PANGGITA
TO NIPOPOKITA YESUS KRISTUS KA YOHANES
Tesa nompakanoto isi buku
Isi buku eꞌi nantesa panggita to nipopokita Yesus Kristus ka anaguruna to nosanga ka Yohanes. Iꞌa nompopokita nuapa to majadi ri jaꞌina bo ri jaꞌi manusia ri dunia banepia. Jadi Yesus to nompopokita, bo Iꞌa woꞌu to nipopokita riara panggita-panggita eꞌi. Pamulana Iꞌa nipopokita ewa Ana nu Manusia to nolumako ri tatongo kada-kada mpoindo (1:9-20). Naopu etu Iꞌa nipopokita ewa Ana Bimba to nenggore ri sinjori pekatoko Alatala ri suruga (5:6-14). Pade kaopuna Iꞌa nipopokita ewa Tadulako to nesawi jara bula (19:11-16).
Buku eꞌi nitulisi ka topomparasaya-topomparasaya i Pue Yesus tempo ira mpuꞌu-mpuꞌu nipandasa sabana nomparasaya. Ri tempo etu pura-pura todea Roma niparenta mombasomba Magau Roma to niuli Kaisar. Naria santongo topomparasaya nipatesi sabana ira daꞌa nombasomba Magau Kaisar etu. Ira bate-batena nompangaku Yesus Kristus Pue ira, daꞌa Magau Kaisar. Tapi naria woꞌu ira to nokanggaura nomparasaya sabana naeka rara. Jadi patuju nu tesa riara buku eꞌi ala mompakaroso rara topomparasaya ala neꞌe ira mokanggaura momparasaya i Pue Yesus nau nipandasa.
Isi buku eꞌi nipasimbayu ka Yohanes ante bara sakuya ngele panggita. Patuju to napokona nggari panggita-panggita etu iweꞌi: Naupa riara dunia eꞌi topomparasaya i Pue Yesus kana rapandasa, neꞌe kita mokanggaura momparasaya, sabana kaopuna i Pue Yesus kana mombadagi pura-pura balina pade moparenta sampe ri kasae-saena. Pade kita to natutu nomparasaya Iꞌa kana moparenta mpasanggani-nggani ante Iꞌa.
Isi buku to napokona iweꞌi:
1. Balengga nu buku bo petabe (1:1-8)
2. BAGIA PAMULANA (1:9-3:22)
Yesus nipopokita ewa Ana nu Manusia to nolumako ri tatongo papitu kada mpoindo (1:9-20)
Tesa-tesa ka topomparasaya i Pue Yesus ri pituongu ngata (pasal 2-3)
3. BAGIA KARONGUNA (4:1-19:10)
Yesus nipopokita ewa Ana Bimba ri sinjori pekatoko Alatala ri suruga (pasal 4-5)
Ana Bimba nombalepa papitu segel (6:1-8:5)
Pituongu kololio nipopomoni (8:6-11:19)
Pituongu tandaina to norapa ka nuapa majadi banepia (pasal 12-16)
1) Besi ante ule naga (pasal 12)
2) Ule naga ante binata najaꞌa (13:1-10)
3) Binata najaꞌa ante nabi topodawa (13:11-18)
4) Ana Bimba ante satu patampulu patanjobu mbaꞌa topantuki Iꞌa (14:1-5)
5) Popanjani tolumbaꞌa malaeka (14:6-13)
6) Isi dunia nisombe (14:14-20)
7) Isi pituntonga tubu nitubaraka riara dunia (pasal 15-16)
Yohanes nanggita besi bajinga nosanga ka Babel (17:1-19:10)
4. BAGIA KATOLUONGUNA (19:11-22:5)
Yesus nipopokita ewa Topesawi jara bula nalau mosipatesi (19:11-16)
Pitungele kajadia ri posipatesi kaopuna (19:17-21:8)
1) Malaeka to nompokio tonji-tonji (19:17-18)
2) Yesus nombadagi binata najaꞌa (19:19-21)
3) Magau nu Seta nipoꞌu (20:1-3)
4) Topantuki i Pue Yesus nipakatuwu bali (20:4-6)
5) Magau nu Seta nisuku (20:7-10)
6) Tau-tau namate nitangara (20:11-15)
7) Langi nabou ante dunia nabou (21:1-8)
Yohanes nanggita boti besi nosanga ka Yerusalem nasadia raporongo Ana Bimba (21:9-22:5)
5. Karata i Pue Yesus daꞌa masaeka, bo tesa kaopuna (22:6-21)