Bóol ŋe húlínyi baacɔ bá Kɔlɛ́ɛntɛ Ambányɛ yɛ́ Ɛsɔ́ma
18
1 E elime eécí,
Bóol ŋa hátɔ́na a bálɛ́ka cɛ Atɛ́na,
u ŋá cɔba ɔɔ́ Kɔlɛ́ɛntɛ.ª
2 Hɔ́á,
u ŋaá kuána ɔɔcɔ u *Besuif a wɔmɔtɛ́ nyiínyi ɛ́cɛ Akílas ewú u ŋeé bíbíéné e ekéti yí iisí yɛ́ Bɔ́ŋª ;
weé húlúkúne bu húlúkúne i Italí ne wuúci ne oónyí Bilisíle.
ªYááŋa anyía Sɛsáal Kolóote ŋaá sɔ́mbɔ́tɔ́ná ɔsɛ Besuif bekime a bá ŋa bɔ́ bá o Lóom ábɔ́ hatɔ́kɔ́na hɔ́á,
bá hɔláka.
ª Bóol ŋaá látá bukendinyi na Akílas ne oónyí.
3 Bá ŋa bɔ́ bá bábɔ́ nyíɔkɔ nyɛnamá nyí buólí nyɛ́mɔtɛ́,
ɛ́cɛ anyía ɔnua bɛlaŋa bí bikule.
Aáná ú ŋe límékíne náábɔ́,
u nyiɔkɔ ɔlɔŋɔ ne beébe.
4 A *buɔ́sɛ́ bú ehélúme bú Besuif bukime,
Bóol ŋaá bá weé súŋgunyinyi na baacɔ a *andaŋía yɛ́ ɔbɛ́cɔ́kɔ́lɛ́na,
u aambaka ohónyí wú obísúékíne Besuif,
ta *Bakɛlɛ́k áyá.
5 Mbá ekúlú eyí ne Sílas ne Timoté ŋga bɔ́ háma a Kɔlɛ́ɛntɛ,
bébú húlúkúne a Masɛtuán,
Bóol ŋa nyɛ́ánɛ́na na Akílas ne Bilisíle buólí,
yó bíínjie hú o ohulinyi baacɔ Ambányɛ yɛ́ Ɛsɔ́ma,
ª yó woónyísíkínyi ɔlaana Besuif anyía Yésus áŋa Mesíi.
6 Ɛŋakɛlá Besuif ébú kíne ɔlátɛ́na bɛsana ebí Bóol ŋaá bá weé beébe laakɛna,
bé ŋé túme o wuúci ɔɔ́mbɔ́ná,
Bóol ŋé beébe bíyúkúlékíne ofunú ú bɛ́áyɛ́ bɛlaŋa,
mbá ɔsɛ :
« Mbɔ́kɔ nu ŋe nú nyímúkúne hɛ́nánɔ,
yɛ́ ŋaá banɔ́ lɛ́ca,
banɔ́ bɛ́muátá ;
ɛ tɛ ámɛ bá tɔ́na na asana.
O otúme aámbáya,
míɔ cɔba né eebe a bá tɛ ábɔ́ bá Besuif ».
7 Aáná u ŋa hátɔ́na aáhá,
yɔ́ cɔba o ooki ú ɔɔcɔ a wɔmɔtɛ́,
nyiínyi ɛ́cɛ Titiyus Yusítus ;
u ŋaá bá mubééti Bandɔ́mɛsɛ́ a mɔ́ tɛ á bá ɔɔcɔ u Besuif,
úúyé ooki ŋaá bá a maabána ma andaŋía yɛ́ ɔbɛ́cɔ́kɔ́lɛ́na.
8 Ta híáná,
mutéŋínyi andaŋía yɛ́ ɔbɛ́cɔ́kɔ́lɛ́na Kilíbus ŋaá háyá mɔŋɔlɛ́ né Otéŋí a Waáŋá,
na cíáyɛ́ ciíbe cɛ baacɔ ikime áyá.
Baacɔ bá Kɔlɛ́ɛntɛ beéŋí a bá ŋa bɔ́ bá bábɔ́ lɔ́kɔ́máka bɛsana ebí Bóol ŋaá bá weé beébe húlikinyi ŋa bɔ́ hákɛ́na mɔŋɔlɛ́ tɔ́na né Otéŋí a Waáŋá,
bó beébe ootokine.
9 Buutú a búmɔtɛ́ Bóol ŋaá lɛ́cáka *eseye yɛ́ asana :
U ŋaá lɛ́cá Otéŋí a Waáŋá ewú u ŋeé wuúci laána ɔsɛ :
« Eti líkíméke !
Cɔbá ne buúse o ohulinyi baacɔ Ambányɛ yɛ́ Ɛsɔ́ma,
eti lésíkínyi mbuumu,
10 anyía ya mɛ́ŋa oówo e elime ;
ta ɔɔcɔ tɛ́ kɔ́ yɔ́ɔ tála aabá a cɛɛ́tɔ anyía wɔ yɔ́ɔ kɛla bɔɔbɛ́,
ananyía báámɛ baacɔ áŋa a bálɛ́ka eeci hú mbiɔ́kɛ. »
11 Bóol ŋe límékíne ɔɔ́ Kɔlɛ́ɛntɛ hiɔŋɔ hikimekime ne ekélékéti,
u eékúnyíki baacɔ Bɛsana bɛ́ Bandɔ́mɛsɛ́.
12 Ekúlú ayɛ́ Kalɛ́ɔŋ ŋaá bá Kɔ́mɛ́na ci ekéti yí iisí yɛ́ Akayí,
Besuif bekime ŋa bɔ́ lɔ́kɔ́mákána anyía bébú núúsíki Bóol ;
bé ŋge bú wuúci sɔ́mɛ́ná ná Kɔ́mɛ́na Kalɛ́ɔŋ eé ciíbe cɛ nyɛkála bɛsana,
13 bɔ́ láana Kɔ́mɛ́na báyɛ :
« Ɔɔcɔ ooci ŋe yóosinyi baacɔ anyía bé nyemíki Bandɔ́mɛsɛ́ a nyɛnamá enyí *bikotí ti ŋe yeékúnyi ».ª
14 Hí ayɛ́ Bóol ŋa sɛ́ wéé túme ɔbɛ́kála,
Kalɛ́ɔŋ ŋá laána Besuif ɔsɛ :
« Huúúʼ,
banɔ́ Besuif,
énu menyí anyía mbɔ́kɔ Bóol ooci á bá ɔwɔɔ́nɔ́kɔ́nɔ́ ɔɔcɔ,
ta anyía ɔkɛlánɔ́ bɔɔbɛ́ a bɔ́mɔtɛ́,
keyé ya mɛ́ŋa wu olimine mbuumu,
mío weéhínyínyi ɔlɔ́kɔ́ma bíánɔ́ bɛsɔ́mɛ́na.
15 Mbá ayɛ́ yááŋa anyía nú ŋe nú súŋunyinyi hú a asana na bɛcambɛ́tɛ́ ne eénye a cɔ́mɔtɛ́ na a asana na bíánɔ́ bikotí bɛ́ bɛ́muátá,
banɔ́ bɛ́muátá nuánɔ́ nyɛ́mana nú ocikiliekene asana eéyé ;
ɛ tɛ ámɛ bá wu ɔkɛlaka nyɛnamá nyɛ́ bɛsana eényí. »
16 Aáná u ŋa kɛ́la anyía bé beébe hémúkúnyi eé ciíbe cɛ nyɛkála bɛsana.
17 Nyɛkɔca nyɛmɛ́ɔ́mɛ́na eényí Sosotɛ́n,
mutéŋínyi andaŋía yɛ́ ɔbɛ́cɔ́kɔ́lɛ́na,
bé ŋé túme o wuúci lúkúte eé buúse bú ciíbe cɛ nyɛkála bɛsana.
Ta híáná,
nyɛkɛla eényí ti ómo yébi Kalɛ́ɔŋ te butíkítíki.
Bóol ma hálɔ́mɔ́na a Antióse
18 Bóol ŋa háná é límekine ɔɔ́ Kɔlɛ́ɛntɛ ɔmbana ú mɔɔ́sɛ́ weéŋí,
u ŋé bíósíkínyi benyíinyí bé olumitinine,
u ŋé óófíne eé sitíme,
u ŋé súéte eé Silíi ɔlɔŋɔ ne Bilisíle na Akílas.
Bóol ŋaá cáŋa é bíkútéke aatɔ́ a bálɛ́ka cɛ Saáŋkɛlɛ́ª ɛ́cɛ u tɛ ŋa hátɔ́na ɔkanda.
Yááŋa anyía u ŋaá bɛ́nyɛana tuhúnyi e nyisúŋe enyí ú ŋeé súŋíné Bandɔ́mɛsɛ́.ª
19 Bá ŋga hámá ɛ Ɛfɛ́ɛsɛ ;
hɔ́á ú ŋeé síké ne Bilisíle na Akílas.
U ŋá cɔbá a *andaŋía yɛ́ ɔbɛ́cɔ́kɔ́lɛ́na,
yó súŋgunyinyi ne *Besuif ;
20 a bɔ́mɔtɛ́ ŋe bú wuúci batá anyía wá cáŋa límekine ɔmbana ú mɔɔ́sɛ́ ne beébe,
mbá u ŋe kíné.
21 Aáná u ŋeé beébe bíósíkinyi,
mbá ɔsɛ :
« Ɛ ká kaá mɛ hálɔ́mɔ́na náánɔ́ buɔ́sɛ́ bú etémbí,
mbɔ́kɔ Bandɔ́mɛsɛ́ ŋé lénéke.
» Nyɛhatɔna eényí ɛ Ɛfɛ́ɛsɛ eé sitíme noómi,
u ŋé súéte.
22 Ɛ́makɛ́la wá kaáháma a Sɛsalɛ́ɛ,
u ŋá bááta eé Yelúsalɛm anyía we keé téŋíti hiɔ́bɔ hí belumitinine Yésus hɛ́ hɔ́á ;
e elime eécí,
u ŋá cɔba a Antióse.
23 Ayɛ́ u ŋeé límékíne hɔ́á ɔmbana ú mɔɔ́sɛ́,
u ŋá háná hátɔ́na,
u ŋé súéte.
U ŋá sɔ́mbɔ́tɔ́nɛ́na i iisí cɛ Kalasi,
yɔ́ hɔ́lɛ́na i iisí ci Filiki,
u húlé kíndísíki belumitinine bekime o olumitinine noómi.
Abólos ŋeé húlinyi baacɔ Ambányɛ yɛ́ Ɛsɔ́ma
24 Ekúlú etéeyé,
ɔɔcɔ u *Besuif a wɔmɔtɛ́ ewú u ŋeé bíbíéne a Alɛkɛsandilí ŋa kaáhámá ɛ Ɛfɛ́ɛsɛ.
Nyíáyɛ́ nyiínyi ŋaá bá ɛ́cɛ Abólos ;
u ŋaá bá weé menyukune ɔtáŋa na bɔɔcɔ,
u menyukune tɔ́na bɔmbányɛ Bɛsana bɛ́ Ciɔɔ́ŋɛ́ cɛ́ Bandɔ́mɛsɛ́.
25 Bá ŋaá bá bé meé wuúci eékúnyíki ɔlátɛ́na ohónyí ú Otéŋí a Waáŋá.
U ŋaá bá weé húlikinyi baacɔ Bɛsana a bɛ́ ŋa lɛca Yésus,
yó bíínjie noómi na ɔtɛ́má okime,
u biíbi eékúnyíki háyɛ yááŋa anyɛmánánɔ́.
Asana ɔ́mɔtɛ́,
u ŋaá bá weé menyukune hú *obíótíne ú Sáaŋ.
26 Abólos ŋé búle ɔtáŋa a *andaŋía yɛ́ ɔbɛ́cɔ́kɔ́lɛ́na yí Besuif,
u ti líkíme ta bɔkɔ.
Ɛ́makɛ́la ne Bilisíle na Akílas ábɔ́ lɔ́kɔ́máka úúyé ɔtáŋa,
bé ŋé wuúci lɔ́ŋɔ́kɔ e úúbú ooki ;
bé ŋé wuúci eékúnyíki ɔlátɛ́na ohónyí ú Bandɔ́mɛsɛ́ bɔmbányɛ ɔ ɔhɔla.
27 E elime eécí,
Abólos ŋaá bá wa yáambaka osúéte i iisí cɛ Akayí ;
bááyɛ́ benyíinyí bé olumitinine ŋe bú wuúci kíndísíkí anyía wá cɔbá.
Aáná bá ŋa bɔ́ ɔɔ́ŋɔ́kɛ́ná belumitinine bá hɔ́á nufule a núáŋa anyía bé wuúci káha bɔmbányɛ.
Ɛ́makɛ́la wa kaáháma hɔ́á,
u ŋɔ ɔɔ́lɔ́kɔ buéŋí eebe abá yaála yí nuubo yɛ́ Bandɔ́mɛsɛ́ ŋa kɛla anyía bé lumítékíníne.
28 Yááŋa anyía u ŋaá bá weé tóŋgínyi Besuif o motóndóló ɛ́cɛ ú me beébe fanakɛna Ciɔɔ́ŋɛ́ cɛ́ Bandɔ́mɛsɛ́ anyía Yésus áŋa *Mesíi,
yó beébe kueyiki eété e cííbú isuŋí ɛ ɛkatɛ́katɛ́ cɛ baacɔ.