Ne Bóol ne Sílas a Tɛsaloníke
17
1 E elime eécí,
bá ŋa bɔ́ hɔ́lákɛ́na na a bálɛ́ka cɛ Amfibolis na a bálɛ́ka cɛ Aboloni,
bá ŋga hámá a Tɛsaloníke.
Hɔ́á *Besuif ŋa bɔ́ bá na *andaŋía yɛ́ ɔbɛ́cɔ́kɔ́lɛ́na.
2 Bóol ŋe yóofine a andaŋía eéyí háyɛ u ŋaá bá wa kɛ́laka.
Bɛhanyɛ bɛ́tátɔ́ bɛ́ *buɔ́sɛ́ bú ehélúme bú Besuif,
u ŋaá bá we súŋgunyinyi ne Besuif a asana yɛ́ Ciɔɔ́ŋɛ́ cɛ́ Bandɔ́mɛsɛ́.
3 U ŋeé beébe ciíci hembulekine,
u tóŋgínyi háyɛ cɛ́ ŋa kɔ́ɔna anyía yɛ́ ŋa nyɛmána anyía Yésus á lɔ́kɔ́máka muuyé mbá u háanyua e biwéewé ;
u kɔɔnaka ɔsɛ :
« Yésus ooci awɔ́ ɛ́ ŋa mɛ́ banɔ́ láana,
wuúci wáŋa *Mesíi. »
4 Aáná Besuif a bɔ́mɔtɛ́ ŋe bú lúmítékíníne bɛsana eébí,
bé ŋé óófókíne ɔ ɔlɔŋɔ ú ne Bóol ne Sílas.
Híáná ne beénjú bá bɔkɔ a aabá beéŋí na *Bakɛlɛ́k a bá ŋa bɔ́ bá bébú nyémiki Bandɔ́mɛsɛ́ ŋe bú oófókíne tɔ́na ɔ ɔlɔŋɔ oócí.
5 Mbá Besuif a bá ŋa bɔ́ bá na yaáká ŋe bú bísúétíné baacɔ a bá tɛ ábɔ́ kɛ́la ta bɔkɔ,
beébe bé ŋé húle abɔ́ yáláyála a bálɛ́ka ;
bé ŋé beébe oosíkínyi anyía bé tuŋúlíkínyi bálɛ́ka ne hikókó,
bá tɔ́kɔ́kɔ baacɔ bekime.
Bá ŋa bɔ́ cɔ́bá o ooki ú Yásɔn,
bá ŋga aámbáka ne Bóol ne Sílas anyía bébú télímínyi a nyɛkála ɛ ɛkatɛ́katɛ́ cɛ baacɔ bá bunɔŋɔ.
6 Háyɛ bó ti ómó bú beébe bɔ́ŋɔ,
bá ŋá báka hátɛna na Yásɔn na bɔ́mɔtɛ́ benyíinyí bé olumitinine,
bé ŋé beébe cɔbána eé buúse bú bekélísi bɛsana bá bálɛ́ka.
Bá ŋa bɔ́ bá bé húlé ábɔ́ kɔ́ɔnaka okelú ɔ ɔmuaná báyɛ :
« Baacɔ eebe á bɔ́ŋa betuŋulinyi ɔmɛsɛ́ okime.
Bá ŋga bɔ́ hámá aaha,
7 Yásɔn ŋé beébe hiíte bɔmbányɛ e úúyé ooki.
Mbá nyíábɔ́ nyɛbɛ́kɛ́lɛ́na,
beébe bekime,
áŋa náányia ne *bikotí bɛ́ *Sɛsáal :
Bá ŋa bɔ́ kɔ́ɔna báyɛ Otéŋí u etémbí áŋa hɔ́á,
ɛ́cɛ Yésus. »
8 Ɔtáŋa oócí ŋeé nyímísi injiŋé na cɛ baacɔ bá nyɛkɔca ne ci bekélísi bɛsana.
9 Bé ŋe bú bítímbíé na Yásɔn na bɔsɔ́ɔ́kɔ́ a bɔ́mɔtɛ́,
ɔ ɔkɔɔ́háma ayɛ́ bá ŋa bɔ́ bɛ́ɔ́ndɔ́kɔ né bekélísi bɛsana ɔkɛla anyía bé beébe nyɛánáka.
Ne Bóol ne Sílas eé Belée
10 Hí ahɛ́ buutú ŋaá kúá,
belumitinine ŋa bɔ́ aámbáka ohónyí anyía ne Bóol ne Sílas ébú súéte eé Belée.
Ahɛ́ bá ŋga bɔ́ hámá,
bé ŋé oofíne a *andaŋía yɛ́ ɔbɛ́cɔ́kɔ́lɛ́na yí *Besuif.
11 Besuif bá bálɛ́ka ci Belée ŋa bɔ́ bá na ambányɛ́kɛ́ yɛ́ ɔtɛ́má ɔ ɔhɔla bɔsɔ́ɔ́kɔ́ bá Tɛsaloníke.
Bé ŋe tényí ebú lúmitinine Ambányɛ yɛ́ Ɛsɔ́ma.
Aáná bé ŋe bú túmé ɔwaákɔ́nɛ́na Ciɔɔ́ŋɛ́ cɛ́ Bandɔ́mɛsɛ́ mɔɔ́sɛ́ mekime anyía bábɔ́ lɛ́ca mbɔ́kɔ bɛsana ebí Bóol ŋaá bá weé beébe laakɛna áŋa taaká.
12 Baacɔ beéŋí aabɔ́ ɛ ɛkatɛ́katɛ́ ŋe bú lúmítékíníne,
na a *Bakɛlɛ́k áyá,
na banɔ́mɔcɔ́ ne beénjú bá bɔkɔ a aabá beéŋí.
13 Mbá ekúlú ayɛ́ Besuif bá Tɛsaloníke ŋe bú ményí anyía Bóol ŋeé húlinyi baacɔ bé Belée Bɛsana bɛ́ Bandɔ́mɛsɛ́ tɔ́na,
bá ŋá faákɔ́na hɔ́á anyía bébú óósíkínyi nyɛkɔca nyɛ́ baacɔ anyía nyɛ́ á kɛláka hikókó.
14 Benyíinyí bé olumitinine ŋa bɔ́ kɛ́lá ɔ ɔkɛla anyía Bóol é súéte a aháŋá yɛ́ nuɔmɔ́ nɔ́ makɛ́lɛ́.
Mbá ne Sílas ne Timoté ŋa bɔ́ lɔ́bɔ́ eé Belée.
15 Baacɔ a bá ŋa bɔ́ cɔ́bá o okoósíke Bóol ŋe ke bú wuúci síké eé sitíme a bálɛ́ka cɛ Atɛ́na.
E elime eécí bá ŋga bɔ́ hálɔ́mɔ́ná eé Belée na ɛsɔ́ma ecí Bóol ŋaá bɛ́lɛ́hákɛ́na ne Sílas ne Timoté.
Cɛ́ ŋaá bá anyía bé tényí ké wuúci kuana.
Bóol a Atɛ́na
16 Ekúlú eyí Bóol ŋaá bá waá tátáka ne Sílas ne Timoté a Atɛ́na,
u ŋa kásá buéŋí na nyɛnamá nyɛ́ bɛbɔ́kɔ́bɔ́kɔ anyɛ́ u ŋaá bá waá lɛ́caka baacɔ bá bálɛ́ka eécí ébú béétíki.
17 Aáná u ŋaá bá weé súŋgunyinyi ne *Besuif ne bebééti Bandɔ́mɛsɛ́ a bá tɛ abɔ́ bá Besuif a yáábɔ́ *andaŋía yɛ́ ɔbɛ́cɔ́kɔ́lɛ́na mɔɔ́sɛ́ mekime.
U ŋaá bá weé súŋgunyinyi tɔ́na na baacɔ abá u ŋaá bá wɔ yɔ́ɔ́ndɛ́mákána ne beébe a bɛhaála abɛ́ bá ŋaá bá bábɔ́ bɛ́bándákána.
18 Ne beékúnyi bɛsana bí injiŋé a bɔ́mɔtɛ́ abá bá ŋaá bá bɔ́ lɔ́ŋɔ́kɔ báyɛ « Beebikuliɛ́ŋ » ne « Besitoyisiɛ́ŋ » ŋe bú túmé ɔtáŋa tɔ́na ne wuúci.
ª Bɔ́mɔtɛ́ eé beébe ŋa bɔ́ bátá báyɛ :
« Aátɛ́ akuakúálɛ́kɛ eeye ŋá kɔ́ɔna e ?
» Mbá bɔsɔ́ɔ́kɔ́ bé etémbí a bá ŋa bɔ́ lɔ́kɔ́ma háyɛ Bóol ŋaá bá weé húlikinyi baacɔ na asana yí Yésus na nyɛhaanyua nyí biwéewé ŋa bɔ́ kɔɔ́na báyɛ :
« Yááŋa háyɛ anyía u ŋe húlinyi baacɔ bɛsana bɛ́ bɛbandɔ́mɛsɛ́ e bikenyí ».ª
19 Bá ŋaá báátána Bóol a nɔkɔndɔ ɛ ɛkatɛ́katɛ́ cɛ Alolobásɛ,
ª Hitúlé a hiáŋá hɛ́ bálɛ́ka,
mbá báyɛ nááyá :
« Okóo,
tua sɔ́ŋa tu omenyi yɔɔ́sɔɔ́sɔ yí nyiékúnyi eéyé eyí o ŋoó weékúnyi baacɔ e ?
20 Ɔ ɔ́ŋa wu ɔ basɔ́ láána bɛsana e bikenyí abɛ́ tú tɛ ŋa sɔ́ lɔ́kɔ́ma ;
biíbi tu ŋa sɔ́ aamba anyía keyé tu ŋé sú ményi aátɛ́ bí ŋe hémbule. »
21 (Bá ŋa bɔ́ kɔɔ́na aáná anyía na baacɔ bekime bá Atɛ́na ne bekenyí a bá ŋaá bá hɔ́á ŋa bɔ́ bá bé me bú bíhélínyi ɔkɔɔna ta anyía ɔbɛ́lɔ́kɔ́ma bɛɔ́sɔɔ́sɔ bɛ́ bɛsana e bí ŋe bíóndísíkínyi ɔháma.)
22 Bóol ŋa tálɛ́mɛ́ná ɛndánáka ɛ ɛkatɛ́katɛ́ ci Hitúlé,
mbá ɔsɛ :
« Banɔ́,
baacɔ bá Atɛ́na,
ɛ́ ma mɛ́ lɛca anyía nua nɔ́ŋa bebíínjíénú buéŋí a bɛsana bí ilumitinine.
23 Ɛ ŋa mɛ́ kɔɔna aáná ananyía ayɛ́ ɛ ŋaá mɛ bá i húle ámɛ bɛ́náŋáláka aá cianɔ́ bálɛ́ka noómi,
ɛ ŋá mɛ lɛcáka endúme cé okotí ecí nu ŋe nú nyéminyi bɛbandɔ́mɛsɛ́ ;
míɔ lɛca nyindúmé a nyɛ́mɔtɛ́ nyɛɔ́ŋɔ́kɔ́nɔ́ anyía “Nyɛ́ bandɔ́mɛsɛ́ ecí tu ti ŋé sú ményi !”
ª Aháa !
Ooci ewú nu ŋe nú bééti nu ti menyí,
waátákána oócí ɛ́ ma mɛ́ faaya ɔ ɔ banɔ́ húlinyi yááyɛ́ asana.
24 Bandɔ́mɛsɛ́ awɔ́ ú ŋa bɔ́tá na ɔmɛsɛ́ na bɛnyɛ́ma bikime a bɛ́áŋa noómi,
wuúci wáŋa Otéŋí u na ɔmuaná na u ɔmɛsɛ́,
mbá ta híáná,
u naŋa u ti e límíne eé meébe emé baacɔ ŋe bú wuúci falɛfɛna.
25 Híáná tɔ́na,
u tɛ ŋá yáamba anyía baacɔ ébú wuúci ɔ́ɔ́lɔ́kɔ na bɔkɔ a bɔ́mɔtɛ́,
anyía wuúci ú ŋe yíinjie baacɔ bekime olíhe,
u iínjíékíne mehúne a bɛnyɛ́ma bikime tɔ́na.
26 Bandɔ́mɛsɛ́ ŋa cáŋacáŋa oketi ɔɔcɔ ɔmɔtɛ́ ;
ɔ ɔɔcɔ oócí ɔmɔtɛ́ mɔnɔŋɔ mekime ŋa yaátákánáná,
u ŋé meéme limísíkínyi a bɛhaála bɛhaála ɔ ɔmɛsɛ́ okime.
U ŋé beébe tákákɛ́na bikúlú na bɛ́ bɛlɔlɔ́ na bɛ́ tɔbɔ́lá ne bikéti bí iisí abɛ́ bábɔ́ nyɛmána bé olímekine hɔ́á.
27 U ŋa kɛ́láka aáná anyía mbá baacɔ ké búle ebú wuúci aamba anyía yáakɛlá e nyihúle wuúci aamba eényí,
bá bɔ́ŋa bé o wuúci bɔ́ŋɔ.
Aá taaká Bandɔ́mɛsɛ́ tɛ á bá haaca na basɔ́.
28 Yááŋa anyía “Bandɔ́mɛsɛ́ u ŋaá basɔ́ iínjie olíhe,
u kɛlaka tɔ́na anyía tué bínyíékínyi,
tu ményúkúne anyía tua sɔ́ŋa”,
híáná báánɔ́ bafɛka ɛtáŋa ɔ bɔ́mɔtɛ́ ŋe bú óónyísíkínyí tɔ́na,
báyɛ :
“Tua sɔ́ŋa tɔ́na bááyɛ́ baáná.”ª
29 Aáná,
háyɛ tua sɔ́ŋa baáná bá Bandɔ́mɛsɛ́,
tu tɛ ɔ́mɔ́ sɔ́ nyɛ́mana tú obíkétíki anyía u ŋaá hɔ́á ta abácɛ yí kóolo ta anyía eléŋú yɛ́ mɔɔnyɛ́ ta anyía nyɛndányɛ́,
bɛnyɛ́ma abɛ́ baacɔ náŋa bábɔ́ túáka aá ciabɔ́ injiŋé cɛ bɛ́muátá o o biíbi nyemi.
30 Bandɔ́mɛsɛ́ ti ŋé túné á fánɛna bikúlú abɛ́ baacɔ ŋaá bá bé tí ébú ményi nyíáyɛ́ nyiléne.
Mbá aámbáya u ŋɔɔ́ lɔ́ŋɔ baacɔ bekime bá bɛhaála bikime ɔ ɔbɛ́kákálákɛ́na máábɔ́ maabɛ́,
mbá bá sɔ́mba ɔkɔlɔ́ eé meéme.
31 Yááŋa anyía u ŋaá táfá na buɔ́sɛ́ bú okélísíki baacɔ bá ɔmɛsɛ́ okime na ɔɔcɔ ewú u kéé beébe kélísíki aá taaká noómi.
Buátɛ́ bɔkɔ Bandɔ́mɛsɛ́ ŋeé tóŋínyí hibílícínyínyí á baacɔ bekime e nyiheenyi enyí u ŋeé héényi waáta ɔɔcɔ e biwéewé. »
32 Ɛ́makɛ́la baacɔ eébé ábɔ́ lɔ́kɔ́máka ɔtáŋa ú Bóol a asana na nyɛhaanyua nyí biwéewé,
bɔ́mɔtɛ́ eé beébe ŋe bú túmé o wuúci cɛ́ca,
mbá bɔsɔ́ɔ́kɔ́ a bɔ́mɔtɛ́ báyɛ :
« Tu ká sɔ́ ɔ lɔ́kɔ́máka o obíkétíki asana eéyé buɔ́sɛ́ bú etémbí,
tɛ́ cáŋa hɛ́nánɔ. »