PANGGITA
TO NIPOPOKITA YESUS KRISTUS KA YOHANES
Balengga nu buku
1
Isi buku eꞌi nantesa panggita nggari jaꞌi Yesus Kristus. Iꞌa nipakau Alatala mompopokita ka batua-batuana nuapa to daꞌa mana masaeka majadi. Yesus nompakau malaekana malau mompopokita etu pura-pura ka batuana Yohanes.
2 Pade Yohanes nompasimbayu pura-pura nuapa to nikitana, etumo tesa nggari jaꞌi Alatala bo posabi nggari jaꞌi Yesus Kristus.
3 Masana mpuꞌu tau to mombabasa tesa-tesa to niboto riara buku eꞌi bo tau-tau to mangepe bo mantuki nuapa to nitulisi riarana. Sabana mana masaeka pura-pura etu kana majadi.
Petabe nggari jaꞌi Yohanes
4 Tesa eꞌi nggari jaꞌiku Yohanes, ka todea topomparasaya i Pue Yesus ri pituongu ngata ri Propinsi Asia. Perapi Pue Alatala mombawai ka komi rasi bo katuwua mabelo. Rasi etu nggari jaꞌi Alatala to nariamo nggari lamba pamulana, bo to naria weꞌi-weꞌi, pade to maria sampe ri kasae-saena. Pade rasi etu woꞌu nggari jaꞌi papitu nosa nu Alatala to naria ri ngayo pekatoko nu Alatala, a
5 pade nggari jaꞌi Yesus Kristus. Iꞌamo sabi to namala raparasaya, Iꞌamo to pamula-mulana nipakatuwu bali nggari kamatena. Iꞌamo topoparenta pura-pura magau riara dunia. Iꞌa nompotowe kita pade ante leina Iꞌa nanggabasaka kita nggari silakata pura-pura.
6 Kita nipajadina todea riara poparentana, kita nipajadina topanggeni-topanggeni agama to nanggeni pesomba ka Umana Alatala. Perapi Yesus Kristus ratoiya bo rabila, perapi Iꞌa moparenta sampe ri kasae-saena. Amin!
7 Kitamo! Iꞌa marata nibungu kulimu. b Iꞌa kana rakita mata pura-pura tau, nabeloka ira to nombasaku usuna. c Pade pura-pura manusia ri dunia kana mageo mpajea manggita Iꞌa. Etu mpuꞌu-mpuꞌu kana majadi! Amin!
8 Pue Alatala nanguli, “Aku eꞌimo pamulana bo kaopuna. Aku to naria mamimo nggari lamba pamulana, Aku naria weꞌi-weꞌi pade Aku kana maria sampe ri kasae-saena. Akumo to neliu nggakuasa.”
BAGIA PAMULANA (1:9-3:22)
Yesus nipopokita ewa Ana nu Manusia to nolumako ri tatongo papitu kada mpoindo
9 Aku eꞌi Yohanes, sampesuwu komi riara i Pue. Nasimbayu ante komi aku woꞌu nipandasa sabana nomparasaya i Pue Yesus, bo nasimbayu ante komi aku woꞌu nombarata bagia riara poparentana. Pade aku woꞌu naroo tempo nipandasa nasimbayu ante komi. Aku nipatani ri saongu lewuto nosanga ka Lewuto Patmos, sabana nompatolele Tesa nu Alatala pade nompangaku Yesusmo Pueku.
10 Tempo Eo Mpepue aku nikuasai Nosa Nagasa nu Alatala, pade niepeku suara nggari talikuku to namangga mpuꞌu ewa wamba nu kololio.
11 Suara etu nanguli iweꞌi: “Tulisimo nuapa to mukita pade pakatumo ka todea topomparasaya to netoꞌo ri pituongu ngata, etumo ngata Efesus, ngata Smirna, ngata Pergamus, ngata Tiatira, ngata Sardis, ngata Filadelfia pade ngata Laodikia.”
12 Nangepe etu aku nakampeili madota manggita isema notesa ka aku. Tempo aku nakampeili nikitaku papitu kada mpoindo bulawa.
13 Ri tatongo kada mpoindo etu naria sambaꞌa tau, lenjena ewa Ana nu Manusia. d Baju nipasuana nandoe mpuꞌu narata ri kadana, pade naria pompoꞌu bombarana bulawa.
14 Balenggana bo woꞌona nabula njuꞌu ewa kapa bo salju. Pade matana najela ewa jela nu apu.
15 Kadana naralei ewa tambaga nitunu riara apu. Pade suarana namangga mpuꞌu ewa soo nu ue bete.
16 Ri pale ngganana naria pituongu betuꞌe, pade nggari ngangana nesuwu samata guma nomata ntimali to nataja mpuꞌu. Pade lenjena ewa wana nu eo ri eo ntongo.
17 Tempo aku nanggita Iꞌa kaliu-liu aku nadungga ntuobo ri ngayona ewa tomate. Tapi Iꞌa nombadika pale ngganana ri koroku pade nanguli, “Neꞌe iko maeka. Aku eꞌimo pamulana bo kaopuna.
18 Aku eꞌimo to natuwuna. Bopia aku namatemo. Tapi kitamo, weꞌi-weꞌi aku natuwu bali sampe ri kasae-saena. Akumo to nakuasa nanjoko kunci kamatea bo petoꞌo ntomate.
19 Sabana etu tulisimo nuapa pura to nikitamu, nabeloka to najadi weꞌi-weꞌi, nabeloka nuapa to majadi banepia.
20 Daꞌa ninjanimu batuana pituongu betuꞌe to nikitamu ri pale ngganaku eꞌi bo papitu kada mpoindo bulawa. Iweꞌimo batuana: Pituongu betuꞌe etu nombagambara pitumbaꞌa malaeka to nanggeniaka todea topomparasaya Aku to netoꞌo ri pituongu ngata. Pade papitu kada mpoindo bulawa etu nombagambara todea topomparasaya to naria ri pituongu ngata etu.”