Nə́ Cinu Yezu Kristə mà n ká n bə̀ zhə̀n zhə̀nà
3
Dɔwabá nántwə̂rh,
tɛ̀bɛ́ wɔ́ à sábá nə̀lyè nyân dɛ́ à nʼâ kɛ̃ à la ába pɔ.
Sə nə̀myɛ́ nə̀lyè y ga wẽ́,
à nʼâ yâl bʼâ tó kàrmɔ́ à nʼâ lyǐrh ába mó dɛnnɛ á surhə né pul pamparɛ̃ɛ̃.
2 Lyǐrhnə zɔ̀mà nɛ́ nyɛ̀bɛ́ Yi nyì-zwennə bé byili shãã ga mɔ́,
ǹdə́ Cinu mú ń wɔ́ nə́ Zwennə mó nyə́ né tùntúmə́ bé byili ába mó.
3 Sə tɛ̀bɛ́ rə̀ wɔ́ yò du mú,
lwarna bə̀ dwã nɛ́ nánkwaá nɛ́ wẽ́,
lyì mʼa zɛ̃̀ bə̀ nʼê wɛ̀rhɛ́ ǹdə bə̀ shilə námməlwâlsɛ́ gə́ nʼê yâl nɛ́.
4 Bə̀ bʼa mɔ̀n ába bə wɔ̀:
“Yezu yə̀ wə̀l bə̀ ń mà n ká n bə̀ nà?
Sə wɔ́ yẽ̀ ń nə ŋwɛ́nɛ́?
Nə́ nàmbala bɛ́ cùwə̀,
lũ w jʼà gwẽ̌ wɔ́ ǹdə ò gə́ wɔ́ nɛ́,
kaka yə̀ lyə́r yé.”
5 Wɔ́ Yi rə̀ zə rə̀ zɔ̀mɛ̀ rɛ́,
rə wɛ̀rhɛ́ dɛ̃̌ ǹdə́ cɛ shãã shãã ga,
rə ce cɛ y du nɛ̃̌ cəcəl wə,
rə wɛ̀rhɛ́ y ǹdə́ nɛ̃̌.
Bə̀ nʼê wɛ̀rhɛ́ ǹdə wɔ́ swé bə̀ swě rə̀myɛ́ ta.
6 Wɔ́ nɛ̃̌ mɔ́ mə̀myɛ́ cìcì Yi ce mə mɔ́lɛ́ shãã ga lũ w mə cɔ̀ wà.
7 Wɔ́ zɔ̀mɛ̀ rɛ́ rə̀myɛ́ cìcì mú rə̀ gwẽ̌ zə dɛ̃̌ ǹdə́ cɛ y rə̀ zhǐ zà zà,
rə̀ mʼê dɛ̃̀ lyì bí byɛ̀bɛ́ bə̀ bə shɛ̀ nyí zõ mó bùrsí dɛ̃ rɛ́.
Wɔ́ dɛ̃ rɛ́ rə̀myɛ́ yù w Yi la dɛ̃̌ ǹdə́ cɛ y myɛ yò zhìlù ǹdə́ myǐn.
8 Dɔwabá nántwə̂rh,
kɔn rə̀dù ŋwɛ́nɛ́ á bə mə̂ sʼá swě yé:
dɛ̃ rə̀dù nyɛ̌ ǹdə byinə mɔ̀rhɔ̀ ta,
byinə mɔ̀rhɔ̀ zɛ̃̀ nə̀ nyɛ̌ ǹdə dɛ̃ rə̀dù ta Cinu yilə.
9 Lyì jàlà nʼê bùl bə̀ Cinu nə́ ń dɛnɛ ǹdə́ ń nyí-bwəl lé pyǐrh,
sə è də̀ èta yé.
Ń nə́ ń yâl bə̀ lyì bí gakó pyìrhí bə̀ wun bə yẽ̌ lwɛlɛ wɔ̀rhɔ́ nɛ.
Wɔ́ rə̀myɛ́ è ce,
ń nə́ ń zhìlì ń yala nɛ ǹdʼába,
mùnì lò mə̀dù ga yò bə̀kʼa zhìlì yé.
10 Cinu dɛ̃ rɛ́ bʼa jàr bɛ̀ ǹdə ŋwɔ̀l-bal ta.
Sə rə̀myɛ́ yùwə̀,
dɛ̃̌ yi rí bʼa jé ǹdə́ sɔ̀ nánfɔ̀lɔ̀ kɔ̀bɔ́ ò nʼô zɛ̃̀ wu ni.
Wẽ̀ tɛ̀bɛ́ gakó rə̀ ŋwɛ́nɛ́ dɛ̃̌ bʼa shɛ̃̀ bárhɛ́ rə yə̂l.
Yi bʼa kə́ lyì bí byɛ̀bɛ́ bə̀ ŋwɛ́nɛ́ cɛ y yó mó bùrsì bə̀ tùntwə̃̀ə̃̀ né yilə.
11 Rə̀myɛ́ gakó gə́ la jó èta mɔ́ ce,
ámyɛ cìcì mú mə̂ sʼá lwar á gə́ mʼâ zə á cìn ní á tùntwə̃̀ə̃̀ né wẽ́.
Á tùntwə̃̀ə̃̀ né mə̂ sə nə yí Yi pùbùlə̀,
sʼá zhí ri,
12 á mʼá dɛ̃̀ rə̀ dɛ̃ rɛ́.
Cenə jàn nɛ́ á tùntwə̃̀ə̃̀ né ce dɛ̃ rɛ́ yí làlà.
Rə̀myɛ́ yùwə̀,
myǐn mú bʼa cɔ̀ dɛ̃̌ yi rí,
sə mə̀ lumi rí bʼa lyɛ̃ rə yə̂l wẽ̀ tɛ̀bɛ́ gakó rə̀ ŋwɛ́nɛ́ dɛ̃̌.
13 Yi bwəl nyí bə̀ rə̀ mʼa ce dɛ̃̌ nándwə̃̀ ǹdə́ cɛ nándwə̃̀ yə̀ nɛ́,
sə cángá tumə bʼa yə̀ rə̀ wẽ́.
Wɔ́ rə̀myɛ́ nə́ rʼé dɛ̃̀.
14 Rə̀myɛ́ ce,
dɔwabá nántwə̂rh,
cenə jàn nɛ́ á yə̀ wárhgáá,
dóó bə̀kʼa yə̀ á yó w Yi yé né yé,
sə yə̀-zùlə́ yə̀ ámyɛ̌ ǹdə́ rə̀myɛ́ ga bwə̂l wə,
á bʼá dɛ̃̀ dɛ̃ rɛ́ rə̀myɛ́.
15 Lwarna bə̀ nə́ Cinu gə́ nə́ ń zhìlì ń yala nɛ mɔ́,
wɔ́ mùnì ga á nə vwârh.
Wɔ́ èta nə́ da-byǐ nántwə̂ Pwəə kɛ̃ n byili ába né.
Ń zɔ̀m ǹdə́ surhə né nyɛ̀bɛ́ Yi pɔ mɔ mɔ́.
16 Ń zɔ̀m yò w òmyɛ́ sábá nɛ́ nyɛ̀bɛ́ gakó ń kɛ̃ rə̀myɛ́ yil mó wẽ́.
Zɔ̀mà jàlà ŋwɛ́nɛ́ ń sábá nɛ́ wẽ́ nə̀ kùr nyɔ̀ɔ̀ zum.
Rə̀myɛ́ ce,
lyì bí byɛ̀bɛ́ bə̀ bə bə̀ nà yó zhǐ kẽkẽ bə̀ yə̀ kaka kùr swí mú nʼê lyə́r zɔ̀mà nɛ́ nə̀myɛ́.
Bə̀ nʼê wɛ̀rhɛ́ èta Yi zɔ̀mɛ̀ rɛ́ sɛ́bɛ́ rɛ́ jààsɛ̀ dwã myɛ wẽ́,
sə rə̀myɛ́ wɔ́ bə̀ cìcì yò bə̀ nʼê zhìlì.
17 Wɔ́ rə̀myɛ́ à dámâ à nʼâ byili ába èlâsɛ̃´ dɔwabá nántwə̂rh.
Rə̀myɛ́ ce,
dɛ̃̌na á cìnə̀,
á bə̀kʼá yẽ̌ á cìn nì á pə byɛ̀bɛ́ bə̀ bə shɛ̀ Yi nyə́ né zõ mó ne bə jə́jɛ̀rɛ́ yé,
mùnì ga á ŋwɛ̀nɛ́ á zhì kẽkẽ.
18 Cenə jàn nɛ́ á cə̀ə̀lè á yə̀ nə́ Cinu ǹdə́ nə́ Zwennə Yezu Kristə sónó w wẽ́,
á lwar ń pár á súlí.
Ń yil lé bʼa nə còrhó èlâsɛ̃´ ǹdə́ byinə nə̀ bə zhɔ̌ zhe yilə!
Amɛ̀n!