Kàrmɔ̀ byilnə nánkɔ̀mdɛ́ bʼa nə còrhò-tum
2
Lyì yʼà ŋwɛ́nɛ́ Esərayɛl lyì bí wẽ́ shãã ga,
bə̀ nʼê gòm kɔma bə̀ bə̀myɛ́ wɔ́ Yi nyì-zwennə.
Èta myɛ,
kàrmɔ̀ byilnə nánkɔ̀mdɛ̀ bʼa shèè bə yə̀ ámyɛ wẽ́ bə̀ nʼê cèrhè kɔma nyə̀ná lyì bí ni.
Bə̀ gaga mɔ́ bʼa zhɛ̃̀ bə̀ yó-cə́bal mɔ́ mɔ̀bɔ́ ń vwârh bɛ mɔ́.
Sə bə̀ mʼa zhìlì bə̀ cìcì yò làlà.
2 Lyì nánzhəzhɔ̌ bʼa tó be bə twĩ̀ yààyàà,
sə bə̀ tùntwə̃̀ə̃̀ né bʼa ce lyì bí tùrh zhə̀n sɔ́má yá.
3 Bə̀ mʼa zə numbyínsi surhə nyə̀ná bə jə́jɛ̀rɛ́ ába,
mùnì bə nə kɔn.
Sə bə̀ bùrsí kɔ́ mɔ́ ju kùr shãã ga,
bə̀ yò w zhìlù mú bwəlse.
4 Yi yə̀ màlɛ́kabá byɛ̀bɛ́ bə̀ wɛ̀rhɛ́ lwɛlɛ mɔ́ nɛ yẽ̌ yé.
Rə̀ co be nɔ̀nɔ̀ ǹdə́ cə-byṹ jàà y wa,
rə ce bə lyẽ be ǹdə́ nyáná bə̀ mʼê dɛ̃̀ bùrsí kɔ́ dɛ̃ rɛ́.
5 Rə̀ yə̀ shãã ga lũ w ni yẽ̌ yé.
Rə̀ ce dwà nyɔ̀ dɛ̃´dɛ̃´,
nɛ̃̌ mɔ́ zhìlì byɛ̀bɛ́ bə̀ bə shɛ̀ rə̀ nyí ni zõ mó lũ wə́,
sə rə̀ vwârh Nəwee mó ń nə́ ń bwə̀l cángá yò-ècɔ̀nɔ̀ nyí rí mú,
e súlí lyì dwã bwàlpyɛ̀.
6 Rə kə́ Sɔdɔm ǹdə́ Gɔmɔɔrɛ bùrsì,
rə zə myǐn rə cɔ̀ cɛmɛ nɛ́ nə̀myɛ́.
Rə̀myɛ́ yʼà mə̂ sə rə yə̀ myɔrhɔ byɛ̀bɛ́ bə̀ bə shɛ̀ nyí ni zõ mó yilə,
mùnì bə lwar kɔn dɛ̀bɛ́ rə̀ la bɛ wɔ̀rhɔ́.
7 Sə rə̀ zwẽ Lɔtɛ mɔ́,
ń yà ń wɔ́ lyì-twə̂ y,
ń ŋwɛ́nɛ́ lyì bí byɛ̀bɛ́ bə̀ yʼà bə shɛ̀ Yi nyí ni zõ mó cəcəl w twéé twéé ǹdə́ wu-zhìlù mú.
8 Lyì-twə̂ y èmyɛ́ gə́ yʼà ŋwɛ́nɛ́ bə̀ wẽ́,
ń yírhə́ nə bə̀ tùntùm-bəjə́ə́lé,
ń zhã̌ myɛ jʼà nyɛ̌ nə̀ yò twéé twéé mó,
ń wu yʼà zhìlì.
9 Rə̀myɛ́ nʼê byili bə̀ Cinu wɔ̌ ń zwẽ byɛ̀bɛ́ bə̀ zhí mu bə̀ zhǐ bə̀ nà y yó mó nɔ̀nɔ̀ jɔ̃̀ wà,
n zɛ̃̀ n zhìlì ń yala nɛ ǹdə́ byɛ̀bɛ́ bə̀ bə shɛ̀ ń nyí ni zõ mó,
ń mə́ ń dɛ̃̀ bùrsí kɔ́ dɛ̃ rɛ́,
n pə bɛ còrhò-tum.
10 Sə wɔ́ byɛ̀bɛ́ bə̀ tʼâ zwẽ ń nyí ni,
bə̀ nʼê wɛ̀rhɛ́ ǹdə bə̀ yala nɛ́ shilə námməlwâlsɛ́ gə́ nʼê yâl nɛ́ mɔ́ nɛ,
ń la còrhò-tum pɔ du.
Kàrmɔ̀ byilnə bé nánkɔ̀mdɛ́ rə̀myɛ́ mɔ́ zhe rə̀ cìcì zhə̀nà;
bə̀ wɔ́ cìn-byilu cìnə́;
bə̀ nʼê tùrh jàn cìnə́ bé bə̀ ŋwɛ́nɛ́ dɛ̃̌ yi w bə̀ zhe zùwə́ mó;
bə̀ tʼâ nyàm bɛ̀ yé.
11 Màlɛ́kabá zhe jàn ǹdə́ ŋwɔ̀nɔ́ du bə̀myɛ́.
Sə ǹdə́ rə̀myɛ́ ga,
bə̀ tʼâ cĩ́ yò jàn cìnə́ bé bə̀myɛ́ mɔ́ yó w bə tùrh bè Cinu yé né yé.
12 Lyì bí bə̀myɛ́ mɔ́ wɔ́ kɔn dɛ̀bɛ́ bə̀ bùl bə̀ kùr yó bə̀ nʼê wɛ̀rhɛ́ ǹdə vwàmá ta.
Bə̀ bə surhə zhe yé.
Wɔ́ zal e gu dúdú yil bə̀ ŋwɛ́nɛ́.
Bə̀ nʼê tùrh kɔn dɛ̀bɛ́ bə̀ yə̀l rə̀ párá,
sə bə̀ yò bʼa zhìlì ǹdə vwàmá ta.
13 Wɔ́ rə̀myɛ́ rə̀ bʼa yə̀ bə̀ còrhò-tum bə̀ tùntùm-bəjə́ə́lé yilə.
Bə̀ só sə bə wɛ̀rhɛ́ bə̀ shilə námməlwâlsɛ́ pùbùlə̀ nə̀nyɔ́nɔ́ nɛ.
Rə̀myɛ́ nʼê pɛ bɛ wu-nyɔ̃̀.
Bə̀ gə nʼê tó ába bə̀ jí címsi,
bə̀ só kɔma góm bə pə ába.
Bə̀ tùntwə̃̀ə̃̀ né wɔ́ cìzhìl nyə̀ná,
nə̀ bə shil zhe yé.
14 Bə̀ yírhə́ tʼâ nyǐ kaka dõ jàà wà,
e súlí fwə̂l tumə ne yé.
Bə̀ tʼâ lyɛ̀ɛ̀ ǹdə́ yə̀-bəlwàálɛ wɔ̀rhɔ́ yé.
Bə̀ nʼê jə́jɛ̀rɛ́ lyì bí byɛ̀bɛ́ bə̀ surhə né bə jàà èdù zhǐ mú,
bə̀ nʼê pyà wársɛ twéé twéé,
sə bə̀ yò bʼa zhìlì!
15 Bə̀ yẽ̌ sɔ́má y nántwə̂ y ne bə ywə̀r bə jé.
Bə̀ kwè sɔ́má y kɛ̀bɛ́ Bɔsɔɔrɛ byǐ Balaamɛ kwè mó.
Balaamɛ wɔ́ Yi nyì-zwennə,
sə ń swéné wársɛ,
n shɛ̀nɛ́ n zwẽ se n twĩ̀ lwɛlɛ.
16 Ń gə́ cẽ Yi nyí ni mú ce,
bə̀na púr è nyí e zɔ̀m ǹdə́ mɔ ǹdə numbyíní ta.
Bə̀na jʼà tʼâ zɔ̀m yé.
Èta,
è cə̀r ń tùm-fwə́ə́ré yé ne.
17 Kàrmɔ̀ byilnə bé bə̀myɛ́ mɔ́ wɔ́ ǹdə bǔrh shɛ̀bɛ́ sə̀ bə nɛ̃̌ zhe ta.
Bə̀ wɔ́ ǹdə bə́ban ta,
zho nánfɔ̀lɔ̀ nʼô kwè,
sə Yi tɛnɛ jàà rə cĩ́,
è nyɛ̌ námbyṹ fúrí,
rə̀ la bɛ nɛ́ co.
18 Bə̀ nʼê zə bə̀ cìn-byilu zɔ̀m-fwə́ə́ré ǹdə́ bə̀ ywâl zɔ̀mà nɛ́,
bə̀ mʼê vwɛ̃ lyì bí byɛ̀bɛ́ bə̀ ju kùr bə shə́r lũ w lyì bí bə̀ jé mó wẽ́ mó.
19 Bə̀ nʼê bwəl nyí bə̀ bə̀ mʼa pə bɛ cìn-cìnú,
bə̀myɛ́ cìcì mú jʼà wɔ́ bə̀ yala shilə né nə̀ la bə̀ yò zhìlù mú yómə́,
bə̀ kɔn jàn gə du lò,
ǹ wɔ́ rə̀ yóm.
20 Byɛ̀bɛ́ bə̀ lwar nə́ Cinu ǹdə́ nə́ Zwennə Yezu Kristə pár bə shə́r lũ w tùntùm-bəlwàálɛ́ wẽ́ mó,
lyì bí bə̀myɛ́ gə yẽ̌ bə̀ cìn nì tùntwə̃̀ə̃̀ né nə̀myɛ́ jɔ̃̀ wà,
nə kʼa ŋwɛ̀nɛ́ bɛ,
bə̀ yò mʼa kwɛrhɛ o cɔ̀ dwini shãã ga.
21 Bə̀ gə yʼà yə̀ sɔ́má y cángá mɔ́ pár lwar cɔ̃̀ bə̀ gə lwar è pár bə zɛ̃̀ bə cẽ Yi nyə́ né bə̀ byili bi mú.
22 Səswalá èdù ŋwɛ́nɛ́ è nʼê wə̀lə̀:
“Kùlí yʼa tɔlɛ,
e kʼa zhízhílí e jí è tətɔɔlɛ́.”
È dõ kʼe wɔ̀:
“Bə̀ gə shàrh kùkú,
o kʼa vò o byíbyílí bɔ̀bɔ̀rɔ̀ wà.”
Rə̀myɛ́ ce,
kɔn dɛ́ dɛ̀bɛ́ rə̀ yú bi mú nʼê byili bə̀ səswalsɛ́ zɔ̀mà nɛ́ wɔ́ zhə̀nà.