Zhidi
sɛ́bɛ́ rɛ́ ń kɛ̃ mɔ́
Zhidi nə́ ń ce Kristə-lyì bí
1
Àmyɛ́ Zhakɛ nyɛ̃´ Zhidi,
à wɔ́ Yezu Kristə tùntùnnə̀,
à nʼâ kɛ̃ sɛ́bɛ́ rɛ́ tɛ̀bɛ́ à la ámyɛ̌ byɛ̀bɛ́ nə́ Da Yi byẽ̀ mó ne pɔ.
Ń só ába,
ń nə́ ń yìlì ába Yezu Kristə jàn yilə.
2 Yi bʼà jʼâ nʼê dùr á nɔ̀nɔ̀,
rə swéné ába,
sə rə pə ába yə̀-zùlə́!
Dɛ̃̌na á cìn ǹdə́ kàrmɔ̀ byilnə nánkɔ̀mdɛ́
3 À dɔwabá nántwə̂rh,
nə́ gakó vwârh mɔ́ wɔ́ kɔn rə̀dù.
Wɔ́ rə̀myɛ́ è ce,
à yʼà nʼâ yâl ǹdə́ à wu gakó sʼa kɛ̃ sɛ́bɛ́ a pə ába rə̀myɛ́ yilə.
Sə èlâsɛ̃´,
à pwírí kɔn wɔ́ nyɔ́ɔ́ bʼà kɛ̃ dɛ a pə ába,
bə̀ lyì-bəlwâlsɛ ŋwɛ́nɛ́ bə̀ nʼê jə́jɛ̀rɛ́ lyì bí mùnì ga bə yẽ̌ kɔn dɛ́ dɛ̀bɛ́ Yi byili nə́ba nə́ zwẽ rə̀ nyí mú ni.
Sə à nʼâ yâl bə̀ cẽnə lyì bí bə̀myɛ́ mɔ́ nyə̀ná nɛ́,
mùnì ga á zhì kẽkẽ kɔn dɛ́ dɛ̀bɛ́ bə̀ byili nə́ba nə́ zwẽ rə̀ nyí mú wẽ́.
Yi pɔ rə̀myɛ́ rə̀ lyì bí ni twər rə̀dù sá,
twéé gakó yilə.
4 Lyì-bəlwâlsɛ́ sə̀myɛ́ shèè sə bʼè ŋwɛ́nɛ́ á wẽ́.
Sə̀ co Yi zɔ̀mɛ̀ rɛ́ rə̀ wɔ́ sónó zɔ̀mɛ̀ mɔ́ yé né,
sə̀ mʼê twĩ̀ ywâl tumə.
Sə̀ nʼê bùl bə̀ Yi tʼâ nyǐ rə̀myɛ́ ǹdə yò ta yé.
Èta,
sə̀ nʼê tó rə̀myɛ́ dɛnnɛ sə̀ zhɛ̃̀ Yezu Kristə.
Wɔ́ ńmyɛ̌ dúdú ń wɔ́ nə́ Yó-cə́bal ǹdə́ nə́ Cinu.
Bə̀ zɔ̀m sə̀ yò shãã shãã ga Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi la sə̀ yò zhìlù.
5 Á yě kɔn dɛ̀bɛ́ à la ába byilu mú.
Ǹdə́ rə̀myɛ́ ga,
à la ába kɔn rə̀dù lyǐrh.
Cinu vwârh ń lyì bí Ezhibti ni,
sə rə̀myɛ́ kwã nɛ́,
ń ce byɛ̀bɛ́ bə̀ yə̀ ń nyí ni zwẽ mó cì.
6 Lyǐrhnə kɔn gə́ tó né màlɛ́kabá jàlà yilə:
Yi yʼà pɔ bɛ ŋwɔ̀nɔ́ bə̀ jàà y wa,
sə bə̀ zhǐr bə yẽ̌ jàà y èmyɛ́ nɛ.
Wɔ́ rə̀myɛ́ yil Yi ce bə lyẽ be ǹdə́ nyáná cə-byṹ jàà y wa,
bə̀ mʼê dɛ̃̀ bùrsí kɔ́ dɛ̃ rɛ́ nánfɔ̀lɔ̀ wá.
7 Lyǐrhnə myɛ Sɔdɔm ǹdə́ Gɔmɔɔrɛ ǹdə́ cɛmɛ nɛ́ nyɛ̀bɛ́ nə̀ dɛ̃ nɛ mɔ́ yò wə́.
Nə̀myɛ lyì bí wɛ̀rhɛ́ yə̀-bəlwàálɛ ǹdə màlɛ́kabá bə̀myɛ́ mɔ́ ta.
Bə̀ zù fwə̂l tumə wẽ́.
Kɔn súlí myɛ,
bə̀ yʼà nʼê yâl bə fwə̂l ǹdə́ wẽ̀ dɛ̀bɛ́ rə̀ də̀ numbyínsi.
Sə èlâsɛ̃´,
bə̀ nɔ còrhò-tum,
bə̀ ŋwɛ́nɛ́ myǐn mɔ̀bɔ́ mə̀ tʼâ la cú gaga wẽ́,
sə rə̀myɛ́ wɔ́ myɔrhɔ lò gakó yilə.
8 Lyì-bəlwâlsɛ́ sə̀myɛ́ nʼê wɛ̀rhɛ́ ǹdə cɛmɛ nɛ́ nə̀myɛ́ lyì bí ta.
Sə̀ nʼê tó sə̀ dàrhà nɛ́ dɛnnɛ sə zə sə̀ yala nɛ́ sə̀ mʼê wɛ̀rhɛ́ tumə nyɛ̀bɛ́ nə̀ nʼê pɛ sɛ jìmdì;
sə̀ nʼê nyǐ Cinu zɔ̀mà nɛ́ ǹdə kɔn nánfò ta;
sə̀ nʼê tùrh jàn cìnə́ bé bə̀ ŋwɛ́nɛ́ dɛ̃̌ yi w bə̀ zhe zùwə́ mó.
9 Yi màlɛ́kabá gakó náncɛ y ń yíl Myishəə mó ǹdə́ Shətana vwɛ̃ dwã Muyiisi cùù w yó.
Ǹdə́ rə̀myɛ́ ga,
Myishəə yə̀ shɛ̀nɛ́ n tə̀ rə̀myɛ́ yil n tùrh Shətana y yé.
Kɔn dɛ̀bɛ́ ń púr ń nyú w mú,
ń wòwə̀:
“Yi mʼa pɔ̃́ còrhò-tum.”
10 Lyì-bəlwâlsɛ́ sə̀myɛ́ nʼê tùrh kɔn dɛ̀bɛ́ sə̀ yə̀l rə̀ párá.
Kɔn dɛ́ dɛ̀bɛ́ sə̀ yě mó,
sə̀ yě re nánkùkùlí sə̀ kùr yó ǹdə vwàmá ta.
Sə wɔ́ rə̀myɛ́ gaga mɔ́ rə̀ zə sɛ rə̀ la sə̀ yò zhìlù jàà wà.
11 Sə̀ twĩ̀ ǹdə Kɛ̃ɛ̃ ta;
sə̀ tə̀ wársɛ yil sə kwè sɔ́má kɛ̀bɛ́ è də̀ zhə̀n ǹdə Balaamɛ ta;
sə̀ cẽ Yi nyí ní ǹdə Kɔrɛ ta.
Wɔ́ rə̀myɛ́ è ce sə̀ yò zhìlì.
Zwini bʼa zə sɛ!
12 Wɔ́ sə̀ twírí y á wẽ́ è ce á kùjú w á nʼá twí dwã yó á jí mú kʼô bə kùr zhe yé.
Sə̀ yə̀l cìzhìl pár yé;
sə̀ nʼê jí dɛ̃´dɛ̃´;
wɔ́ sə̀ dúdú yò sə̀ nʼê bùlə̀.
Sə̀ nyɛ̌ ǹdə bə́ban gə́ tó zho ne rə lyɛ̃ rə̀ nɛ̃̌ yə̀ tɛ̃´ twərh ta.
Sə̀ nyɛ̌ ǹdə cèmé nyɛ̀bɛ́ nə̀ byâ co gə yú nə̀ tʼâ ce byâ ta;
sə̀ nyɛ̌ ǹdə cèmé nyɛ̀bɛ́ bə̀ mǔr bə ló tɛ̃´ nə cì kókó ta.
13 Sə̀ nʼê vùr sə̀ cìzhìl tumə sə̀ ce pwẽ̀ nè,
ǹdə nə̀-fɔ̀lɔ̀ nɛ̃̌ gə́ yʼa vùr jìmdì mə̀ wẽ́ mə ce pwẽ̀ nè né.
Sə̀ nyɛ̌ ǹdə cã̀mə́sɔ̌rh shɛ̀bɛ́ sə̀ tʼâ zhì jàà èdù ta,
sə Yi tɛnɛ jàà rə cĩ́,
è nyɛ̌ námbyṹ fúrí,
rə̀ la sɛ nɛ́ co byinə nə̀ bə zhɔ̌ zhe yilə.
14 Adəma kwã nɛ́,
Enɔkɛ yàl nə́ nàmbala kùrə̀ bwàlpyɛ̀ nyâm.
Wɔ́ ńmyɛ̌ ń dámâ n zɔ̀m lyì-bəlwâlsɛ́ sə̀myɛ́ mɔ́ yò n wɔ̀:
“Nyǐnə Cinu bàn ǹdə́ ń màlɛ́kabá mɔ̀ɔ̀rhɛ̀ nánzhəzhɔ̌,
15 ń mə́ ń la lũ w lyì bí púlə́púlə́ bùrsì bǔr.
Ń mà n pə còrhò-tum lyì-bəlwâlsɛ́ gakó ne,
tumə né nyɛ̀bɛ́ sə̀ wɛ̀rhɛ́ nə̀ yə̀ ń pùbùlə̀ yàl mɔ́ yilə.
Ń mà n pə còrhò-tum yə̀-bəlwàálɛ cìnə́ byɛ̀bɛ́ bə̀ yə̀ mɔ̀ dùr bə tùrh mò mó ne.”
16 Kɔn rə̀dù ga tɛ̀nɛ́ rə̀ nʼê swí lyì-bəlwâlsɛ́ sə̀myɛ́ yírh yé.
Sə̀ zhe ŋwɔ́ŋwɔ̌ dɛ̃ gakó;
sə̀ nʼê wɛ̀rhɛ́ ǹdə sə̀ shilə námməlwâlsɛ́ gə́ nʼê yâl nɛ́;
sə̀ nʼê zə sə̀ cìn-byilu zɔ̀m-fwə́ə́ré sə̀ mʼê jə́jɛ̀rɛ́ lyì bí,
sə wɔ́ sə̀ cìn yilə.
Zhínə kɔn dɛ́ dɛ̀bɛ́ á zwẽ rə̀ nyí mú ni kẽkẽ
17 À dɔwabá nántwə̂rh,
è gə wɔ́ ámyɛ̌ yilə,
lyǐrhnə zɔ̀mà nɛ́ nyɛ̀bɛ́ nə́ Cinu Yezu Kristə tùntúmə́ bé byili ába shãã ga mɔ́.
18 Bə̀ wòwə̀:
“Dwã nɛ́ nánkwaá nɛ́ wẽ́,
lyì mʼa zɛ̃̀ bə̀ nʼê mɔ̀n ába,
bə̀ nʼê wɛ̀rhɛ́ ǹdə bə̀ shilə námməlwâlsɛ́ gə́ nʼê yâl nɛ́,
bə̀ twə́r tɛ̀nɛ́ ǹdə́ Yi yé.”
19 Bə̀ bùlə̀ né wɔ́ numbyínsi nyə̀ná,
nə̀ tʼâ shí Yi Eshirhə y sõ yé.
Wɔ́ bə̀myɛ́ bə̀ nʼê pɔr Kristə-lyì bí dwã nɛ.
20 À dɔwabá nántwə̂rh,
ámyɛ̌ cə̀ə̀lènə̀ á zhí Yi ni kẽkẽ ǹdə́ kɔn dɛ́ dɛ̀bɛ́ rə̀ byili ába á zwẽ rə̀ nyí mú.
Lwə̂lnə Yi ǹdə́ Eshirhə náàcɛ̀nɛ́ jàn.
21 Mɛ̃na Yi sónó w wẽ́,
á mʼá dɛ̃̀ nə́ Cinu Yezu Kristə,
bə̀ ń wɔ́ nɔ̀nɔ̀-dǔr cí,
ń mà n pə ába nyǔ mə̀ tʼâ la zhɔ̌.
22 Dǔrnə byɛ̀bɛ́ bə̀ nʼê ce tə́tɔ̀ná mɔ́ nɔ̀nɔ̀.
23 Zwẽnə be mùnì ga bə lú myǐn mú yé né.
Dǔrnə lyì jàlà myɛ nɔ̀nɔ̀,
sʼá dɛ̃̀ á cìnə̀,
á bə̀kʼá shɛ̀nɛ́ á tó á zù bə̀ tùntwə̃̀ə̃̀ né nə̀ bə càn mɔ́,
nə ce á zə jìmdì yé.
Cèrhénə nə́ cèrhé Yi!
24 Cèrhénə nə́ cèrhé Yi!
Rə̀ wɔ̌ ába rə̀ la yìlù kɔn gakó wẽ́ á tʼá la tɛ̃´ tu yé.
Wɔ́ rə̀myɛ́ rə̀ mʼa ce á bə̀ á zhì rə̀ yé né,
rə̀ zùwə́ y wẽ́,
ǹdə́ wu-nyɔ̃̀,
dóó tʼâ la á yó w yál yé.
25 Yi wɔ́ rə̀dù sá.
Wɔ́ rə̀myɛ́ rə̀ tó nə́ Cinu Yezu Kristə dɛnnɛ rə vwârh ába.
Wɔ́ rə̀myɛ́ rə̀ zhe zùwə́,
rə̀ du kɔn gakó,
rə̀ zhe jàn ǹdə́ ŋwɔ̀nɔ́,
shãã ga,
ǹdə́ èlâsɛ̃´,
ǹdə́ twéé gakó byinə nə̀ bə zhɔ̌ zhe yilə!
Amɛ̀n!