2
येसुमी जन्म
मट्टी १:१८-२५
1 मरक्लऎ डीनाबी रोम हाङ्डाम्पीऎ ढ्या हाङ् आगास्टसऎ याॽमी ङॆॽमाम् लागी नीङ् साॽमालॆक् कामानुङ् खोसॆ हाङ्डाम् लॆःमीम्पा चोप्न हाङ्डाम्पी लोमीम्पा लॆटा। 2 इग याॽलऎ नीङ् ङॆःॽमॆ नुङ् साॽमॆ योम्पक् लीमार कुरेनीयस लोमॆ याॽमी सीरीया अन्चलबीऎ टुङ्घङ्पा लॆटा। 3 चोप्न याॽमीची नीङ् साप्सी टाङ्पा टाङ्पामी हाटाबी खारामी।
4 योसेफ सङ्क खो पेन्डॆ ठाल गालील अन्चलमी नासराटबाङ्कॆ नीङ् साॽमाम् लागी डाउडऎ डीरीक् लःढारी हाङ्टेम् लॆःमीम्पा यहुडीयामी बेटलेहेम लोमॆ हाटाबी खारा, मान्ठाभनॆ खो डाउडमी सामॆक्बीऎ लॆटा।
5 नीङ् साॽमाम् लागी खोसॆ टाङ्पॆ ङाःक्सीम्पा मरीयम सङ्क सोरी चीखॆटु। आक्रक्ल मरीयम बक्ख्रीॽमा लॆटा।
6 बेटलेहेमपी चुआचीरक्न मरीयममी चाचा टक्मॆ बेला सप्पु। 7 हाङ् खोसॆ टुम्मी पासा टगु हाङ् चेऎ मोमु हाङ् पीक्खङ्पी युङु। मान्ठाभनॆ खोचीम् लागी पोप्ठाम्ठॆयोङ्पी* ठवाँ मॆन्चु।
कुखुबाची नुङ् नीङ्वाहाङ्मी खानावाँ टॆखुबाची
8 बेटलेहेम गावाँ कॆक्पीऎ चौराबी सामुङ् कुखुबाची, उम्ची सामुङ् हुङ्सॆ युटा पेम्मीम्पा लॆटामी।
9 एक्क नीङ्वाहाङ्मी खानावाँ टॆखुबा कुखुबाचीमी कॆक्पी खाङ्मुसा। हाङ् नीङ्वाहाङ्मी ओऎ गीउमीउ ओसा हाङ् खोचीऎ मः खाङ्टकुची। हाङ् कीसीमाऎ यङ्पकुची।
10 हाङ् नीङ्वाहाङ्मी खानावाँ टॆखुबाऎ आख्खाची लोसुची, “आकीसीआनॆ, मान्ठाभनॆ काङॆ आन्नामी लागी डीरीक् हाङ्हाङ्मी खानावाँ लाटॆडुङ्। ग खनावाँ चोप्न याॽमीचीम् लागी ली।
11 आयु डाउड जन्म लीमीम्पा हाटाबी आन्नामी लागी नीङ्वाहाङ्ऎ पाङ्हाङ्पा एक्क फाक्खुबा ख्रीस्टमी जन्म लीडा, खो प्रभु चङ्चङ्बा लॆ।
12 आन्नॆ लेमाम् लागी चै ग लीक्, आन्नॆ एक्क चाचा चेऎ मोम्मीम्पा हाङ् सीङखङ्पी इम्मीॽमीम्पा खाङ्टकाम्नी।” 13 आक्रक्लॽन होइढा डीरीक् नीङ्वाहाङ्मी खानावाँ टॆखुबाची सङ्क आक्कुबी खाङ्मुकसामी हाङ् नीङ्वाहाङ्मी नीङ् ठेस्से गरक्मा साम् इबकामी,
14 “चोप्बाङ् सङ्पी पारूबी पेन्खुबा नीङ्वाहाङ् सङ्पी लीर। हाङ् बाखाटेम्पी आसा याॽमीचीनुङ् खो चेन्चाक् आख्खाचीऎ सान्टी टक्चाउचीर।”
15 नीङ्वाहाङ्मी खानावाँ टॆखुबाची पारूबी ऎम्पखारामी हाङ् कुखुबाची टाङ्पा टाङ्पाबी गर कासामी, “लु कानी प्रभुऎ लोमीम्पा रक्मा लीमीम्पा खनावाँ बेटलेहेमपी खाङ्सी खॆॽमा।” 16 हाङ् कुखुबाची पीन्से बेटलेहेम खारामी। आक्कुबी खोचीऎ मरीयम, योसेफ नुङ् सीङ्खङ्पी इम्मीॽमीम्पा चाचा खाङ्टकुची। 17 आक्क डॆङ्पी नीङ्वाहाङ्मी खानावाँ टॆखुबाऎ चाचा टक्डा कामानुङ् इडुयॆ खानावाँ खोचीऎ खेम्मीटुचीमी। 18 ग खानावाँ खेम्खुबा चोप्न याॽमीची आख्खॆटुची। 19 टर मरीयमऎ चै खेम्मीम्पा चोप्न खानावाँ उम् नीवाँब्न युङु। 20 मान्टक्मा कुखुबाची लोमीम्पा लॆटामी आक्रक्मान खेम्टमीम्पा नुङ् खाङ्टक्मीम्पासॆ खोची नीङ्वाहाङ्मी नीङ् लासे ठेस्से ऎम्पकामी।
येसुमी नीङ् युङ्मीम्पा
21 इस्राएलीचीम् यायेॽमा आनुसारा बाङ् डीनाबी चाचामी खाट्ना लीमार खोम् नीङ् “येसु” युङुची। आक्क नीङ् खो बक्पी टामाबाङ् याॽलन नीङ्वाहाङ्मी खानावाँ टॆखुबाऎ पीॽमीम्पा लॆटा।
येसु सङ्टीम्पा
22 मोसाऎ साॽमीम्पा यायेॽमा रक्न खोचीम् सॆङ्सॆङ्ऎ लीमॆ लः लीसा हाङ् खोचीऎ खो नीङवाहाङ्मी ङारीङ्पी पीस्सी यारुसालेम लाटॆटुची। 23 मान्ठाभनॆ नीङ्वाहाङ्मी यायेॽमाबी “चोप्न याॽल टॽमीम्पा वाठाङ्पा पासा नीङ्वाहाङ्मी लागी सङ्टीॽमा लॆ” कामानुङ् साब्डा। 24 हाङ् नीङ्वाहाङ्मी यायेॽमाऎ लोसीन्टॽन, खोची हीच्ची हीच्ची उख्रीॽवा रुः रप्खॆॽवा खीम्मानुङ् सङ्टीॽमाम् लागी नीङ्वाहाङ्मी खीम्पी टाआची।
25 आक्रक्ल सीमीयोन लोमॆ याॽमी यारुसालेमपी पेन्युक्सा। खो नीवाँनेन् याॽमी लॆटा हाङ् खो नीङ्वाहाङ्पी नीवाँयुङ् लॆयुक्सा। खोसॆ इस्राएलीचीम् फाक्खुबा याॽमीमी लाम्फु खाङ्ढाङ्पा लॆटु हाङ् खोनुङ् सॆङ्सॽङ्ऎ लवा चुआ। 26 सॆङ्सॆङ्ऎ लवाऎ सीमीयोन गरहाङ् लोमीम्पा लॆटा, “नीङ्वाहाङ्ऎ पाङ्कुयॆ ख्रीस्ट मॆखाङ्टॽलढारी आना सीःखॆॽनानॆछ”। 27 सॆङ्सॆङ्ऎ लवाऎ सीमीयोन नीङ्वाहाङ्मी खीम्पी खारॆ लोसु, हाङ् खो खारा। आक्रक्लॽन मरीयम नुङ् योसेफ सङ्क यायेॽमाबी साॽमीम्पा योम्पक् मुमाम् लागी चाचा खीम्मानुङ् नीङ्वाहाङ्मी खीम्पी टाआची। 28 सीमीयोनऎ चाचा उम् हुक्पी ठेॽमानुङ् नीङ्वाहाङ्मी नीङ् ठेस्से खो गर कासा,
29 “ओ नीङ्वाहाङ्, आनॆ कानुङ् इमीम्पा खानावाँ सङ्क यॆरुना। ह काङा आनाम् योम्पक् मुखुबा काम्नुर लाम्फु पीॽङॆ।
30 मान्ठाभनॆ काम् मीगॆॽन आनॆ पाङ्हाङ्पा फाक्खुबा खाङ्टकुङ्।
31 आनॆ खो चोप्न याॽमीचीऎ खाङ्टकुचीर कामानुङ् पाङ्हाङ्डुनॆ ह।
32 खोन होइढा जाटीबीहा याॽमीची आनाम् लाम्फु
खाङ्मीखुबा हाऎ ह
हाङ् आनाम् इस्राएली याॽमीची नीङ्लावा लॆःॽमीखुबा ह।”
33 चाचामी बारेबी सीमीयोनऎ लोमीम्पा खानावाँ खेमाचु हाङ् योसेफ नुङ् मरीयम आक्टीखाराची। 34 सीमीयोनऎ खोची आसीका पीट्टुची हाङ् उम्मा मरीयम लोसु, “खेमॆ, इस्राएलबी डीरीक् याॽमीची हीङ्पमीॽमाम् लागी नुङ् नासॆलॆॽमाम् लागी नीङ्वाहाङ्ऎ आनम्न चाचा सॆःक्डुयॆछ। खोन नीङ्वाहाङ्मी लाम्फु खाङ्मीखुबा ह, हाङ् डीरीक् याॽमीचीऎ खो सीच्चाकुचॆछ। 35 गरहाङ् डीरीक् याॽमीचीम् नीवाँबीहा खानावाँ खाङ्मुॽक हाङ् आनाम् नीवाँ चै छोम्कुयॆ ठुॽलाङ्ऎ ठगीन्टॽन टुगुऎछ।”
36 नीङ्वाहाङ्मी खीम्पी एक्क नीङ्वाहाङ्ऎ लोमीम्पा खानावाँ इखुबा हन्ना लोमॆ मासीङ्मा चुआ। खो आसेर सामॆॽबीऎ फनुएल लोमॆ याॽमीमी मेॽनुङ्मा पासा लॆटा। खो भ्या लॆःॽमीम्पा बाङ्ची नीङ् डॆङ्पीॽन लाङ्मीॽमा पीक्खॆम्पा लॆटा। 37 हाङ् खो लाङ्मीॽमान लीमानुङ् बापङ्रीऎ (८४) नीङ्ऎ मासीङ्मा पीक्खॆम्पा लॆटा। हाङ् खोसॆ नीङ्वाहाङ् चुङ्ठाम् खीम् मॆयाःइलेःम साक्नेॽमानुङ् लेल्लेन्सेन्सेन् नीङ्वाहाङ् चुङ्युक्सु। 38 आक्रक्लॽन खो सङ्क मरीयम नुङ् योसेफमी कॆक्पी टाआ हाङ् नीङ्वाहाङ् ओहाक् पीट्टु हाङ् इस्राएलीची हीङ्चामीक्खुबामी लाम्फु खाङ्खुबा चोप्न येसुमी बारेबी इःटुची।
39 नीङ्वाहाङ्मी यायेॽमाऎ लोसीन्टॽन चोप्न मुमाहा योम्पक् मुसीटाचु हाङ् मरीयम नुङ् योसेफ चाचा येसु चीःक्मानुङ् गालील ठुम्काबीऎ उम्ची हाटा नासरटबीॽन ऎन्टाआची। 40 आक्कुबी चाचा पुसे चॆक्मावाऎ लीसे खारा हाङ् नीवाँ टासे खारा, हाङ् नीङ्वाहाङ्मी आसीका खो सक्पी चुआ।
येसुऎ नीङ्वाहाङ्मी खीम्पी खानावाँ इःमीम्पा
41 येसुमी उम्पा उम्मा सालीम्म फाक्मीम्पा चाडा मानालॆसी यारुसालेम खॆॽयुॽसाची। 42 येसु एप्पङ्ही नीङऎ लीमार यहुडी चालाना आनुसारा खोची चाडा मानालॆसी यारुसालेम खाराची। 43 चाडा लुक्खारा हाङ् खोची टाङ्पाम् खीम्पी ऎम्पकामी। येसु चै यारुसालेमबीॽन पेयाका। हाङ्सङ् ग खानावाँ उम्पा नुङ् उम्माऎ मालेचु। 44 येसु होइढा लाम्फु लाम्ढुखुबाचीनुङ् चु हला मीनाची हाङ् लेल्लेन् लाम्ढुङ्साची। युटा म टाङ्पाम् याॽमीची नुङ् लाङ्काम्चीम् लुम्पी यक्पकाचु। 45 टर खोचीऎ आक्कुबी येसु मान्यक्टकाचु। मसॆ खोची खो यक्माम् लागी यारुसालेम एम्पकाची। 46 हाङ् खोचीऎ सुम्ची डीना डॆङ्पी येसु नीङ्वाहाङ्मी खीम्पी यक्टकाचु। आक्रक्ल खो नीवाँनेन् खानावाँ चीङ्खुबा याॽमीचीम् खानावाँ खेम्से हाङ् खानावाँ सीम्से पेम्मीम्पा लॆटा। 47 खोसॆ यामुम्पा नुङ् ऎम्पीम्पा चेन्टुबाङ् नीवाँहा खानावाँ खेम्खुबा नुङ् खाङ्खुबा चोप्न आक्खॆ मीयुक्सुची। 48 आक्कुबी उम्ची पासा खाङ्टकाचु हाङ् खोचीस आक्टीखाराची। हाङ् मरीयमऎ सीमु, “चाचो, आनॆ काङ्का इग माङ् लॆःॽमीम्पा? खाङॆ, आम्पा नुङ् काङॆ आना कीसीसे यक्मेसीसाचीम्।” 49 खोसॆ खोची लोसुची, “आन्नॆ काङा मान्ठा यक्मीम्पा? मालः काङा उङ्पामी खीम्पी लीमालॆ कामानुङ् आन्नॆ मालेम्पा लॆटाम्नॆ?” 50 हाङ्सङ् खोसॆ लोमीम्पा खानावाँ खोम् मा नुङ् पाऎ मॆवाप्हीचु। 51 आक्कडॆङ्पी येसु खोम् पामानुङ् नासरटबी ऎन्टाआ हाङ् खोचीऎ लोमीम्पा खानावाँ खासीसे पेना। उम्माऎ चै इःघा चोप्न खानावाँ मामीःखॆॽलेःम उम् नीवाँब्न युङु। 52 हाङ् येसु सरीर नुङ् नीवाँबी नीङ्वाहाङ्नुङ् याॽमीमी नाम्नावाँबी पुसे पुसे खारा।