ཏམ༌པ༌ སུང༌རབས༌སི༌ ནང༌ང༌ ཁག༌ཅན༌ མིང༌ དང༌ ཚིགས༌ གུན༌།
ཀ༌
1
ཀ༌ཡིན༌ ༼ཡོ༌ཧཱ༌ནན༌ 1 3:12;
ཨིབ༌རི༌པ༌ 11:4;
ཡུ༌དཱ༌ 1:11༽,
ཀ༌ཡིན༌ ནི༌ ཨ༌དམ༌ དང༌ ཧ༌ཝའེ༌ གོ༌མའེ༌ ཕྲུ༌གུ༌བོ༌ ཨིན༌པིན༌།
དཀོན༌མཆོག༌ ཁོའེ༌ ཆོད༌པ༌ སང༌ ཁོའེ༌ ནོ༌ ཨ༌བེལ༌ལི༌ ཆོད༌པ༌ ཐུགས༌ཐད༌ད༌ ཛད༌ པ༌སང༌ ཁོ༌ ཚིགས༌ཏེ༌ ཨ༌བེལ༌ སདས༌།
ཏེ༌བོའེ༌ཕིའ༌ ཁོའ༌ དཀོན༌མཆོག༌གི༌ ཆོགས༌ནེ༌ ངན༌ ཕོག༌།
ཀེ༌ནན༌ ༼མད༌ཐཱ༌ 15:22;
ཆག༌ལས༌གུན༌ 7:11;
ཆག༌ལས༌གུན༌ 13:19༽,
ཀེ༌ནན༌ ནི༌ དཀོན༌མཆོག༌གི༌ ཨིས༌ར༌ཨེལ༌པ༌གུན༌ལ༌ སལ༌ལ༌ ཛད༌ཅེས༌སི༌ ཞལ༌ཆད༌ ཛད༌ཁན༌ནི༌ ཏེ༌ ནས༌སའེ༌ མིང༌བོའ༌ ཟེར༌ར༌ནོག༌།
དག༌ས༌ ཏེ༌ ནས༌ས༌བོའ༌ ཨིས༌ར༌ཨེལ༌ ཟེར༌ར༌ནོག༌།
དཀོན༌མཆོག༌གི༌ ཆོད༌ཁང༌ དཀོན༌མཆོག༌གི༌ ཆོད༌ཁང༌ང༌ ཡ༌ཧུ༌དཱ༌པའེ༌ ཆོད༌ཁང༌ངའང༌ ཟེར༌ར༌ནོག༌།
ཡ༌ཧུ༌དཱ༌པ༌གུན༌ནི༌ ཆོད༌ཁང༌ ནི༌ ཨིས༌ར༌ཨེལ༌ལི༌ གྱལ༌ས༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌པིན༌།
ཏེ༌བོ༌ གྱལ༌པོ༌ སོ༌ལོ༌མོན༌ནི༌ ཏུས༌ལ༌ རྩིགས༌ཏེ༌ ཨིན༌པིན༌།
ཨིས༌ར༌ཨེལ༌པ༌གུན༌ རི༌སྟོང༌ངི༌ ནང༌ང༌ ཡོད༌ ཟ༌ནེ༌ ཏམ༌པ༌ ཅ༌ལག༌ ཀ༌གུན༌ ཡ༌ཝ༌ ཐུག༌སའེ༌ ཀུར༌བོའེ༌ ནང༌ང༌ བོར༌རད༌པིན༌,
ཆོད༌ཁང༌ རྩིག༌ ཚར༌ར༌ཅིག༌,
ཏེ༌ ཏམ༌པ༌ ཅ༌ལག༌གུན༌ ཆོད༌ཁང༌ངི༌ ནང༌ང༌ ཁྱོངས༌ཏེ༌ བོརས༌།
ཏེ༌ནེ༌ཕར༌ལ༌ ཏེ༌ ཆོད༌ཁང༌བོ༌ ཡ༌ཧུ༌དཱ༌པ༌གུན༌ནི༌ དཀོན༌མཆོག༌ག༌ ཆོད༌པ༌ དང༌ སྲོག༌ཆོད༌ ཕུལ༌ཅེས༌སི༌ ནས༌ས༌བོ༌ གྱུར༌།
ཏུས༌ཆེན༌ ཁག༌ཅན༌གུན༌ རྩི༌ ཟ༌ནེ༌ ཡ༌ཧུ༌དཱ༌པ༌གུན༌ ཡེ༌རུ༌ཤ༌ལེམ༌མ༌ དཀོན༌མཆོག༌ག༌ སྲོག༌ཆོད༌ ཕུལ༌ལ༌ལ༌ ཆའད༌པིན༌།
ཡང༌ ཏེ༌ ཆོད༌ཁང༌བོ༌ ཆོས༌སི༌ ལབ༌ཞ༌ ཏང༌ཅེས༌ དང༌ གྲོས༌དུར༌ གུན༌ ཅོ༌སའེ༌ ནས༌ས༌བོའང༌ ཨིན༌པིན༌།
དཀོན༌མཆོག༌གི༌ ཆོད༌ཁང༌ངི༌ ནག༌ཤ༌ ཟིགས༌ས༌ ཛད༌།
དཀོན༌མཆོག༌ ཡ༌ ནམ༌ཁའེ༌ གྱལ༌སྲིད༌ དཀོན༌མཆོག༌ ཡ༌ ནམ༌ཁའེ༌ གྱལ༌སྲིད༌དི༌ ཏོན༌བོ༌ ནི༌ དཀོན༌མཆོག༌ དང༌ ཁོང༌ངི༌ མི༌གུན༌ནི༌ པར༌ལ༌ བྲེལ༌ ཡོད༌ཁན༌བོ༌ ཨིན༌ནོག༌།
དཀོན༌མཆོག༌ ནི༌ གྱལ༌པོ༌ ཙོགས༌ ཨིན༌ནོག༌,
ཅིའ༌ཟེར༌ན༌ ཁོང༌ངི༌ ཁོང༌རང༌ངི༌ མི༌གུན༌ སྐྱོབས༌ཏེ༌ སྒོས༌དོམ༌ ཚང༌མ༌ སལ༌ཨིན༌,
ལམ༌སྟན༌ ཛད༌ཨིན༌ ཝང༌སྲུལ༌ལ༌ ཛད༌ད༌ནོག༌།
དཀོན༌མཆོག༌ག༌ ཨིད༌ཤེས༌ ཅོས༌ཏེ༌ ཁའ༌ཉན༌ཁན༌གུན༌ ནི༌ དཀོན༌མཆོག༌གི༌ གྱལ༌སྲིད༌དི༌ མི༌གུན༌ ཨིན༌ནོག༌།
ནམ༌ ཡེ༌ཤུ༌ མ༌ཤི༌ཀ༌ ཇིག༌རྟེན༌ནི༌ཀ༌ སྐྱོདས༌,
དཀོན༌མཆོག༌གི༌ གྱལ༌སྲིད༌པོ༌ སོ༌མ༌ ཚུལ༌ཞིག༌གི༌ ནང༌ང༌ ཐོང༌,
ཅིའ༌ཟེར༌ན༌ ཡེ༌ཤུ༌ མ༌ཤི༌ཀའེ༌ མི༌གུན༌ལ༌ སོ༌མ༌ བྲེལ༌ཞིག༌གི༌ ནང༌ང༌ དཀོན༌མཆོག༌ ཉམ༌པོ༌ མི༌ཚེ༌ ཕུད༌ཅེས༌ལ༌ སྒོ༌ ཕེའ༌ཛདས༌།
དཀོན༌མཆོག༌གི༌ སྲས༌ ཞལ༌ཆད༌ སོ༌མའེ༌ ནང༌ང༌ ཡེ༌ཤུ༌ མ༌ཤི༌ཀ༌ དཀོན༌མཆོག༌གི༌ སྲས༌ མོལ༌ཏེ༌ དུག༌།
དཀོན༌མཆོག༌གི༌ སྲས༌ བྲི༌ཅེས༌པོའེ༌ དཀོན༌མཆོག༌ མང༌པོ༌ཞིག༌ ཡོད༌ཏེ༌ ཨིན༌ནོག༌ སམ༌ མ༌གོས༌,
ཅིའ༌ཟེར༌ན༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌,
དཀོན༌མཆོག༌ ཅིག༌ཅིག༌ ཞུགས༌ཏེ༌ ཨིན༌།
དཀོན༌མཆོག༌ག༌ ཐའ༌མ༌ ཡ༌ གོ༌ཟུག༌ མེད༌པ༌ ཏུས༌གྱུན༌ ཞུགས༌ཏེ༌ ཨིན༌ནོག༌།
ཁོང༌ངི༌ ཇིག༌རྟེན༌ དང༌ ནམ༌ཁའེ༌ ནང༌ང༌ ཡོད༌ཁན༌ ཚང༌མ༌ ཞང༌ང༌ ཛད༌ཏེ༌ ཨིན༌།
སུང༌རབས༌སི༌ ནང༌ང༌ ཏེ༌ཟུག༌ དེན༌བ༌ རིག༌ མོལ༌ཏེ༌ ཡོད༌ཏེ༌ ཨིན༌ནོག༌,
ཨིན༌ནའང༌ ཏེ༌གུན༌ ཧ༌གོ༌ཅེས༌ལ༌ མ༌ ཀགས༌པོ༌ ཆའ༌ནོག༌།
སྤེར༌ན༌,
དཀོན༌མཆོག༌ ཡབ༌,
དཀོན༌མཆོག༌ སྲས༌སི༌ ནང༌ང༌,
དཀོན༌མཆོག༌ སྲས༌ དཀོན༌མཆོག༌ ཡབ༌བི༌ ནང༌ང༌,
ཡང༌ ཏམ༌པའེ༌ ཐུག༌ཉིད༌ ཁོང༌ ཉིས༌ཀོའེ༌ ནང༌ང༌ ཞུགས༌ པ༌སང༌ དཀོན༌མཆོག༌ ཅིག༌ཅིག༌ ཨིན༌ མོལ༌ཁན༌བོ༌ ཀྲང༌པོ༌ ཨིན༌ནོག༌།
དཀོན༌མཆོག༌གི༌ སྲས༌,
ཡེ༌ཤུ༌ མ༌ཤི༌ཀ༌ མིའི༌ ཚུལ༌ལ༌ ལྟམས༌།
༼ཡོ༌ཧཱ༌ནན༌ 1:1,14,15༽,
ཡེ༌ཤུའི༌ དཀོན༌མཆོག༌ག༌ ཞལ༌ཏ༌ སལ༌ཨིན༌ ཁོང༌ང༌ ཨ༌བ༌ལེ༌,
ཡང༌ དཀོན༌མཆོག༌གི༌ ཡེ༌ཤུའ༌ བུ༌ཚ༌ མོལས༌།
སུང༌རབས༌སི༌ ནང༌ཞིན༌ དཀོན༌མཆོག༌ སྲས༌,
ཡབ༌ དཀོན༌མཆོག༌ ཙོགས༌ལ༌ ཏུས༌གྱུན༌ ཞུགས༌ཏེ༌ ཐའ༌མ༌ ཡ༌ གོ༌ཟུག༌ མེད༌པ༌ ཡང༌ ཁོང༌གུན༌ལ༌ ཁྱུད༌དའང༌ དྲན༌དྲའ༌ ཡོད༌ཏེ༌ ཨིན༌ནོག༌།
ཨིན༌ནའང༌ སྲས༌སི༌ ཁོང༌རང༌ ཡབ༌ དཀོན༌མཆོག༌གི༌ ཡོག༌ག༌ བོར༌ར༌ ཛདས༌,
ནམ༌ ཁོང༌ འི༌ ཇིག༌རྟེན༌ནི༌ཀ༌ ཁོང༌རང༌ངི༌ ཡབ༌བི༌ ཐུགས༌དོད༌ ནང༌ཞིན༌ སྡིག༌ཅན༌གུན༌ནི༌ ཕིའ༌ ཀྲོངས༌ས༌ སྐྱོདས༌།
ཡེ༌ཤུ༌ དང༌ སྐྱབ༌གོན༌ གུན༌ནི༌ སྐོར༌ལ༌ བྲིས༌ཁན༌བོའ༌ ཟིགས༌།
དཀོན༌མཆོག༌གི༌ ལུ༌གུ༌ ༼ཡོ༌ཧཱ༌ནན༌ 1:29,36༽,
དཀོན༌མཆོག༌གི༌ ཡ༌ཧུ༌དཱ༌པ༌གུན༌ལ༌ མོ༌ཟེས༌ གྱུད༌ཏེ༌ སལ༌ཁན༌ནི༌ ཁྲིམས༌ ནང༌ཞིན༌,
དཀོན༌མཆོག༌གི༌ ཁོང༌གུན༌ནི༌ སྡིག༌པ༌གུན༌ལ༌ ཤགས༌པ༌ ཛད༌ཅེས༌སི༌ ཕིའ༌ ལུ༌གུ༌ སྲོག༌ཆོད༌ལ༌ ཕུལ༌ལད༌པིན༌,
ཅིའ༌ཟེར༌ན༌ དཀོན༌མཆོག༌གི༌ མོལས༌,
“ལུ༌གུ༌ སད༌ཏེ༌ ཁྲག༌ བིང༌ཁན༌བོ༌ མི༌ཞིག༌གི༌ སྡིག༌པའེ༌ ཚབས༌,
ཡང༌ ཏེ༌ མི༌བོ༌ དཀོན༌མཆོག༌གི༌ དུན༌ལ༌ སྐབས༌སྟོགས༌ཞིག༌ རྩང༌མ༌ གྱུར༌ཏེ༌ ཨིན༌།”
ཡེ༌ཤུའ༌ དཀོན༌མཆོག༌གི༌ ལུ༌གུ༌ མོལ༌ལ༌ ཛདས༌ ཅིའ༌ཟེར༌ན༌ ཁོང༌ངི༌ ཁོང༌རང༌ངི༌ སྲོག༌པོ༌ ང༌དང༌ངི༌ སྡིག༌པ༌གུན༌ལ༌ ཤགས༌པ༌ ཐོབ༌ཅེས༌ལ༌ ཆོད༌པ༌ ཕུལ༌ལད༌ ཛདས༌།
རྐྱང༌ཤིང༌ རོམ༌པའེ༌ ཝང༌སྲུལ༌པ༌གུན༌ནི༌ ལུག༌སྲོལ༌ ནང༌ཞིན༌ ཁྲིམས༌ཅག༌ཁན༌གུན༌ལ༌ ཆད༌པ༌ ཏངས༌ཏེ༌ སད༌ཅེས༌ལ༌ རྐྱང༌ཤིང༌ངི༌ཀ༌ རྐྱང༌ངད༌པིན༌།
འི༌ ཆད༌པ༌བོ༌ མི༌ སད༌ཁན༌ དང༌ ཅག༌པ༌ ངན༌པ༌ གུན༌ལ༌ ཏང༌ངད༌པིན༌།
རྐྱང༌ཤིང༌ངི༌ ནག༌ཤ༌ ཟིགས༌ས༌ ཛད༌།
ཁ༌
ཁྲལ༌ལེན༌ཁན༌ ཡེ༌ཤུའི༌ ཏུས༌ལ༌ ཡ༌ཧུ༌དཱ༌པ༌ ཁ༌ཅིག༌གི༌ རོམ༌པའེ༌ ཝང༌སྲུལ༌པ༌གུན༌ནི༌ ཕིའ༌ ཁྲལ༌ལེན༌ཅེས༌སི༌ ལས༌ ཅོའད༌པིན༌།
ཡ༌ཧུ༌དཱ༌པ༌ ཨིན༌ ཨིན༌ནའང༌ ཁོང༌གུན༌ནི༌ ཝང༌ ཉམ༌པོ༌ ཡ༌ཧུ༌དཱ༌པ༌གུན༌ལ༌ ཁྲལ༌ ཤལ༌ཅུག༌གད༌པིན༌ ཀ༌བོ༌ རོམ༌པའེ༌ མག༌མི༌གུན༌ནི༌ ལ༌ཆའེ༌ ཕིའ༌ ཀོལ༌ལད༌པིན༌།
ཁོང༌གུན༌ནི༌ ཡ༌ཧུ༌དཱ༌པ༌གུན༌ནི༌ ཀ༌ནེ༌ ཁྲལ༌ལི༌ སང༌ མང༌ང༌ ཐེ༌བ༌ པེ༌ནེ༌ ལེན༌ཏེ༌ ཁོ༌རང༌གུན༌ནི༌ ཕིའ༌ བོར༌རད༌པིན༌།
ཏེ༌བོའེ༌ཕིའ༌ ཡ༌ཧུ༌དཱ༌པ༌གུན༌ནི༌ ཁོང༌གུན༌ལ༌ ནཕ༌རད༌ ཅོས༌ཏེ༌ སྡིག༌ཅན༌ ཐེའད༌པིན༌།
ཁྲིམས༌ དཀོན༌མཆོག༌གི༌ ཁྲིམས༌པོ༌ ནི༌ ཞལ༌ཆད༌ སྙིང༌པའེ༌ གོ༌མའེ༌ སྤེ༌ཆ༌ ལྔའེ༌ ནང༌ང༌ བྲིས༌ཏེ༌ ཡོད༌ཏེ༌ ཨིན༌ནོག༌།
ཏེ༌གུན༌ནི༌ ནང༌ང༌,
དཀོན༌མཆོག༌གི༌ ཁོང༌རང༌ངི༌ མི༌གུན༌ནི༌ ཕན༌ཐོགས༌སི༌ ཕིའ༌ མོ༌ཟེས༌ལ༌ སྔོན༌ཅུག༌ཁན༌ནི༌ ཁྲིམས༌གུན༌ ཡང༌ ཨིས༌ར༌ཨེལ༌ དང༌ ཞན༌ གྱལ༌ཁམས༌ ཚང༌མའེ༌ མི༌རབས༌གུན༌ནི༌ ཐོ༌ བྲིས༌ཏེ༌ ཡོད༌ཏེ༌ ཨིན༌ནོག༌།
སྐུ༌ཚབས༌ པ༌འུ༌ལུའི༌ མོལས༌,
“དཀོན༌མཆོག༌གི༌ ང༌དང༌ང༌ ང༌དང༌གུན༌ སྡིག༌ཅན༌ ཨིན༌ཁན༌བོ༌ སྟན༌ཅེས༌སི༌ ཕིའ༌ ཁྲིམས༌གུན༌ སལ༌ལ༌ ཛདས༌།”
ཁྲིམས༌ཁུང༌ ཁྲིམས༌ཁུང༌ ནི༌ ཀའོགྲ༌ལ༌ ཟེར༌ར༌ནོག༌།
ཁྲུས༌ལེན༌ཅེས༌ ཁྲུས༌ལེན༌ཁན༌ནི༌ མི༌བོའེ༌,
རང༌ངི༌ ཅོ༌ཁན༌ནི༌ སྡིག༌པ༌གུན༌ནི༌ཀ༌ གྱོད༌པ༌ སྐྱེས༌ཏེ༌ ཁོང༌གུན༌ནི༌ སྡིག༌པའ༌ ཤགས༌པ༌ སལ༌ཁན༌ནི༌ ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཁྱོངས༌ཏེ༌,
ཁོང༌ངི༌ ཁའ༌ཉན༌ཏེ༌ ཁོང༌ང༌ བྲང༌ཅེས༌སི༌ སྤང༌པོ༌ ཏང༌ང༌ནོག༌།
ཁྲུས༌ལེན༌ནི༌ ཏུས༌,
ང༌དང༌ ཆུའི༌ ནང༌ཀུག༌ག༌ སུབ༌ཅེས༌པོ༌,
ཡེ༌ཤུ༌ ཉམ༌པོ༌ ཤི༌ཁན༌ནི༌ སྟགས༌ ཡང༌ ཆུའི༌ ནང༌ནེ༌ བིང༌ང༌ཅིག༌,
ཡེ༌ཤུ༌ ཉམ༌པོ༌ མི༌ཚེ༌ སོ༌མ༌ཞིག༌གི༌ ནང༌ང༌ སོན༌ཏེའ༌ ལང༌ཅེས༌སི༌ སྟགས༌ ཨིན༌ཁན༌བོ༌ སུང༌རབས༌སི༌ ནང༌ང༌ མོལ༌ཏེ༌ ཡོད༌ཏེ༌ ཨིན༌ནོག༌།
ག༌
གའ༌མོའེ༌ ནས༌ཚུལ༌ མི༌གུན༌ནི༌ ཕིའ༌ དཀོན༌མཆོག༌གི༌ ཞུ༌ལོན༌བོའ༌ གའ༌མོའེ༌ ནས༌ཚུལ༌ ཟེར༌ར༌ནོག༌།
འི༌ ལོན༌བོ༌ དཀོན༌མཆོག༌གི༌ ཁོང༌རང༌ངི༌ སྲས༌,
ཡེ༌ཤུ༌ མ༌ཤི༌ཀ༌,
འི༌ ཇིག༌རྟེན༌པ༌གུན༌ལ༌ ཁོང༌གུན༌ནི༌ ཅོ༌ཁན༌ནི༌ སྡིག༌པའེ༌ ཆད༌པ༌ ཕོག༌ཅེས༌པོའེ༌ ཀ༌ནེ༌ སྐྱོབ༌ཅེས༌ལ༌ ཀལ༌ལ༌ ཛདས༌།
ཡང༌ ཡེ༌ཤུ༌ གཙོ༌བོ༌ དཀོན༌མཆོག༌ ཨིན༌ཁན༌བོའ༌ ཏད༌པ༌ ཅོ༌ཅེས༌ གྱུད༌ཏེ༌,
དཀོན༌མཆོག༌གི༌ ཕྲུ༌གུ༌ གྱུར༌ཅུག༌ཅེས༌ལའང༌ ཀལ༌ལ༌ ཛདས༌།
གི༌དི༌འོན༌ ༼ཨིབ༌རི༌པ༌ 11:32༽,
ཨིས༌ར༌ཨེལ༌པའེ༌ གྱལ༌པོ༌གུན༌ནི༌ ཀེ༌ནན༌ ཡུལ༌ལི༌ ནང༌ང༌ ཝང༌སྲུལ༌ གོ༌ཟུག༌གི༌ སང༌ སྔུན༌ལ༌,
གི༌དི༌འོན༌ ཁོང༌ངི༌ འུ༌སྐྱོང༌གུན༌ནི༌ ནང༌ནེ༌ ཅིག༌ཅིག༌ ཨིན༌པིན༌།
ཁོའ༌ དཀོན༌མཆོག༌གི༌ ནང༌ང༌ མ༌ཀྲག༌པོ༌ ཏད༌པ༌ ཡོད༌པ༌,
ཁོང༌ང༌ ལམ༌སྟོན༌ ཛད༌ཅེས༌ལ༌ མོས༌ལམ༌ ཞུས༌,
སྤེར༌ན༌ ཁོའེ༌ ཨིས༌ར༌ཨེལ༌པ༌གུན༌ མག༌གི༌ ནང༌ང༌ ཁྲིད༌ ཟ༌ནེ༌ མག༌མི༌ མ༌ཉུ༌ངུན༌ མ༌ནེ༌ མེད༌ནའང༌,
ཁོང༌གུན༌ནི༌ གྲ༌འོ༌གུན༌ལ༌ ཕམ༌ཀལས༌,
ཅིའ༌ཟེར༌ན༌ དཀོན༌མཆོག༌གི༌ ཁོང༌གུན༌ལ༌ རོགས༌ ཛདས༌།
ཆ༌
ཆད༌དོན༌ ༼ཆད༌དོན༌ སྙིང༌པ༌:
ལུ༌ཀ༌ 1:72;
ཆག༌ལས༌གུན༌ 3:25, 7:8;
གཱ༌ལ༌ཏི༌ཡ༌ 3:17;
ཨིབ༌རི༌པ༌ 9:1,
ཆད༌དོན༌ སོ༌མ༌:
མད༌ཐཱ༌ 26:28;
མར༌ཀུས༌ 14:24;
ལུ༌ཀ༌ 22:20;
རོམ༌པ༌ 11:27,
ཀོ༌རིན༌ཐི༌པ༌ 1 11:25;
ཀོ༌རིན༌ཐི༌པ༌ 2 3:14 ཨིབ༌རི༌པ༌ 7:22, 8:6-13, 9:15, 10:16, 29, 12:24, 13:20༽,
སྡེ༌ ཉིས༌སི༌ པར༌ལ༌ ཁའ༌ཆམས༌ ཆ༌ཅེས༌པོའ༌ ཆད༌དོན༌ ཟེར༌ར༌ནོག༌།
ཆད༌དོན༌ནི༌ སྡེ༌ ཉིས༌སི༌ ནང༌ང༌ བྲེལ༌ དང༌ ལས༌གུན༌ ཅོ༌ཅེས༌སི༌ ཁ༌ཆད༌ སྟན༌ན༌ནོག༌།
དཀོན༌མཆོག༌གི༌ ཆད༌དོན༌ སྙིང༌པའེ༌ ནང༌ང༌ དཀོན༌མཆོག༌ ཁོང༌རང༌ མི༌གུན༌ནི༌ ཡབ༌ དང༌ གཙོ༌བོ༌ ཨིན༌ཁན༌,
ཡང༌ མི༌གུན༌ནི༌ ཁོང༌ང༌ ཅེས༌པ༌ ཅོས༌ཏེ༌ ཁའ༌ཉན༌གོ༌ཤེས༌,
ཁའ༌ཉན༌ཁན༌གུན༌ལ༌ ཅིན༌ལབས༌ ཡ༌ ཁའ༌ མ༌ཉན༌ཁན༌གུན༌ལ༌ ཆད༌པ༌ ཕོག༌ཨིན༌ མོལ༌ལ༌ ཛདས༌།
ཆད༌དོན༌ སོ༌མའེ༌ ནང༌ང༌ དཀོན༌མཆོག༌གི༌,
ཁོང༌ངི༌ སྲས༌སི༌ ནང༌ང༌ ཏད༌པ༌ ཅོ༌ཁན༌གུན༌ལ༌ མི༌ཚེ༌ སོ༌མ༌ ཐོབས༌ཏེ༌ ཁོང༌གུན༌ནི༌ ནང༌ང༌ དཀོན༌མཆོག༌གི༌ ཐུག༌ཉིད༌ ནས༌ཏེ༌ ཁོང༌ངི༌ མི༌ གྱུར༌ཅེས༌སི༌ ཞལ༌ཆད༌ ཛདས༌།
ཆད༌དོན༌ནི༌ སྒམ༌ ༼བིང༌ཏེ༌ ཆ༌ཅེས༌ 25,
ཨིབ༌རི༌པ༌ 9:4,
ཡོང༌ཅེས༌ཅན༌ནི༌ ཏུས༌སི༌ ལུང༌སྟན༌ 11:19༽,
འི༌ སྒམ༌བོ༌ ཤིང༌ངི༌ སྒམ༌ སེར༌རི༌ ཏུམས༌ཁན༌ཞིག༌ ཨིན༌པིན༌,
ཀ༌བོའེ༌ ནང༌ང༌ དཀོན༌མཆོག༌གི༌ རྡོའ༌ ལེབ༌ལེབ༌ ཉིས༌སི༌ཀ༌ བྲིའ༌ ཛད༌ཁན༌ནི༌ བཀའ༌རྒྱ༌ རྕུ༌ དང༌ ཞན༌ཡང༌ ཏམ༌པ༌ ཅ༌ལག༌གུན༌ བོར༌རད༌པིན༌།
སྒམ༌ དང༌ ཏེ༌ནང༌ང༌ ཡོད༌ཁན༌གུན༌ མ༌ ཏམ༌པ༌ ཨིན༌པིན༌,
ཅིའ༌ཟེར༌ན༌ ཏེ༌བོ༌ དཀོན༌མཆོག༌གི༌ ཨིས༌ར༌ཨེལ༌པ༌གུན༌ ཉམ༌པོ༌ ཆད༌དོན༌ ཛད༌ཁན༌བོའེ༌ སྟགས༌ ཨིན༌པིན༌།
རི༌སྟོང༌ངི༌ ནང༌ང༌ བེས༌ལ༌ ཡོད༌ ཟ༌ནེ༌,
ཁོང༌གུན༌ནི༌ ཏེ༌ སྒམ༌བོ༌ ཁུར༌ཏེ༌ ཉམ༌པོ༌ ཁྱེར༌རད༌པིན༌,
ཡང༌ གྲུལ༌ མ༌གྲུལ༌ ཟ༌ནེ༌ ཏེ༌བོ༌,
ཏམ༌པའེ༌ ཀུར༌བོའེ༌ ནང༌ང༌ བོར༌རད༌པིན༌།
ཡེ༌རུ༌ཤ༌ལེམ༌མི༌ ནང༌ང༌ ཆོད༌ཁང༌ རྩིགས༌ཏེ༌ སྟིང༌ནེ༌,
ཆོད༌ཁང༌ངི༌ ཚང༌མའེ༌སང༌ ཏམ༌པ༌ ནས༌སའེ༌ ནང༌ང༌ ཏེ༌ སྒམ༌བོ༌ བོརས༌།
ཆད༌དོན༌ནི༌ སྒམ༌མི༌ ནག༌ཤ༌ ཟིགས༌ས༌ ཛད༌།
ཆོས༌ཁྲིམས༌ལ༌ ཁས༌པ༌གུན༌ ཁོང༌གུན༌ ནི༌ ཕ༌རུ༌ཤི༌པའེ༌ སྡེ༌ ཁག༌ཅིག༌ ཨིན༌པིན༌།
ད༌
དཱ༌བིད༌ དཱ༌བིད༌ ནི༌ ཨིས༌ར༌ཨེལ༌པ༌གུན༌ནི༌ ཚང༌མའེ༌སང༌ ཀྲག༌པོ༌ གྱལ༌པོ༌ ཡང༌ ཡེ༌ཤེའེ༌ བུ༌ཚའ༌ ཆུང༌ཤོག༌པོ༌ ཨིན༌པིན༌།
གྱལ༌པོ༌ གྱུར༌རི༌ སང༌ སྔུན༌ལ༌ ཁོའེ༌ ཁོ༌རང༌ངི༌ ཨ༌བའེ༌ ལུག༌གུན༌ ཚོའད༌པིན༌།
ཁྱོག༌ཏོང༌ངི༌ ཏུས༌ལ༌,
ཁོང༌ངི༌ ཟུགས༌པོ༌ མ༌ ཆེན༌མོ༌ ཤེད༌ཅན༌ མག༌མི༌ གོ༌ལི༌ཡཱཐ༌ ཡུག༌རྡོ༌ ཏངས༌ཏེ༌ སདས༌,
ཡང༌ ཨིས༌ར༌ཨེལ༌པ༌གུན༌ལ༌ གྱལ༌ཁའ༌ ཆེན༌མོ༌ཞིག༌ ཐོབ༌ཅུགས༌།
དཱ༌བིད༌དི༌ དཀོན༌མཆོག༌ག༌ ཅེས༌པ༌ མ༌སྲན༌ཏྲེ༌ ཅོས༌པ༌,
ཁོང༌ང༌ སྟོད༌པ༌ ཕུལ༌ཅེས༌ལ༌ སུང༌གུར༌རི༌ སྤེ༌ཆའེ༌ སྟོད༌ལུ༌ མང༌པོ༌ཞིག༌ ཁོང༌ངི༌ བྲིས༌ཏེ༌ ཨིན༌པིན༌།
ཏུས༌ མང༌པོའེ༌ སྔུན༌ལ༌,
ལུང༌སྟོན༌པ༌གུན༌ནི༌ དཀོན༌མཆོག༌གི༌ ཀལ༌ལ༌ ཛད༌ཅེས༌སི༌ སྐྱབ༌གོན༌ མ༌ཤི༌ཀ༌,
དཱ༌བིད༌དི༌ པུར༌གྱུད༌ ཨིན༌ བྲིས༌ཁན༌ ནང༌ཞིན༌ ཡེ༌ཤུ༌ ནི༌ ཏེན༌ན༌ པུར༌གྱུད༌པོ༌ ཨིན༌པིན༌ ༼རོམ༌པ༌ 1:3,
ཡོང༌ཅེས༌ཅན༌ནི༌ ཏུས༌སི༌ ལུང༌སྟན༌ 22:16༽།
ཏམ༌པའེ༌ ཐུག༌ཉིད༌ ཏམ༌པའེ༌ ཐུག༌ཉིད༌ ནི༌ དཀོན༌མཆོག༌ ཞུགས༌ཏེ༌ ཨིན༌ནོག༌།
ཨིན༌ནའང༌ ཡབ༌ དཀོན༌མཆོག༌ དང༌ དཀོན༌མཆོག༌གི༌ སྲས༌ ཡེ༌ཤུ༌ མ༌ཤི༌ཀ༌,
ཉིས༌ཀོའེ༌ སང༌ སོ༌སོ༌ ཨིན༌ནོག༌།
ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ ཅོ༌ཁན༌གུན༌ལ༌ དེན༌བ༌ སྔོན༌ཅུག༌ཅེས༌,
ལམ༌སྟན༌ཅེས༌,
ཡང༌ དཀོན༌མཆོག༌གི༌ ཐུགས༌ཐད༌ཁན༌ ཅོ༌ཉན༌ཅེས༌ལ༌,
ཡབ༌ དཀོན༌མཆོག༌ དང༌ གཙོ༌བོ༌ ཡེ༌ཤུའི༌ ཁོང༌གུན༌ནི༌ ནང༌ང༌ ཏམ༌པའེ༌ ཐུག༌ཉིད༌ ཀལ༌ལ༌ ཛདས༌།
དཀོན༌མཆོག༌གི༌ སྲས༌སི༌ སྐོར༌ལ༌ བྲིས༌ཁན༌བོའང༌ ཟིགས༌།
ན༌
ནཱའ༌མན༌ ༼ལུ༌ཀ༌ 4:27༽,
ཡ༌ཧུ༌དཱ༌པ༌ མན༌ཁན༌ ནཱའ༌མན༌ སི༌རི༌ཡཱའེ༌ ནང༌ང༌ དུག༌ཁན༌ མག༌མི༌ སྤོན༌བོ༌ཞིག༌ ཨིན༌པིན༌།
ཁོའ༌ ཛེ༌ནད༌ ཡོངས༌ཏེ༌ ཡོད༌པིན༌།
ལུང༌སྟོན༌པ༌ ཨེ༌ལི༌ཤའེ༌ སྐོར༌ལ༌ ཚོར༌ར༌ཅིག༌,
ཁོ༌ ཁོ༌རང༌ངི༌ ནད༌པོ༌ ཕན༌ཅུག༌ཅེས༌ལ༌ ཁོང༌ ཡོད༌ས༌ སོང༌།
ཨེ༌ལི༌ཤའེ༌ ཁོའ༌ ཡོར༌དཱན༌ ལྩངས༌པོའེ༌ ནང༌ང༌ ལན༌ རྡུན༌ ཆུའ༌ ཞུག༌ཅེས༌ལ༌ མོལས༌།
ཁོའེ༌ ཁོང༌ངི༌ ཁའ༌ཉན༌ པ༌སང༌ ཟུ༌མོ༌བོ༌ སིང༌ གྱལ༌ཏེ༌ མེད༌ཁན༌ སོང༌།
ནི༌ནེ༌ཝ༌ ༼མད༌ཐཱ༌ 12:41;
ལུ༌ཀ༌ 11:30,32༽,
ནི༌ནེ༌ཝ༌ ཏེན༌ན༌ གྱལ༌ས༌བོ༌ ཨིན༌ནོག༌,
ཀ༌རུ༌ དཀོན༌མཆོག༌གི༌ ལུང༌སྟོན༌པ༌ ཡོ༌ནཱ༌ གྱུད༌ཏེ༌ ཆད༌པ༌ སལ༌ཏེ༌ ཁོང༌གུན༌ མེད༌ཁན༌ ཅོ༌ཨིན༌ མོལ༌ཏེ༌ ལོན༌ ཀལ༌ལ༌ ཛདས༌།
ལོན༌བོ༌ ཚོར༌ར༌ཅིག༌,
ནི༌ནེ༌ཝ༌པ༌གུན༌ནི༌ གྱོད༌པ༌ སྲན༌ཏྲེ༌ ཅོས༌ པ༌སང༌,
དཀོན༌མཆོག༌གི༌ ཁོང༌གུན༌ལ༌ ཤགས༌པ༌ སལ༌ལ༌ ཛདས༌།
ནོར༌སྐལ༌ ཨ༌བ༌ ཤི༌ཏེ༌ སྟིང༌ནེ༌ ཕྲུ༌གུ༌གུན༌ལ༌ ཨ༌བའེ༌ ནོར༌རི༌ སྐལ༌ལ༌ ཐོབ༌ཁན༌བོའ༌ ནོར༌སྐལ༌ ཟེར༌ར༌ནོག༌།
ནོ༌ཨ༌ ༼མད༌ཐཱ༌ 24:37,38;
ལུ༌ཀ༌ 3:36; 17:26,27;
ཨིབ༌རི༌པ༌ 11:7,
པི༌ཏྲར༌ ཏང༌པོ༌ 3:20;
པི༌ཏྲར༌ ཉིས༌པ༌ 2:5༽,
ནོ༌ཨའེ༌ སྐོར༌ལ༌ གོ༌ཟུག༌གི༌ སྤེ༌ཆའེ༌ ནང༌ང༌ བྲིས༌ཏེ༌ ཡོད༌ཏེ༌ ཨིན༌ནོག༌།
ཏེན༌ན༌ ཏུས༌ལ༌ མི༌ ཚང༌མ༌ མ༌ ངན༌པ༌ ཡོད༌ པ༌སང༌,
དཀོན༌མཆོག༌གི༌ ཆུ༌ལོག༌ ཆེན༌མོ༌ཞིག༌ ཀལ༌ཏེ༌ ཇིག༌རྟེན༌པ༌གུན༌ མེད༌ཁན༌ ཅོ༌ཅེས༌ལ༌ ཁྲིམས༌ཅད༌ད༌ ཛདས༌།
ནོ༌ཨ༌ མི༌ ཀྲང༌པོ༌ཞིག༌ ཨིན༌ཅེས༌པའེ༌ དཀོན༌མཆོག༌གི༌ ཁོ༌,
ཁོའེ༌ ནང༌ཚངས༌ དང༌ སེམས༌ཅན༌ནི༌ རིགས༌ ཚང༌མ༌ སྐྱོབ༌ཅེས༌སི༌ ཕིའ༌ ཁོ༌ ལྡམས༌ཏེ༌ ཁོའ༌ གྲུ༌ཟིང༌ མ༌ ཆེན༌མོ༌ཞིག༌ ཅོ༌ཅེས༌ལ༌ བཀའ༌ སལས༌།