Bíel ŋe bíkétínyi belumitinine úúyé ɔkanda
11
1 Ekúlú ayɛ́ ta baacɔ a bá tɛ ábɔ́ bá *Besuif ŋa bɔ́ káha tɔ́na bɔmbányɛ Bɛsana bɛ́ Bandɔ́mɛsɛ́ aáná,
na baacɔ bá ɛndɔ́ma na báábɔ́ benyíinyí belumitinine *Kilís bé Yuté ŋa bɔ́ lɔ́kɔ́máká asana eéyé.
2 Ahɛ́ Bíel ŋgaá hálɔ́mɔ́ná eé Yelúsalɛm,
belumitinine a bá ŋa bɔ́ bá bábɔ́ kɔɔnaka anyía baacɔ bekime ŋá bɔ́ nyɛ́mána bá ɔbɛ́ácáka ŋe bú túme ɔkákálɛ́na Bíel,
3 báyɛ :
« Anyána o ŋoó woofine eé meébe ma baacɔ a bá tɛ ábɔ́ bá babɛ́ácákánɔ́,
e nyíékínyi ne beébe e ? »
4 Aáná Bíel ŋeé beébe bíkétíkínyi bɛsana bikime háyɛ bɛ́ ŋa bɛ́kɛ́láka,
ɔsɛ náábɔ́ :
5 « Ɛ ŋaá mɛ bá a bálɛ́ka ci Sobé yámɛ bɛ́cɔ́kɔ́lɔ́kɛ́na Bandɔ́mɛsɛ́,
míɔ lɛcá *eseye yɛ́ asana :
Bɔkɔ ŋeé húle ɔ Ɔmuaná,
bú sɔ́ɔ́náka ɔ ɔmɛsɛ́,
bú hɔ́áka yaandándá yɛ́ sanja ne *tubéŋú túnyíse tusúŋékénú.
Bɔkɔ eébú ŋa kaáháma hoóhi na yaŋɔ́.
6 I ŋe mí buúbu bísíémúkúnyí,
míɔ lɛcaka noómi anamánamá ne cé bitúké bɛ́ ɔmɛsɛ́,
na cá ɛnyama cí biciké,
na mɔɔ́hɔ,
ne tunonyí tɔ́ ɔmuaná.
7 Ɛ ŋaá mɛ lɔ́kɔ́má okelú á mɛ laakɛna ɔ́sɛ :
“Bíel eé,
hatɔ́na ɛndánáka,
ɔ́ɔ́nɔ́kɔ ɛnyama eeci mbá e ciíci nyíáka !”
8 Mbá ɛsɛ́ :
“Buakaʼo,
Otéŋí a Waáŋá,
anyía ta buɔ́sɛ́ ɛ tɛ́ ŋá mɛ nyíá bɔkɔ te bú bihíŋe,
ta bɔ́ mɔnyɔ́kɔ́lɔ́.”
9 Okelú oócí ŋa háná lɔ́kɔ́mána ɔ Ɔmuaná ɔ́sɛ :
“Bɔkɔ bukime abɔ́ Bandɔ́mɛsɛ́ ŋaá kɔ́ɔ́na anyía búáŋa bufúúménénú,
atɛ kɔɔ́na anyía búáŋa bɔkɔ bɔ́ mɔnyɔ́kɔ́lɔ́.”
10 Okelú oócí ŋaá hálɔ́mɔ́nɛ́ná ɔlɔ́kɔ́mána bikúlú bɛ́tátɔ́ ;
e elime eécí,
bɔkɔ eébú ŋá hálɔ́mɔ́na ɔ Ɔmuaná na bíáyɛ́ bɛnyɛ́ma bikime.
11 Hí aá yaátɛ́ ekúlú,
baacɔ bátátɔ́ ŋá ka bɔ́ hámá o ooki awɔ́ ɛ ŋaá mɛ bá hɔ́á;
ª bé ŋeé beébe tɔ́má náámɛ,
bé húlúkúne a Sɛsalɛ́ɛ.
12 *Efúúménénú yí Elilé ŋa mɛ́ laána anyía yémí súéte ne beébe,
i ti bísúŋúnyi.
Benyíinyí bé olumitinine bétíndétú ebé i ŋeé mi héléné aaha ŋge bú mi síké a Sɛsalɛ́ɛ.
Tu ŋé oofíne basɔ́ bekime eé ciíbe cɛ Kɔɔnɛ́yɛ.
13 U ŋá basɔ́ bíkétíkínyi háyɛ ú ŋa lɛ́cá eeyé eé ciíbe *elilé yɛ́ bɔsɔ́ma yɛ́ Bandɔ́mɛsɛ́ atálɛ́mánánɔ́,
yí wuúci laakɛna yɛ́sɛ :
“Tɔ́ma baacɔ eé Sobé bɔ́ kɔ lɔ́ŋɛ́ta Símon,
úúyé ɔtáŋɛ́na Bíel.
14 U kɔ́ yɔ́ɔ laakɛna mehúnyi e mé kó yó nohi,
na ciɔwɔ ciíbe cɛ baacɔ ikime áyá !”
15 Ekúlú eyí i ŋeé mi túmé ɔtáŋa,
Efúúménénú yí Elilé nyiofine eényí náábɔ́,
bɔkɔ búmɔtɛ́ háyɛ yí ŋe yóófíne náásɔ́ e nyitúme.
16 Aáná ɛ ŋaá mɛ́ bɛ́táá asana eyí Otéŋí a Waáŋá ŋaá kɔ́ɔ́na ɔsɛ :
“Sáaŋ ŋó yóótókíne baacɔ ne menyífé,
mbá banɔ́,
Bandɔ́mɛsɛ́ káá banɔ́ óótokine ne Efúúménénú yí Elilé.”
17 Aáná Bandɔ́mɛsɛ́ ŋeé beébe iínjíé nyiínjie nyɛ́mɔtɛ́ háyɛ anyɛ́ ú ŋaá basɔ́ iínjíé ekúlú ayɛ́ tu ŋa sɔ́ háya mɔŋɔlɛ́ né Otéŋí a Waáŋá Yésus Kilís ;
yaŋɔ́ ɛ́cɛ aányɛ́ awɔ́ ya mɛ́ŋa wu ɔbɛ́kɛ́ŋɛ́lɛ́ána a nyɛkɛla nyɛ́ Bandɔ́mɛsɛ́ e ? »
18 Ɛŋakɛlá baacɔ eébé ábɔ́ lɔ́kɔ́máka ɔtáŋa oócí,
bé ŋé lésíkínyi mbuumu,
bé iínjíékíne Bandɔ́mɛsɛ́ nuúmi,
báyɛ :
« Yááŋa taaká anyía Bandɔ́mɛsɛ́ me yiínjie tɔ́na baacɔ a bá tɛ ábɔ́ bá Besuif ohónyí na wú ɔbɛ́kákálákɛ́na máábɔ́ maabɛ́ na wú ɔbɔ́ŋɔ taaká ci olíhe. »
Belumitinine bá bálɛ́ka cɛ Antióse
19 Mutekesene e mú ŋeé túmé ekúlú ayɛ́ bɔ́ ŋɔ yɔ́ɔ́nɔ́ Itiene ŋa kɛ́lá anyía belumitinine *Kilís ábɔ́ sáásíáka.
Bɔsɔ́ɔ́kɔ́ a bɔ́mɔtɛ́ eé beébe ŋe bú súétéké,
bɔ́ kɔ hámɔ́kɔ́na ne e Fenisí,
ne e Síbele,
na a Antióse.
ª Mbá hú a baacɔ bé Besuif bá ŋa bɔ́ bá bébú húlikinyi Ambányɛ yɛ́ Ɛsɔ́ma.
20 Mbá ta híáná,
nyɛkátá nyí belumitinine a bɔ́mɔtɛ́ ne bé Síbele ne bé Silɛ́ɛn ŋa bɔ́ cɔ́bá a Antióse ;
beébe bé ŋe bú túmé ɔtáŋa tɔ́na na baacɔ a bá tɛ ábɔ́ bá *Besuif,
bé beébe húlikinyi Ambányɛ yɛ́ Ɛsɔ́ma e yí ŋo tóŋínyi asana yí Otéŋí a Waáŋá Yésus.
21 Makɛ́nda ma Bandɔ́mɛsɛ́ ŋaá bá ne beébe,
ɔmbana ú baacɔ weéŋí nyɛhákɛ́na mɔŋɔlɛ́ né Otéŋí a Waáŋá eényí,
bá ŋá bɔ bɛ́kɔ́ŋɔ́nákɛ́na ɛtɛ́má.
22 Hiɔ́bɔ hí belumitinine hí Yelúsalɛm ŋaá lɔ́kɔ́máká asana eéyé,
aáná bá ŋa bɔ́ tɔ́má *Baanábas a bálɛ́ka cɛ Antióse.
23 Ahɛ́ u ŋgaá hámá hɔ́á,
yɔ́ lɛ́ca háyɛ Bandɔ́mɛsɛ́ ŋaá sáyábákɛ́na belumitinine,
u ŋé bílénéke,
u ŋé beébe kíndísíki anyía beébe bekime bé límekine bebíínjíénú né Otéŋí a Waáŋá na ɔtɛ́má okime.
24 Yááŋa anyía Baanábas ŋaá bá na ambányɛ yɛ́ ɔtɛ́má,
wuúci onyíóyónó ne *Efúúménénú yí Elilé,
ne olumitinine ɔ ɔtɛ́má.
Ɔmbana ú baacɔ weéŋí ŋeé bíínjíé ɔ ɔlátɛ́na Bɛsana bí Otéŋí a Waáŋá.
25 E elime eécí,
Baanábas ŋé súéte a Táas ɔ ɔkɔwáamba Sóol hɔ́á.
26 Ɛ́makɛ́la wéé wuúci bɔ́ŋɔ,
u ŋé wuúci cɔbana a Antióse ;
bó límekine hɔ́á beébe bekime béfendí na hiɔ́bɔ hí belumitinine eéhí hiɔŋɔ hikimekime,
bó weékúnyíki ɔmbana ú baacɔ weéŋí bɛsana bí olumitinine.
A Antióse,
bá ŋa cáŋacáŋa ɔlɔa *baákɔ́nɛ́na bé Yésus báyɛ bekilísíten.
27 Aá yaátɛ́ ekúlú eéyé,
*behémúnyi bɛsana bá Bandɔ́mɛsɛ́ a bɔ́mɔtɛ́ ŋa bɔ́ hátɔ́na eé Yelúsalɛm,
bɔ́ cɔ́ba a Antióse.
28 A mumɔtɛ́ eé beébe,
nyíáyɛ́ nyiínyi ɛ́cɛ Akabus,
ŋaá hátɔ́na ɛndánáka,
ú húlíkínyi baacɔ bɛsana na makɛ́nda me Efúúménénú yí Elilé,
u kɔɔnaka ɔsɛ hikúlúkúlú mecíli a maáŋá káá nyíá ɔmɛsɛ́ okime.
ª (Híáná yɛ́ ŋaá bɛ́kɛ́láka ekúlú eyí Kolóote ŋaá bá Sɛsáal).ª
29 Baákɔ́nɛ́na bé Yésus ŋa bɔ́ sɔ́mbɔ́tɔ́ná o owiínjíékíne hú naányɛ́ bɔkɔ bukime abɔ́ wáŋa wu ɔbɔ́ŋɔ,
anyía bábɔ́ tɔ́mɛ́na benyíinyí bé olumitinine bé Yuté nyiɔ́lɔ.
30 Híáná bá ŋa bɔ́ kɛ́láka ;
bɔ́ tɔ́mɛ́na *bekendisi belumitinine bé Yuté nyiɔ́lɔ eényí ;
na Baanábas ne Sóol bé ŋe bú nyiínyi cɔbána.ª