རོམ༌མི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌།
པ༌འུ༌ལུའི༌ ཆོགས༌ནེ༌ ཇུ༌ ཞུས༌།
1:1-7
1
འི༌ ཨི༌གེ༌བོ༌ ང༌ པ༌འུ༌ལུ༌,
མ༌ཤི༌ཀ༌ ཡེ༌ཤུའི༌ ཚེ༌ཡོག༌,
དཀོན༌མཆོག༌གི༌ ལྡམ༌མ༌ ཛད༌ཁན༌ སྐུ༌ཚབས༌,
གའ༌མོའེ༌ ནས༌ཚུལ༌ ཤད༌ད༌ལ༌ ལམ༌ཅུག༌ག༌ ཛད༌ཁན༌ནི༌ ཆོགས༌ནེ༌ ཨིན༌།
2 དཀོན༌མཆོག༌གི༌ འི༌ གའ༌མོའེ༌ ནས༌ཚུལ༌བོ༌ ཏུས༌ མང༌པོའེ༌ སྔུན༌ལ༌ ཁོང༌རང༌ངི༌ ལུང༌སྟོན༌པ༌གུན༌ གྱུད༌ཏེ༌,
ཏམ༌པའེ༌ སུང༌རབས༌སི༌ ནང༌ང༌ ཞལ༌ཆད༌ ཛད༌ཏེ༌ ཨིན༌པིན༌།
3 གའ༌མོའེ༌ ནས༌ཚུལ༌བོ༌ ནི༌ ཁོང༌རང༌ངི༌ སྲས༌སི༌ སྐོར༌ལ༌ ཨིན༌ནོག༌།
ཇིག༌རྟེན༌ནི༌ མི༌ཚེའེ༌ ནང༌ང༌ ཁོང༌,
གྱལ༌པོ༌ དཱ༌བིད༌དི༌ གྱུད༌ནེ༌ སྐྱེའ༌ ཛད༌ཏེ༌
4 ཏམ༌པའེ༌ ཐུག༌ཉིད༌དི༌ ཤེད༌ གྱུད༌ཏེ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ ཁོང༌ དཀོན༌མཆོག༌གི༌ སྲས༌ ཨིན༌ཁན༌བོ༌ སྟན༌ན༌ ཛདས༌།
ཁོང༌ ནི༌ ཡེ༌ཤུ༌ མ༌ཤི༌ཀ༌,
ང༌དང༌ངི༌ གཙོ༌བོ༌ ཨིན༌།
5 མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ ང༌ཞ༌གུན༌ལ༌ སྐུ༌ཚབས༌སི༌ ཚུལ༌ལ༌,
ཀ༌རུང༌ས༌ ཡ༌ཧུ༌དཱ༌པ༌ མན༌ཁན༌གུན༌ལ༌ དཀོན༌མཆོག༌གི༌ ཅོའ༌ ཛད༌ཁན༌གུན༌ ཤད༌ཅེས༌སི༌ ཝང༌ཆ༌ དང༌ རྩི༌ཝ༌ གུན༌ སལ༌ལ༌ ཛདས༌།
ཁོང༌ངི༌ ཏེ༌ཟུག༌ ཅོའ༌ ཛད༌ཅེས༌སི༌ གྱུན༌ཚན༌ ནི༌,
ཡ༌ཧུ༌དཱ༌པ༌ མན༌ཁན༌གུན༌ནི༌ ཁོང༌ངི༌ ཁའ༌ཉན༌ཅེས༌ དང༌ ཏད༌པ༌ ཅོས༌ཏེ༌ ཁོང༌ངི༌ ཚན༌ལ༌ རྩི༌ཝ༌ ཁྱོང༌ཅེས༌པོ༌ ཨིན༌ནོག༌།
6 ཡང༌ ཁྱོ༌ཞ༌གུན༌ནའང༌,
ཡེ༌ཤུ༌ མ༌ཤི༌ཀའེ༌ ཁོང༌རང༌ངི༌ མི༌ ལྡམ༌མ༌ ཛད༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཨིན༌ནོག༌།
7 ངའེ༌,
དཀོན༌མཆོག༌གི༌ ཅེས༌པ༌ ཅོའ༌ ཛད༌ཏེ༌ ཁོང༌ངི༌ མི༌ ཏམ༌པ༌གུན༌ གྱུར༌ཅེས༌ལ༌ བོད༌ད༌ ཛད༌ཁན༌ནི༌ ཁྱོ༌ཞའ༌ རོམ༌པ༌ ཚང༌མ༌ལ༌ བྲིའད༌།
དཀོན༌མཆོག༌ ང༌དང༌གུན༌ནི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ དང༌ སེམས༌དེ༌ ཁྱོ༌ཞ༌གུན༌ལ༌ སལ༌ལ༌ ཛད༌ཤིག༌།
དཀོན༌མཆོག༌གི༌ གའ༌མོའེ༌ ནས༌ཚུལ༌།
1:8-17
8 ཚང༌མའེ༌སང༌ སྔུན༌ལ༌,
ངའེ༌ ཁྱོ༌ཞའ༌ ཚང༌མའེ༌ ཕིའ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌,
ཅིའ༌ཟེར༌ན༌ མ༌ཤི༌ཀའེ༌ ནང༌ང༌ ཡོད༌ཁན༌ནི༌ ཁྱོ༌ཞའེ༌ ཏད༌པའེ༌ སྐོར༌ལ༌ ཇིག༌རྟེན༌ གང༌པོའེ༌ མི༌གུན༌ནི༌ སྤེ༌ར༌ ཏང༌དུག༌།
9 ངའེ༌ མོས༌ལམ༌ ཞུ༌ ཟ༌ནེ༌ ཁྱོ༌ཞ༌གུན༌ ཏུས༌གྱུན༌ ཨིད༌ཏུ༌ ཅོའད༌,
ཏེ༌བོའེ༌ སྤང༌པོ༌ དཀོན༌མཆོག༌ ཨིན༌,
ཁོང༌ངི༌ སྲས༌སི༌ གའ༌མོའེ༌ ནས༌ཚུལ༌བོ༌ ཕེལ༌ཅུག༌ཅེས༌ལ༌ ངའེ༌ ང༌རང༌ངི༌ སྙིང༌ངི༌ ཐིལ༌ནེ༌ ཞབས༌ཏོག༌ ཞུའད༌།
10 ངའེ༌ མོས༌ལམ༌ ཚང༌མའེ༌ ནང༌ང༌,
ཀལ༌ཏེས༌ དཀོན༌མཆོག༌ ཐུག༌གོངས༌སད༌ན༌,
ང༌ ཁྱོ༌ཞ༌གུན༌ ཉམ༌པོ༌ ཐུག༌ཅེས༌ལ༌ སྐབས༌ཤིག༌ སལ༌ ཟེར༌ཨིན༌ ཞུ༌ཝ༌ ཕུལ༌ལད༌།
11 གཙོ༌བོའེ༌ ནང༌ང༌ ཤེད༌ཅན༌ གྱུར༌ཅེས༌ལ༌ རོགས༌ ཅོ༌ཁན༌ནི༌ ཐུག༌ཉིད༌དི༌ ཁྱུད༌རིག༌ ཁྱོ༌ཞ༌གུན༌ལ༌ ཁྱོང༌ཅེས༌སི༌ ཕིའ༌ ངའ༌ ཁྱོ༌ཞའ༌ ཉམ༌པོ༌ ཐུག༌ཅེས༌ལ༌ དོད༌པ༌ སྲན༌ཏྲེ༌ རག༌།
12 ཏེ༌བོའེ༌,
ངའེ༌ ཁྱོ༌ཞ༌གུན༌ལ༌,
ཡང༌ ཁྱོ༌ཞའེ༌ ངའ༌ ཏད༌པའེ༌ ནང༌ང༌ སྤོས༌པ༌ སྐྱེ༌ཅུག༌ ཐུབ༌ཨིན༌།
13 ཅེས༌པའེ༌ སྤུན༌གུན༌,
ངའེ༌ ལན༌ མང༌པོ༌ ཁྱོ༌ཞ༌གུན༌ལ༌ ཐུག༌ཅེས༌སི༌ ཐབས༌ ཅོས༌པིན༌,
ཨིན༌ནའང༌ དག༌ས༌ ཚོག༌པ༌ སྒགས༌ཏེ༌ བོར༌ཁན༌བོ༌ ཁྱོ༌ཞ༌གུན༌ལ༌ གྱུས༌ ཆ༌གོས༌ སམ༌མ༌རག༌།
ངའ༌ ཁྱོ༌ཞ༌གུན༌ནི༌ ཕྲོའ༌ ལས༌ ཅོ༌ཅེས༌ དང༌ ཐུག༌ཉིད༌དི༌ བྲས༌བུ༌ གུན༌ ལྟ༌ཅེས༌སི༌ དོད༌པ༌ རག༌,
ཀ༌ཟུག༌ ངའེ༌ ཞན༌ཡང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཐོང༌།
14 གིརིས༌པའེ༌ ལབ༌ཞའེ༌ ནང༌ང༌ ཡོན༌ཏན༌ ཡོད༌ཁན༌ དང༌ མེད༌ཁན༌ ཉིས༌ཀོའ༌ ཡ༌ ཤེས༌རབས༌ཅན༌ དང༌ སམ༌བ༌ མེད༌ཁན༌ ཉིས༌ཀོའ༌,
གའ༌མོའེ༌ ནས༌ཚུལ༌ ཤད༌ཅེས༌སི༌ ཁག༌ ངའ༌ ཕོག༌ཏེ༌ ཨིན༌
15 པ༌སང༌,
ཁྱོ༌ཞའ༌ རོམ༌མི༌ གྱལ༌སའེ༌ ནང༌ང༌ ཡོད༌ཁན༌གུན༌ལའང༌ གའ༌མོའེ༌ ནས༌ཚུལ༌ ཤད༌ཅེས༌ལ༌ ངའ༌ རིངས༌ས༌རག༌།
16 འི༌ གའ༌མོའེ༌ ནས༌ཚུལ༌བོའ༌ ངའ༌ ཁྲེལ༌ལ༌ མེ༌རག༌,
ཅིའ༌ཟེར༌ན༌ འི༌བོ༌ ནི༌ ཏད༌པ༌ཅན༌ནི༌ མི༌ཚང༌མ༌ སྐྱོབ༌ཐུབ༌ཅེས༌སི༌ དཀོན༌མཆོག༌གི༌ སྟོབས༌པོ༌ ཨིན༌ནོག༌,
ཏང༌པོ༌ ཡ༌ཧུ༌དཱ༌པ༌གུན༌ལ༌ ཏེ༌ནེ༌ ཡ༌ཧུ༌དཱ༌པ༌ མན༌ཁན༌གུན༌ལ༌།
17 འི༌ གའ༌མོའེ༌ ནས༌ཚུལ༌བོའེ༌ ང༌དང༌ དཀོན༌མཆོག༌གི༌ སྐུན༌དུན༌ལ༌ ཀ༌ཟུག༌གི༌ ཀྲང༌པོ༌ གྱུར༌ཅེས༌པོ༌ སྟན༌ན༌ནོག༌,
ཀ༌བོ༌ གོ༌མ༌ནེ༌ ཇུག༌མ༌ ཚོག༌པ༌ ཏད༌པ༌ གྱུད༌ཏེ༌ གྲུབ༌བ༌ནོག༌།
ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཡོད༌ཏེ༌ ཨིན༌ནོག༌,
“ཏད༌པ༌ གྱུད༌ཏེ༌ མི༌ ཀྲང༌པོ༌ཞིག༌ག༌ མི༌ཚེ༌ ཐོབ༌བ༌ནོག༌།”a
སྡིག༌པའེ༌ཀ༌ དཀོན༌མཆོག༌གི༌ ཐུགས༌སྲོ༌།
1:18-32
18 ཨིན༌ནའང༌ ཁོ༌རང༌གུན༌ནི༌ ངན༌པའེ༌ ལས༌གུན༌ནི༌ གྱབ༌བ༌,
དེན༌བ༌བོ༌ ཀབས༌ཏེ༌ བོར༌ཁན༌ནི༌ མི༌,
ངན༌པ༌ དང༌ སྡིག༌ཅན༌ ཚང༌མའེ༌ གྱབ༌གལ༌ལ༌,
དཀོན༌མཆོག༌གི༌ ཐུགས༌སྲོ༌ ནམ༌ཁའ༌ནེ༌ སྟན༌ན༌ ཛད༌ཨིན༌ ཨིན༌ནོག༌།
19 ཁོང༌གུན༌ལ༌ དཀོན༌མཆོག༌གི༌ དེན༌བའེ༌ སྐོར༌ལ༌ གྱུས༌ཡོད༌ཏེ༌ ཨིན༌ནོག༌,
ཅིའ༌ཟེར༌ན༌ ཁོང༌ངི༌ ཏེ༌གུན༌ ཁོང༌གུན༌ལ༌ སལ༌པོ༌ ཛད༌ཏེ༌ སྟན༌ན༌ ཛད༌ཏེ༌ ཨིན༌པིན༌།
20 ཇིག༌རྟེན༌ ཛད༌པ༌ནེ༌ ཕར༌ལ༌ མི༌གུན༌ནི༌,
དཀོན༌མཆོག༌གི༌ ཛད༌ཁན༌ ཚང༌མ༌ གྱུད༌ཏེ༌,
སལ༌པོ༌ ཅོས༌ཏེ༌,
མ༌ཐོང༌ཁན༌ནི༌ ཁོང༌ངི༌ ཁྱུད༌གུན༌ ཐོངས༌ཏེ༌ ཨིན༌ནོག༌,
ཀ༌གུན༌ ཁོང༌ངི༌ ཐའ༌མེད༌པའེ༌ ཝང༌ དང༌ དཀོན༌མཆོག༌གི༌ ཤིས༌པོ༌ ཨིན༌ནོག༌།
ཏེན༌ན༌བོའེ༌ཕིའ༌ ཁོང༌གུན༌ནི༌ ཅའང༌ སྐྱོན༌ ཅོ༌མི༌ཉན༌།
21 ཁོང༌གུན༌ནི༌ དཀོན༌མཆོག༌ ཤེས༌ཨིན༌ ཡོད༌ཏེའང༌,
ཁོང༌ང༌ འོས༌པའེ༌ རྩི༌ཝ༌ མ༌ཏངས༌ ཡ༌ ཐུག༌རྗེ༌ཆེའང༌ མ༌ཞུས༌།
ཨིན༌ནའང༌ དཀོན༌མཆོག༌ ཀ༌ཟུག༌ཤིག༌ ཨིན༌,
ཏེ༌ སྐོར༌ལ༌ སམ༌བ༌ མེད༌ཁན༌གུན༌ ཙོགས༌ལ༌ སམ༌བ༌ ཏང༌ཅེས༌ གོ༌ཟུགས༌,
ཀ༌བོའེ༌ ཞས༌ཏེ༌ ཁོང༌གུན༌ ལྡད༌པ༌ མེད༌ཁན༌ ཙོགས༌ གྱུར༌ཏེ༌ ལག༌མོ༌ སམ༌བ༌ ཏང༌ མ༌ཉན༌།
22 ཁོང༌གུན༌ནི༌ ཁོ༌རང༌གུན༌ སམ༌བ༌ཅན༌ ཨིན༌ ཟེར༌ནའང༌,
ཁོང༌གུན༌ བུང༌བུ༌ ཙོགས༌ གྱུར༌ཏེ༌ ཨིན༌ནོག༌།
23 ཡང༌ ཁོང༌གུན༌ནི༌ ཟིར༌རྗིད༌ཅན༌ དང༌ ཏུས༌གྱུན༌ སོན༌པོ༌ ཨིན༌ཁན༌ནི༌ དཀོན༌མཆོག༌ག༌ མ༌ཅོལ༌ལ༌ ཤི༌ཅེས༌ཅན༌ནི༌ མི༌,
ཡ༌ ཅི༌པ༌,
ཡ༌ སེམས༌ཅན༌,
ཡ༌ རྒལ༌ཅིག༌གི༌ རིགས༌ གུན༌ནི༌ ཟོས༌ཏེ༌ ནང༌ང༌ ཅོ༌ཁན༌ནི༌ སྐུན༌དྲའ༌ ཅོལ༌ལ༌ནོག༌།
24 ཏེ༌བོའེ༌ཕིའ༌ དཀོན༌མཆོག༌གི༌ ཏེ༌ མི༌གུན༌ ཁོ༌རང༌གུན༌ནི༌ སྡིག༌པའེ༌ དོད༌པ༌ ནང༌ཞིན༌ ཅོ༌ཅེས༌ལ༌ ཕང༌ང༌ ཛདས༌།
ཏེ༌བོའེ༌ ཞས༌ཏེ༌ ཁོང༌གུན༌ནི༌ ཁོ༌རང༌ ཅིག༌ དང༌ ཅིག༌གི༌ ཟུགས༌པོ༌ ཉམ༌པོ༌ ཁམ༌ལོག༌ དང༌ ཚི༌ཏུ༌ ལས༌གུན༌ ཅོས༌།
25 ཁོང༌གུན༌ནི༌ དཀོན༌མཆོག༌གི༌ དེན༌བའེ༌ ཚབས༌ལ༌ ཟུས༌མའེ༌ ལབ༌ཞ༌གུན༌ ཀོལས༌,
ཡང༌ ཇིག༌རྟེན༌ ཛད༌ཁན༌ དཀོན༌མཆོག༌ ཀ༌བོའ༌ ཏུས༌གྱུན༌ སྟོད༌པའེ༌ འོས༌པ༌ ཨིན༌,
ཨ༌མེན༌།
ཁོང༌ང༌ མ༌ཅོལ༌ལ༌ ཁོང༌ངི༌ ཚབས༌ལ༌ ཁོང༌ངི༌ ཛད༌ཁན༌གུན༌ལ༌ ཅོལ༌ཅེས༌ དང༌ ཞབས༌ཏོག༌ ཞུས༌།
26 ཏེན༌ན༌བོའེ༌ཕིའ༌ དཀོན༌མཆོག༌གི༌ ཁོང༌གུན༌ ཁོ༌རང༌གུན༌ནི༌ ཁྲེལ༌མེད༌དི༌ དོད༌པ༌གུན༌ ཅོ༌ཅེས༌ལ༌ ཕང༌ང༌ ཛདས༌།
བུ༌མོ༌གུན༌ནིའང༌ རང༌ཞིན༌ནི༌ ལུས༌བྲེལ༌ལི༌ ཚབས༌ལ༌ ཁོ༌རང༌ ཅིག༌ དང༌ ཅིག༌གི༌ པར༌ལ༌ ལུས༌བྲེལ༌ བོརས༌།
27 ཏེན༌ན༌ ཙོགས༌ལ༌ བུ༌ཚ༌གུན༌ནིའང༌ རང༌ཞིན༌ནི༌ ལུས༌བྲེལ༌བོ༌ ཕངས༌ཏེ༌,
ཁོ༌རང༌ བུ༌ཚ༌གུན༌ནི༌ པར༌ལ༌ ལུས༌བྲེལ༌ལི༌ དོད༌པ༌ སྲན༌ཏྲེ༌ ཅོས༌།
ཡང༌ བུ༌ཚ༌གུན༌ནི༌ ཞན༌ བུ༌ཚའ༌ ཉམ༌པོ༌ ཁྲེལ༌མེད༌དི༌ ལས༌ ཅོས༌པ༌,
ཁོང༌གུན༌ལ༌ ཁོ༌རང༌གུན༌ནི༌ ཟུགས༌པའེ༌ ནང༌ང༌ ཏེ༌ ལས༌ངན༌བོའེ༌ ཆད༌པ༌ ཕོག༌།
28 ཁོང༌གུན༌ནི༌ དཀོན༌མཆོག༌ ཤེས༌གོ༌ཤེས༌པོ༌ ནི༌ ཕན༌མི༌ཐོགས༌ཤིག༌ ཨིན༌ སམ༌ པ༌སང༌,
དཀོན༌མཆོག༌གི༌ ཁོང༌གུན༌ སམ༌བ༌ མེད༌ཁན༌གུན༌ ཙོགས༌ལ༌ སམ༌བ༌ ཏང༌ཅེས༌ལ༌ ཕང༌ང༌ ཛདས༌།
ཏེ༌ཟུག༌ ཅོའ༌ ཛད༌ཅེས༌པོའེ༌,
ཁོང༌གུན༌ནི༌ ཅོ༌ མི༌གོ༌ཤེས༌སི༌ ལས༌ངན༌གུན༌ ཅོས༌།
29 ཁོང༌གུན༌ནི༌ མི༌ཚེ༌བོ༌ ངན༌པ༌ ཚང༌མའེ༌ གངས༌,
སྤེར༌ན༌ སྡིག༌པ༌,
ནབས༌,
ནཕ༌རད༌,
སེམས༌སི༌ ནང༌ང༌ ཚིག༌ཅེས༌,
མི༌སད༌,
ཛིང༌མོ༌ ཏང༌ཅེས༌,
གོབ༌སྐོར༌ཅེས༌,
མིང༌ནའང༌ ཞན༌མ༌གུན༌ལ༌ སེམས༌སི༌ ནང༌ང༌ ཕོག༌ཅུག༌ཅེས༌ དང༌ སྤེར༌མེན༌ ཏང༌ཅེས༌།
30 ཏེ༌ མི༌གུན༌ནི༌ ཞན༌མ༌གུན༌ནི༌ སྐོར༌ལ༌ སྤེ༌ར༌ རྩོག༌པོ༌ ཟེར༌ཁན༌,
དཀོན༌མཆོག༌ག༌ ནཕ༌རད༌ ཅོ༌ཁན༌,
ཞན༌ལ༌ རྩི༌ཝ༌ མ༌ཅོ༌ཁན༌,
ཕོ༌སོ༌ཅན༌ དང༌ རང༌སྟོད༌ ཏང༌ཁན༌གུན༌ ཨིན༌ནོག༌།
ཏེ༌གུན༌ སྡིག༌པ༌ ཅོ༌ཅེས༌སི༌ ལམ༌ སོ༌མའེ༌ སྐོར༌ལ༌ སམ༌བ༌ ཏང༌ཁན༌ དང༌ ཁོ༌རང༌གུན༌ནི༌ ཕ༌མའེ༌ ཁའ༌ མ༌ཉན༌ཁན༌,
31 ཧ༌གོ༌ཉིན༌ མེད༌ཁན༌,
ཁ༌ཆད༌ ཅག༌ཁན༌,
ཅམས༌པ༌ དང༌ སྙིང༌རྗེ༌ མེད༌ཁན༌ གུན༌ ཨིན༌ནོག༌།
32 དཀོན༌མཆོག༌གི༌ བཀའ༌རྒྱ༌ ནང༌ཞིན༌ ཏེ༌ཟུག༌ ལས༌ ཅོ༌ཁན༌གུན༌ལ༌ ཤི༌གོ༌ཤེས༌ འོས༌པ༌ ཨིན༌ཁན༌བོ༌ གྱུས༌ཡོད༌ཏེའང༌,
ཏེན༌ན༌ ལས༌ངན༌གུན༌ ཅོ༌ཅེས༌ མ༌ཚད༌,
ཞན༌མ༌ ཏེ༌ཙོགས༌ ཅོ༌ཁན༌གུན༌ལ༌ སྟོད༌པ༌ ཏང༌དུག༌།