4
येसुमी नीवाँ ठाक्मीम्पा
मट्टी ४:१-११; मर्कु १:१२-१३
1 येसु यार्डन हङ्माबाङ् ऎम्पक्मार सॆङ्सॆङ्ऎ लावा खोनुङ् चुआ। हाङ् सॆङ्सॆङ्ऎ लावाऎ खो आसास पेम्मीनीहा ठालबी नीवाँ ठाःग्सी लाखेटु। 2 आक्कुबी सैटानऎ खो हीङ्वा लॆःमीॽमाम् लागी रीचीपङ् डीनाढारी नीवाँ ठाःगु। येसुऎ रीचीपङ् डीनाढारी माङस माचामीम्पा लॆटा। मसॆ खो डीरीक् सागॆसीमीम्पा लॆटा। 3 आक्रक्लॽन सैटानऎ येसु लोसु, “चैबान आना नीङ्वाहाङ्मी पासाना हाङ्ग इग लुङ्कॽवा चारेपा लीर कामानुङ् लोसॆ हाङ् ग चारेपा लीर।” 4 येसुऎ गर कामानुङ् खानावाँ एम्पीटु, “नीङ्वाहाङ्मी साप्चीराबी गरक् साब्डा, चारेपाऎ टेॽन याॽमी हीङ्चानी।” 5 आक्क डॆङ्पी सैटानऎ येसु एक्क टक्भॆऎ पङ्पङमाबी लाखॆटु हाङ् एच्छक्पीॽन खाम्टेम्बीऎ चोप्न हाङ्टेम् खाङ्मीस्से खो लोसु, 6 “कॆ आना इघा चोप्न हाङ्टेम्मी हाङ् नुङ् इघा चोप्न चासुम्मी टुङ्घङ्पा मुहीॽना, मान्ठाभनॆ इघा चोप्न काम हुक्पी चु हाङ् कॆ आसा पीॽमा मीकुङ्र खो पीॽहीकुङ्। 7 काङा स्यामीॽङॆ हाङ् इघा चोप्न आनाम् ली।” 8 येसुऎ आक्क लोसु, “नीङ्वाहाङ्मी साप्चीराबी गरक् साब्डा, ‘आनॆ आनाम् प्रभु नीङ्वाहाङ् स्यामीटॆ हाङ् खोम् टेॽन खानावाँ खेमॆ।’”
9 हाङ् सैटानऎ येसु यारुसालेम लाखॆटु हाङ् नीङ्वाहाङ्मी खीम्मी वाचेन्टु टॆटु हाङ् लोसु, “चैबान आना नीङ्वाहाङ्मी पासाना हाङ्ग गबाङ् चेःढीन्टॆ, 10 मान्ठाभनॆ नीङ्वाहाङ्मी साप्चीराबी गरहाङ् साब्डा,
‘आना खाङ्माम् लागी नीङ्वाहाङ्ऎ खोम् नीङ्वाहाङ्मी खानावाँ टॆखुबाची पाङ्हाङ्कुची’
11 ‘हाङ् आनाम् लाङ् लुङ्कॽवाबी ऎटःक्सीॽल कामानुङ्
आक्खाचीऎ आना हुक्हुक् पीॽन याङ्मीहाछ।’”
12 येसुऎ सैटान लोसु, “नीङ्वाहाङ्मी खानावाँबी गर स साब्डा, आनॆ आनाम् प्रभु नीङ्वाहाङ्मी नीवाँ ठाःग्मा फॆन्नी।” 13 सैटानऎ येसुमी नीवाँ ठाःग्सीटु हाङ् होइक काम्नुऎ ल मान्यक्टॽलढारी खो याइडउ हाङ् खाइटा।
गालीलबी येसुमी योम्पक
मट्टी ४:१२-१७; मर्कु १:१४-१५
14 सॆङ्सॆङ्ऎ लावामी चॆॽमावा टक्चउ हाङ् येसु गालीलबी ऎन्टाआ। हाङ् गॆअङ्मॆअङ्हा चोप्न ठालबी खोम् खानावाँ फॆबका। 15 हाङ् खोसॆ यहुडीची खोम्ठाम् खीम्पी चीम्पकुची हाङ् चोप्नसॆ खोम् नीङ् ठेॽयुङ्सुची।
येसु याॽमीची खोम्ठाम् खीम्पी
मट्टी १३:५३-५८; मर्कु ६:१-६
16 येसु खो पुमीम्पा हाटा नासारटबी टाआ। याॽलऎ रॽन खो नाचामॆ डीना यहुडी याॽमीची खोम्ठाम् खीम्पी खारा हाङ् नीङ्वाहाङ्मी खानावाँबी साॽमीम्पा खानावाँ इमाम् लागी येप्पका। 17 खोसॆ इमाम् लागी नीङ्वाहाङ्ऎ लोमीम्पा खानावाँ इखुबा यसैयाऎ साॽमीम्पा साप्चीरा पीट्टुची हाङ् खोसॆ साप्चीरा हेम्बकु हाङ् गरक्मा साॽमीम्पा ठाल लाबकु,
18 “नीङ्वाहाङ्मी लावा कासक्पी चु, मान्ठाभनॆ नीङ्वाहाङ्ऎ माङ्स माआमीहा याॽमीची काम्नुऎ खानावाँ खेम्मीॽमाम् लागी काङा सॆःक्डीङ्। हाङ् सॆक्चीबी सीडामीहाची फाॽमॆ नुङ् मीक् आखाङ्खुबाची खाङ्खुबा मुमॆ खानावाँ इःमाम् लागी हाङ् डुख्खा पीॽमीम्पाची फाॽसी नीङ्वाहाङ्ऎ काङा पाङ्हाङ्डीङ्,
19 हाङ् टाङ्पाम् याॽमीची फाॽमॆ डीना टाडा कामानुङ् खेम्मीॽमाम् लागी प्रभु नीङ्वाहाङ्ऎ काङा पाङ्हाङ्डीङ्।”
20 आक्क डॆङ्पी येसुऎ साप्चीरा बॆगुहाङ् ऎल्लाहाङ् पीट्टुची हाङ् खो पेना। आक्कुबी चुखुबाचीऎ खो खाङ्ढाङ्पा लॆटुची। 21 हाङ् खोसॆ आख्खाची लोसुची, “नीङ्वाहाङ्मी ग खानावाँ आइ आन्नॆ खेम्भॆॽमारॽन पुरा लीडा।”
22 चोप्न याॽमीचीऎ खोम् नीङ् ठेरुची। नाम्नावाँऎ चेप्खेम्पा खोम् खानावाँ खेमुची हाङ् खोची आक्खॆटुची। खोची गर कासामी, “मालः इग योसेफमी पासा हॆॽनॆ?” 23 येसुऎ आक्खाची लोसुची, “चाइबान ह आन्नॆ काङा ग खानावाँ लोङानी, ‘ओ सीढा लॆखुबा याॽमी, ‘याॽल आनान नुबकॆ।’ हाङ् ‘कर्फनुहुम लोमॆ ठालबी लॆःमीम्पा आक्खॆॽमाहा योम्पक् आनाम् हाटाबी सङ्क लॆटॆ।’”
24 “टर आन्ना कॆ चैबान लोकानी, नीङ्वाहाङ्मी खानावाँ इखुबाची उम्ची ठालबीहा याॽमीचीऎ ङॆबुचीनी। 25 हाङ् होइक स एक्क खानावाँ कॆ आन्ना लोकानी, नीङ्वाहाङ्मी खानावाँ लोखुबा एलीयामी लःबी सुम्ची नीङ् ठुक्ची माहीना वारी मॆन्टा हाङ् याॽमीचीऎ आचाटक्मॆ लः टाआ। आक्रक्ल इस्राएलबी डीरीक् लाङ्मीॽमाची चुआमी। 26 हाङ्सङ् इस्राएलबीहा लाङ्मीॽमाचीबी हॆॽनॆ टर सीडोनमी सारपट लोमॆ ठालबीऎ एक्क लाङ्मीॽमाबी टेॽन नीङ्वाहाङ्ऎ एलीया पाङ्हाङ्सु। 27 आक्रक्न इस्राएलबी एलीसा नीङ्वाहाङ्ऎ लोमीम्पा खानावाँ इखुबा लॆटार आक्कुबी डीरीक् साखक्मी टुक्खाची चुआमी हाङ्सङ् आक्खाची आसास मानुबक्मीट्टुची टर सीरीया हाङ्टेम्बीऎ नामान् लोमॆ याॽमी टेॽन नुबका।”
28 ग खानावाँ खेमुची हाङ् याॽमीची खोम्ठाम् खीम्पी खोम्टी खॆॽमीम्पा चोप्न यहुडीची एट्टान याॽचाबक्कुची। 29 आक्खाची पगामी हाङ् येसु लाबुची हाङ् सॆस्से हाटाबाङ् लाबहाक्सुची। हाटा एक्क पङ्पङमाबी चुआ, मसॆ खोचीऎ येसु म पङ्पङ्माबाङ् कक्ढाङ्मा यगुची। 30 हाङ्सङ् येसु आक्खाचीम् लुम्पाङ् लेल्लीहीङ् खारा।
खारीॽमाङ्ऎ लाॽमीम्पा याॽमी नुबक्डॆ
मर्कु १:२१-२८
31 आक्क डॆङ्पी येसु गालीलमी कफर्नहुम लोमॆ ठालबी टाआ। हाङ् चोप्न नाचामॆ डीना खोसॆ याॽमीची चीन्युक्सुची। 32 खोम् खानावाँ खेमुची हाङ् आक्खाची आक्खॆटुची मान्ठाभनॆ खोम् खानावाँ ढुप्पाट नुङ्मा लॆटा।
33 यहुडी याॽमीची खोम्ठाम् खीम्पी एक्क काइसॆ खारीॽमाङ्ऎ लाॽमीम्पा याॽमी चुआ। आक्क ढ्या साम्लाऎ गर कामानुङ् याकासा, 34 “ओ नासरटमी येसु, आनॆ काङ्का माङ् लॆमा परम्पा? माङ् आना काङ्का सेस्सी टाडानॆ हॆ? आना नीङ्वाहाङ्ऎ पाङ्हाङ्पा सॆङसॆङ्ऎ याॽमीना ह कामानुङ् कॆ लेःॽना।” 35 ग खानावाँ खेमु हाङ् येसुऎ आक्क खारीॽमाङ् वोमानुङ् लोसु, “यङ् उःगॆ हाङ् ग याॽमीबाङ् खाइहाङ्इट्टॆ।” आक्क याॽमी चेब्मानुङ् खारीॽमाङ् खाइटा हाङ्सङ् आक्क याॽमीबी हाम्पी स माङ्स हुवा मॆली।
36 चोप्न याॽमीची आक्खॆटुची हाङ् गर कामानुङ् खानावाँ इबकामी, “ग याॽमीम् खानावाँबी मान्टक्मा ढुप्पाट चुऎ, मान्ठाभनॆ गसॆ वोमा अक्सी खारीॽमाङ् सङ्क खाइहाङ्ऎ रछ।” 37 हाङ् गॆअङ्मॆअङङ्बीहा चोप्न ठालबी येसुमी खानावाँ फुबका।
येसुऎ डीरीक याॽमीची नुबॽमीम्पा
मट्टी ८:१४-१७; मर्कु १:२९-३४
38 यहुडी याॽमीची खोम्ठाम् खीम्बाङ् येसु आम्पका हाङ् सीमोनमी खीम्पी खारा। आक्रक्ल सीमोनमी नाम्मा डॆटॆम्पासॆ इम्चाढाङ्पा लॆटा। खीम्पीहा याॽमीचीऎ “इग नुबक्मीच्चीमॆ” कामानुङ् खो लोसुची। 39 येसु खोम् कॆक्पी खारा हाङ् डॆटॆमा वोसु हाङ् आक्रक्लॽन डॆटॆमा याइखॆटु हाङ् खो पोग्लीनटा हाङ् खोची चामा डुङ्मा पीट्टुची।
40 नाम् डाखॆटु हाङ् याॽमीचीऎ डीरीक् टुक्खुबाची येसुबी लाटॆटुची। खोसॆक आक्खाची चोप्नबी हुक् युङु हाङ् चोप्न नुबक्मीट्टुची। 41 डीरीक् याॽमीचीबाङ् खारीॽमाङ्ची सङ्क गरहाङ् याकासे आम्पकामी, “आना नीङ्वाहाङ्मी पासाना ह,” हाङ्सङ् येसुऎ आक्खाची वोमानुङ् यामुमा मापीट्टुची मान्ठाभनॆ आक्खाचीऎ खो नीङ्वाहाङ्ऎ सॆक्मीम्पा ख्रीस्ट कामानुङ् लेॽयुङ्सुची।
येसु आसस माआमीहा ठालबी
मर्कु १:३५-३९
42 नाम्सङ्माक्नी येसु आसास माआमीहा ठालबी खारा। हाङ्सङ् याॽमीचीऎ खो यक्से टाआमी। आक्खाचीऎ खो यक्टकुची हाङ् ऎखॆॽमीॽमॆ नीवाँऎ लोसुची, “काङ्का ऎयाइडाचीमॆ।” 43 टर खोसॆ आक्खाची लोसुची, “काङॆ होइढा ठालब्स नीङ्वाहाङ्मी हाङ्टेम्मी काम्नुऎ खानावाँ खेम्मीॽमा लॆःमी। मान्ठाभनॆ नीङ्वाहाङ्ऎ काङा ग योम्पक्मी लागी न पाङ्हाङ्डीङॆ ह।” 44 गरहाङ् खोसॆ चोप्न यहुडीया ठालबीहा यहुडी याॽमीची खोम्ठाम् खीम्पी खेम्मीसे खारा।