ཡོང༌ཅེས༌ཅན༌ནི༌ ཏུས༌སི༌ ལུང༌སྟན༌།
ཡེ༌ཤུ༌ མ༌ཤི༌ཀའེ༌ མ༌འོང༌ ལུང༌སྟན༌ ཛདས༌།
1:1-3
1
འི༌ ཨི༌གེ༌,
ཡེ༌ཤུ༌ མ༌ཤི༌ཀའེ༌ མ༌འོང༌ ལུང༌སྟན༌ ཛད༌ཁན༌བོ༌ ཨིན༌ནོག༌,
ཀ༌བོ༌ དཀོན༌མཆོག༌གི༌ གྱོགས༌པ༌ ཇུང༌གོ༌ཤེས༌ཅན༌གུན༌ མ༌ཤི༌ཀའེ༌ ཞབས༌ཏོག༌པ༌གུན༌ལ༌ ཤད༌ཅེས༌ལ༌ ཡོ༌ཧཱ༌ནན༌ལ༌ སལ༌ལ༌ ཛད༌ཏེ༌ ཨིན༌།
ཡེ༌ཤུའི༌ འི༌ མ༌འོང༌ ལུང༌སྟན༌བོ༌,
ཁོང༌ངི༌ ཞབས༌ཏོག༌པ༌ ཡོ༌ཧཱ༌ནན༌ལ༌ སྟན༌ན༌ ཛད༌ཅེས༌ལ༌ ཁོང༌རང༌ངི༌ ཕོ༌ཉ༌ ཀལ༌ལ༌ ཛདས༌།
2 ང༌ ཡོ༌ཧཱ༌ནན༌ནི༌ འི༌ ཐོང༌ཁན༌ ཚང༌མའ༌ སྤང༌པོ༌ ཏང༌ངད༌,
ཡང༌ ངའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ བཀའ༌ དང༌ ཡེ༌ཤུ༌ མ༌ཤི༌ཀའེ༌ སྤང༌པོ༌ སལ༌ལ༌ ཛད༌ཁན༌ གུན༌ནི༌ སྐོར༌ ཤད༌དད༌།
3 འི༌ མ༌འོང༌ ལུང༌སྟན༌ནི༌ བཀའ༌ སིལ༌ཏེ༌ ཤད༌ཁན༌གུན༌ ཅིན༌ལབས༌ཅན༌ ཡང༌ ལོན༌བོའ༌ ཉན༌ཏེ༌ ཏེ༌ནང༌ང༌ ཟེར༌ཏེ༌ ཡོད༌ཁན༌བོའེ༌ཀ༌ ལག༌ལེན༌ ཅོ༌ཁན༌ ཚང༌མའང༌ ཅིན༌ལབས༌ཅན༌ ཨིན༌,
ཅིའ༌ཟེར༌ན༌ ཡོང༌ཅེས༌ཅན༌ནི༌ འི༌ ཏུས༌པོ༌ མ༌ ཉེ༌མོའ༌ ལེབས༌ཏེ༌ ཨིན༌ནོག༌།
ཆོས༌ཚོགས༌ དུན༌ལ༌ ཡོ༌ཧཱ༌ནན༌ནི༌ ཞུ༌ལོན༌།
1:4-8
4 ང༌ ཡོ༌ཧཱ༌ནན༌ནི༌ འི༌ ཨི༌གེ༌བོ༌ ཨ༌སི༌ཨཱ༌ ནང༌ང༌ ཡོད༌ཁན༌ནི༌ ཆོས༌ཚོགས༌ དུན༌ལ༌ བྲིའད༌།
དཀོན༌མཆོག༌ དག༌ས༌ ཞུགས༌ཏེ༌ ཡོད༌ཁན༌,
སྔུན༌ལ༌ ཞུགས༌ཏེ༌ ཡོད༌པིན༌,
ཡང༌ སྐྱོད༌ཅེས༌ཅན༌ དང༌ ཁོང༌རང༌ངི༌ ཞུགས༌ཁྲིས༌སི༌ དུན༌ལ༌ ཡོད༌ཁན༌ནི༌ ཐུག༌ཉིད༌ རྡུན༌ གུན༌ནི༌ ཆོགས༌ནེ༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ཤིག༌,
5 ཡང༌ ཡེ༌ཤུ༌ མ༌ཤི༌ཀའེ༌ ཆོགས༌ནེའང༌།
ཁོང༌ ནི༌ ལོ༌ཁྱེལ༌ཅན༌ནི༌ སྤང༌པོ༌,
ཏང༌པོ༌རང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཁན༌,
ཡང༌ ཇིག༌རྟེན༌ནི༌ གྱལ༌པོ༌གུན༌ནི༌ ཝང༌སྲུལ༌པ༌ ཞུགས༌ཏེ༌ ཨིན༌ནོག༌།
ང༌དང༌གུན༌ལ༌ ཅམས༌པ༌ ཅོའ༌ ཛད༌ཁན༌,
ཡང༌ ཁོང༌རང༌ངི༌ སྲོག༌པོ༌ ཅིན༌བ༌ སལ༌ཏེ༌ ང༌དང༌གུན༌ ང༌དང༌གུན༌ནི༌ སྡིག༌པ༌ནེ༌ ཐར༌ ཅུག༌ག༌ ཛད༌ཁན༌,
6 ང༌དང༌གུན༌ ཁོང༌རང༌ངི༌ དཀོན༌མཆོག༌ དང༌ ཡབ༌བ༌ ཞབས༌ཏོག༌ ཞུ༌ཅེས༌སི༌ ཕིའ༌ བླ༌མ༌ དང༌ གྱལ༌ཁག༌གི༌ མི༌གུན༌ ཅོའ༌ ཛད༌ཁན༌ནི༌ ཡེ༌ཤུ༌ མ༌ཤི༌ཀའ༌ སྤལ༌ དང༌ ཝང༌གུན༌ ཏུས༌གྱུན༌ནེ༌གྱུན༌ ཐོབ༌ཤིག༌,
ཨ༌མེན༌།
7 ལྟོས༌ཤིག༌,
ཁོང༌ སྲིན༌ནི༌ཀ༌ ཞུགས༌ཏེ༌ ཕེབས༌དུག༌།
མི༌ཚང༌མའེ༌ ཁོང༌ ཇལ༌ཨིན༌,
ཡང༌ ཁོང༌ང༌ རྡུང༌ ཙུག༌ཁན༌གུན༌ནིའང༌།
ཁོང༌ངི༌ ཞས༌ཏེ༌ ཇིག༌རྟེན༌པ༌ ཚང༌མའེ༌ རྡུག༌པོ༌ ཅོ༌ཨིན༌།
ཏེ༌བོ༌ ཏན༌ཏན༌ གྲུབ༌ཨིན༌,
ཨ༌མེན༌།
8 གཙོ༌བོ༌ དཀོན༌མཆོག༌གི༌ མོལ༌དུག༌,
“ང༌ ནི༌ ཨལ༌ཕ༌ དང༌ ཨོ༌མེ༌ག༌:
གོ༌ཟུག༌ དང༌ སྟིང༌ཇུག༌བོ༌ ཨིན༌།
ང༌ ནི༌ དག༌ས༌ ཡོད༌,
སྔུན༌ལ༌ ཡོད༌པིན༌ ཡང༌ ཡོང༌ཅེས༌ཅན༌ དང༌ ཀུན༌ཝང༌ དཀོན༌མཆོག༌ ཨིན༌།”
གཙོ༌བོ༌ ཡེ༌ཤུའི༌ ཆོས༌ཚོགས༌གུན༌ལ༌ ཞུ༌ལོན༌།
1:9-20
9 ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཡོད༌ཅེས༌པོའེ༌,
ཁྱོ༌ཞ༌གུན༌ནི༌ རྡུག༌ངལ༌,
དཀོན༌མཆོག༌གི༌ གྱལ༌སྲིད༌ དང༌ ཟོད༌སེམས༌ ཉམ༌པོ༌ རྡུག༌ངལ༌ ཁུར༌ཅེས༌སི༌ ནང༌ང༌ ང༌ ཡོ༌ཧཱ༌ནན༌ ཁྱོ༌ཞའེ༌ སྤུན༌ དང༌ ཕྲོ༌པ༌ ཨིན༌།
ངའེ༌ དཀོན༌མཆོག༌གི༌ བཀའ༌ ཤད༌ཅེས༌ དང༌ ཡེ༌ཤུའི༌ སྐོར༌ལ༌ སྤང༌པོ༌ ཏང༌ཅེས༌པོའེ༌,
ངའ༌ ཆད༌པ༌ ཏངས༌ཏེ༌ ཚོ༌ལིང༌a པད༌མོས༌ ཟེར༌ཁན༌ནི༌ཀ༌ ཁྱེར༌ཏེ༌ བོརས༌།
10 ཟ༌ཉི༌མ༌ ཀ༌བོ༌ གཙོ༌བོའེ༌ ཞག༌ ཨིན༌ ཏེ༌ ཞག༌ག༌ ངའེ༌ཀ༌ དཀོན༌མཆོག༌གི༌ ཏམ༌པའེ༌ ཐུག༌ཉིད༌ བབས༌ས༌ ཛད༌ཏེ༌ ངའེ༌ ང༌རང༌ངི༌ གྱབ༌ནེ༌ ཏུང༌སྐད༌ ཙོགས༌ སྐད༌ ཀྲག༌པོ༌ཞིག༌ ཚོར༌།
11 ཡང༌ ཏེ༌ སྐད༌པོའེ༌ ངའ༌ མོལ༌ལ༌རག༌,
“ཁྱོ༌རང༌ངི༌ ཐོང༌ཅེས༌ཅན༌གུན༌ ཤོག༌རིལ༌ལི༌ཀ༌ བྲིས༌ཏེ༌ ཨེ༌ཕེ༌སས༌,
སྨིར༌ནཱ༌,
པེར༌ག༌མུམ༌,
ཐི༌འ༌ཏི༌རཱ༌,
སཱར༌དིས༌,
ཕི༌ལ༌དེལ༌ཕི༌ཨཱ༌ དང༌ ལ༌འོ༌དི༌ཀིའི༌ ཆོས༌ཚོགས༌ རྡུན༌ཀོའ༌ ཀོལ༌།”
12 ངའེ༌ ངའ༌ ཞལ༌ཏ༌ སལ༌ཁན༌བོའ༌ ལྟ༌ཅེས༌ལ༌ གྱུར༌ར༌ཅིག༌,
ངའ༌ སེར༌རི༌ འོད༌སྟགས༌ རྡུན༌ ཐོང༌།
13 ཡང༌ ངའེ༌ ཏེ༌ འོད༌སྟག༌གུན༌ནི༌ ཕྲོ༌ནེ༌ “མི༌རིགས༌སི༌བུ༌ ཙོགས༌ཤིག༌,”b
ཞངས༌ཏེ༌ ཇལ༌།
ཁོང༌ངི༌ ནམ༌ཟའ༌ མ༌ རིང༌མོ༌ ཞབ༌ ཚོག༌པ༌ ལེབ༌ཁན༌ ཡང༌ སེར༌ཀུད༌ལ༌ ལས༌ཁན༌ནི༌ ཤལ༌ ཁོང༌ངི༌ ཤང༌གག༌ག༌ སལ༌ལ༌ ཛད༌ཏེ༌ དུག༌།
14 ཁོང༌ངི༌ ཨུ༌ དང༌ ཨུ༌སྲ༌བོ༌,
བལ༌ ཡ༌ ཁ༌ ཀར༌པོ༌ ཙོགས༌,
ཡང༌ ཁོང༌ངི༌ སྕན༌བོ༌ མེ༌ ཀྲག༌པོ༌ བར༌ཁན༌ ཙོགས༌ དུག༌།
15 ཁོང༌ངི༌ ཞབས༌པོ༌,
མེ༌ ནང༌ང༌ སྲག༌ཁན༌ནི༌ ར༌གན༌ ཙོགས༌ ལྡང༌ཤན༌ ཐོང༌དུག༌,
ཡང༌ ཁོང༌ངི༌ སུང༌སྐད༌པོ༌ ཆུ༌ ཀྲག༌པོ༌ གྱུག༌ཁན༌ནི༌ སྐད༌ ཙོགས༌ རག༌།
16 ཁོང༌ངི༌ ཆག༌ ཡས༌པའེ༌ ནང༌ང༌ སྐར༌མ༌ རྡུན༌ ནམས༌ཏེ༌ དུག༌,
ཡང༌ ཁོང༌ངི༌ ཞལ༌ནེ༌ ཁའ༌ ཉིས༌ཅན༌ནི༌ ར༌འི༌ ནོན༌པོ༌ བིང༌དུག༌།
ཁོང༌ངི༌ ཞལ༌དོང༌བོ༌ ཉིང༌གུང༌ངི༌ ཉི༌མའེ༌ འོད༌ཟེར༌ ཙོགས༌ དུག༌།
17 ཁོང༌ ཇལ༌ལ༌ཅིག༌,
ང༌ ཁོང༌ངི༌ ཞབས༌སི༌ དུན༌ལ༌ ཤི༌ཁན༌ ཙོགས༌ལ༌ གྱེལ༌སོང༌།
ཨིན༌ནའང༌ ཁོང༌ངི༌ ཁོང༌རང༌ངི༌ ཆག༌ ཡས༌པ༌བོ༌ ངའེ༌ཀ༌ བོར༌ར༌ ཛད༌ཏེ༌ མོལས༌,
“ཇིགས༌ མ༌ཇིགས༌!
ང༌ ནི༌ ཏང༌པོ༌ དང༌ སྟིང༌ཇུག༌པོ༌ ཨིན༌།
18 ང༌ སྲོག༌ སལ༌ཁན༌བོ༌ ཨིན༌,
ང༌ ཤི༌ཏེ༌ མེད༌པིན༌,
ཏ༌ ལྟོས༌,
ང༌ ཏུས༌ གྱུན༌ནེ༌གྱུན༌ནི༌ ཕིའ༌ སོན༌ཏེའ༌ ལུས༌ཨིན༌;
ཡང༌ ཤི༌ཅེས༌ དང༌ ཤི༌ཁན༌གུན༌ནི༌ ནས༌སའེ༌ཀ༌ ངའ༌ ཝང༌ ཡོད༌།”
19 “ཁྱོ༌རང༌ངི༌ ཐོང༌ཁན༌,
དག༌ས༌ ཇུང༌ཨིན༌ ཡོད༌ཁན༌ དང༌ སྟིང༌ནེ༌ ཇུང༌ཅེས༌ཅན༌ གུན༌ བྲིས༌།
20 ཁྱོ༌རང༌ངི༌ ངའེ༌ ལག༌པ༌ ཡས༌པའེ༌ ནང༌ང༌ ཡོད༌ཁན༌ནི༌ སྐར༌མ༌ རྡུན༌ ཐོང༌ཁན༌ དང༌ སེར༌རི༌ འོད༌སྟགས༌ རྡུན༌ནི༌ སང༌ཝ༌བོ༌ འི༌བོ༌ ཨིན༌:
སྐར༌མ༌ རྡུན༌ཀོ༌ ནི༌,
ཏེ༌ ཆོས༌ཚོགས༌ རྡུན༌ནི༌ ཕོ༌ཉ༌གུན༌ ཡང༌ འོད༌སྟགས༌ རྡུན༌ཀོ༌ ནི༌,
ཏེ༌ ཆོས༌ཚོགས༌ རྡུན༌བོ༌ ཨིན༌།”