ཤོག༌རིལ༌ དང༌ ལུ༌གུ༌།
5:1-14
5
ངའེ༌ ཏེ༌ ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌བོའེ༌ ཆག༌ ཡས༌པའེ༌ ནང༌ང༌,
ཤོག༌རིལ༌ གྱབ༌དུན༌ ཉིས༌ཀོའེ༌ཀ༌ བྲིས༌ཏེ༌ ཐེ༌ཙེ༌ རྡུན༌ གྱབས༌ཏེ༌ ཡོད༌ཁན༌བོ༌ ཐོང༌།
2 ཡང༌ ངའེ༌ སྟོབས༌ཅན༌ ཕོ༌ཉ༌ ཞིག༌གི༌ སྐད༌ ཆེན༌མོའེ༌ ནང༌ང༌ མོལ༌ཨིན༌ ཚོར༌,
“འི༌ ཤོག༌རིལ༌ལི༌ ཐེ༌ཙེ༌གུན༌ ཅགས༌ཏེ༌ ཕེ༌ཅེས༌སི༌ འོས༌པ༌ སུ༌ ཨིན༌?”
3 ཨིན༌ནའང༌ ནམ༌ཁའ༌,
ཡ༌ ཇིག༌རྟེན༌ནི༌ཀ༌ དུག༌ཁན༌,
ཡ༌ སའེ༌ ཡོག༌ག༌ ཡོད༌ཁན༌ སུ༌ཞིག༌གའང༌ ཏེ༌ ཤོག༌རིལ༌བོ༌ ཕེ༌ ཡ༌ ལྟའ༌ མ༌ཉན༌།
4 ང༌ སྲན༌ཏྲེ༌ ངུས༌པིན༌ ཅིའ༌ཟེར༌ན༌ སུ༌ཞིག༌གའང༌,
ཏེ༌ ཤོག༌རིལ༌ ཕེ༌ཅེས༌,
ཡ༌ སིལ༌ཅེས༌སི༌ འོས༌པ༌ མ༌བིང༌།
5 ཏེ༌ནེ༌ འུ༌སྐྱོང༌གུན༌ནི༌ ཕྲོ༌ནེ༌ ཅིག༌གི༌ ང༌ མོལས༌,
“མ༌ངུ༌,
ལྟོས༌ ཡ༌ཧུ༌དཱ༌པའེ༌ སྡེ༌ ནང༌ནེ༌ སིང༌གེ༌ ཟེར༌ཁན༌,
གྱལ༌པོ༌ དཱ༌བིད༌དི༌ པུར༌གྱུད༌,
གྱལ༌ཁའ༌ ཐོབ༌ཁན༌,
ཁོང༌ ནི༌ ཐེ༌ཙེ༌ རྡུན༌ཀོ༌ ཅགས༌ཏེ༌ སྤེ༌ཆ༌ ཕེ༌ཅེས༌སི༌ འོས༌པ༌ཅན༌བོ༌ ཞུགས༌ཏེ༌ ཨིན༌ནོག༌།”
6 ཏེ༌ནེ༌ ང༌ སད༌ཏེ༌ ཡོད༌ཁན༌ ཙོགས༌སི༌ ལུ༌གུ༌ཞིག༌ ཐོང༌,
ཁོང༌ ཏེ༌ སྲོག༌ ཡོད༌ཁན༌ ཞི༌ཀོ༌ དང༌ འུ༌སྐྱོང༌ 24 ཐའ༌ནེ༌ སྐོར༌ཏེ༌ ཡོད༌ཁན༌ནི༌ ཞུགས༌ཁྲིས༌སི༌ དུན༌ལ༌ ཞངས༌ཏེ༌ དུག༌།
ཏེ༌ ལུ༌གུ༌བོའ༌ རཱ༌ཅོ༌ རྡུན༌ དང༌ མིག༌ རྡུན༌ དུག༌,
ཀ༌བོ༌ དཀོན༌མཆོག༌གི༌ ཇིག༌རྟེན༌ གང༌པོའེ༌ ནང༌ང༌ ཀལ༌ལ༌ ཛད༌ཁན༌ནི༌ ཐུག༌ཉིད༌ རྡུན༌བོ༌ ཨིན༌ནོག༌།
7 ཏེ༌ ལུ༌གུ༌བོ༌ སྐྱོད༌ཏེ༌ ཞུགས༌ཁྲིས༌སི༌ཀ༌ ཞུགས༌ཁན༌ནི༌ ཆག༌ ཡས༌པ༌ནེ༌,
ཏེ༌ སྤེ༌ཆ༌བོ༌ ལེནས༌།
8 ཁོང༌ངི༌ སྤེ༌ཆ༌བོ༌ ཁོང༌རང༌ངི༌ ཆག༌ག༌ ནམས༌ས༌ཅིག༌,
སྲོག༌ ཡོད༌ཁན༌ ཞི༌ཀོ༌ དང༌ འུ༌སྐྱོང༌ 24 གུན༌ནི༌ ལུ༌གུའི༌ དུན༌ལ༌ ཆག༌ཕུལས༌།
ཡང༌ ཁོང༌ ཚང༌མའེ༌ ལག༌ག༌ ཏར༌ ཡོད༌ཁན༌ནི༌ རོལ༌མོ༌ ཡང༌ སྤོས༌ སྐངས༌ཁན༌ནི༌ སེར༌རི༌ གོར༌མོ༌ རིག༌ དུག༌,
ཏེ༌ སྤོས༌གུན༌ དཀོན༌མཆོག༌གི༌ མི༌གུན༌ནི༌ མོས༌ལམ༌གུན༌ ཨིན༌ནོག༌།
9 ཏེ༌གུན༌ནི༌ ལུ༌ སོ༌མ༌ཞིག༌ ཏངས༌,
“ཉེ༌རང༌,
ཏེ༌ ཤོག༌རིལ༌བོ༌ ལེན༌ཏེ༌
ཐེ༌ཙེ༌གུན༌ ཅག༌ཅེས༌སི༌ འོས༌པ༌ ཨིན༌ནོག༌།
ཅིའ༌ཞུ༌ན༌ ཉེ༌རང༌ ཀྲོངས༌ཏེ༌,
ཉེ༌རང༌ངི༌ སྐུ༌ཁྲག༌ རིན༌ལ༌ ཤལ༌ལ༌ ཛད༌ཏེ༌,
རིགས༌ ཚང༌མ༌,
སྐད༌རིགས༌ ཚང༌མ༌ དང༌,
གྱལ༌ཁག༌ ཚང༌མའེ༌ མིར༌གྱུད༌གུན༌ནེ༌
དཀོན༌མཆོག༌གི༌ ཕིའ༌ མི༌གུན༌ ཉོའ༌ ཛད༌ཏེ༌ ཨིན༌ནོག༌།
10 ཉེ༌རང༌ངི༌ ཏེ༌ མི༌གུན༌ ང༌དང༌གུན༌ནི༌ དཀོན༌མཆོག༌ག༌ ཞབ༌ཤི༌ ཞུ༌ཅེས༌སི༌ ཕིའ༌,
གྱལ༌སྲིད༌ དང༌ བླ༌མ༌ གུན༌ ཅོའ༌ ཛདས༌།
ཡང༌ ཏེ༌གུན༌ནི༌ ཇིག༌རྟེན༌ནི༌ཀ༌ ཝང༌སྲུལ༌ཨིན༌།”
11 ཏེ༌ནེ༌ ངའེ༌ ལྟའ༌ཅིག༌,
ཕོ༌ཉའ༌ སྟོང༌ཕྲག༌ ཕྲི༌ཕྲག༌ མང༌པོའེ༌ སྐད༌ ཚོར༌,
ཏེ༌གུན༌ནི༌ ཞུགས༌ཁྲིས༌,
སྲོག༌ ཡོད༌ཁན༌ ཞི༌ཀོ༌ དང༌ འུ༌སྐྱོང༌ 24 གུན༌ལ༌ ཐའ༌ནེ༌ སྐོར༌ཏེ༌ དུག༌པིན༌།
12 སྐད༌ ཆེན༌མོའེ༌ ནང༌ང༌ ཏེ༌གུན༌ནི༌ ལུ༌ ཏང༌དུག༌པིན༌,
“ཏེ༌ སད༌ཁན༌ནི༌ ལུ༌གུ༌བོའ༌ ཝང༌,
ནོར༌,
ཤེས༌རབས༌,
ཤེད༌,
རྩི༌ཝ༌,
སྤལ༌ དང༌ སྟོད༌པ༌ ཐོབ༌ཅེས༌སི༌ འོས༌པ༌ ཨིན༌།”
13 ཏེ༌ནེ༌ ངའེ༌ ནམ༌ཁའ༌,
ཇིག༌རྟེན༌,
སའེ༌ ཡོག༌ག༌ ཡོད༌ཁན༌ དང༌,
གྱ༌ཚོའེ༌ ནང༌ང༌ ཡོད༌ཁན༌ནི༌ སྲོག༌ཅན༌ ཚང༌མའེ༌,
“ཞུགས༌ཁྲིས༌སི༌ཀ༌ ཞུགས༌ཁན༌ དང༌ ལུ༌གུའ༌ སྟོད༌པ༌,
རྩི༌ཝ༌,
སྤལ༌ དང༌ ཝང༌ གུན༌ ཏུས༌གྱུན༌ནེ༌གྱུན༌ ཐོབ༌ཤིག༌”
ཟེར༌ཨིན༌ ལུ༌ ཏང༌ཨིན༌ ཚོར༌།
14 ཏེ༌ནེ༌ ཏེ༌ སྲོག༌ ཡོད༌ཁན༌ ཞི༌ཀོའེ༌ ཞུས༌ “ཨ༌མེན༌,”
ཡང༌ ཏེ༌ འུ༌སྐྱོང༌གུན༌ནི༌ ཆག༌ཕུལ༌ཨིན༌ ཁོང༌གུན༌ལ༌ ཅོལས༌།