Bíel ŋe húlinyi Kɔɔnɛ́yɛ Ambányɛ yɛ́ Ɛsɔ́ma
10
1 Ɔɔcɔ a wɔmɔtɛ́ ŋaá bá a Sɛsalɛ́ɛ,
ª nyíáyɛ́ nyiínyi ɛ́cɛ Kɔɔnɛ́yɛ.
U ŋaá bá mutéŋínyi bicénji etíne atáánɔ ɔ ɔlɔŋɔ ú bicénji awɔ́ bɔ́ ŋɔ́ lɔ́ŋɔ anyía « bicénji bí Italí ».
2 Ɔɔcɔ oócí ŋaá bá atálɛ́mánánɔ́ yɛ́ ɔɔcɔ,
u kékéke Bandɔ́mɛsɛ́ buéŋí,
ne wuúci na ciayɛ́ ciíbe cɛ baacɔ ikime.
U ŋaá bá wɔ yɔ́ɔ́lɔ́kɔ basɔ́kásɔ́ka bé *Besuif buéŋí ;
u bɛ́cɔ́kɔ́lɔ́kɛ́na Bandɔ́mɛsɛ́ bikúlú bikime.
3 Búmɔtɛ́ buɔ́sɛ́,
i injéŋí ɛ́tátɔ́ cɛ nabuɔ́sɛ́,
ª Kɔɔnɛ́yɛ ŋaá lɛ́cá eseye yɛ́ asana :
Elilé yɛ́ bɔsɔ́ma yɛ́ Bandɔ́mɛsɛ́ ŋo yóófíne nááyá,
yó wuúci lɔ́ŋɛ́ta yɛ́sɛ :
« Kɔɔnɛ́yɛ e ! »
4 Kɔɔnɛ́yɛ ŋé yiíyi tála eése,
u líkíméke,
u ŋé yiíyi batá ɔsɛ :
« Aátɛ́ yááŋa e,
Otéŋí ?
» Elilé yɛ́ bɔsɔ́ma yɛ́ Bandɔ́mɛsɛ́ ŋé wuúci bɛ́káma yɛ́sɛ :
« Bandɔ́mɛsɛ́ ŋeé bíléníne ne úúwe ɔbɛ́cɔ́kɔ́lɛ́na na nyiɔ́lɔ anyɛ́ ɔ ŋɔɔ́ wɔɔ́lɔ basɔ́kásɔ́ka ;
yaátɛ́ asana u tɛ ŋɔ́ yɔ́ɔ bɛ́hɔ́ya.
5 Aámbáya aná,
tɔ́ma baacɔ eé Sobé bá kɔ́ lɔ́ŋɛ́ta ɔɔcɔ a wɔmɔtɛ́ awɔ́ bá ŋɔɔ́ lɔ́ŋɔ anyía Símon,
úúyé ɔtáŋɛ́na Bíel.
6 U ŋe límíne o ooki ú Símon,
mutumbe bɛɔfɔ.
Ciayɛ́ ciíbe áŋa a asálá yɛ́ nuɔmɔ́ nɔ́ makɛ́lɛ́. »
7 Hí ahɛ́ *elilé yɛ́ bɔsɔ́ma eéyí ŋa hɔ́lá,
Kɔɔnɛ́yɛ ŋɔ́ lɔ́ŋɛ́ta na bááyɛ́ bɔnyiɔnɔ a bɔ́mɔtɛ́ béfendí,
ne ecénji e bicénji abɛ́ u ŋaá bá weé téŋgínyi,
sɔ́ɔ́kɔ́ awɔ́ u ŋaá bá atálɛ́mánánɔ́ yɛ́ ɔɔcɔ.
8 U ŋé beébe bíkétíkínyi bɛsana bikime a bɛ́ a bɛ́kɛ́láka,
nyi beébe tɔ́ma eényí eé Sobé.ª
9 Ɔ ɔyá ɔyá,
ekúlú ayɛ́ baacɔ eébé ŋa bɔ́ bá o ohónyí,
bébú bíkósíki na bálɛ́ka ci Sobé,
Bíel ŋá bááta ɔ ɔnɔŋɔ ú ciíbe ɔ ɔbɛ́cɔ́kɔ́lɛ́na Bandɔ́mɛsɛ́.
Túefiª ŋaá bá hoóhi na ɔnyɛmana.
10 Ɛcaná ŋé túme o wuúci nuana,
u aambaka ɔnyíá.
Ekúlú ayɛ́ bá ŋaá bá bé wuúci námbákɛ́na bɛnyɛ́ma,
u ŋe síké é bítéme ciayɛ́ injiŋé ma bɛ́kɔ́ŋɔ́na,
u ŋá lɛcá *eseye yɛ́ asana :
11 Ɔmuaná ŋeé bíhúúné,
bɔkɔ háyɛ yaandándá yɛ́ sanja sɔ́ɔ́náka ɔ ɔmɛsɛ́ ne *tubéŋú túnyíse tusúŋékénú.
12 A bɔkɔ eébú noómi,
anamá ekime na cá ɛnyama,
na cá mɔɔ́hɔ,
ne cé tunonyí ŋaá bá hɔ́á.
13 Aáná Bíel ŋaá lɔ́kɔ́má okelú a wɔ́mɔtɛ́ é wuúci laakɛna ɔ́sɛ :
« Bíel,
hátɔ́na ɛndánáka !
Ɔ́ɔ́nɔ́kɔ ɛnyama eeci,
mbá e ciíci nyíáka. »
14 Mbá Bíel ɔsɛ :
« Buakaʼo,
Otéŋí a Waáŋá,
anyía ta buɔ́sɛ́ ɛ́ tɛ ŋá mɛ nyíá bɔkɔ te bú bihíŋe,
ta bɔ́ mɔnyɔ́kɔ́lɔ́. »
15 Okelú oócí ŋa háná á lɔ́kɔ́mána,
u ŋé wuúci laána ɔ́sɛ :
« Bɔkɔ bukime abɔ́ Bandɔ́mɛsɛ́ ŋaá kɔ́ɔ́na anyía búáŋa bufúúménénú,
atɛ kɔɔ́na anyía búáŋa bɔkɔ bɔ́ mɔnyɔ́kɔ́lɔ́. »
16 Asana eéyé ŋaá hálɔ́mɔ́nɛ́na ɔbɛ́kɛ́la aáná bikúlú bɛ́tátɔ́ ;
e elime eécí,
bɔkɔ eébú ŋaá hálɔ́mɔ́ná ɔbááta ɔ Ɔmuaná.
17 Ekúlú eyí Bíel ŋaá bá waá bɛ́tááka nyihembule nyɛ́ asana ayɛ́ ú ma lɛ́caka,
baacɔ abá Kɔɔnɛ́yɛ ŋaá tɔ́má ŋa bɔ́ bá ɛ́cɛ bá ma bɔ́ bátaka baacɔ ooki ú Símon ;
bá ŋa bɔ́ bá bá búáŋa aámbáya eé buúse bú ehenyi.
18 Bá ŋá lɔ́ŋɔ́kɔ baacɔ,
bó beébe bata báyɛ :
« Tɛ́ka aaha Símon awɔ́ bɔ́ ŋɔɔ́ lɔ́ŋɔ anyía Bíel ŋe límine e ? »
19 Bíel ŋaá bá wa yánáŋa ɔ ɔbɛ́táá asana ayɛ́ wá lɛ́caka,
ekúlú eyí Elilé yɛ́ Bandɔ́mɛsɛ́ ŋeé wuúci laána yɛ́sɛ :
« Kuɔŋɔ́,
baacɔ a bá bɔ́ŋa aaha bátátɔ́ª ŋa bɔ́ aamba ;
20 hatɔ́na,
sɔ́ɔ́na,
mbá e súéte ɔlɔŋɔ ne beébe,
eti bísúŋúnyi anyía yaŋɔ́ yémi beébe tɔ́ma. »
21 Aáná Bíel ŋaá hátɔ́na,
yɔ́ kɔ kúana baacɔ eébé,
mbá ɔsɛ :
« Yaŋɔ́,
ya mɛ́ŋa ɔɔcɔ awɔ́ nu ŋa nɔ́ aamba.
Aátɛ́ nuanɔ́ fáaya ɔ ɔkɛla e ? »
22 Báyɛ :
« Tua sɔ́ŋa aaha anyía mutéŋínyi bicénji Kɔɔnɛ́yɛ ú maá basɔ́ tɔ́ma nɔ́ɔ́wɔ.
Wáŋa atálɛ́mánánɔ́ yɛ́ ɔɔcɔ,
u naŋa weé kékéke Bandɔ́mɛsɛ́ ;
Besuif bekime ŋe bú wuúci lémbi.
Elilé yɛ́ bɔsɔ́ma yɛ́ Bandɔ́mɛsɛ́ e yefúúménénú ŋeé wuúci laána anyía wɔ́ yɔ́ɔ lɔ́ŋɔ́kɔ e úúyé ooki,
wá lɔ́kɔ́máka bɛsana abɛ́ ɔ ŋɔ́ɔ cɔ́ba o o wuúci laakɛna. »
23 Bíel ŋeé beébe oofínyi eé ciíbe,
yó beébe fienyisi.
Ɔ ɔyá ɔyá,
u ŋá hatɔ́na ɔlɔŋɔ na baacɔ eébé,
bé ŋé súéte.
Belumitinine a bɔ́mɔtɛ́ bé Sobé ŋa bɔ́ cɔ́ba o okoó wuúci síke.
24 A buɔ́sɛ́ bɔ́ ɔláta,
bá ŋga hámá a Sɛsalɛ́ɛ.
Kɔɔnɛ́yɛ ŋaá bá weé beébe tátáka na ciayɛ́ ciíbe cɛ baacɔ na bíáyɛ́ bikendinyi bɛ́ ɔtɛ́má abɛ́ u ŋɔɔ́ lɔ́ŋɔ́kɔ́.
25 Ekúlú eyí Bíel ŋa sɛ́ wé yóófíne eé ciíbe,
Kɔɔnɛ́yɛ ŋa cɔ́bá o okoó wuúci káha,
u ŋá kuána Bíel a akɔlɔ́ o o wuúci nyemíki.
26 Mbá Bíel ŋeé wuúci hetúnyí,
yó wuúci laana ɔsɛ :
« Hatɔ́na ɛndánáka,
eti mi nyemíki ;
yaŋɔ́ tɔ́na,
ya mɛ́ŋa ɔɔcɔ háyɛ kuɔŋɔ́. »
27 Aáná Bíel ŋo yóófíne eé ciíbe,
bé húle táŋátáŋa na Kɔɔnɛ́yɛ ;
u ŋaá kúána baacɔ beéŋí babɛ́bándánɔ́ hɔ́á.
28 Mbá ɔsɛ náábɔ́ :
« Nú ŋe nú ményi anyía olumitinine ú Besuif ti ŋó yóókóto anyía uubú ɔɔcɔ é kendíkínyi na ɔɔcɔ u bunɔŋɔ bú etémbí,
ta anyía wé yóófine e úúyé ooki.
Mbá ta híáná,
Bandɔ́mɛsɛ́ ŋeé mi tóŋínyí anyía ɛ tɛ ɔ́mɔ́ nyɛ́mana wu ɔlɛcaka ta ɔɔcɔ a wɔmɔtɛ́ háyɛ ɔɔcɔ u bihíŋe ta anyía u mɔnyɔ́kɔ́lɔ́,
mbá i wuúci bíkíilie.
29 Buátɛ́ bɔkɔ ɛ́ ma mɛ́ faaya,
i ti bísúkúle.
Ɛ ŋa mɛ́ aamba omenyi aatɔ́ yɛ́ asana ayɛ́ ɔ́ɔ mɛ lɔ́ŋɔ́kɔ. »
30 Kɔɔnɛ́yɛ ɔsɛ :
« Hɛ́nánɔ eeci mɔɔ́sɛ́ matátɔ́,
e ekúlú eeye aana,
ɛ ŋa mɛ́ bá yámɛ bɛ́cɔ́kɔ́lɔ́kɛ́na Bandɔ́mɛsɛ́ª eémi eé ciíbe,
i injéŋí ɛ́tátɔ́ cɛ́ nabuɔ́sɛ́.
I ŋe síké emi bítéme ɔɔcɔ maá mɛ tálɛ́mɛ́nɛ́na eé buúse,
bíáyɛ́ bɛlaŋa nɔmaka,
31 mbá ɔsɛ :
“Kɔɔnɛ́yɛ,
Bandɔ́mɛsɛ́ áŋa ɔlɔ́kɔ́mánɔ́ úúwe ɔbɛ́cɔ́kɔ́lɛ́na ;
u ŋa bɛ́táá nyiɔ́lɔ anyɛ́ ɔ ŋɔɔ́ wɔɔ́lɔ basɔ́kásɔ́ka.
32 Tɔ́ma baacɔ aná eé Sobé,
bɔ́ kɔ lɔ́ŋɛ́ta ɔɔcɔ a wɔmɔtɛ́ awɔ́ bɔ́ ŋɔɔ́ lɔ́ŋɔ anyía Símon,
úúyé ɔtáŋɛ́na Bíel.
U ŋe límine o ooki ú Símon,
mutumbe bɛɔfɔ.
Ciayɛ́ ciíbe áŋa a asálá yɛ́ nuɔmɔ́ nɔ́ makɛ́lɛ́.”
33 Ɛ ŋaá mɛ tɔ́ma ɔ ɔtɔ́ma baacɔ ɔ ɔkɔɔ́ kuɔŋɔ́ lɔ́ŋɛ́ta.
Ɔ́ mɔɔ́ kɛla bɔmbányɛ háyɛ ɔ́ mɔɔ́ faáya.
Aámbáya basɔ́ eebe eé buúse bɔ́ Bandɔ́mɛsɛ́ anyía túásɔ́ lɔ́kɔ́máka bɛsana bikime ebí Otéŋí a Waáŋá ɔ́ yɔ́ɔ laakɛna anyía ɔ́ɔ basɔ́ húlíkínyi. »
Bíel ŋe bíkétíkínyi baacɔ bɛsana o ooki ú Kɔɔnɛ́yɛ
34 Bíel ŋeé túmé ɔtáŋa ɔsɛ :
« Aámbáya ɛ́ maá mɛ lɔ́kɔ́ma bɔmbányɛ bɔmbányɛ anyía Bandɔ́mɛsɛ́ tɛ á bá ne mebeé.
35 Míɔ háná lɛca anyía ɔɔcɔ okime ewú u ŋeé kéke Bandɔ́mɛsɛ́,
u kɛlaka bɛsana a bɛtálɛ́mánánɔ́,
ŋe bíléníne Bandɔ́mɛsɛ́,
ta u cáŋa á bá u bunɔŋɔ bɔ́ háányɛ́ !
36 Bandɔ́mɛsɛ́ ŋaá tɔ́mɛ́ná baacɔ bé *Islayɛ́l Ambányɛ yɛ́ Ɛsɔ́ma o o beébe óókísi anyía mbuumu káá bá ɛ ɛkatɛ́katɛ́ ci ne wuúci na baacɔ e elime ci Yésus *Kilís,
Mutéŋínyi baacɔ bekime.
37 Banɔ́ bɛ́muátá,
nú ŋe nú ményi bɛsana a bɛ́ ŋa bɛ́kɛ́láka i iisí ci Yuté ikime o otúme a *Kalilé ekúlú ayɛ́ Sáaŋ ŋeé húlíkínyi baacɔ Ambányɛ yɛ́ Ɛsɔ́ma,
yó beébe ootokine.
38 Nú ŋe nú ményi tɔ́na anyána Bandɔ́mɛsɛ́ ŋe yíinjíé Yésus,
ɔɔcɔ u *Násalɛt,
makɛ́nda me *Efúúménénú yí Elilé.
Nú ŋe nú ményi tɔ́na anyána Yésus ŋaá bá u húlé á kándaka,
u kɛlaka baacɔ bɔmbányɛ,
u eéŋúnyísíki baacɔ bekime abá Musɔ́mɛ́na ŋaá bá mú ma hátɛakɛna.
Yááŋa anyía Bandɔ́mɛsɛ́ ŋaá bá ne wuúci.
39 Basɔ́ bɛ́muátá,
tua sɔ́ŋa bambasɔ́mbásɔ bá bɛsana bikime ebí Yésus ŋaa kɛ́láka i iisí ci *Besuif,
hɔlákáhɔ́láka eé Yelúsalɛm.
Bé ŋeé wuúci ɔ́ɔ́nɔ́ ɛ́cɛ bé meé wuúci aátákɛ́na ɔ ɔmbásá.
40 Asana ɔ́mɔtɛ́,
Bandɔ́mɛsɛ́ ŋeé wuúci heényi o owé a mɔɔ́sɛ́ matátɔ́,
yó wuúci iínjie makɛ́nda me obítóŋgínyi a baacɔ.
41 U ti ómo bítóŋínyi a baacɔ bekime,
mbá náásɔ́,
bambasɔ́mbásɔ abá Bandɔ́mɛsɛ́ ŋa cáŋacáŋa ɔtáfáka,
u ŋé bítóŋgínyi.
Tu ŋe sú nyíékínyí,
túó muékínyi ɛ́cɛ ú ma háanyua e biwéewé.
42 Yésus ŋaá basɔ́ tɔ́má anyía túésú húlíkínyi baacɔ Ambányɛ yɛ́ Ɛsɔ́ma,
tu beébe tóŋgínyi anyía wuúci wáŋa taaká ooci awɔ́ Bandɔ́mɛsɛ́ ŋaá kɔ́ɔ́na anyía u káá sɔ́mbɔ́tɔ́kɔ́nɛ́na na bɔɔ́sɔ ne bewéékúnénú bɛsana.
43 Ɔɔcɔ oócí,
Yésus,
*behémúnyi bɛsana bá Bandɔ́mɛsɛ́ bekime ŋa bɔ́ táŋáká yááyɛ́ asana,
bá kɔ́ɔnaka báyɛ :
Ɔɔcɔ awɔ́ u ŋá háya mɔŋɔlɛ́ nááyá,
Bandɔ́mɛsɛ́ ŋa nyɛ́anɛnɛna búáyɛ́ bɔɔbɛ́ e elime ci Yésus. »
Efúúménénú yí Elilé me oofine a baacɔ a bá tɛ ábɔ́ bá Besuif
44 Ekúlú eyí Bíel ŋaá bá wa yánáŋa ɔ ɔtáŋa,
*Efúúménénú yí Elilé nyiofinine eényí ɛtɛ́má cɛ́ baacɔ bekime a bá ŋa bɔ́ lɔ́kɔ́máká Bɛsana bɛ́ Bandɔ́mɛsɛ́.
45 Belumitinine a bá ŋa bɔ́ fááya o okoósíke Bíel ŋa bɔ́ bá *Besuif ;
bé ŋe bú kékéké buéŋí ekúlú ayɛ́ bá ŋa bɔ́ lɛ́cá anyía Bandɔ́mɛsɛ́ me yíínjie ta baacɔ a bá tɛ ábɔ́ bá Besuif Efúúménénú yí Elilé.
46 Yááŋa anyía bá ŋa bɔ́ bá bábɔ́ lɔ́kɔ́máka bábɔ́ táŋáka ɛtáŋa anamánamá,
bé nyémiki bɛandándá bí *bikéki bɛ́ bɛsana bɛ́ Bandɔ́mɛsɛ́.
47 Mbá Bíel ɔsɛ :
« Aámbáya baacɔ eebe a búáŋa bonyíóyónú ne Efúúménénú yí Elilé háyɛ basɔ́,
aányɛ́ wáŋa wu o beébe kóti tɔ́na *obíótíne ne menyífé e ? »
48 Ɔsɛ bé beébe ootókíne eé nyiínyi nyí Yésus *Kilís,
nyi beébe ootókíne eényí.
Bé ŋé wuúci batá anyía wa háná límekine ɔmbana ú mɔɔ́sɛ́ ne beébe.