínú ɛtɛ́má noómi.
7 Yaátɛ́ asana ta bɔkɔ a búmɔtɛ́ a bɛnyɛ́ma abɛ́ Bandɔ́mɛsɛ́ ŋé yíinjie aayá a baacɔ tɛ ŋá banɔ́ bɛ́ámbɛ́na,
banɔ́ abá nu ŋa nɔ́ táta na mɔŋɔlɛ́ buɔ́sɛ́ ebú uusú Otéŋí a Waáŋá Yésus Kilís kéé bítóŋínyi náásɔ́.
8 Yésus Kilís oócí u káá banɔ́ kíndísíki ɔ ɔkɔɔ́háma a nyɛmana,
ananyía nuánɔ́ bámɔ́kɔ́na tɛ́ka na hɛkɔma buɔ́sɛ́ abɔ́ u ká ka hálɔ́mɔ́na o okokélísi baacɔ.
9 Bandɔ́mɛsɛ́ u ŋaá banɔ́ lɔ́ŋɔ́kɔ́ anyía núánɔ́ bámɔ́kɔ́na e nyimónjóló ne uuyé Ɔɔ́nɔ́ Yésus Kilís,
uusú Otéŋí a Waáŋá.
Wáŋa ooci ewú u ŋé nyíóyísínyi cááyɛ́ esúŋe ekime.
Musalɔtɔnana ɔ hiɔ́bɔ hí belumitinine hɛ́ Kɔlɛ́ɛntɛ
10 Isíʼo,
banɔ́ báámɛ benyíinyí,
ɛ ŋa mɛ́ aamba ɔ banɔ́ láana a makɛ́nda me uusú Otéŋí a Waáŋá Yésus *Kilís anyíaʼo :
Cɔ́kɔ́lɛ,
ánɔ bámɔ́kɔ́na nyuúté nyɛ́mɔtɛ́ ;
nuti lumítíne anyía eetíé á banɔ́ sálɔ́tɔ́kɔ́na ;
mbá ánɔ bámɔ́kɔ́na balatákánɔ́ e nyimónjóló bɔmbányɛ bɔmbányɛ,
na a nyɛánɔ́ nyɛbɛ́táá,
na a bɛsana abɛ́ nu ŋa nɔ́ tákɛ́na ɔkɛla.
11 Banɔ́,
báámɛ benyíinyí,
yááŋa anyíaʼo :
Baacɔ bá hɛnyɛ́nɔ́ hí Kolowéª ŋa ka bɔ́ mɛ́ laakɛ́na anyía tukókó má kúákɔna aanɔ́ ɛ ɛkatɛ́katɛ́.
12 Yááŋa anyía bɔ́mɔtɛ́ baacɔ aanɔ́ ɛ ɛkatɛ́katɛ́ ŋa bɔ́ kɔɔna báyɛ :
« Basɔ́,
tua sɔ́ŋa elime ne Bóol.
» A bɔ́mɔtɛ́ báyɛ :
« Basɔ́,
tua sɔ́ŋa elime na Abólos.
»ª A bɔ́mɔtɛ́ báyɛ :
« Basɔ́,
tua sɔ́ŋa elime na Sɛfas ».
Eebe a bɔ́mɔtɛ́ tɔ́na báyɛ :
« Aá basɔ́,
tua sɔ́ŋa elime ne Kilís ».
13 Ééʼ buamɛ,
mbá Kilís áŋa ɔbɛ́sálɔ́tɔ́kɔ́nánɔ́ e ?
Ɔ́kɔ,
bá ŋa yaátákɛ́na Bóol ɔ ɔmbásá ɔ ɔmuaná a yáánɔ́ asana,
ta anyía e nyiínyi nyí Bóol bá ŋaá banɔ́ ootókíne e ?
14 Aá yaŋɔ́,
i ŋeé mi iínjie Bandɔ́mɛsɛ́ bitéŋíti anyía i ŋe mí ootíne hú ne Kilíbusª na Káyusª aanɔ́ ɛ ɛkatɛ́katɛ́.
15 Aáná ta ɔɔcɔ tɛ á bá wu ɔsána ɛŋɔ́nɔ anyía bá ŋaá banɔ́ óótókíne eémi e nyiínyi.
16 Ɛ́ɛ,
ɛ́ ma mɛ́ bɛ́táá,
i ŋeé mi ootókíne tɔ́na baacɔ bé ciíbe cɛ baacɔ cɛ Ɛsɛtɛfánas,
ɛ tɛ ŋa háná ámɛ bɛ́táá anyía i ŋeé mi ootíne tɔ́na ɔɔcɔ u etémbí.
17 Yááŋa anyíaʼo,
Kilís tɛ ɔ́mɔɔ́ mɛ tɔ́ma hú o okowóotine baacɔ,
mbá u ŋaá hɔ́lá ɔ mɛ tɔ́ma o okoó beébe húlínyi Ambányɛ yɛ́ Ɛsɔ́ma ;
tɛ́ka ne tusiŋítí tɔ́ ɔtáŋa tɔ́ baacɔ,
ɔ ɔkɛla anyía owé ú Kilís ɔ ɔmbásá ɔ ɔmuaná tɛ́ háma buólí bú nubókó.
Yésus áŋa injiŋé ci ohúle ná Bandɔ́mɛsɛ́
18 Yááŋa anyíaʼo,
nyihulinyi baacɔ asana yí owé ú *Kilís ɔ ɔmbásá ɔ ɔmuaná áŋa háyɛ asana yɛ́ buála a baacɔ a bá bɔ́ŋa o ohónyí wú bunyímé,
mbá a basɔ́ abá tua sɔ́ŋa o ohónyí wú nyɛnɔhɔ,
ú ŋaá basɔ́ cíbúníne makɛ́nda ma Bandɔ́mɛsɛ́.
19 Aáná yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Ɛ ká mɛ́ ááŋíaka a bɛɛtɔ́ injiŋé ci benjiŋénjíŋe,
mío témbúnyísíki omenyi ú bemenyi bɛsana ».*
20 Onjiŋénjíŋe weényi aná e ?
Háányɛ́ *muékúnyi bikotí áŋa e ?
Ta anyía musuŋunyi bɛsana mɔ hɛɛya eehi e ?
Aá taaká,
Bandɔ́mɛsɛ́ áŋa otóŋgínyínyi baacɔ anyía injiŋé cɛ baacɔ bá ɔmɛsɛ́ áŋa injiŋé cɛ buála.
21 Yááŋa anyíaʼo,
haála ahá Bandɔ́mɛsɛ́ ŋoó tóŋgínyí baacɔ bɛsana na ciayɛ́ injiŋé,
beébe te o wuúci menyutune a ciabɔ́ injiŋé ;
yaátɛ́ asana Bandɔ́mɛsɛ́ ŋa sɔ́mbɔ́tɔ́ná onohiki baacɔ e bé ŋe bú lumitinine nyi-beébe-hulinyi owé ú Yésus Kilís a nyɛ́áŋa háyɛ asana yɛ́ buála.
22 *Besuif ŋa bɔ́ báta anyía bé beébe oónyísíkínyinyi ne bikéki bí tubílícínyínyí ;
*Bakɛlɛ́k,
beébe bábɔ́ áambaka anyía bé beébe oónyísíkínyi na ɔtáŋa ú injiŋé.
23 Mbá aá basɔ́,
tu ŋe sú húlínyi baacɔ asana yí Kilís a waátákɛ́nánɔ́ ɔ ɔmbásá ɔ ɔmuaná.
Yiíyi Besuif ŋa bɔ́ lɛca háyɛ aabɛ́ yɛ́ asanaª,
baacɔ a bá tɛ ábɔ́ bá Besuif ébú hiíteke háyɛ asana yɛ́ buála.
24 Mbá a aháŋá na baacɔ abá Bandɔ́mɛsɛ́ ŋɔɔ́ lɔ́ŋɔ́kɔ́,
te Besuif ta Bakɛlɛ́k,
Kilís áŋa makɛ́nda ma Bandɔ́mɛsɛ́,
wuúci tɔ́na ciayɛ́ injiŋé,
25 ananyía asana ayɛ́ baacɔ bá ɔmɛsɛ́ ŋa bɔ́ lɛca háyɛ yaála yí injiŋé yɛ́ Bandɔ́mɛsɛ́ áŋa ne injiŋé a cɛ́ á hɔ́la omenyi ú baacɔ ;
híáná tɔ́na asana ayɛ́ bá ŋa bɔ́ lɛca háyɛ bɔnɔ́nɔ́ bɔ́ Bandɔ́mɛsɛ́ ŋaá kɛ́nda ɔ ɔhɔla makɛ́nda ma baacɔ.
26 Banɔ́,
báámɛ benyíinyí,
énu menyi anyía Bandɔ́mɛsɛ́ u ŋaá banɔ́ lɔ́ŋɔ́kɔ́ ;
ánɔ bɛ́lɛ́ca aná :
Baacɔ beéŋí aanɔ́ ɛ ɛkatɛ́katɛ́ tɛ́ ábɔ́ bá ne injiŋé a nyɛlɛca nyɛ́ baacɔ bá ɔmɛsɛ́,
beéŋí tɛ́ka baacɔ bá maatá masáánɔ́,
beéŋí tɔ́na tɛ́ka baacɔ bé eénye.
27 Mbá Bandɔ́mɛsɛ́ ŋaá bɛ́kɛ́lákɛ́na bɛsana abɛ́ baacɔ ŋa bɔ́ lɛca anyía bɛ́áŋa tuálaála tɔ́ bɛsana o otémbúnyísi injiŋé cɛ baacɔ bá ɔmɛsɛ́,
yɔ́ bɛ́kɛ́lákɛ́na tɔ́na bɛsana bɛ́ ɔmɛsɛ́ abɛ́ baacɔ ŋa bɔ́ lɛca anyía bɛ́áŋa na butɔmbɔ́ o otémbúnyísíki eebi a bɛ́áŋa na makɛ́nda.
28 Bandɔ́mɛsɛ́ ŋaá bɛ́kɛ́lákɛ́na bɛsana bikime bɛ́ bunjúálɛ́ eébí abɛ́ baacɔ ŋa bɔ́ bábɛ́na,
bé biíbi hiiteke háyɛ bɛsana bí etémbí ne etémbí omenyisiki eebi a bɛ́áŋa hɔ́á,
29 ɔ ɔkɛla anyía ta ɔɔcɔ ti bíbééti eeyé eé buúse.
30 Yááŋa anyía nááyá nua nɔ́ŋa e nyimónjóló ne Yésus Kilís.
Wuúci wá yáaŋa ciasɔ́ injiŋé e ci ŋeé húle ná Bandɔ́mɛsɛ́,
wuúci u ŋaá basɔ́ télímíkínyí na bɛtálɛ́mákánánɔ́ bɛ́ baacɔ,
ne bifúúmékénénú,
na bɛháŋɔ́nákánɔ́ eé buúse bɔ́ Bandɔ́mɛsɛ́.
31 Háyɛ yááŋa yɔɔ́ŋɔ́kɔ́nɔ́ anyía :
« Ɔɔcɔ awɔ́ u ŋa yáamba obíbééti é bíbéétíki a asana ne Otéŋí a Waáŋá ».*