SURA NGGARI JAꞌI
YUDAS
Petabe
1
Sura eꞌi nggari jaꞌiku Yudas, batua Yesus Kristus bo tuaꞌi Yakobus, ka komi to nipokio Alatala majadi todeana. Komi mpuꞌu-mpuꞌu nipotowe Umata Alatala pade komi nijagaina ala maroo mantuki Yesus Kristus.
2 Perapi asi mata, towe bo katuwua mabelo nggari jaꞌi Alatala rarasai komi ante daꞌa ria kaopu-opuna.
Topomparasaya kana mainga ri jaꞌi guru-guru topodawa
3 Sampesuwu-sampesuwu to nipotoweku, nabete mpuꞌu raraku mantulisi sura ka komi ewa kabelona to nirasaita pura-pura tempo nipakasalama i Pue Yesus. Tapi nipekiriku paraluu aku mantulisi mompatuduki komi ala manjoko mpakaroso pepatuduki to nakono to nipasimbayu Alatala ka pura-pura topomparasaya i Pue Yesus. Pade paraluu woꞌu aku mompatuduki komi ala bate-batena mangewa tau-tau to madota mombabali pepatuduki etu. Sabana pepatuduki etu niwai Alatala sanggani lau pade nagana puramo sampe ri kasae-saena.
4 Nitulisiku iwetu sabana nariamo bara sakuya mbaꞌa tau to nesua nggalino ri tatongo komi. Ira etu tau-tau to daꞌa nantuki dota Alatala. Ira nombabali tesa ewa towe belo nu Alatala ante nanguli daꞌa mokuya kita mogau sala sabana Alatala nompotowe kita pade Iꞌa kana mombaampungi salata etu. Pade ira nombasapu Yesus Kristus Magau bo Pueta sambaꞌa lau. Nggari nggaolu pesuku to rapawela ka ira nipakatantu mamimo riara Buku Nagasa.
5 Naupa komi nangginjani etu pura-pura, kana kupopatora sangganipa woꞌu ka komi iweꞌi: Toramo! Pue nanggabasaka todeana to Yahudi nggari tana Masir. Tapi naupa iwetu Iꞌa nompakaropu ira to daꞌa nomparasaya. a
6 Tora woꞌu malaeka-malaeka i Pue to nombaliunaka kuasa to nipakatantu Alatala ka ira sampe ira nompalasi petoꞌo ira mboto ri suruga. Ira nitarunggu Alatala ri petoꞌo narumau pade nipoꞌu ante rante to daꞌa namala rakabasaka sampe ira rasuku ri Eo Mpotangara banepia.
7 Iwetu woꞌu pokainggu pue ngata Sodom bo Gomora pade ngata-ngata ntanina to namosu ri setu. Nasimbayu ewa malaeka-malaeka etu ira woꞌu daꞌa nabasa-basa nogau sala ante tau daꞌa rongona mboto pade nantuki pokainggu to daꞌa ntoto masipato. Ngata ira nipakaropu ante apu ewa jonjo ka pura-pura tau iwenu pokainggu to najaꞌa kana rasuku ante apu sampe ri kasae-saena. b
8 Iwetu woꞌu guru-guru topodawa etu. Aga niposimpangipi-ngipi ira powia to nompakatantoru koro ira mboto. Ira nanjapuaka kuasa Alatala, pade ira nanguli sinjaꞌi malaeka-malaeka ri suruga to nipogumaa.
9 Tapi nau tadulako malaeka i Mikhael mboto daꞌa nowia iwetu. Tempo iꞌa nosisono ante Magau nu Seta ewa isema to mamala mangala watabaku i Musa, iꞌa daꞌa nabia mompakasala Magau nu Seta ante nanguli sinjaꞌi iꞌa. Mikhael aga nanguli, “Perapi Pue mombabunggaa iko.”
10 Tapi guru-guru etu nanguli sinjaꞌi mpengele-ngele anu daꞌa ninjani ira. Ira nasimbayu ewa binata-binata to daꞌa namala nompekiri, sabana ira aga nantuki dota koro mboto ante daꞌa ria rekena. Tapi kakonona nggari powia etumo sampe ira masipato rapakaropu.
11 Mandasa mpuꞌu ira! Sabana ira nompasiala pokainggu i Kain nggaolu to nompatesi tuaꞌina mboto. c Ira nompasiala pokainggu i Bileam to nasala aga nadota mombarata doi. d Pade ira nangewa Alatala nasimbayu ewa i Korah nggaolu sampe ira woꞌu masipato rapakaropu. e
12 Tempo komi nasiromu nanggoni mpasanggani-nggani, guru-guru topodawa etu aga nompakaeya mata komi sabana ira aga nompebasa nanggoni ante daꞌa naeya matana, pade aga nompekiri koro ira mboto. Ira daꞌa ntoto ria gunana nasimbayu ewa kulimunggapu to daꞌa najadi uja, aga niburu mpoiri gusaꞌa guseꞌi. Pade ira woꞌu daꞌa ria gunana nasimbayu ewa kayu to daꞌa nowua ri tempona. Kayu etu kana ratowo bo rapekale sampe namate liu-liu.
13 Pokainggu ira to nompakatantoru nasimbayu ewa wura ntasi to nadepu to naboli ri wiwi ntalinti tempo balumba bete rara ntasi. Pade ira daꞌa namala raparasaya sabana nasalanjalamo nasimbayu ewa betuꞌe-betuꞌe ri langi to nanawu nggari petoꞌo to masipatona pade sambara nolinja. Jadi ira to noinggu iwetu kana rasuku ri petoꞌo to neliu nggarumau sampe ri kasae-saena.
14 Henokh, muli kapituntapina nggari Adam, nombaboto guru-guru topodawa etu iweꞌi: “Kita weꞌi! Pue kana marata ante njobu-njobu malaekana to nagasa
15 ala mombatangara pura-pura tau. Iꞌa kana mombasuku pura-pura tau daꞌa nantuki dota Alatala sabana pura-pura pokainggu ira to najaꞌa. Pade Iꞌa kana mombasuku ira sabana pura-pura tesa njilaka to niuli ira ka Iꞌa.”
16 Guru-guru topodawa etu batena nongua ka katuwu ira mboto, pade aga nompakasala tau ntanina. Ira aga natuwu nantuki dota rara ira to najaꞌa. Ira notesa nompakalanga koro ira mboto, pade ira notesa namomi-momi ka tau ala mombarata untu.
Popatora bo tewai kaopuna
17 Tapi sampesuwu-sampesuwu to nipotoweku, toramo tesa to niboto suro-suro nu Pueta Yesus Kristus.
18 Ira nanguli ka komi iweꞌi: “Ane namosumo kaopu nu dunia kana meumba topesapuaka to mompongei-ngei Tesa i Pue. Ira aga matuwu mompebasa ka dota rara ira mboto to najaꞌa.”
19 Tau-tau niboto etumo to nompopogaꞌa todea topomparasaya. Ira aga nikuasai dota-dota najaꞌa nggari dunia eꞌi, pade Nosa Nagasa nu Alatala daꞌa ntoto naria ri jaꞌi ira.
20 Tapi sampesuwu-sampesuwu to nipotoweku, pakabelomo katuwumu ante maroo mantuki pomparasayamu to nagasana. Pade posambayamo ante pekeniaka Nosa Nagasa nu Alatala.
21 Jagaimo koro komi mboto ala batena matuwu riara towe nu Alatala. Popeamo katuwua mabelo sampe ri kasae-saena to rawai Pueta Yesus Kristus ka komi nantuki asi matana.
22 Komi kana maasi mata ri jaꞌi ntau to nolengga-lengga momparasaya,
23 pade tulungimo ira ala ira rapakasalama nggari pesuku nasimbayu ewa tau rapakasalama nggariara apu. Pade komi kana maasi mata woꞌu manggita tau-tau ntanina to nikuasai dota rara to najaꞌa. Tulungimo ira manggabasaka pokainggu ira to najaꞌa ante mainga ala neꞌe komi woꞌu matepakeni mantuki pokainggu ira to najaꞌa.
Tesa mantoiya Pue Alatala
24 Alatala nakuasa mombajagai komi ala neꞌe manawu. Iꞌa nakuasa manggeni komi mpaka ri suruga mantingayo Iꞌa riara karemena to nipogumaa ante inggu to nagasa bo kadamba nu rara.
25 Iꞌamo Alatala sambaꞌa lau. Iꞌamo to nompakasalama kita nantuki powia Pueta Yesus Kristus. Iꞌamo Alatala to neliu nggabete katuwuna, Magau to nipogumaa. Iꞌamo to nabaraka bo nakuasa nggari lamba pamulana, weꞌi-weꞌi, pade sampe ri kasae-saena. Amin!
Tabe nggari jaꞌiku,
Yudas