Bé ŋé kueyínyi Bíel eé ciíbe cɛ ɛcaná
12
1 Ekúlú etéeyé Otéŋí Elóotª ŋeé túmé otekese baacɔ a bɔ́mɔtɛ́ bá ɔlɔŋɔ ú belumitinine Kilís.
2 Aáná u ŋaá kɛ́lá anyía bɔ́ yɔ́ɔ́nɔ́ Sáak,
onyíinyí ú Sáaŋ,
na nɔsala nɔ́ ɔhána.
3 Ahá u ŋaá lɛ́cá anyía nyɛkɛla eényí ŋe bíléníne *Besuif,
u ŋé túné kɛ́la anyía bá hatɛ́na Bíel.
Yɛ́ ŋaá bá e ekúlú yɛ́ bɔŋanda abɔ́ bá ŋá nyíá biléti a bɛ́ tɛ á bá ne enutisi.
4 Ɛŋakɛlá *Elóot á kɛ́la anyía bá hatɛ́na Bíel,
u ŋé wuúci kueyínyi eé ciíbe cɛ ɛcaná ;
u ŋeé télímíkínyí ɛlɔŋɔ ínyíse cí bicénji bínyíse bínyíse o otétényi Bíel,
hú na ɔlɔŋɔ na yááyɛ́ ekúlú.
U ŋaá bá waá bɛ́tááka anyía e elime cɛ bɔŋanda bɔ́ *Basíka u kéé kélísíki Bíel,
baacɔ bekime limekine.
5 Ekúlú eyí bicénji ŋaá bá bíé tétényíki Bíel aáná eé ciíbe cɛ ɛcaná,
belumitinine ŋe bú bíínjíé ɔ ɔbɛ́cɔ́kɔ́lɛ́na Bandɔ́mɛsɛ́ na makɛ́nda a yááyɛ́ asana.
Elilé yɛ́ bɔsɔ́ma me hémúnyi Bíel eé ciíbe cɛ ɛcaná
6 Buutú a bɔ́mɔtɛ́,
bá kɔɔnaka anyía *Elóot kéé kélísíki Bíel nɔɔ́nɔyá,
Bíel ŋaá bá wa hɛ́táka hiiné ɛ ɛkatɛ́katɛ́ ci bicénji bífendí,
bé me wuúci ɔɔ́tɔ́kɔ́kɔ na macanja mefendí.
Bicénji a bɛ́mɔtɛ́ ŋaá bá bíé tétényíki nyiofine nyí ciíbe cɛ ɛcaná.
7 Elilé yɛ́ bɔsɔ́ma yɛ́ Bandɔ́mɛsɛ́ ŋá háma hú huasɛ !
Eese ŋá lɛcána e ekéti yí ciíbe eyí Bíel ŋaá bá hɔ́á ;
yí ŋé nyietínyi Bíel a bɛkɛndá,
yí ŋé wuúci heényi,
mbá yɛ́sɛ nááyá :
« Tényí hátɔna ɛndánáka.
» Macanja a má ŋaá bá aayá a aabá ŋé bíhémbúléke.
8 Mbá *elilé yɛ́ bɔsɔ́ma yɛ́sɛ nááyá :
« Bísúŋe ciɔwɔ kandá,
mbá a bɛ́háya bíɔ́wɔ bɛkandɛ́na a akɔlɔ́.
» Bíel ŋa kɛlaka híáná.
Elilé yɛ́ bɔsɔ́ma ŋá háná wuúci laana yɛ́sɛ :
« Laŋába búɔ́wɔ bɔlaka bú nyiike,
mbá a mɛ láta. »
9 Bíel ŋé yiíyi látáka,
bá ŋa hámá eé ciíbe cɛ ɛcaná ;
u ti menyi anyía bɔkɔ ebú elilé yɛ́ bɔsɔ́ma ŋá kɛla áŋa taaká.
Bíel bɛ́tááka ɔsɛ ú ma lɛca *eseye yɛ́ asana.
10 Bá ŋa bɔ́ hɔ́lá ɔlɔŋɔ ú bicénji ú buúse awɔ́ ú ŋaá bá wé tétényíki Bíel,
bɔ́ hɔ́la ú ɔláta ;
bá ŋga hámá e ehenyi yí biléŋú a aháŋá yɛ́ bálɛ́ka.
Ehenyi eéyé ŋé bíkúúne yiíyi bɛ́muátá ɛ́cɛ bá bɔ́áŋa hoóhi ;
aáná bá ŋa bɔ́ hámá a nɔháatɛ́,
bá ŋá láta hihényíhényí a hɛ́mɔtɛ́.
Hú ayɛ́ bé ŋe bú hiíhi láta aáná,
elilé yɛ́ bɔsɔ́ma yɛ́ Bandɔ́mɛsɛ́ nyiséŋúlíne Bíel eényí.
11 Ahɛ́ Bíel ŋeé bímenyi anyía wa yáaŋa a nɔháatɛ́,
yɔ́ lɛcá anyía bɛsana a bɛ́ ma bɛ́kɛ́láka áŋa taaká,
mbá ɔsɛ :
« Aámbáya í me mí menyi anyía Bandɔ́mɛsɛ́ wá tɔ́ma taaká yááyɛ́ elilé yɛ́ bɔsɔ́ma anyía yé keé mi kétúnyi a aabá cé Elóot,
yó mi kétúnyi tɔ́na e muuyé mukime emú *Besuif ŋaá bá bébú lénéke anyía yámɛ lɔ́kɔ́máka. »
12 Ɛŋakɛlá wá lɛ́ca aáná,
u ŋá cɔba o ooki ú Malíi,
iinyí cɛ Sáaŋ.
ª Bá ŋaá lɔá waáta Sáaŋ ɔtáŋɛ́na anyía Malɛ́kus.
Baacɔ beéŋí ŋa bɔ́ bá hɔ́á ɔ ɔbɛ́cɔ́kɔ́lɛ́na Bandɔ́mɛsɛ́.
13 Bíel ŋé kitíte okokí ú nyiofine.
Aáná munyiɔnɔ a mumɔtɛ́ e muénjú,
nyiínyi ɛ́cɛ Olóote ŋaá faáya ɔ ɔkɔbɛ́lɔ́kɔ́ma ɔɔcɔ ewú u ŋe kíte.
14 Ahɛ́ u ŋaá lɔ́kɔ́ma okelú ú Bíel,
yó menyi anyía Bíel wáŋa,
obíléne ŋé wuúci nyióyo ɔ ɔtɛ́má,
mbá na anyía wé kúúne ehenyi,
u ŋá hálɔ́mɔ́na yáaŋa na ɔtɛ́tá eé ciíbe noómi ɔ ɔkɔláana baacɔ anyía Bíel áŋa a nɔháatɛ́.
15 Báyɛ nááyá :
« Hatɔ́nɛ́na baacɔ na buála eébú.
» Mbá wuúci hú ɔkɔɔna anyía :
« Yááŋa taaká,
Bíel wáŋa.
» Báyɛ nááyá :
« Yáakɛlá yááyɛ́ elilé yááŋa. »
16 Hú bábɔ́ táŋáka aáná,
Bíel a hɛ́nyákɛ́na okite okokí.
Bé ŋe síké ebú kúune ehenyi,
bá ŋá lɛcá Bíel,
bé ŋe kéké buéŋí.
17 U ŋé beébe eendé na ɔɔbɔ́,
u ŋé beébe bíkétíkínyi anyána Bandɔ́mɛsɛ́ meé wuúci hémúnyi eé ciíbe cɛ ɛcaná.
Mbá ɔsɛ :
« Énu síké óókísi Sáakª asana eeye,
na báásɔ́ benyíinyí a bɔ́mɔtɛ́ áyá.
» U ŋá háma o osúéte haála hé etémbí.
18 Ahɛ́ ɔyá ŋaá yá,
bicénji ŋé túme obíyébi anyía bébú ményi háányɛ́ Bíel áŋa.
19 Elóot ŋá tɔ́mɔ́kɔ́na baacɔ o o húle áamba Bíel ;
háyɛ bó ti ómo bú wuúci bɔ́ŋɔ,
u ŋá kɛlá anyía bé bícónyíki bicénji eébí,
nyiínjie makɛ́nda me o biíbi ɔɔ́nɔ́kɔ eényí.
E elime eécí,
Elóot ŋaá hatɔ́na i iisí ci Yuté,
yó ko límekine a bálɛ́ka cɛ Sɛsalɛ́ɛ ɔmbana ú mɔɔ́sɛ́.
20 Elóot ŋaá bá waá lɔ́kɔ́mákɛ́na baacɔ ne bé Tíil ne bé Síton ɔtɛ́má ɔnua weéŋí.
Aáná baacɔ eébé ŋa bɔ́ lɔ́kɔ́mána,
bɔ́ hɔ́lɛna ná Bɛlástus,
muafa bɔnɔ́mɛ bú ooki ú Elóot ;
bá ŋa bɔ́ cɔ́ba né Elóot anyía bábɔ́ báta nyɛlata nyí bumbénú anyía bíábɔ́ bɛnyɛ́ma bɛ́ ɔnyíá ŋaá bá bíé húlúkúne i iisí ci Elóot.
21 Ekúlú ayɛ́ ɛndána ecí Elóot ŋeé beébe iínjíé ŋa kaá hámá,
Elóot ŋá laŋábaka bíáyɛ́ bɛlaŋa bí butéŋí,
u ŋé límíne a nɔkɔná ;
u táŋáka,
baacɔ bekime lɔ́kɔ́máka.
22 Baacɔ kɔɔnaka buáŋá,
báyɛ :
« Bandɔ́mɛsɛ́ a cɛ́mɔtɛ́ cɛ ŋaá táŋa,
tɛ́ cáŋa ɔɔcɔ ! »
23 Hú aá yaátɛ́ ekúlú,
elilé yɛ́ bɔsɔ́ma yɛ́ Bandɔ́mɛsɛ́ ŋó konyísi Elóot anyía u ŋa nyɛana anyía baacɔ ébú wuúci iínjíékíne nuúmi na anyía bé nuúnu iínjíékíne ná Bandɔ́mɛsɛ́ ;
bicicí ŋeé wuúci ɔɔ́ŋɔ́lɔ́kɔ́ a tɔɔna,
nyiwé eényí.
24 Aáná Bɛsana bɛ́ Bandɔ́mɛsɛ́ ŋaá bá bɛ́a cɔ́cɔbaka ne buúse.
25 Ɛ́makɛ́la na *Baanábas ne Sóol ábɔ́ mana búábɔ́ bɔsɔ́ma bú okoówiínjie mɔɔnyɛ́ eé Yelúsalɛm,
bá ŋgá bɔ́ hálámánáná a Antióse Sáaŋ awɔ́ bɔ́ ŋɔɔ́ lɔ́ŋɔ anyía Malɛ́kus.