ཀོ༌རིན༌ཐི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌ ཉིས༌པ༌།
ཀོ༌རིན༌ཐི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌སི༌ སྐོར༌།
འི༌ ཆག༌བྲིས༌ དང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ གྱུད༌ཏེ༌,
ང༌དང༌ང༌ འི༌ ཆག༌བྲིས༌པོ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ པ༌འུ༌ལུའི༌ བྲིའ༌ ཛད༌ཁན༌བོ༌ གྱུས༌ ཆའ༌ནོག༌།
འི༌ ཆག༌བྲིས༌པོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 22 ཉེ༌ཁོར༌ལ༌ བྲིའ༌ ཛད༌ཁན༌བོ༌ ང༌དང༌གུན༌ལ༌ ཆོས༌སི༌ ཁས༌པ༌གུན༌ གྱུད༌ཏེ༌ གྱུས༌ ཆའ༌ནོག༌།
འི༌ ཆག༌བྲིས༌པོ༌,
པ༌འུ༌ལུའི༌ མ༌ཀེ༌དོ༌ནི༌ཡཱའེ༌ ནང༌ང༌ ཡོད༌ཏུས༌ བྲིའ༌ ཛད༌ཏེ༌ ཨིན༌ནོག༌།
འི༌ ཆག༌བྲིས༌ དང༌ སྔུན༌མའེ༌ ཆག༌བྲིས༌སི༌ པར༌རི༌ ཏུས༌པོའེ༌ ནང༌ང༌ པ༌འུ༌ལུ༌ ཀོ༌རིན༌ཐི༌ ཆོས༌ཚོགས༌ལ༌ ཐུག༌ག༌ལ༌ སོང༌ཏེ༌ ཨིན༌པིན༌།
ཏེ༌ཏུས༌པོ༌ པ༌འུ༌ལུ༌ དང༌ ཁོང༌གུན༌ནི༌ ཕིའ༌ མ༌ ཀགས༌པོའེ༌ ཏུས༌ཤིག༌ ཨིན༌པིན༌,
ཅིའ༌ཟེར༌ན༌ ཁོང༌ང༌ ཏེ༌ ཆོས༌ཚོགས༌པོའ༌ ཏེ༌ནང༌ང༌ ཡོད༌ཁན༌ནི༌ ནོར༌ཁྲུལ༌ ཚང༌མའེ༌ ཀ༌ནེ༌ སྐྱོང༌གོས༌པིན༌།
སྟིང༌ནེ༌ ཁོང༌ངི༌ ཏི༌ཏུས༌ ཏེ༌རུ༌ ལམ༌ཅུགས༌ ཡང༌ ཁོང༌གུན༌ནི༌ སྐོར༌ལ༌ ཏི༌ཏུས༌སི༌ ཀ༌ནེ༌ ནས༌ཚུལ༌ ཟང༌པོ༌ རིག༌ ཚོར༌།
ཨིན༌ནའང༌ ཏ༌རུང༌ངའང༌ ཏེ༌ ཆོས༌ཚོགས༌སི༌ ནང༌ང༌ ཁ༌ཅིག༌གི༌ པ༌འུ༌ལུའི༌ ཝང༌ཆ༌བོའ༌ གྱབ༌གལ༌ ཅོའད༌པིན༌།
ཏེན༌ན༌བོའེ༌ཕིའ༌ པ༌འུ༌ལུའི༌ འི༌ ཆག༌བྲིས༌པོ༌ བྲིའ༌ ཛདས༌,
འི༌ནང༌ང༌:
1 ཀོ༌རིན༌ཐིའ༌ ལོགས༌ཏེ༌ ཡོང༌ཅེས༌སི༌ ཐབ༌ལྡིངས༌སི༌ ནང༌ང༌ ཅི༌ཕིའ༌ གྱུར༌ཇ༌ ཁྱོངས༌ཁན༌བོ༌ ཧ༌གོ༌ཅུག༌ག༌ ཛད༌ཅེས༌;
2 ཁོང༌གུན༌ནི༌ ཆད༌པ༌ ཅད༌ཁན༌,
ཏད༌པ༌ཅན༌ སྡིག༌པ༌ ཅོ༌ཁན༌བོ༌ ཉམ༌པོ༌ ཐུན༌བྲེལ༌ ཅོ༌ཅེས༌ལ༌ ཞུ༌ཝ༌ ཞུ༌ཅེས༌;
3 ཟུས༌མ༌ ལོབ༌བོན༌གུན༌ནི༌ སྤུང༌གོལ༌ནེ༌ ཁོང༌ངི༌ ཆག༌ལས༌གུན༌ སྐྱོབ༌བ༌ ཛད༌ཅེས༌;
4 ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ ཆོས༌ཚོགས༌གུན༌ནི༌ ཕིའ༌ པེ༌ནེ༌ རོག༌རམ༌མི༌ ཁ༌ཆད༌ ཅོ༌ཁན༌བོ༌ དྲན༌དྲའ༌ གྲུབ༌ཅུག༌ཅེས༌ལ༌ སྤོས༌པ༌ སལ༌ཅེས༌;
5 ཀོ༌རིན༌ཐི༌ ནང༌ང༌ ཡོད༌ཁན༌ནི༌ ཟུས༌མའེ༌ སྐུ༌ཚབས༌གུན༌ནི༌ ཟེར༌ཁན༌ནི༌ གྱབ༌གལ༌ལ༌,
པ༌འུ༌ལུ༌ མ༌ཤི༌ཀའེ༌ སྐུ༌ཚབས༌ ཨིན༌ཁན༌ནི༌ ཝང༌ཆ༌བོ༌ ཆོས༌ཚོགས༌ལ༌ སྟན༌ཅེས༌།