ས༌མུའེལ༌ལི༌ ས༌འུལ༌ལ༌ ཁྲུས༌ཏངས༌།
9:1 ནེ༌ 10:8
9
བེན༌ཡཱ༌མིན༌ནི༌ སྡེ༌ནེ༌ ཀིཤ༌ ཟེར༌ཁན༌ མི༌ ཆུག༌པོ༌ དང༌ མ༌ རྩི༌ཝ༌ཅན༌ ཞིག༌ ཡོད༌པིན༌,
ཁོ༌ ཨ༌བི༌འེལ༌ལི༌ བུ༌ཚ༌,
ཨ༌བི༌འེལ༌ ཟེ༌རོར༌རི༌ བུ༌ཚ༌,
ཟེ༌རོར༌ བེ༌ཀོ༌རད༌དི༌ བུ༌ཚ༌ ཡང༌ བེ༌ཀོ༌རད༌ ཨ༌པི༌ཡའེ༌ བུ༌ཚ༌ ཨིན༌པིན༌།
2 ཀིཤ༌ཤི༌ བུ༌ཚ༌ ས༌འུལ༌ ཨིས༌ར༌ཨེལ༌ གང༌པོའེ༌ ནང༌ང༌ ཚང༌མའེ༌སང༌ ཛེས༌པོ༌ ཡོད༌པིན༌,
ཁོ༌ ཞན༌ ཚང༌མའེ༌ སང༌ གོའེ༌ ཐོན༌ཞིག༌ རིང༌ང༌ ཡང༌ སྒོབ༌ཞག༌ཅན༌ ཡོད༌པིན༌།
3 ཏ༌ ས༌འུལ༌ལི༌ ཨ༌བ༌ ཀིཤ༌ཤི༌ བུང༌བུ༌གུན༌ སྟོར༌ ཡང༌ ཁོའེ༌ ས༌འུལ༌ལ༌ ཟེརས༌,
“ཁྱོ༌རང༌ ཡོག༌པོ༌ ཞིག༌ ཁྲིད༌ཏེ༌ བུང༌བུ༌གུན༌ ཙལ༌ལ༌ སོང༌།”
4 ཏེ༌ནེ༌ ས༌འུལ༌ དང༌ ཡོག༌པོའེ༌ ཨེཕ༌ར༌ཡིམ༌མི༌ རི༌ཡུལ༌ གང༌པོའེ༌ ནང༌ང༌ ཙལ༌ཨིན༌ ཤ༌ལི༌ཤའི༌ ས༌ཆ༌ ལེབ༌ ཨིན༌ནའང༌ བུང༌བུ༌གུན༌ མ༌ཐོབ༌།
ཏེ༌ནེ༌ ཁོང༌གུན༌ནི༌ ཤའ༌ལིམ༌ དང༌ བེན༌ཡཱ༌མིན༌ནི༌ ས༌ཆ༌ གང༌པོའེ༌ ནང༌ང༌ ཙལས༌ ཨིན༌ནའང༌ བུང༌བུ༌གུན༌ མ༌ཐོང༌།
5 ཁོང༌གུན༌ ཟུཕ༌ གྱལ༌ཁག༌གི༌ ནང༌ང༌ ལེབ༌བ༌ཅིག༌ ས༌འུལ༌ལི༌ ཡོག༌པོའ༌ ཟེརས༌,
“ཡོང༌ ཁང༌པ༌ ལོགས༌ཏེ༌ ཆེན༌,
ཏེ༌མན༌ན༌ ངའེ༌ ཨ༌བའེ༌ བུང༌བུའི༌ ཚབས༌ལ༌ ང༌དང༌གུན༌ནི༌ ཕིའ༌ ཚེར༌ཁ༌ ཅོ༌ སྲིད༌ཅེས༌ ཨིན༌ནོག༌།”
6 ཨིན༌ནའང༌ ཡོག༌པོའེ༌ ཟེརས༌,
“འི༌ གྲོང༌ཁྱེར༌རི༌ ནང༌ང༌ དཀོན༌མཆོག༌གི༌ མི༌ཞིག༌ ཡོད༌ཁན༌བོ༌ ངའ༌ ཨིད༌ཏུ༌ ཡོངས༌,
མི༌ ཚང༌མའེ༌ ཁོང༌ང༌ མ༌སྲན༌ཏྲེ༌ རྩི༌ཝ༌ ཅོའ༌ནོག༌ ཅིའ༌ཟེར༌ན༌ ཁོང༌ངི༌ མོལ༌ཁན༌ ཚང༌མ༌ དེན༌བ༌ གྲུབ༌དུག༌།
ཁོང༌ ཡོད༌ས༌ ཆེན༌ ཅི༌གྱུས༌ ཁོང༌ངི༌ ང༌དང༌ང༌ བུང༌བུ༌གུན༌ ཙལ༌ཅེས༌ལ༌ ལམ༌སྟན༌ ཛད༌ སྲིད༌ཅེས༌ ཨིན༌ནོག༌།”
7 ས༌འུལ༌ལི༌ ཟེརས༌,
“ཟའ༌ཅེས༌ ཚང༌མ༌ ཚར༌,
ཁོང༌ ཡོད༌ས༌ ཆ༌ན༌ ང༌དང༌ངི༌ ལག༌ག༌ ཁོང༌ང༌ ཏང༌ཅེས༌ ཅའང༌ མེད༌ཏེ༌ ཨིན༌ནོག༌།
ཁོང༌ང༌ ཏང༌ཅེས༌ལ༌ ང༌དང༌ངི༌ ལག༌ག༌ སྐྱེས༌ ཅི༌ ཡོད༌?”
8 ཡོག༌པོའེ༌ ལན༌ཏངས༌ “ངའེ༌ ལག༌ག༌ མུལ༌ལི༌ པེ༌ནེ༌ ཆུ༌ངུན༌ ཅིག༌ ཡོད༌,
ཏེ༌བོ༌ དཀོན༌མཆོག༌གི༌ མི༌བོའ༌ ཕུལ༌ཨིན༌ ཡང༌ ཁོང༌ངི༌ ང༌དང༌ང༌ བུང༌བུ༌གུན༌ ཙལ༌ཅེས༌ལ༌ ལམ༌སྟན༌ ཛད༌ སྲིད༌ཅེས༌ ཨིན༌ནོག༌”
9 ༼ཏེ༌ ཏུས༌ མི༌གུན༌ནི༌ དཀོན༌མཆོག༌ག༌ ཏྲི༌ཝ༌ཞིག༌ ཏྲི༌ཨིན༌ སམ༌ན༌ ཁོང༌གུན༌ནི༌ ཟེར༌རད༌པིན༌,
“ཡོང༌ དཀོན༌མཆོག༌གི༌ ཞལ༌ཟིགས༌གུན༌ ཐོང༌ཁན༌ནི༌ མི༌ ཡོད༌ས༌ ཆེན༌།”
ཨིན༌ནའང༌ ལུང༌སྟོན༌པ༌གུན༌ལ༌ སྔུན༌ ཏུས༌ལ༌ “དཀོན༌མཆོག༌གི༌ ཞལ༌ཟིགས༌གུན༌ ཐོང༌ཁན༌ནི༌ མི༌” ཟེར༌རད༌པིན༌༽།
10 ས༌འུལ༌ལི༌ ཟེརས༌,
“གྱལ༌ལ༌རག༌,
ཡོང༌ ང༌དང༌ ཆེན༌།”
ཏེ༌ནེ༌ ཁོང༌གུན༌ གྲོང༌ཁྱེར༌རི༌ ནང༌ང༌ དཀོན༌མཆོག༌གི༌ མི༌ དུག༌སའེ༌ ནས༌ས༌ སོང༌།
11 ཁོང༌གུན༌ རི༌ ཛགས༌ཏེ༌ གྲོང༌ཁྱེར༌ལ༌ ཆ༌ ཟ༌ནེ༌ ཁོང༌གུན༌ལ༌ ཆུ༌དོང༌ནེ༌ ཆུ༌ ཕིང༌ང༌ལ༌ ཡོང༌ཁན༌ནི༌ བུ༌མོ༌ ན༌ཆུང༌ ཁ༌ཅིག༌ ཐུག༌པ༌ ཁོང༌གུན༌ནི༌ ཏྲིས༌,
“དཀོན༌མཆོག༌གི༌ ཞལ༌ཟིགས༌ ཟིགས༌ཁན༌ནི༌ མི༌ དི༌རིང༌ འི༌རུ༌ ཞུགས༌ཏེ༌ དུག༌ག༌?”
12 ཁོང༌གུན༌ནི༌ ལན༌ཏངས༌,
“ཞུགས༌ཏེ༌ དུག༌,
ཁོང༌ ཨིན༌ན༌ ལམ༌ནེ༌ ཁྱོ༌ཞའེ༌ སང༌ སྔུན༌ལ༌ སྐྱོདས༌།
ནས༌ས༌ ཐོན༌པོའེ༌ཀ༌ མི༌གུན༌ནི༌ སྲོག༌ཆོད༌ ཆོད༌པ༌ ཕུལ༌ཅེས༌སི༌ ཕིའ༌ ཁོང༌ གྲོང༌ཁྱེར༌རི༌ ནང༌ང༌ དི༌རིང༌རང༌ སྐྱོདས༌།
13 ཏེ༌རུ༌ ཟན༌ ཟའ༌ལ༌ ཆའེ༌སང༌ སྔུན༌ལ༌ ཁོང༌ང༌ ཐུག༌ ཉན༌ཅེས༌ལ༌ གྱོགས༌པ༌ སོང༌ཤིག༌།
ཁོང༌ངི༌ ཆོད༌པའ༌ ཅིན༌ལབས༌ སལ༌ཏེ༌ མ༌ནེ༌ བོད༌ཁན༌ མི༌གུན༌ནི༌ ཟན༌ ཟའ༌ མ༌ནོག༌།
ཀལ༌ཏེས༌ དག༌ས༌ ཆ༌ན༌ ཁྱོ༌ཞའ༌ ཁོང༌ ཐུག༌ཨིན༌།
14 ཏེ༌ནེ༌ ཁོང༌གུན༌ ཀེན༌ལ༌ གྲོང༌ཁྱེར༌ལ༌ སོང༌,
ཁོང༌གུན༌ གྲོང༌ཁྱེར༌རི༌ ནང༌ང༌ ཞུགས༌ ཟ༌ནེ༌ ས༌མུའེལ༌ ཁོང༌གུན༌ ཆོགས༌ལ༌ ཕི༌ལོག༌ག༌ ཆོད༌པ༌ ཕུལ༌སའེ༌ ནས༌ས༌ ཐོན༌པོ༌ ཆ༌ཅེས༌ལ༌ བིངས༌ཏེ༌ ཡོང༌ངད༌པིན༌།
15 སྔུན༌མ༌ ཞག༌པོ༌ ཡ༌ཝའེ༌ ས༌མུའེལ༌ལ༌ མོལས༌,
16 “ཐོ༌རེ༌ འིན༌ན༌ ཏུས༌པོའེ༌ཀ༌ ངའེ༌ ཁྱོ༌རང༌ ཡོད༌ས༌ བེན༌ཡཱ༌མིན༌ནི༌ སྡེ༌ནེ༌ མི༌ཞིག༌ ལམ༌ ཅུག༌ཨིན༌ ཡང༌ ཁྱོ༌རང༌ངི༌ ཁོའེ༌ཀ༌ མར༌ ལུགས༌ཏེ༌ ངའེ༌ མི༌ ཨིས༌ར༌ཨེལ༌པ༌གུན༌ནི༌ཀ༌ སྤོན༌བོའ༌ སྐོས༌།
ཁོའེ༌ ངའེ༌ མི༌གུན༌ ཕི༌ལིས༌ཏི༌པ༌གུན༌ནི༌ ཀ༌ནེ༌ ཐར༌ ཅུག༌ཨིན༌ ཅིའ༌ཟེར༌ན༌ ངའེ༌ ང༌རང༌ངི༌ མི༌གུན༌ནི༌ཀ༌ སྙིང༌རྗེ༌ ཉམ༌པོ༌ ལྟའད༌ ཡང༌ ཁོང༌གུན༌ནི༌ རྡུག༌ངལ༌ལི༌ ནང༌ང༌ མོས༌ལམ༌ ཞུ༌ཁན༌གུན༌ ངའེ༌ ཚོར༌།”
17 ས༌མུའེལ༌ལ༌ ས༌འུལ༌ ཐོང༌ང༌ཅིག༌ ཡ༌ཝའེ༌ མོལས༌,
“ངའེ༌ ཁྱོ༌རང༌ང༌ ཟེར༌ཁན༌ནི༌ མི༌བོ༌ འིན༌ན༌བོ༌ ཨིན༌།
ཁོའེ༌ ངའེ༌ མི༌གུན༌ནི༌ཀ༌ ཝང༌ སྲུལ༌ཨིན༌།”
18 ས༌འུལ༌ གྱས༌སྒོའེ༌ དུན༌ལ༌ ལེབ༌བ༌ཅིག༌ ས༌མུའེལ༌ལ༌ ཏྲིས༌,
“ཇུ༌ཇུ༌ ཤད༌ད༌ ཛད༌དའང༌,
དཀོན༌མཆོག༌གི༌ ཞལ༌ཟིགས༌ ཟིགས༌ཁན༌ནི༌ མིའི༌ ཁང༌པ༌ ཀ༌ནེ༌ ཡོད༌?”
19 ས༌མུའེལ༌ལི༌ ལན༌ཏངས༌,
“ཏེ༌ མི༌བོ༌ ང༌རང༌ ཨིན༌།
ངའེ༌ སང༌ སྔུན༌ལ༌ ཆོད༌པ༌ ཕུལ༌སའེ༌ ནས༌ས༌ ཐོན༌པོའེ༌ཀ༌ ཀེན༌ལ༌ སོང༌,
དི༌རིང༌ ང༌ ཉམ༌པོ༌ ཁྱོ༌རང༌ ཁར༌ཇི༌ ཟེན༌ ཡང༌ ཐོ༌རེ༌ ང༌མོ༌ ངའེ༌ ཁྱོ༌རང༌ངི༌ སྙིང༌ངི༌ ནང༌ང༌ ཡོད༌ཁན༌ ཚང༌མ༌ ཤད༌ཏེ༌ ཁྱོ༌རང༌ ལམ༌ ཅུག༌ཨིན༌།
20 ཞག༌ སུམ༌མི༌ སྔུན༌ལ༌ སྟོར༌ཁན༌ནི༌ བུང༌བུ༌གུན༌ནི༌ སྐོར༌ལ༌ མ༌ཚེར༌ ཅིའ༌ཟེར༌ན༌ ཏེ༌གུན༌ ཐོབ༌ཏེ༌ ཨིན༌ནོག༌།
ཨིས༌ར༌ཨེལ༌པ༌ ཚང༌མའེ༌ རེ༌ཝ༌བོ༌ ཁྱོ༌རང༌ དང༌ ཁྱོ༌རང༌ངི༌ ནང༌ཚངས༌སི༌ཀ༌ བོར༌ཅེས༌པོ༌ ཁྱོ༌རང༌ང༌ ཧ༌གོ༌གོས༌།”
21 ས༌འུལ༌ལི༌ ལན༌ཏངས༌ “ཨིན༌ནའང༌ ཨིས༌ར༌ཨེལ༌པའེ༌ ཚང༌མའེ༌ སང༌ ཆུང༌ཤོག༌ བེན༌ཡཱ༌མིན༌ནི༌ སྡེ༌ནེ༌ ང༌ ཨིན༌།
ངའེ༌ ནང༌ཚང༌ བེན༌ཡཱ༌མིན༌ནི༌ སྡེ༌ནེ༌ ཚང༌མའེ༌སང༌ རྩིས༌མེད༌པོ༌ མ༌ནོག༌ག༌?
ཅི༌ཕིའ༌ ཉེ༌རང༌ངི༌ ང༌ འི༌ཙོགས༌ སྤེ༌ར༌ མོལ༌ལད༌?”
22 ཏེ༌ནེ༌ ས༌མུའེལ༌ལི༌ ས༌འུལ༌ དང༌ ཁོའེ༌ ཡོག༌པོ༌ ནང༌ ཆེན༌མོ༌ ཞིག༌གི༌ ནང༌ང༌ ཁྲིད༌ཏེ༌ ཁྱེརས༌ ཡང༌ ཁོང༌གུན༌ ཅོག༌ཙེའེ༌ གོ༌ ཆོགས༌ལ༌ དུག༌ཅུགས༌ བོད༌ཁན༌ནི༌ གྲོན༌པོ༌ སུམ༌ཅུའེ༌ དུན༌ལ༌ ཁོང༌གུན༌ལ༌ རྩི༌ཝ༌ ཏངས༌།
23 ས༌མུའེལ༌ལི༌ ཁར༌ཇི༌ སྐོལ༌ཁན༌བོའ༌ ཟེརས༌,
“ངའེ༌ ཁྱོ༌རང༌ང༌ ཐེན༌ཏེ༌ བོར༌ཅེས༌ལ༌ ཏང༌ཁན༌ནི༌ ཤའེ༌ ཁག༌པོ༌ ཁྱོང༌།”
24 ཏེ༌ནེ༌ མ༌ཅེན༌ནི༌ རྐང༌པའེ༌ ཤ༌ ཁྱོངས༌ཏེ༌ ས༌འུལ༌ལི༌ དུན༌ལ༌ བོརས༌།
ས༌མུའེལ༌ལི༌ ཟེརས༌,
“ཁྱོ༌རང༌ངི༌ ཕིའ༌ ཐེན༌ཏེ༌ བོར༌ཁན༌ནི༌ ཤ༌ འི༌བོ༌ ཨིན༌,
ཟོ༌,
འི༌ གྲོན༌པོ༌གུན༌ ཉམ༌པོ༌ ཟའ༌ཅེས༌ལ༌ ངའེ༌ ཏེ༌བོ༌ སྔུན༌ནེ༌ པར༌ལ༌ འིན༌ན༌ ཏུས༌པོའེ༌ ཕིའ༌ ཐེན༌ཏེ༌ བོར༌པིན༌།”
ཏེ༌ནེ༌ ཏེ༌ ཞག༌ག༌ ས༌མུའེལ༌ ཉམ༌པོ༌ ས༌འུལ༌ལི༌ ཁར༌ཇི༌ ཟོས༌།
25 ཁོང༌གུན༌ ཆོད༌པ༌ ཕུལ༌སའེ༌ ནས༌ས༌ ཐོན༌པོ༌ནེ༌ ཐུར༌ལ༌ གྲོང༌ཁྱེར༌ལ༌ ལོགས༌ཏེ༌ སོང༌ ཡང༌ ས༌མུའེལ༌ལི༌ ས༌འུལ༌ ཕིའ༌ ཁང༌པའེ༌ ཐོག༌གི༌ཀ༌ མལ༌ཙ༌ གྲལ༌གྲིག༌ ཅོས༌།
26 ཐོ༌རེ༌ཟུག༌པོ༌ ནམ༌ལངས༌ས༌ཅིག༌ ས༌མུའེལ༌ལི༌ ས༌འུལ༌ལ༌ བོད༌ཏེ༌ ཟེརས༌,
“ལོངས༌།
ཁང༌པ༌ ལོགས༌ཏེ༌ ལམ༌ཅུག༌ཅེས༌སི༌ ཏུས༌པོ༌ ལེབ༌ཏོག༌།”
ཏེ༌ནེ༌ ས༌འུལ༌ གྲལ༌གྲིག༌ ཆའ༌ཅིག༌ ས༌མུའེལ༌ ཁོ༌ ཉམ༌པོ༌ ཁང༌པ༌ནེ༌ བིང༌ཏེ༌ ཡོངས༌།
27 ཁོང༌གུན༌ གྲོང༌ཁྱེར༌རི༌ ཐའ༌མ༌ ལེབ༌བ༌ཅིག༌,
ས༌མུའེལ༌ལི༌ ས༌འུལ༌ལ༌ ཟེརས༌,
“ཁོང༌རང༌ངི༌ ཡོག༌པོའ༌ སྔུན༌ལ༌ སོང༌ ཟེར༌།”
ཡོག༌པོ༌ སོང༌ཏེ༌ སྟིང༌ནེ༌ ས༌མུའེལ༌ལི༌ ཟེརས༌,
“འི༌ཀ༌ ཙ༌པིག༌ དུག༌,
ངའེ༌ དཀོན༌མཆོག༌གི༌ ཆོགས༌ནེ༌ ཁྱོ༌རང༌ང༌ སལ༌ཁན༌ནི༌ ལོན༌བོ༌ ཤད༌ཨིན༌།”