མ༌ཤི༌ཀའེ༌ སྐུ༌ཚབས༌གུན༌ནི༌ ཆག༌ལས༌།
ཏམ༌པའེ༌ ཐུག༌ཉིད༌དི༌ ཞལ༌ཆད༌།
1:1-5
1
1-2 ཅེས༌པའེ༌ ཐེའུ༌ཕེ༌ལུས༌ ངའེ༌ བྲིས༌ཁན༌ནི༌ སྤེ༌ཆ༌ ཏང༌པོའེ༌ ནང༌ང༌,
གཙོ༌བོ༌ ཡེ༌ཤུ༌ དཀོན༌མཆོག༌གི༌ ནམ༌ཁའ༌ ལེན༌ལེན༌ ཚོག༌པ༌ ཁོང༌ངི༌ ལབ༌ཞ༌ སལ༌ཁན༌ དང༌ ཆག༌ལས༌ ཛད༌ཁན༌ ཚང༌མའེ༌ སྐོར༌ལ༌ བྲིས༌ཏེ༌ ཡོད༌།
ནམ༌ཁའ༌ ལེན༌ན༌ ཛད༌དི༌ སང༌ སྔུན༌ལ༌,
ཡེ༌ཤུའི༌ ཁོང༌རང༌ངི༌ ལྡམ༌མ༌ ཛད༌ཁན༌ནི༌ སྐུ༌ཚབས༌གུན༌ལ༌ ཏམ༌པའེ༌ ཐུག༌ཉིད༌ གྱུད༌ཏེ༌ ལབ༌ཞ༌ སལ༌ཏེ༌ ཨིན༌པིན༌།
3 རྡུག༌ངལ༌ ནམས༌ཏེ༌ སྟིང༌ནེ༌ ཡེ༌ཤུའི༌ ཁོང༌ སོན༌ཏེའ༌ ཞངས༌ཁན༌ནི༌ སྟགས༌ མང༌པོ༌ ཁོང༌གུན༌ལ༌ སྟན༌ན༌ ཛད༌ཏེ༌,
ཞག༌ 40 ཁོང༌གུན༌ལ༌ ཁོང༌རང༌ སྔོན༌ ཅུག༌ག༌ ཛདས༌ ཡང༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤད༌ད༌ ཛདས༌།
4 ལན༌ཅིག༌ ལོབ༌ཕྲུགས༌གུན༌ ཉམ༌པོ༌ དོན༌ཏང༌ དོན༌ནི༌ ཏུས༌ ཡེ༌ཤུའི༌ མོལས༌,
“ངའེ༌ ཁྱོ༌ཞ༌གུན༌ལ༌ ཟེར༌ཁན༌ ནང༌ཞིན༌,
ངའེ༌ ཡབ༌བི༌ ཞལ༌ཆད༌ ཛད༌ཁན༌བོ༌ ཐོབ༌ཐོབ༌ ཚག༌པ༌ ཁྱོ༌ཞའ༌ ཡེ༌རུ༌ཤ༌ལེམ༌ནེ༌ ཕི༌ལོག༌ག༌ མ༌ཆ༌།
5 ཡོ༌ཧཱ༌ནན༌ནི༌ མི༌གུན༌ལ༌ ཆུའི༌ཁྲུས༌ ཏངས༌ཏེ༌ ཨིན༌པིན༌,
ཨིན༌ནའང༌ ཞག༌ ཁ༌ཅིག༌གི༌ ནང༌ང༌ ཁྱོ༌ཞ༌གུན༌ལ༌ ཏམ༌པའེ༌ ཐུག༌ཉིད༌དི༌ ཁྲུས༌ཐོབ༌ཨིན༌།”
དཀོན༌མཆོག༌གི༌ ཡེ༌ཤུ༌ ནམ༌ཁའ༌ ལེན༌ན༌ ཛདས༌།
1:6-11
6 སྐུ༌ཚབས༌གུན༌ ཡེ༌ཤུ༌ ཉམ༌པོ༌ ཛོམས༌ཏེ༌ ཡོད༌ ཟ༌ནེ༌ ཁོང༌གུན༌ནི༌ ཟེརས༌,
“གཙོ༌བོ༌ལེ༌,
ཉེ༌རང༌ངི༌ ཨིས༌ར༌ཨེལ༌པ༌གུན༌ལ༌ རོམ༌མི༌ ཝང༌ནེ༌ རང༌ཝང༌ སལ༌ཏེ༌ ང༌དང༌ངི༌ གྱལ༌སྲིད༌པོ༌ ལོགས༌ཏེ༌ ཁྱོང༌ང༌ ཛད༌ཅེས༌སི༌ ཏུས༌པོ༌ ཨིན༌ན༌?”
7 ཡེ༌ཤུའི༌ ཁོང༌གུན༌ལ༌ མོལས༌,
“ཏེ༌ ཏུས༌སྐབས༌ དང༌ ནས༌ལུག༌ གུན༌ ལྡམ༌མ༌ ཛད༌ཅེས༌སི༌ ཝང༌བོ༌ ཡབ༌ ཅིག༌པོའ༌ ཡོད༌ཏེ༌ ཨིན༌ནོག༌,
ཡང༌ ཁྱོ༌ཞའ༌ ཏེ༌གུན༌ ཤེས༌གོས༌ མེད༌པ༌ ཨིན༌ནོག༌།
8 ཏམ༌པའེ༌ ཐུག༌ཉིད༌ ཁྱོ༌ཞའེ༌ཀ༌ བབས༌སི༌ ཏུས༌,
ཁྱོ༌ཞ༌གུན༌ལ༌ སྟོབས༌ ཐོབ༌ཏེ༌ ཁྱོ༌ཞ༌གུན༌ནི༌ ཡེ༌རུ༌ཤ༌ལེམ༌,
ཡ༌ཧུ༌དཱ༌ ཡུལ༌ གང༌པོ༌,
ས༌མར༌རི༌ཡཱ༌ ཡང༌ ཇིག༌རྟེན༌ གང༌པོའེ༌ ནང༌ང༌ ངའེ༌ སྤང༌པོ༌ ཏང༌ཨིན༌།”
9 ཏེ༌ ཚང༌མ༌ མོལ༌ཏེ༌ སྟིང༌ནེ༌ ཁོང༌གུན༌ནི༌ མིག༌གི༌ དུན༌ལ༌ གཙོ༌བོ༌ ཡེ༌ཤུ༌ ནམ༌ཁའ༌ ཁྱེར༌ར༌ ཛད༌ཏེ༌ སྲིན༌ནི༌ ཀབ༌བ༌ ཛདས༌ ཡང༌ ཁོང༌གུན༌ནི༌ ཁོང༌ ཇལ༌ མ༌ཐུབ༌།
10 ཁོང༌གུན༌ནི༌ ཡེ༌ཤུ༌ ནམ༌ཁའ༌ ལེན༌ན༌ ཛད༌ཁན༌བོའ༌ ལྟེན༌ དུགས༌ཏེ༌ ཡོད༌ ཟ༌ནེ༌,
ཧུན༌མེད༌ལ༌ མི༌ ཀོས༌ ཀར༌པོ༌ གོན༌ཁན༌ ཉིས༌ ཁོང༌གུན༌ནི༌ དུན༌ལ༌ ཇལ༌ཏེ༌
11 མོལས༌,
“གཱ༌ལིལ༌ལི༌པ༌གུན༌,
ཅི༌ཕིའ༌ ནམ༌ཁའ༌ ལྟས༌ཏེ༌ དུག༌གད༌?
ཀ༌ཟུག༌ ཁྱོ༌ཞའེ༌ ཡེ༌ཤུ༌ ནམ༌ཁའ༌ ལེན༌ན༌ ཛད༌ཁན༌བོ༌ ཐོང༌,
ཏེན༌ན༌ ཙོགས༌ལ༌ ཁོང༌ ཡང༌སྐྱར༌ ལོགས༌ཏེ༌ སྐྱོད༌ཨིན༌།”
ཡུ༌དཱའེ༌ ཚབས༌ལ༌ སྐུ༌ཚབས༌ སྐོའ༌ ཛདས༌།
1:12-26
12 ཏེ༌ སྟིང༌ནེ༌ ཁོང༌གུན༌ ཨོ༌ལིཝ༌ཝི༌ རི༌a ཀ༌ནེ༌ བབས༌ཏེ༌ ཡེ༌རུ༌ཤ༌ལེམ༌མ༌ ལོགས༌ཏེ༌ སྐྱོདས༌,
ཀ༌བོ༌ གྱལ༌ས༌ནེ༌ ཀི༌ལོ༌མི༌ཀྲར༌ ཅིག༌ ཐག༌རིང༌ང༌ ཡོད༌པིན༌།
13 ཏེ༌རུ༌ ལེབ༌བ༌ཅིག༌,
སྐུ༌ཚབས༌གུན༌ སྔུན༌ལ༌ དུགས༌ཏེ༌ ཡོད༌ཁན༌ནི༌ ཁང༌པའེ༌ སྟང༌ཐོག༌ག༌ སོང༌།
ཁོང༌གུན༌ པི༌ཏྲར༌,
ཡོ༌ཧཱ༌ནན༌,
ཡ༌ཀོབ༌,
ཨེན༌གྲིའུ༌,
ཕི༌ལིབ༌,
ཐོ༌མཱས༌,
བར༌ཐོལ༌མཱ༌,
མད༌ཐཱ༌,
ཨལ༌ཕི༌འུས༌སི༌ བུ༌ཚའ༌ ཡ༌ཀོབ༌,
ཤི༌མོན༌ ཡུལ༌དད༌ཅན༌ དང༌ ཡ༌ཀོབ༌བི༌ བུ༌ཚའ༌ ཡུ༌དཱ༌ གུན༌ ཨིན༌པིན༌།
14 ཏེ༌ སྐུ༌ཚབས༌ ཚང༌མ༌ སེམས༌ ཅིག༌ སོང༌ཏེ༌ ཏུས༌གྱུན༌ མོས༌ལམ༌ ཞུའ༌ལ༌ ཛོམ༌མད༌པིན༌,
ཞན༌ བུ༌མོ༌ ཁ༌ཅིག༌,
ཡེ༌ཤུའི༌ ཨ༌མ༌ མིར༌ཡམ༌ དང༌,
ཡེ༌ཤུའི༌ ནོ༌གུན༌ནའང༌,
ཁོང༌གུན༌ ཉམ༌པོ༌ ཛོམ༌མད༌པིན༌།
15 ལན༌ ཅིག༌ ནམ༌ ཏད༌པ༌ཅན༌ནི༌ མི༌ 120 ཛོམས༌ཏེ༌ ཡོད༌དི༌ ཏུས༌,
པི༌ཏྲར༌ ལངས༌ཏེ༌ མོལས༌,
16 “སྤུན༌གུན༌ ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌ ནང༌ཞིན༌,
ཏམ༌པའེ༌ ཐུག༌ཉིད༌དི༌ གྱལ༌པོ༌ དཱ༌བིད༌ གྱུད༌ཏེ༌ ཡུ༌དཱའེ༌ སྐོར༌ལ༌ ལུང༌སྟན༌ ཤད༌ཁན༌གུན༌ གྲུབ༌གོས༌ཏེ༌ ཨིན༌ནོག༌,
ཀ༌བོ༌ ཡུ༌དཱ༌ ནི༌ ཡེ༌ཤུ༌ ཟུམ༌ཁན༌གུན༌ནི༌ ལམ༌སྟན༌པ༌ གྱུར༌།
17 ཁོ༌ ང༌ཞའེ༌ ཕྲོ༌པ༌ ཡང༌ ཁོའེ༌ ང༌ཞའ༌ ཉམ༌པོ༌ ཞབས༌ཏོག༌ ཞུས༌ཏེ༌ ཨིན༌པིན༌།”
18 ༼ཨིན༌ནའང༌ ཁོའེ༌ ལས༌ངན༌བོའེ༌ རིན༌བོའ༌ ཞིང༌ཞིག༌ ཉོས༌,
ཤི༌ཏེ༌ སའེ༌ཀ༌ བུད༌,
ཁོའེ༌ གྲོད༌པ༌ ཆད༌ཏེ༌ ནང༌ཆ༌ ཚང༌མ༌ བིང༌།
19 ཡང༌ ཏེ༌ཟུག༌ ཇུང༌ཁན༌བོ༌ ཡེ༌རུ༌ཤ༌ལེམ༌པ༌ ཚང༌མའེ༌ ཚོར༌,
ཏེ༌ ཞིང༌བོའེ༌ མིང༌ང༌ ཨིབ༌རི༌པའེ༌ སྐད༌དི༌ ནང༌ང༌ ཨ༌ཀེལ༌ད༌མ༌ ཏགས༌,
ཀ༌བོའེ༌ ཏོན༌བོ༌ ཁྲག༌གི༌ ཞིང༌ ཨིན༌ནོག༌།༽
20 པི༌ཏྲར༌རི༌ མོལས༌,
“སུང༌གུར༌རི༌ སྤེ༌ཆའེ༌ ནང༌ང༌ ‘ཁོའེ༌ ཁང༌པའེ༌ ནང༌ང༌ སུའང༌ མ༌དུག༌ག༌ ནང༌སྟོང༌ ཆ༌ཤིག༌b།’
སུང༌གུར༌རི༌ ཞན༌ཡང༌ ནས༌ས༌ཞིག༌གི༌ཀ༌,
‘ཁོའེ༌ ཝང༌སྲུལ༌ཅེས༌སི༌ ཀོ༌ས༌ ཞན༌ཞིག༌གི༌ ཁྱེར༌ཨིན༌’c བྲིའ༌ ཛད༌ཏེ༌ ཨིན༌ནོག༌།”
21-22 “ཏེ༌བོའེ༌ཕིའ༌ གཙོ༌བོ༌ ཡེ༌ཤུ༌ ང༌དང༌གུན༌ ཉམ༌པོ༌ ཡོད༌ ཟ༌ནེ༌ ༼ཡོ༌ཧཱ༌ནན༌ནི༌ ཡེ༌ཤུའ༌ ཁྲུས༌སལ༌ལི༌ ཏུས༌ནེ༌ ཁོང༌ ནམ༌ཁའ༌ ལེན༌ལེན༌ ཚག༌པ༌༽ ཏུས༌གྱུན༌ ང༌དང༌ ཉམ༌པོ༌ ཡོད༌ཁན༌གུན༌ནི༌ ཕྲོ༌ནེ༌ ང༌དང༌ངི༌,
ཡུ༌དཱའེ༌ ཚབས༌ཤིག༌ ལྡམ༌གོས༌།
སུ༌ཞིག༌ ལྡམ༌ནའང༌ ཁོ༌ ང༌དང༌ ཉམ༌པོ༌ ཡེ༌ཤུ༌ སོན༌ཏེའ༌ ཞངས༌ཁན༌ནི༌ སྤང༌པོ༌ གྱུར༌གོས༌།”
23 ཏེ༌ནེ༌ ཁོང༌གུན༌ནི༌ མི༌ ཉིས༌སི༌ མིང༌ ལྡམ༌མ༌ལ༌ ཁྱོངས༌,
མིང༌ ཅིག༌པོ༌ ཡོ༌སེབ༌ ཡ༌ བཱར༌ས༌བས༌ ༼ཁོའ༌ ཡུས༌ཏུས༌སའང༌ ཟེར༌རད༌པིན༌༽ ཡང༌ མིང༌ ཅིག༌པོ༌ མད༌ཐི༌ཡས༌ ཨིན༌པིན༌།
24-25 ཏེ༌ནེ༌ ཁོང༌གུན༌ནི༌ མོས༌ལམ༌ ཞུས༌,
“ཀྱེ༌ གཙོ༌བོ༌,
ཉེ༌རང༌ངི༌ མི༌ཚང༌མའེ༌ སྙིང༌ ཁྱེན༌ན༌ནོག༌།
སྐུ༌ཚབས༌སི༌ ལས༌ ཕངས༌ཏེ༌ འོས༌པ༌ ཨིན༌ཁན༌ནི༌ ཉལ༌ཝའེ༌ ནང༌ང༌ སོང༌ཁན༌ནི༌ ཡུ༌དཱའེ༌ ཚབས༌ལ༌,
ཡེ༌ཤུའི༌ སྐུ༌ཚབས༌ དང༌ ཞབས༌ཏོག༌ ཞུ༌ཅེས༌སི༌ ཕིའ༌ འི༌ ཉིས༌ཀོའེ༌ ནང༌ནེ༌ ཉེ༌རང༌ངི༌ ལྡམ༌མ༌ ཛད༌ཁན༌བོ༌ ང༌ཞའ༌ སྟན༌ན༌ ཛད༌།”
26 ཆོ༌ལོ༌ རིལ༌ཏེ༌ གྱན༌ གྱབས༌པ༌ མད༌ཐི༌ཡས༌སི༌ མིང༌ བིང༌,
ཡང༌ ཁོ༌ སྐུ༌ཚབས༌ རྕུག༌ཤིག༌གི༌ ཕྲོའ༌ སྲེས༌།