Ne Bóol na Baanábas a bálɛ́ka ci Ikóniyom
14
1 Ekúlú eyí ne Bóol na *Baanábas ŋga bɔ́ hámá a bálɛ́ka ci Ikóniyom,
ª bé ŋge óófíne tɔ́na a andaŋía yɛ́ ɔbɛ́cɔ́kɔ́lɛ́na yí Besuif yɛ́ hɔ́á ;
bé ŋé húlíkínyi baacɔ Ambányɛ yɛ́ Ɛsɔ́ma a nyɛnamá anyɛ́ ɔmbana weéŋí ne ú Besuif na ú Bakɛlɛ́k ŋa bɔ́ hákɛ́ná mɔŋɔlɛ́ né Yésus.
2 Asana ɔ́mɔtɛ́,
*Besuif e bé ŋe bú kínéke olumitinine ŋe bú óósíkínyí baacɔ bé etémbí a bá tɛ ábɔ́ bá Besuif anyía bébú líŋékíne benyíinyí bé olumitinine.
3 Ne Bóol na Baanábas ŋe bú límékíne yaandándá yí ekúlú a bálɛ́ka ci Ikóniyom.
Bá ŋa bɔ́ bá na mɔŋɔlɛ́ meéŋí né Otéŋí a Waáŋá,
bá táŋáka bɛsana na taaká ikime,
bé ti líkíme.
Otéŋí a Waáŋá ŋeé beébe iínjie makɛ́nda ma ɔkɛlaka ne bikéki bí tubílícínyínyí ne bikémése bɛ́ bɛsana,
ananyía wó tóŋínyi anyía bɛsana ebí bé ŋe bú húlínyi baacɔ a yááyɛ́ yaála yí nuubo áŋa taaká.
4 Aáná baacɔ bekime bá bálɛ́ka ŋa bɔ́ bɛ́sálɔ́tɔ́na tuafa túfendí ;
eebe e elime ci Besuif,
eebe a bɔ́mɔtɛ́ e elime cɛ baacɔ bá ɛndɔ́ma.
5 Ne Besuif,
na baacɔ a bá tɛ ábɔ́ bá Besuif,
na báábɔ́ betéŋí ŋa bɔ́ bá bábɔ́ áambaka o beébe kɛla bɔɔbɛ́,
bé lénéke anyía bé beébe túméke andányɛ́,
bé wéékúne.
6 Hí ayɛ́ ne Bóol na Baanábas ŋe bú menyi aáná,
bá ŋá cabákɛ́na ɔ ɔkɔbɛ́námba a bálɛ́ka cí iisí cɛ Lɛkawoni;
ª cɛ́áŋa anyía ne Lisitɛ́lɛ na Tɛlɛ́bɛª na bɛhaála a bɛ́mɔtɛ́ a bɛ́ ŋaá bá hoóhi.
7 Bé ŋé túme ohulinyi baacɔ bá hɔ́á Ambányɛ yɛ́ Ɛsɔ́ma.
Ne Bóol na Baanábas a bálɛ́ka ci Lisitɛ́lɛ
8 Ɔɔcɔ a wɔmɔtɛ́ ŋaá bá asákála a bálɛ́ka ci Lisitɛ́lɛ,
u ŋeé bíbíéné ɔnɔkɔ́kɔ́nɔ́ na afɛ́kɛ́ eéyé ;
ta buɔ́sɛ́ ú tɛ ŋá hátɔna ɛndánáka ɔ ɔkandáka.
9 Buɔ́sɛ́ a búmɔtɛ́,
ɔɔcɔ oócí ŋaá bá waá lɔ́kɔ́máka Bóol á táŋáka.
Bóol ŋé wuúci tála eése,
u ŋá lɛcá anyía ɔɔcɔ oócí ŋaá bá na mɔŋɔlɛ́ meéŋí ma ɔwaáŋɔ́nua.
10 Aáná u ŋeé wuúci laána okelú ɔ ɔmuaná ɔsɛ :
« Hatɔ́na,
tálɛ́mɛ́na ɛndánáka,
kuɔŋɔ́ bɛ́muátá !
» Ɔɔcɔ ŋé béme ɔ ɔmuaná,
u ŋa tálɛ́mɛ́na ɛndánáka,
u ŋé túme ɔkanda.
11 Ɛ́makɛ́la baacɔ a bá ŋa bɔ́ bá aáhá ábɔ́ lɛ́ca asana eyí Bóol ma kɛ́la,
bé ŋé túme osobi okelú ɔ ɔmuaná na nɔlɛkawoni báyɛ :
« Bɛbandɔ́mɛsɛ́ ihúényínyí cɛ baacɔ ma fáaya náásɔ́,
bí húlúkúne ɔ Ɔmuaná. »
12 Aáná bé ŋe bú beébe lɔ́áka eénye cá bíábɔ́ bɛbandɔ́mɛsɛ́ :
*Baanábas nyiínyi anyía Séyus,
ª Bóol nyiínyi anyía Ɛlɛ́mɛs anyía u ŋaá bá mutáŋa.ª
13 Mululi nyiínjie mú bandɔ́mɛsɛ́ a cɛáŋa ne nyiínyi anyía Séyus ŋeé héléne banɔ́mɛ bá káwɔ balaŋákánɔ́ na bɛsama bɛ́ maatɛ́ eé buúse bú bihenyi bí ciíbe cɛ ɔbɛ́cɔ́kɔ́lɛ́na ci Séyus ;
cɛ ŋaá bá e nyiofokine nyɛ́ bálɛ́ka.
U ŋaá bá wa yáambaka ɔsɔ́mbɛ́na na Baanábas ne Bóol bitúké eébí,
anyía bá ŋa bɔ́ lɔ́kɔ́mána na baacɔ anyía bébú beébe nyemiki ne biíbi.
14 Mbá,
ɛ́makɛ́la baacɔ bá ɛndɔ́ma eébé ábɔ́ lɔ́kɔ́ma aáná,
bá ŋá laháka bíábɔ́ bɛlaŋa ;
bé ŋe tényí óofokine ɛ ɛkatɛ́katɛ́ cɛ nyɛkɔca nyɛ́ baacɔ,
bá kɔ́ɔnaka okelú ɔ ɔmuaná báyɛ :
15 « Baláayɛ́,
anyíatɛ́ nú ŋa nɔ́ kɛ́la aáná e ?
Basɔ́ tɔ́na,
tua sɔ́ŋa baacɔ háyɛ banɔ́.
Ambányɛ yɛ́ Ɛsɔ́ma yí Yésus ayɛ́ tu ŋá sɔ́ banɔ́ húlinyi áŋa anyía ánɔ nyɛanáka onyemi bɛbɔ́kɔ́bɔ́kɔ a bɛ́ tɛ ŋɔ́ yɔɔ́lɔ,
núá bɛ́kɔ́ŋɔ́na ná Bandɔ́mɛsɛ́ a wáŋa wɔɔ́sɔ ;
wuúci u ŋe kétíki na ɔmɛsɛ́ na ɔmuaná na nuɔmɔ́ nɔ́ makɛ́lɛ́ na bɛnyɛ́ma bikime a bɛ́áŋa hɔ́á.
16 A tɔɔya tú elime,
Bandɔ́mɛsɛ́ ŋe lúmítíne anyía mɔnɔŋɔ mekime a látákɛ́na cííbú ihényí cɛ́ bɛ́muátá acɛ́ bá ŋa bɔ́ bá bébú lénéke ɔlátɛ́na.
17 Yiíyi anyía u náŋa wé tóŋgínyi yááyɛ́ yaála yí nuubo a baacɔ ekúlú ekime,
u naŋa waá banɔ́ néesikinyi tɔbɔ́lá,
u banɔ́ héyísíkínyi bɛnyɛ́ma e bikúlú a bɛ́ á nyɛ́mana,
u banɔ́ iínjíékíne bɛnyɛ́ma bɛ́ ɔnyíá,
u nyióyísíki obíléne e cíínú ɛtɛ́má. »
18 Ta háyɛ baacɔ bá ɛndɔ́ma ŋa bɔ́ bá bábɔ́ táŋáka aáná,
bá ŋa bɔ́ lɛ́cáka muuyé muéŋí anyía bébú léke nyɛkɔca nyɛ́ baacɔ o beébe sɔ́mbɛ́na bitúké o o beébe nyemi.
19 *Besuif a bɔ́mɔtɛ́ ŋe bú húlé na a bálɛ́ka cɛ Antióse ci iisí ci Bisiti na a bálɛ́ka ci Ikóniyom ;
bé ŋe bú bísúétíne baacɔ,
bé ŋé túméke Bóol andányɛ́ anyía bébú wuúci ɔ́ɔ́nɔ́,
bé ŋé wuúci túlúléke,
bé ŋge wuúci oombóko a maabána ma bálɛ́ka,
bébú kétiki anyía ú me wé.
20 Ta híáná,
ekúlú eyí belumitinine ŋe bú bítúlékíne hoóhi ne wuúci,
Bóol ŋá hatɔ́na ɛndánáka,
u ŋá halɔ́mɔ́na a bálɛ́ka.
Ɔ ɔyá ɔyá,
u ŋé súéte a Tɛlɛ́bɛ ne wuúci na Baanábas.
Ne Bóol na Baanábas a Antióse i iisí ci Silíi
21 Ne Bóol na *Baanábas ŋe bú húlíkínyi baacɔ Ambányɛ yɛ́ Ɛsɔ́ma a bálɛ́ka cɛ Tɛlɛ́bɛ,
bó bísúékíne baacɔ beéŋí o olumitinine Yésus.
E elime eécí,
bá ŋgá hálɔ́mɔ́na ne e Lisitɛ́lɛ,
ne i Ikóniyom,
na a Antióse ci iisí cí Bisiti.
22 Bá ŋa bɔ́ bá bébú kíndísíki ɛtɛ́má cí belumitinine,
bé beébe lébéke anyía bá bɛ́kɛ́ndɛ́na o olumitinine noómi,
bá kɔ́ɔnaka báyɛ :
« Basɔ́ belumitinine,
tu ŋá sɔ́ nyɛ́mána tú ɔ cáŋa lɔ́kɔ́máka muuyé muéŋí,
mbá tu síké óofine e *Butéŋí bɔ́ Bandɔ́mɛsɛ́ noómi. »
23 Hí a hiɔ́bɔ hí belumitinine hikime hɛ́ hɔ́á,
bá ŋa bɔ́ táfáka baacɔ,
bó beébe télímíkínyi *bekendisi belumitinine.
Ɛŋakɛlá bébú bíkíilie ɔnyíá,
bɔ́ bɛ́cɔ́kɔ́lɔ́kɛ́na Bandɔ́mɛsɛ́,
bé ŋe beébe cuméke né Otéŋí a Waáŋá,
nááyá bá ŋa bɔ́ hákɛ́na mɔŋɔlɛ́.
24 E elime eécí,
bá ŋa bɔ́ hɔ́lákɛ́na i iisí ci Bisiti,
bá ŋgá háma i iisí cɛ Bamfilí.
25 Bé ŋe bú hulíkínyi baacɔ bá bálɛ́ka cɛ Bɛ́ɛsɛ Ambányɛ yɛ́ Ɛsɔ́ma,
bɔ́ ŋɔ́ lɔɔ́kɔ a Atali.
26 Aáhá bé ŋe bú óófíne eé sitíme a cɛ́mɔtɛ́,
bé ŋé súéte a bálɛ́ka cɛ Antióse i iisí ci Silíi,
haála ehé bé ŋeé beébe cuméke ná Bandɔ́mɛsɛ́,
anyía yááyɛ́ yaála yí nuubo é beébe ɔ́ɔ́lɔ ɔnyiɔkɔ buólí eebu ebú bé me bú kuényinyi aámbáya.
27 Ekúlú ayɛ́ bá ŋga bɔ́ hámá a Antióse,
ª bá ŋá bánda hiɔ́bɔ hí belumitinine hɛ́ hɔ́á,
bé ŋé hiíhi bíkétíkínyi bɛsana bikime abɛ́ Bandɔ́mɛsɛ́ ŋeé nyíóyísíkínyí a búábɔ́ buólí ;
hɔlákáhɔ́láka nyitóŋínyi anyɛ́ Bandɔ́mɛsɛ́ ŋoó tóŋínyi ohónyí anyía baacɔ a bá tɛ ábɔ́ bá Besuif á bɔ́ŋa bé olumitinine tɔ́na.
28 Aáná bé ŋe bú límékíne hɔ́á ekúlú yeéŋí ne belumitinine.