3
बाप्टीस्मा पीक्खुबा युहन्ना
मट्टी ३:१-१२; मर्कु १:१-८; युहान्ना १:१९-२८
1 रोमी ढ्याहाङ् टीबेरीयासऎ हाङ्डाम् लॆॽमीम्पा ङापङ् नीङ् लीमीम्पा लॆटा। आक्रक्ल पान्टीयास पीलाटस यहुडीया ठुम्काबीऎ ढ्या टुङ्घङ्पा लॆटा। हेरोड गालीलबीऎ ढ्या टुङ्घङ्पा लॆटा हाङ् खोम् नुसा फीलीप इटुरीयाबीऎ नुङ् टरखोनीटीस लोमॆ ठुम्काबीऎ ढ्या टुङ्घङ्पा लॆटा। हाङ् अबीलेने ठालबी लुसानीयास लोमॆ याॽमी ढ्या टुङ्घङ्पा लॆटा। 2 आक्रक्ल हन्नास नुङ् कैयाफा लोमॆ याॽमीची चोप्बाङ् ढ्या पुजाहारी लॆटाची। आक्रक्लॽन आसासु पेम्मीनीहा ठालबी जाकारीयामी पासा युहान्नानुङ् नीङ्वाहाङ् यामुसा।
3 मसॆ युहान्ना यर्डन हङ्माबीऎ गॆअङ्मॆअङ्हा ठालबी खारा हाङ् याॽमीची गरहाङ् लोबकुची, “टाटाङ्पाम् हीङ्वा याइटानॆ हाङ् बाप्टीस्मा लासानॆ हाङ् नीङ्वाहाङ्ऎ आन्नाबी चुहा हीङ्वा सक्पीकानी। 4 यसैया लोमॆ नीङ्वाहाङ्ऎ लोमीम्पा खानावाँ इखुबा याॽमीऎ नीङ्वाहाङ्मी साप्चीराबी गरहाङ् साब्डु,
“खेमाम्नॆ, आसासु पेम्मीनीहा ठालबी एक्क याॽमी ढ्या साम्लाऎ गर कामॆपाइ,
“प्रभु टामॆ लाम्फु चेन्चेन् मुसाम्नॆ,
खोम् लाम्फु काम्नुर टङाम्नॆ।”
5 चोप्न हङ्हा डॆॽमालॆ हाङ्
पङ्पङहा फाःबक्मा लॆ, हॆॽहॆॽहा लाम्फु
खीङ्खीङ्हा मुमा लॆ। हाङ् यीङ्हा नुङ् टङ्कुनीहा लाम्फु टङ्हा मुमा लॆ।
6 हाङ् चोप्न याॽमीचीऎ नीङ्वाहाङ्ऎ हीङ्पम्पा योम्पक् खाङ्टकुचॆछ।*
7 डीरीक् याॽमीची बाप्टीस्मा लासी युहान्नाबी टाआमी, हाङ्सङ् युहान्नाऎ आक्खाची लोसुची, “ओ सीःक्चा नुङ्मा पुसॆःमामी पासाची, आन्ना नीङ्वाहाङ्मी सोम्खॆॽवाबाङ्कॆ हीङ्चामाम् लागी आसॆ इटानीहा? 8 आन्ना चैबान टाटाङ्पाम् काइसे नीवाँबाङ् ऎम्पक्से नीङ्वाहाङ्बी नीवाँ टीमीम्पा हाङ्ग आक्क रक्न पाइटानॆ। हाङ् काङ्का अब्राहाममी पासाची ह, मसॆ काङ्कामी काइसा नीवाँ नीङ्वाहाङ्ऎ याइकु आमीनानॆ। कॆ लोकानी, इघा लुङ्कॽवाबाङ् सङ्क नीङ्वाहाङ्ऎ खोम् पीसानासाची लाबक्मा हेकु। 9 सीङ्मी लाङ्पी बेन्ठी सीक्खॆॽडा। काम्नुऎ उम्चा आसीखुबा चोप्न सीङ् डेस्से मीःबी हीट्ठाङ्कुयॆछ।”
10 याॽमीचीऎ खो सीमुची, “आक्रक् हाङ्ग काङ्कॆ माङ् लॆमा लॆऎ?” 11 खोसॆ आक्खाची लोसुची, “हीच्ची लॽलीङ् चुखुबाऎ आचुखुबा याॽमी एक्क पीट्टुर। आक्रक्न चामा चुखुबाऎ चामा पीट्टुचीर।” 12 यावॆङ्ग लाखुबाची सङ्क युहान्नाबी बाप्टीस्मा लासी डाबामी हाङ् सीमुची, “चीन्खुबो, काङ्कॆ चै माङ् लॆमा लॆऎ?” 13 खोसॆ आक्खाची लोसुची, “आन्ना लोमीम्पाबाङ् डीरीक् यावॆङ्ग आलासाम्नॆ।” 14 टीलीङ्गाचीऎ सङ्क सीमुची, “काङ्कॆ चै माङ् लॆमा लॆऎ टा?” युहान्नाऎ आक्खाची लोसुची, “याॽमीची कीसीमा खाङमीसे, रःक्से हाङ् हुन्नहा खानावाँ टीसे खोचीबाङ् याङ् आलासानॆ। हाङ् टाङ्पॆ टक्चाऎ याङ्पीॽन चेन्चाआनॆ।”
15 याॽमीचीऎ नीङ्वाहाङ्ऎ सॆःक्मीम्पा खीस्ट हुङ्ढाङ्पा लॆटामी, मसॆ खोचीऎ उम्ची नीवाँबी युहन्नान ख्रीस्ट रू कामानुङ् मीॽढाङ्पा लॆटामी। 16 मसॆ युहान्नाऎ आक्खा चोप्न याॽमीची लोसुची, “कॆ ग आन्ना योवाऎ बाप्टीस्मा पीकानी। टर काबाङ् एक्क टुङ्घङ्पा टामेपाई। कॆ ग खोम् सुॽमारा बीम्पीॽमा सङ्क खेन्चाउनी। खोसॆ आन्ना सॆङ्सॆङ्ऎ लावा नुङ् मीऎ बाप्टीस्मा पीकानी। 17 खोसॆ सीचाम् नुङ् चाप्अ फाक्माम् लागी हुक्पी ठाप्ठाम् याङ्सीडु। ठाप्सीकु हाङ् सीचाम् चै काम्नुऎ ठालबी युङुकुयॆछ हाङ् चाप्अ चै हानाम्सुङ् सीःखॆॽनीयॆ मीबी हीरूकुयॆछ।”
18 गरहान होइढा सङ्क डीरीक् खानावाँ इसे युहान्नाऎ याॽमीची नुऎ खानावाँ खेम्मीटुची। 19 हाङ् हेरोड हाङ्ऎ हेरोडीयास लोमॆ खोम् नुसा नाम्मी युङ्मीम्पासॆ हाङ् होइढा काइसा योम्पक् लॆमीम्पासॆ युहान्नाऎ खो वोमीम्पा लॆटु। 20 हेरोडऎ युहान्ना सॆक्ढाङ्सु हाङ् आक्खा काइसा योम्पक् सक्पी होइक काइसॆ योक्पक् येरु।
येसुमी बाप्टीस्मा
मट्टी ३:१३-१७; मर्कु १:९-११; युहन्ना १:३२-३४
21 चोप्न याॽमीचीऎ बाप्टीस्मा लामे पाइटामीर, येसुऎ सङ्क बाप्टीस्मा लासु हाङ् खो नीङ्वाहाङ्नुङ् यामुसे लॆमार पारू हेम्बका। 22 हाङ् सॆङ्सॆङ्ऎ लावा उक्ख्रीॽवामी रुपाबी खो सक्पी उक्सा हाङ् पारुबाङ् गरक्मा साम्ला टाआ, “आना काङामी नाम्नाम् पीसीमालुऎ पासाना ह, आनानुङ् काः डीरीक् चेन्चाडीङ्।”
येसुमी सामॆक्
मट्टी १:१-१७
23 येसुऎ होइढा याॽमीचीम् लागी योम्पक् मुबक्मार खो सुपङ् नीङ्र लीमीम्पा लॆटा। याॽमीचीऎ योसेफ न खोमी आप्पा कामानुङ् मीॽयुक्सुची। योसुफमी आप्पा एली लॆटा। 24 एलीमी आप्पा मट्टाट, मट्टाटमी आप्पा लेबी, लेबीमी आप्पा मल्की, मल्कीमी आप्पा यान्ना, यान्नामी आप्पा योसेफ, 25 योसेफमी आप्पा मट्टाठीयस, मट्टाठीयसमी आप्पा आमोस, आमोसमी आप्पा नहुम्, नहुम्मी आप्पा इसली, इसलीमी आप्पा नग्गै, 26 नग्गैमी आप्पा माथ, माथमी आप्पा मट्टाठीयस, मट्टाठीयसमी आप्पा सेमैन, सेमैनमी आप्पा योसेख, योसेखमी आप्पा योडा, 27 योडामी आप्पा योआनन, योआननमी आप्पा रेसा, रेसामी आप्पा यरूबाबेल, यरुबाबेलमी आप्पा सालटीएल, सालटीएलमी आप्पा नेरी, 28 नेरीमी आप्पा मल्की, मल्कीमी आप्पा अड्डी, अड्डीमी आप्पा कोसाम, कोसाममी आप्पा एलमाडम, एलमाडममी आप्पा ऐर, 29 ऐरमी आप्पा यहसु, यहसुमी आप्पा एलीएजर, एलीएजरमी आप्पा योरीम, योरीममी आप्पा मट्टाट, मट्टाटमी आप्पा लेबी, 30 लेबीमी आप्पा सीमीयोन, सीमीयोनमी आप्पा यहुडा, यहुडामी आप्पा योसेफ, योसेफमी आप्पा योनान, योनानमी आप्पा एल्याकीम,
31 एल्याकीममी आप्पा मलेआ, मलेआमी आप्पा मीन्ना, मीन्नामी आप्पा मट्टाथ, मट्टाथमी आप्पा नाटान, नाटानमी आप्पा डाउड, 32 डाउडमी आप्पा यीसै, यीसैमी आप्पा ओबेड, ओबेडमी आप्पा बोअज, बोअजमी आप्पा सल्मोन, सलमोनमी आप्पा नहसोन, 33 नहसोनमी आप्पा अम्मीनाडाब, अम्मीनाडाबमी आप्पा आराम, आराममी आप्पा हेस्रोन, हेस्रोनमी आप्पा फारेस, फारेसमी आप्पा यहुडा,
34 यहुडामी आप्पा याकुब, याकुबमी आप्पा इसाहक, इसाहकमी आप्पा अब्राहाम, अब्राहाममी आप्पा टेरह, टेरहमी आप्पा नाहोर, 35 नाहोरमी आप्पा सरुग, सरुगमी आप्पा रउ, रउमी आप्पा पेलेग, पेलेगमी आप्पा एबेर, एबेरमी आप्पा सेलह, 36 सेलहमी आप्पा केनान, केनानमी आप्पा अर्पक्षड, अर्पक्षडमी आप्पा सेम, सेममी आप्पा नोआ, नोआमी आप्पा लेमेक, 37 लेमेकमी आप्पा मटुसेलह, मटुसेलहमी आप्पा हनोक, हनोकमी आप्पा येरेड, येरेडमी आप्पा महलालेल, महलालेलमी आप्पा केनान, 38 केनानमी आप्पा एनोस, एनोसमी आप्पा सेट हाङ् सेटमी आप्पा आडम लॆटा हाङ् आडममी आप्पा नीङ्वाहाङ्।