Kusegela Sayuni.
132
1 Lwimbo lwa kubakama. Ee Yehowa, kengelela Davidi
Nu kabebe kage kansania.
2 Buni bwalumbide ku Yehowa,
Nu kulumbila ku Mwiya magala wa Yakobo.
3 “Lebelebe nsingile mu numba zane za hema,
Aba nsiyombeke tulo ga mugu wane,
4 Nsyazige meiso mane makindwa na tulo,
Aba bitulu byane kuzenzela,
5 Aaba nu ganasile kukasa Yehowa kiziki,
Nu kiziki kya kwikala ku Mwiya magala wa Yakobo.”
6 Lola, tungule ku musagu wazo mu Efurata,
Nu twazimonine mu isoa lya Yearimu.
7 Twingile mu numba zage za kukumbamina,
Twakumbamine ku kiziki kya kubika magulu mage.
8 Ee Yehowa, zanzuka wende ku kiziki kyobe kya kwikala.
Uwe nu sanduku za magala mobe.
9 Basankoga bobe bavwalikibwe na kwisanana,
Nu basililila bobe balaluke na mbogimbogi.
10 Ku kabamba ka Davidi mukiti wobe,
Ntugalukye malanga mobe ku mubongibwa wobe.
11 Yehowa alumbilide Davidi na bulili,
Nu nteibilile idagano lilyo:
“Nabike mwana wobe ga kisumbi kyobe kya bukota.
12 Ndi ba kikanga kyobe banze idagano lyane,
Nu bulongeki bwane bunkabeigisia,
Nti bayukulu babo beikale
Ga kisumbi kyobe kya bukota ku milyalya.”
13 Kubuno Yehowa asombwede Sayuni,
Atundile kibe kiziki kyage.
14 Kiziki kikino kili kyane kya kumunwa ku milyalya.
Nikale mukyo, kubuno nakisombwede.
15 Lebelebe nakase idia lyakyo mponga,
Nu nikutie bazambi bakyo n'idia.
16 Navwalikye basankoga bakyo lonio,
Nu basililila bakyo balaluke na mbogimbogi.
17 Gago nasakikile Davidi bwangato bunene,
Nu nalongeke kasuku ku mubongibwa wane.
18 Nitie beiti bage na nsoni,
Tondo namuvwalikye nkumbu za bukota.