Nyɛbɛ́bándána nyí Yelúsalɛm
15
1 Bɔ́mɔtɛ́ baacɔ ŋa ka bɔ́ hámá a Antióse,
bé húlúkúne eé Yuté,
bé ŋé túme oweékúnyi benyíinyí bé olumitinine,
bá kɔ́ɔnaka báyɛ :
« Bandɔ́mɛsɛ́ tɛ á bá wu ɔ banɔ́ nóhiki mbɔ́kɔ nu tɛ ŋá nɔ́ bɛ́ácáka háyɛ nyɛbɛ́kɛ́lɛ́na nyí *Moyís ŋe yéekunyi. »
2 Ne Bóol na *Baanábas ti ómo bú lumitine nyiékúnyi eényí.
Aáná hikókó ŋaá kúá aabɔ́ ɛ ɛkatɛ́katɛ́.
Bé ŋé súŋgúnyínyi buéŋí ne beébe a asana eéyé.
Belumitinine ŋa bɔ́ sɔ́mbɔ́tɔ́ná anyía ne Bóol na Baanábas na baacɔ a bɔ́mɔtɛ́ bá Antióse ŋá bɔ́ nyɛmána bɔ́ cɔ́ba eé Yelúsalɛm ɔ ɔkɔɔ́táŋa asana eéyé na baacɔ bá ɛndɔ́ma ne *bekendisi belumitinine.
3 Hiɔ́bɔ hí belumitinine hɛ́ Antióse ŋeé beébe tábɔ́nákɛ́na ɔkanda.
Bá ŋa bɔ́ hɔ́lákɛ́na ne i iisí ci Fenisí na cɛ Samalí,
bé húlé bɛ́lɛ́áŋɔ́nákɛ́na belumitinine a bá ŋa bɔ́ bá hɔ́á anyána baacɔ a bá tɛ ɔ́mɔ́ bɔ́ bá *Besuif ŋa bɔ́ bɛ́kɔ́ŋɔ́nákɛ́na ɛtɛ́má,
bɔ́ hákɛ́na mɔŋɔlɛ́ ná Bandɔ́mɛsɛ́.
Ɛsɔ́ma eécí ŋeé bílénékíné buéŋí belumitinine bekime.
4 Ahɛ́ bá ŋga bɔ́ hámá eé Yelúsalɛm,
na hiɔ́bɔ hí belumitinine,
na baacɔ bá ɛndɔ́ma,
ne bekendisi belumitinine ŋeé beébe káhá.
Ne Bóol na Baanábas ŋe bú beébe bíkétíkínyi bɛsana bikime abɛ́ Bandɔ́mɛsɛ́ ŋeé nyióyísíkínyí náábɔ́.
5 Mbá baacɔ a bɔ́mɔtɛ́ bá ɔlɔŋɔ ú *Bafalisiɛ́ŋ a bá ŋa bɔ́ hákɛ́na mɔŋɔlɛ́ né Yésus ŋa bɔ́ hátɔ́na,
bé ŋe túmé ɔkɔɔna báyɛ :
« Belumitinine a bá tɛ abɔ́ bá Besuif ŋá bɔ́ nyɛmána bá ɔbɛ́ácáka ;
bá ŋá bɔ́ nyɛmána tɔ́na bá ɔlátákɛ́na *bikotí bí Moyís. »
6 Na baacɔ bá ɛndɔ́ma ne bekendisi belumitinine ŋa bɔ́ bɛ́bándákána anyía bábɔ́ áákɔ́nákɛ́na asana eéyé.
7 Ekúlú eyí isuŋí ŋaá bá cɛ́ mɔ yɔ́ɔ́nɛ́na,
Bíel ŋá hatɔ́na,
mbá ɔsɛ :
« Buamɛ eé,
nu ŋe nú menyi anyía Bandɔ́mɛsɛ́ ŋaá mɛ táfá feeké aanɔ́ ɛ ɛkatɛ́katɛ́ anyía yémi hulíkínyí baacɔ a bá tɛ ábɔ́ bá Besuif Ambányɛ yɛ́ Ɛsɔ́ma,
bé yiíyi lɔ́kɔ́máka mbá bé lumitinine.
8 Aáná Bandɔ́mɛsɛ́,
Mumenyi ɛtɛ́má cɛ́ baacɔ,
ŋeé tóŋínyi anyía ú me beébe káha,
ɛ́ɛhɛ́ ú me beébe iínjie tɔ́na *Efúúménénú yí Elilé háyɛ ú ŋaá basɔ́ iínjíé.
9 U ŋo tóŋínyi anyía nyɛálɔ́nána tɛ á bá ɛ ɛkatɛ́katɛ́ cɛ na basɔ́ ne beébe,
yɔ́ súáka cííbú ɛtɛ́má anyía bé me bú lumitinine.
10 Mbá aámbáya aná,
anyíatɛ́ nu ŋa nɔ́ aamba ɔkɔkɔna Bandɔ́mɛsɛ́ ekúlú eyí nu ŋe nú eékínyi belumitinine anyía bá bɛ́túáhákɛ́na malamɔ́ amá te cíísú sɔ́kɔ́nɔ́ ta basɔ́ bɛ́muátá tu ti ómó sú cényi ɔbɛ́túáhɛ́na e ?
11 A nyíásɔ́ nyɛlɛca,
tu ŋe sú lúmitinine anyía Bandɔ́mɛsɛ́ ú ŋá basɔ́ nóhi a yaála yí nuubo yí Yésus,
bɔkɔ búmɔtɛ́ háyɛ baacɔ a bá tɛ abɔ́ bá Besuif. »
12 Ɛ́makɛ́la Bíel á táŋáka aáná,
baacɔ bekime a bá ŋa bɔ́ bá a nyɛbɛ́bándána ŋe bú lésíkínyi mbuumu,
bá ŋá támbáka eetú ɔ ɔlɔ́kɔ́ma háyɛ na Baanábas ne Bóol ŋe bú bíkéti ne bikéki bí tubílícínyínyí ne bikémése bɛ́ bɛsana bikime abɛ́ Bandɔ́mɛsɛ́ ŋé nyíóyísíkínyi náábɔ́ ɛ ɛkatɛ́katɛ́ cɛ baacɔ a bá tɛ ábɔ́ bá Besuif.
13 Ahɛ́ bá ŋa bɔ́ máná ɔtáŋa oócí,
Sáakª ŋá hatɔ́na ɛndánáka,
mbá ɔsɛ :
« Buamɛ éé,
ánɔ lɔ́kɔ́ma.
14 Símonª má basɔ́ bíkétíkínyi háyɛ Bandɔ́mɛsɛ́ ŋeé tétényíkí bɔmbányɛ baacɔ a bá tɛ ábɔ́ bá Besuif hí e nyitúme,
yɔ́ táfa aabɔ́ ɛ ɛkatɛ́katɛ́ baacɔ e bé ŋe bú wuúci bɛ́lɔ́kɔ́mɛ́na.
15 Ɔtáŋa ooci áŋa bɔkɔ búmɔtɛ́ na ɔtáŋa ú *behémúnyi bɛsana bá Bandɔ́mɛsɛ́ a wáŋa wɔɔ́ŋɔ́kɔ́nɔ́ anyía :
16 “Bandɔ́mɛsɛ́ ɔsɛ :
E elime eécí ɛ ká ká mɛ hálɔ́mɔ́na,
míɔ falɛfɔtɔkɔna ciíbe cɛ Táfit a cɛ́ ŋa kátákáta,
mío heenyutune yááyɛ́ ahátátá,
mío yiíyi télímínyítune.
17 E ekúlú eéyé,
baacɔ bé etémbí bekime ká bɔ́ bá na ɛcaná na Bandɔ́mɛsɛ́ ;
ɛ́ɛ,
híáná mɔnɔŋɔ mekime emé i ŋeé mi lénéké anyía má bámɔ́kɔ́na máámɛ káá mɛ aambaka.”ª
18 Aáná Otéŋí a Waáŋá ewú u ŋe yeékúnyíkí feeké baacɔ bɛsana eébí ú ŋaá táŋá. »
19 Sáak ŋaá cɔ́bana ɔtáŋa eé buúse,
ɔsɛ :
« A nyiámɛ nyɛlɛca,
bɔ́ tɛ ɔ́mɔ́ nyɛ́mana bé oyébíki baacɔ a bá tɛ ábɔ́ bá Besuif,
mbɔ́kɔ bá ŋa bɔ́ aamba ɔbɛ́kɔ́ŋɔ́nɛ́na ɛtɛ́má ɔ ɔháya mɔŋɔlɛ́ ná Bandɔ́mɛsɛ́.
20 Tu ŋá sɔ́ nyɛmána tu o beébe ɔɔ́ŋɔ́kɛ́na nufule hú anyía bé bíkíilíéke na ɔnyíá ɛnyama acɛ́ bá sɔ́mbɛ́na e esíéké,
na ɛnjɔkɔ́nɔ́nɔ,
na ɔnyíá biwéewé bɛ́ ɛnyama tɛ́ka na ɔsɛkɛta,
na ɔnyíá manɔ́ŋɔ́ ma ɛnyama.
21 Yááŋa anyíaʼo,
o otúme feeké ɛ naŋa bébú húlikinyi baacɔ bikotí bí Moyís a bálɛ́ka ikime,
bé biíbi fanaka a *bɛndaŋía bɛ́ ɔbɛ́cɔ́kɔ́lɛ́na bí Besuif mɔɔ́sɛ́ mekime ma yáábɔ́ ehélúme. »
Bá ma tɔ́mɛ́na baacɔ a bá tɛ abɔ́ bá Besuif nufule
22 Na baacɔ bá ɛndɔ́ma ne *bekendisi belumitinine,
na hiɔ́bɔ hí belumitinine hikime ŋa bɔ́ sɔ́mbɔ́tɔ́na anyía bá táfa baacɔ a bɔ́mɔtɛ́ aabɔ́ ɛ ɛkatɛ́katɛ́,
bé beébe tɔ́ma a Antióse ɔlɔŋɔ ne Bóol na *Baanábas.
Bá ŋa bɔ́ táfá ne Sílas ne Súute awɔ́ bá ŋaá bá bɔ́ lɔ́ŋɔ́kɔ báyɛ Baasábas.
Benyíinyí bé olumitinine ŋa bɔ́ bá bébú kékéke bífendí eébí.
23 Bé ŋe bú beébe tɔ́má o okoówiínjie nufule anɔ́ bɔ́ ŋɔ yɔɔ́ŋɔ́kɔ,
nɔ́ kɔ́ɔnaka nɔ́sɛ :
« Basɔ́,
na baacɔ bá ɛndɔ́ma ne bekendisi belumitinine,
báánɔ́ benyíinyí,
tu ŋa sɔ́ banɔ́ téŋi,
banɔ́ báásɔ́ benyíinyí abá nɔ́ tɛ anɔ́ bá *Besuif,
nu líhéke na a bálɛ́ka cɛ Antióse ne e bikéti bí iisí ne bí Silíi ne bí Silisí.
24 Tu ŋa sɔ́ lɔ́kɔ́máka anyía baacɔ ŋe bú húle aaha náásɔ́,
bɔ́ kɔ́ banɔ́ láakɛna bɛsana a bɛ́ ŋa banɔ́ iínjíékíné na yaáká ne bulíkílíki ɛ ɛtɛ́má.
Tu ti ómó sú beébe iínjie makɛ́nda ma ɔkɛlaka aáná.
25 Yaátɛ́ asana tú ma sɔ́ lɔ́kɔ́mákáná basɔ́ bekime,
tuɔ́ táfáka baacɔ,
bá faáya náánɔ́ eesú eé nyiínyi ɔlɔŋɔ na bíásɔ́ bikendinyi bɛ́ ɔtɛ́má :
Na Baanábas ne Bóol.
26 Bá bɔ́ŋa baacɔ a bá bɔ́ŋa bebíínjíénú a asana yí uusú Otéŋí a Waáŋá Yésus *Kilís.
27 Aáná tú ma sɔ́ banɔ́ tɔ́mɛ́na ne Súute ne Sílas.
Beébe bɛ́muátá bá ka bɔ́ banɔ́ láákɛ́na bɛsana a bɛ́áŋa bɛɔ́ŋɔ́kɔ́nɔ́ e nufule eenu.
28 Yááŋa anyía ne *Efúúménénú yí Elilé na basɔ́,
tú ŋa sɔ́ sɔ́mbɔ́tɔ́ná anyía tu tɛ banɔ́ eékínyi na bɛsana bí etémbí,
ɛ tɛ ŋáa bá hú eebi a bɛ́ ŋaá bɛ́ámba anyía nuánɔ́ kɛ́láka.
29 Bɛ́áŋa anyía :
Nué bíkíilíéke na ɔnyíá ɛnyama acɛ́ bá sɔ́mbɛ́na e esíéké,
na ɔnyíá manɔ́ŋɔ́ ma ɛnyama.
Nɔtɛ nyíá ɛnyama acɛ́ bɔ́ tɛ ɔ́mɔ́ sɛ́kɛta ;
nɔtɛ bɛ́nyíánáka ɛ ɛnjɔkɔ́nɔ́nɔ noómi.
Yááŋa ambányɛ anyía núénú bíkékényíki bɛsana eébí.
Oóʼo ! »
30 Baacɔ abá bá ŋa táfáká ŋe bú bíósíkínyi belumitinine,
bé ŋé súéte a Antióse.
Ahɛ́ bá ŋga bɔ́ hámá hɔ́á,
bá ŋá bándáka baacɔ anyía bé beébe iínjíé nufule eénú.
31 Bá ŋá fanáka nufule.
Ɛ́makɛ́la bábɔ́ fánáka nufule,
baacɔ bekime ŋé bílénéke ananyía nú meé beébe kíndísíki ɛtɛ́má.
32 Ne Súute ne Sílas ŋa bɔ́ bá beébe bɛ́muátá *behémúnyi bɛsana bá Bandɔ́mɛsɛ́.
Bá ŋa bɔ́ aásánáká na báábɔ́ benyíinyí bé olumitinine eébé,
bé beébe kíndísíki,
bé beébe óónyísíkínyi o olumitinine noómi.
33-34 Bé ŋe bú límékíné hɔ́á ɔmbana ú mɔɔ́sɛ́,
benyíinyí bé olumitinine ŋe bú beébe bíósínyi anyía bá kandáka bɔmbányɛ,
bá hálɔ́mɔ́na ná baacɔ e bé ŋe bú beébe tɔ́má.
[Ta híáná,
Sílas ŋa sɔ́mbɔ́tɔ́ná anyía wá lɔ́bɔ hɔ́á.]
35 A aháŋá ne Bóol na Baanábas,
bá ŋa bɔ́ lɔ́bɔ́ a Antióse ɔmbana ú iílí ;
bá ŋa bɔ́ látána na baacɔ beéŋí a bɔ́mɔtɛ́,
bé eékúnyíki baacɔ,
bé beébe hulikinyi Ambányɛ yɛ́ Ɛsɔ́ma yí Otéŋí a Waáŋá.
Ne Bóol na Baanábas ma bɔ́ aálɔ́nána
36 Ɛ́makɛ́la mɔɔ́sɛ́ á hɔ́laka,
mbá Bóol ná *Baanábas ɔsɛ :
« Túá hálɔ́mɔ́na,
tué húlé lɛ́caka báásɔ́ benyíinyí bé olumitinine a bálɛ́ka ikime ecí tú ŋe sú húlíkínyí baacɔ Ambányɛ yɛ́ Ɛsɔ́ma yí Otéŋí a Waáŋá,
anyía tuésú ményi anyána bá bɔ́ŋa aámbáya. »
37 Baanábas ŋaá bá we lénéke anyía bébú súéte ɔlɔŋɔ na Sáaŋ awɔ́ ú ŋaá bá tɔ́na ne nyiínyi anyía Malɛ́kus.
38 Mbá Bóol ŋa lɛ́cá anyía bú tɛ á bá bɔmbányɛ anyía bébú kendíkínyi ne wuúci,
a asana ayɛ́ u ŋeé beébe bɛ́yúata a bálɛ́ka cɛ Bamfilí,
yó kíne okoó beébe síke o okuenyinyi búábɔ́ buólí.
39 Bé ŋe bú súŋgúnyínyi buéŋí a nyɛnamá enyí bé ŋe bú bíóndísínyí ɔ ɔwaálɔ́nána,
hú náányɛ́ weé hiíte úúyé ohónyí.
Aáná Baanábas ŋe hiíte Malɛ́kus,
bé ŋé oofíne eé sitíme,
bé ŋé súéte i iisí ci Síbele ɛ ɛkatɛ́katɛ́ cɛ nuɔmɔ́.
40 Bóol,
wuúci u ŋá táfa Sílas,
bé ŋe súéte ɛ́cɛ benyíinyí bé olumitinine ma bɔ́ bɛ́cɔ́kɔ́lɔ́kɛ́na Otéŋí a Waáŋá anyía wá sayábákɛ́na úúbú ɔkanda.
41 Ne Bóol ne Sílas ŋa bɔ́ hɔ́lákɛ́na ne eé Silíi ne e Silisí,
bé húlé kíndísíki tuɔ́bɔ tú belumitinine ɛtɛ́má.