ཤེས༌རབས༌སི༌ སྐོར༌ལ༌ པ༌འུ༌ལུའི༌ ལབ༌ཞ༌།
2:1-16
2
སྤུན༌གུན༌ ཁྱོ༌ཞའ༌ དཀོན༌མཆོག༌གི༌ སང༌ཝའེ༌ ཐབས༌པོ༌ ཤད༌ཅེས༌ལ༌ ངའ༌ གོ༌མ༌རང༌ ཡོང༌ ཟ༌ནེ༌,
ངའེ༌ ཀྲག༌པོ༌ ཤེས༌རབས༌ ཡ༌ ཧ༌ལས༌ཤེས༌སི༌ ཚིགས༌ མ༌ཀོལ༌པིན༌།
2 ཅིའ༌ཟེར༌ན༌ ང༌ ཁྱོ༌ཞའ༌ ཉམ༌པོ༌ ཡོད༌ ཟ༌ནེ༌,
ངའེ༌ ཁྱོ༌ཞ༌གུན༌ལ༌ རྐྱང༌ཤིང༌ངི༌ཀ༌ རྐྱངས༌ཁན༌ནི༌ ཡེ༌ཤུ༌ མ༌ཤི༌ཀ༌ ཅིག༌པོ༌ མ༌སྟོགས༌ ཞན༌ཡང༌ ཅི༌ཞིག༌གི༌ སྐོར༌ལ༌ མི༌ཤད༌ཅེས༌ ཐག༌ཅད༌པིན༌།
3 ཁྱོ༌ཞ༌གུན༌ ཉམ༌པོ༌ ཡོད༌ཏུས༌,
མ༌ཤི༌ཀའེ༌ ཆག༌ལས༌ ཅོ༌ཅེས༌སི༌ ནང༌ང༌ ང༌ འུ༌ཐུགས༌,
ཁྲེལ༌ཁན༌ དང༌ ཇིགས༌ཁན༌ཞིག༌ ཚོར༌ར༌ རག༌པིན༌།
4 ངའེ༌ ལབ༌ཞ༌ དང༌ ཆོས༌ཤད༌ཅེས༌ གུན༌ ཧ༌གོའ༌ལ༌ ལ༌མོ༌ ཡང༌ ཁྲུལ༌ཅེས༌ དང༌ ཁས༌པ༌ སྤེ༌ར༌གུན༌ནི༌ཀ༌ རག༌ མ༌ལས༌ས༌,
ངའེ༌ ཏམ༌པའེ༌ ཐུག༌ཉིད༌དི༌ ཁྱོ༌ཞ༌གུན༌ནི༌ ནང༌ང༌ ཆག༌ལས༌ ཛད༌ཅེས༌པོའེ༌ཀ༌ ཨིད༌ཤེས༌ ཅོས༌ཏེ༌ ལབ༌ཞ༌ ཏངས༌པིན༌།
5 ངའེ༌ ཏེ༌བོ༌ ཁྱོ༌ཞ༌གུན༌ནི༌,
མིའི༌ ཤེས༌རབས༌སི༌ཀ༌ མན༌པ༌,
དཀོན༌མཆོག༌གི༌ ཤེད༌དི༌ ནང༌ང༌ ཨིད༌ཤེས༌ ཅོ༌ཅེས༌སི༌ ཕིའ༌ ཅོས༌པིན༌།
6 ཏད༌པའེ༌ ནང༌ང༌ ལྡན༌ཁན༌གུན༌ནི༌ ཕྲོའ༌ ཡོད༌ ཟ༌ནེ༌,
ངའེ༌ ཤེས༌རབས༌ཅན༌ནི༌ ཚིགས༌གུན༌ ཉམ༌པོ༌ སྤེ༌ར༌ ཏང༌ངད༌།
ཨིན༌ནའང༌ ཏེ༌ ཤེས༌རབས༌གུན༌,
གྱོགས༌པ༌ མེད༌ཁན༌ ཆ༌ཅེས༌ཅན༌ནི༌ འི༌ ཇིག༌རྟེན༌པ༌ ཡ༌ འི༌ ཇིག༌རྟེན༌ནི༌ ཝང༌སྲུལ༌པ༌ གུན༌ནི༌ མ༌ནོག༌།
7 ང༌ཞའེ༌ སྤེ༌ར༌ ཏང༌ཁན༌ནི༌ ཤེས༌རབས༌པོ༌ ནི༌,
དཀོན༌མཆོག༌གི༌ སང༌ཝའེ༌ ཐབས༌པོ༌ ཨིན༌ནོག༌,
ཀ༌བོ༌ ཁོང༌ངི༌ སྦས༌ཏེ༌ བོར༌ར༌ ཛད༌ཏེ༌ ཨིན༌།
ཨིན༌ནའང༌ ང༌དང༌གུན༌ལ༌ ཟིར༌རྗིད༌ ཐོབ༌ཅེས༌སི༌ ཕིའ༌ ཇིག༌རྟེན༌ མ༌ཆགས༌སི༌ སང༌ སྔུན༌ལ༌,
ཁོང༌ངི༌ འི༌ ཐབས༌པོ༌ ཅོའ༌ ཛད༌ཏེ༌ ཨིན༌པིན༌།
8 འི༌ ཇིག༌རྟེན༌ནི༌ ཝང༌སྲུལ༌པ༌གུན༌ནི༌ ཏེ༌ སང༌ཝའེ༌ ཐབས༌པོ༌,
ཧ༌མ༌གོའ༌ ཨིན༌ནོག༌།
ཀལ༌ཏེས༌ ཧ༌གོ༌པིན༌ན༌,
ཁོང༌གུན༌ནི༌ ང༌དང༌ངི༌ ཟིར༌རྗིད༌ཅན༌ནི༌ གཙོ༌བོ༌བོ༌ རྐྱང༌ཤིང༌ངི༌ཀ༌ རྐྱངས༌ཏེ༌ མེད༌གྲོ༌།
9 ཏེན༌ན༌བོའེ༌ཕིའ༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌
“སུ༌ཞིག༌གིའང༌ མ༌ཐོང༌ཁན༌ ཡ༌ མ༌ཚོར༌ཁན༌
ཡ༌ སམ༌བའེ༌ ནང༌ང༌ མེད༌ཁན༌ཞིག༌
དཀོན༌མཆོག༌ག༌ ཅེས༌པ༌ ཅོ༌ཁན༌གུན༌ནི༌ ཕིའ༌
གྲལ༌གྲིག༌ ཅོའ༌ ཛད༌ཏེ༌ ཡོད༌ཏེ༌ ཨིན༌ནོག༌།”a
10 ཨིན༌ནའང༌ ཏེ༌གུན༌ དཀོན༌མཆོག༌ ཁོང༌རང༌ངི༌ ཐུག༌ཉིད༌བོའེ༌,
ང༌དང༌གུན༌ལ༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌།
ཏམ༌པའེ༌ ཐུག༌ཉིད༌ལ༌ ཅི༌ཚང༌མ༌ ཐུག༌གྱུས༌ ཨིན༌ནོག༌,
དཀོན༌མཆོག༌གི༌ སང༌ཝ༌གུན༌ནའང༌།
11 མི༌ཞིག༌གི༌ སམ༌ཁན༌གུན༌ ཏེན༌ན༌ མི༌བོའེ༌ སེམས༌ཉིད༌ མ༌སྟོགས༌ ཞན༌ སུ༌ཞིག༌གའང༌ གྱུས༌ ཆ༌མ༌ནོག༌།
ཏེན༌ན༌ ཙོགས༌ལ༌ དཀོན༌མཆོག༌གི༌ ཐུགས༌སམ༌གུན༌ ཁོང༌ངི༌ ཐུག༌ཉིད༌ ཅིག༌པོ༌ མ༌སྟོགས༌,
ཞན༌སུ༌ཞིག༌གའང༌ གྱུས༌ཆའ༌ མ༌ནོག༌།
12 ཡང༌ ང༌དང༌གུན༌ལ༌ ཇིག༌རྟེན༌པའེ༌ སེམས༌ཉིད༌ མན༌པ༌,
དཀོན༌མཆོག༌གི༌ ཐུག༌ཉིད༌ ཐོབས༌ཏེ༌ ཨིན༌ཅེས༌པོའེ༌,
ང༌དང༌གུན༌ལ༌ དཀོན༌མཆོག༌གི༌ ཧ༌ལས༌ཤེས༌སི༌ སྐྱེས༌གུན༌ རིན༌ མེད༌པ༌ སལ༌ལ༌ ཛད༌ཁན༌བོ༌ ཧ༌གོ༌ ཐུབས༌ཏེ༌ ཨིན༌ནོག༌།
13 ཁྱོ༌ཞ༌གུན༌ལ༌ ཏེ༌ ཚང༌མའེ༌ སྐོར༌ལ༌ ཤད༌ ཟ༌ནེ༌,
ང༌ཞའེ༌ མིའི༌ ཤེས༌རབས༌ནེ༌ ཇུང༌ཁན༌ནི༌ ཚིགས༌གུན༌ མ༌ཀོལ༌ལ༌,
ཐུག༌ཉིད༌དི༌ སལ༌ཁན༌ནི༌ ཚིགས༌གུན༌ གྱུད༌ཏེ༌,
སྤེ༌ར༌ ཏང༌ངད༌།
ཐུག༌ཉིད༌དི༌ དེན༌བ༌གུན༌b ལབ༌ཅེས༌ལ༌ ཐུག༌ཉིད༌ཅན༌ནི༌ ཚིགས༌གུན༌ ཀོལ༌ལད༌།
14 ཨིན༌ནའང༌ ཐུག༌ཉིད༌ མེད༌ཁན༌ནི༌ མི༌བོའེ༌,
དཀོན༌མཆོག༌གི༌ ཐུག༌ཉིད༌ནེ༌ ཡོངས༌ཁན༌ནི༌ དེན༌བ༌གུན༌ནི༌ཀ༌ ཨིད༌ཤེས༌ ཅོའ༌ མ༌ནོག༌།
ཏེ༌ མི༌བོའ༌ འི༌གུན༌ ཏོན༌མེད༌ ཚོར༌ར༌ནོག༌,
ཡང༌ ཁོའ༌ ཧ༌གོའ༌ མ༌ནོག༌,
ཅིའ༌ཟེར༌ན༌ ཐུག༌ཉིད༌ ཡོད༌ཁན༌གུན༌ལ༌ མ༌སྟོགས༌,
ཡང༌སུའང༌ ཏེ༌གུན༌ ཧ༌གོ༌ ཐུབ༌བ༌ མ༌ནོག༌།
15 ཐུག༌ཉིད༌ ཡོད༌ཁན༌གུན༌ནི༌ ཅི༌ཚང༌མའེ༌ སྐོར༌ལ༌ སྟག༌ཅད༌ ཅོས༌ཏེ༌ ཧ༌གོ༌ཉན༌ན༌ནོག༌,
ཨིན༌ནའང༌ ཐུག༌ཉིད༌ མེད༌ཁན༌གུན༌ནི༌ ཐུག༌ཉིད༌ ཡོད༌ཁན༌གུན༌ནི༌ ཅོ༌ཟོ༌ དང༌ སམ༌ཟོ༌ གུན༌ ཧ༌གོ༌ ཐུབ༌བ༌ མ༌ནོག༌།
16 ཅིའ༌ཟེར༌ན༌
“སུའ༌ གཙོ༌བོའེ༌ ཐུགས༌སམ༌གུན༌ གྱུས༌ ཆེན༌?
སུའི༌ ལག༌ག༌,
ཁོང༌ང༌ ལབ༌ཞ༌ ཏང༌ཅེས༌སི༌ ཤེས༌རབས༌ ཡོད༌?”c
ཨིན༌ནའང༌ ང༌དང༌གུན༌ནི༌ ནང༌ང༌ མ༌ཤི༌ཀའེ༌ ཐུགས༌སམ༌གུན༌ ཡོད༌ པ༌སང༌,
ང༌དང༌གུན༌ལ༌ ཏེ༌གུན༌ ཧ༌གོ༌ཐུབ༌བ༌ནོག༌།