Tua sɔ́ŋa bɔnyiɔnɔ bá Bandɔ́mɛsɛ́
3
1 Baláamɛ e,
aá yaŋɔ́ʼo,
ɛ tɛ ɔ́mɔɔ́ bá wu ɔ banɔ́ láakɛna bɛsana háyɛ baacɔ ebé Elilé ŋe kéndisi,
mbá ɛ ŋa mɛ́ banɔ́ táŋgɛ́na yáaŋa háyɛ baacɔ ebé imehú ŋe kéndisi ;
háyɛ tunɔ́sɛ́nɔ́sɛ́ o olumitinine ú *Kilís noómi.
2 Mabána meéme ɛ ŋa mɛ́ banɔ́ eémútíkí ;
tɛ́ cáŋa taaká cɛ bɛnyɛ́ma bɛ́ ɔnyíáka ɛ ŋa mɛ́ banɔ́ nyísíkí.
Yááŋa anyía nu tɛ ɔ́mɔɔ́ nɔ́ bámɔ́kɔ́na nú o biíbi cényi ɔnyíá,
ta hú aámbáya eeci,
nu tɛ anɔ́ bá nu o biíbi cényi ɔnyíá,
anyía nua nuánáŋa eebe ebé imehú ŋe kéndisi.
3 Yááŋa anyíaʼo,
nua nuánáŋa ɔ ɔwaákánána,
nu sááka banɔ́ na banɔ́ ;
ɔ́kɔ,
tɛ́ka bú ŋeé tóŋínyi bɔmbányɛ anyía imehú cɛ́ a yánáŋa ɔ ɔ banɔ́ kéndisi e ?
Ɔ́kɔ,
tɛ́ka nua núánáŋa o olíhe háyɛ baacɔ bé imehú náŋa bébú lihéke e ?
4 Yááŋa anyía,
ekúlú ayɛ́ ɔɔcɔ aanɔ́ ɛ ɛkatɛ́katɛ́ ŋá kɔ́ɔna anyía :
« Yaŋɔ́,
ya mɛ́ŋa elime ne Bóol »,
a wɔmɔtɛ́ kɔɔnaka ɔsɛ :
« Yaŋɔ́,
ya mɛ́ŋa elime na Abólos » ;
ɔ́kɔ,
tɛ́ka nu ŋe nú líhe háyɛ baacɔ bé imehú náŋa bé bú líhéke e ?
5 Aányɛ́ wáŋa Abólos e ?
Yaŋɔ́ Bóol,
ya mɛ́ŋa aányɛ́ e ?
Yaŋɔ́ ɛsɛ basɔ́ bekime béfendí tua sɔ́ŋa hú bɔnyiɔnɔ bá Bandɔ́mɛsɛ́ e ?
Basɔ́ tu ŋa sɔ́ banɔ́ bísúékíné o olumitinine.
Aáná,
hú naányɛ́ ŋɔɔ nyíɔ́kɛ́na Otéŋí a Waáŋá hú buólí ebú u ŋeé wuúci iínjíé.
6 Yaŋɔ́ ɛ ŋa mɛ́ ɔ́ɔ́nɔ́kɔ́,
Abólos yó wóotokine menyífé,
mbá Bandɔ́mɛsɛ́ u ŋe kúmísíki.
7 Aáná,
muɔ́nɔ bɛnyɛ́ma tɛ á bá ta bɔkɔ ;
te muotine menyífé.
Hú Bandɔ́mɛsɛ́ bímuócí ewú u ŋe kúmísíki wáŋa bɔkɔ.
8 Na muɔ́nɔ bɛnyɛ́ma ne muotine menyífé á bɔ́ŋa bɔkɔ búmɔtɛ́ ;
hú naányɛ́ kɔ́ɔ́ bɔ́ŋɔ bɛnamá a búáyɛ́ buólí bɔ́ bɛ́muátá.
9 Yááŋa anyía basɔ́,
tua sɔ́ŋa bɔnyiɔnɔ bá Bandɔ́mɛsɛ́ ;
banɔ́ yááyɛ́ esíéné,
banɔ́ tɔ́na ciíbe acɛ́ u ŋa fálɛfa.
10 Bandɔ́mɛsɛ́ ŋeé mi boósíki buéŋí na nyɛnamá nyí nuubo ;
ɛ́ɛhɛ́ yaŋɔ́ ɛ ŋaá mɛ tákákɛ́ná numbelíke nɔ́ ɔfalɛfa háyɛ ambányɛ yɛ́ mufalɛfa meébe,
ɔɔcɔ u etémbí ŋa fálɛ́fáka hɔ́á.
Mbá ɔɔcɔ okime awɔ́ u ŋa fálɛfa hɔ́á ŋá nyɛmána wu obíkékényíki a nyɛnamá anyɛ́ u ŋa fálɛfa.
11 A asana eyí numbelíke a yáa báka nɔtákákɛ́nánɔ́,
nuúnu eénú núáŋa Yésus Kilís,
ta ɔɔcɔ tɛ á bá wu ɔtákákɛ́na numbelíke nú etémbí hɔ́á.
12 Bɔ́mɔtɛ́ baacɔ ŋa bɔ́ falɛfa e numbelíke eénú na andányɛ́,
ne biléŋú,
ne biomí bɛ́ nyɛnɔ́kɔ́.
A bɔ́mɔtɛ́ baacɔ ábɔ́ fálɛfaka ne imbiŋe,
na tɔtálá,
ne imbolo.
13 Énu menyi anyía buólí bɔ́ ɔɔcɔ okime kéé bítóŋínyi ekúlú eyí Yésus Kilís ká ka hálɔ́mɔ́na o okokélísi baacɔ,
anyía e ekúlú eéyé Bandɔ́mɛsɛ́ kéé búlúnéke ne oocó nyɛnamá nyí buólí anyɛ́ ɔɔcɔ okime ŋɔɔ́ nyiɔkɔ.
14 Mbɔ́kɔ buólí abɔ́ ɔɔcɔ ŋɔɔ́ nyiɔ́kɔ káá lɛ́cakana,
Kilís kéé wuúci iínjie bɛmbányɛ bɛ́ bɛnamá.
15 Mbá mbɔ́kɔ buólí abɔ́ ɔɔcɔ ŋɔɔ́ nyiɔ́kɔ ŋá lɔ́kɔ́táka hú táákɔ,
u tɛ kɔ́ɔ́ bɔ́ŋɔ bɛnamá buúse bukime ;
Kilís kéé wuúci nohi,
mbá yɔ́ bá háyɛ ɔɔcɔ awɔ́ á bɛ́hɔɔ ɛ́cɛ ú ma hɔ́lɛna o oocó.
16 Nu ŋe nú menyi bɔmbányɛ bɔmbányɛ anyía nua nɔ́ŋa ciíbe cɛ Bandɔ́mɛsɛ́,
ª nu menyukune tɔ́na anyía yááyɛ́ Elilé ŋe límine náánɔ́.
17 Mbɔ́kɔ ɔɔcɔ ŋa kátaka ciíbe cɛ Bandɔ́mɛsɛ́,
Bandɔ́mɛsɛ́ kéé menyisi uuyé olíhe.
Yááŋa anyía ciíbe acɛ́ Bandɔ́mɛsɛ́ ŋeé líhe hɔ́á áŋa ifúúménénú.
Banɔ́ nua nɔ́ŋa ciátɛ́ ciíbe.
18 Ta ɔɔcɔ ti bínéŋe wuúci bɛ́muátá.
Mbɔ́kɔ ɔɔcɔ aanɔ́ ɛ ɛkatɛ́katɛ́ ŋaa bɛ́táá ɔbámɔ́kɔ́na ne injiŋé a nyɛlɛca nyɛ́ baacɔ bá hɛɛya eehi,
bɔmbányɛ anyía wá bɛ́cáŋa yaála,
ɔ ɔkɛla anyía wá bámɔ́kɔ́na taaká ne injiŋé.
19 Yááŋa anyía injiŋé cɛ baacɔ bá hɛɛya eehi áŋa háyɛ buála eé buúse bɔ́ Bandɔ́mɛsɛ́.
Yaátɛ́ asana yááŋa yɔɔ́ŋɔ́kɔ́nɔ́ anyía :
« Bandɔ́mɛsɛ́ ŋa hátɛna benjiŋénjíŋe a máábɔ́ menjiŋé ma bɛ́muátá ».*
20 Yiíye tɔ́na yɔɔ́ŋɔ́kɔ́ŋɔ́ anyía :
« Otéŋí a Waáŋá ŋeé menyi anyía ɛbɛ́táá cí benjiŋénjíŋe tɛ ŋɔ́ yɔ́ɔ́lɔ ta bɔkɔ ».*
21 Aáná ɔɔcɔ tɛ ɔ́mɔ́ nyɛ́mana wu ɔháya núáyɛ́ nuúmi ná baacɔ,
ananyía na baacɔ eébé bekime na bɛnyɛ́ma bikime bɛ́áŋa bíánɔ́.
22 Ta yaŋɔ́ Bóol,
ta Abólos,
ta Sɛfas,
ta ɔmɛsɛ́,
te olíhe,
te owé,
ta bɛsana bɛ́ aámbáya,
mbá ta bɛsana bɛ́ nɔɔyá,
bikime áŋa bíánɔ́.
23 Mbá banɔ́ nua nɔ́ŋa baacɔ bé Kilís ;
Kilís u Bandɔ́mɛsɛ́.