Tewai ka todea topomparasaya ri ngata Efesus
2
Pade nangulimo Ana nu Manusia ka aku, “Tulisimo ka malaeka to nanggeniaka todea topomparasaya ri ngata Efesus iweꞌi:
Eꞌimo tesa nggari jaꞌina to nanjoko pituongu betuꞌe ri pale ngganana pade to nolumako ri tatongo papitu kada mpoindo bulawa.
2 Ninjaniku pura-pura pokainggumu. Komi naraji nokarajaa pade komi naroo tempo nipandasa sabana nomparasaya Aku. Ninjanikumo komi daꞌa nasituju ante pokainggu tau-tau najaꞌa. Tau-tau to nompangaku korona suro-suroku tapi kakonona daꞌa, ira niuji komi sampe nanotomo ira topodawa.
3 Pade komi mpuꞌu-mpuꞌu nosabara. Komi nipandasa ntau sabana komi topantuki Aku, tapi komi daꞌa naopu rara.
4 Tapi naria sangele inggu komi to daꞌa nipodamba raraku. Komi mana nompotowe Aku ewa bopia tempo komi lako nomparasaya.
5 Etu sampe kuuli ka komi, pakabelo-belo! Nakawao ntotomo kanawu komi! Kajeamo komi, pade powiamo ewa to nipowia komi ri pamulana. Sabana ane komi daꞌa majea, Aku kana marata mangala kada mpoindo bulawa komi nggari petoꞌona.
6 Tapi naupa iwetu naria sangele inggu komi to nipokonoku, etumo komi nomporau rara pokainggu tau-tau to nantuki pepatuduki i Nikolaus, to niporau raraku woꞌu.
7 Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata. Isema-sema padagi kana kuwai ka ira wua nggari Kayu Katuwua to naria riara tinalu Alatala ri suruga.” a
Tewai ka todea topomparasaya ri ngata Smirna
8 Naopu etu nanguli woꞌumo Ana nu Manusia ka aku, “Tulisimo ka malaeka to nanggeniaka todea topomparasaya ri ngata Smirna iweꞌi:
Eꞌimo tewai nggari jaꞌina to niuli Pamulana bo Kaopuna, to namate pade natuwu bali.
9 Ninjaniku kasusa bo kapari to nirasai komi. Ninjaniku komi mpuꞌu-mpuꞌu nakasiasi, tapi kakonona komi nakalumana riara pomparasaya komi. Ninjaniku komi niuli sinjaꞌi ntau to nompangaku korona tau-tau to Yahudi tapi kakonona daꞌa. Ira aga todea Magau nu Seta.
10 Tapi neꞌe komi maeka mantingayo kasusa bo kapari to mana masaeka rarasai komi. Kitamo! Santongo nggari jaꞌi komi kana rapopesua Magau nu Seta riara tarunggu ala komi rapesoba. Komi kana rapandasa sampulu eo kasaena. Tapi pakaroo raramu momparasaya Aku sampe mamate, pade Aku kana mombawai ka komi hadia padagi, etumo katuwua mabelo sampe ri kasae-saena.
11 Isema-sema naria talingana, epemo mpakabelo-belo nuapa to niuli Nosa Nagasa nu Alatala ka todea topomparasaya ri umba-umba ngata. Isema-sema padagi daꞌa ntoto mawela pesuku riara naraka to niuli kamatea karongganina.” b
Tewai ka todea topomparasaya ri ngata Pergamus
12 Naopu etu nanguli woꞌumo Ana nu Manusia ka aku, “Tulisimo ka malaeka to nanggeniaka todea topomparasaya ri ngata Pergamus iweꞌi:
Eꞌimo tewai nggari jaꞌina to naria guma nomata ntimali to nataja mpuꞌu.
13 Ninjanikumo ngata nipetoꞌo komi, etumo riara ngata petoꞌo pekatoko Magau nu Seta. Tapi naupa iwetu komi naroo nomparasaya Aku. Tempo sabiku to nosanga ka Antipas nipatesi ri ngatamu, komi daꞌa nombasapu pomparasaya komi ka Aku. Antipas etu sabiku to natutu nomparasaya Aku sampe iꞌa nipatesi ntau ri ngata komi, etumo ri petoꞌo Magau nu Seta.
14 Tapi danariapa bara sakuya ngele inggu komi to daꞌa nipodamba raraku. Naria nggari tatongo komi to nantuki pepatuduki i Bileam nggaolu. c Bileam etu nompatuduki Magau Balak iwenu mompakanawu tau-tau to Israel riara silaka, etumo ante manggeni ira manggoni panggoni to napalina sabana nipakoni ka pue-pue ntanina, pade ante manguli daꞌa mokuya mogau sala ante tau daꞌa rongota mboto.
15 Pade naria woꞌu nggari tatongo komi to nantuki pepatuduki i Nikolaus.
16 Sabana etu kuuli ka komi, kajeamo nggari silakamu etu. Ane komi daꞌa majea Aku kana masalisa marata ri jaꞌi komi pade mosibali ka ira etu ante guma to naria ri ngangaku.
17 Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata. Isema-sema padagi kana kuwai ka ira roti ‘Manna’ to natetabuniaka.d Pade kana kuwai woꞌu ka ira watu bula simbau saongu. Ri watu bula etu nitulisi sanga nabou to daꞌa ntoto ninjani tau ntanina, aga tau to mantarima watu bula etu to mangginjanina.”
Tewai ka todea topomparasaya ri ngata Tiatira
18 Pade nanguli woꞌumo Ana nu Manusia ka aku, “Tulisimo ka malaeka to nanggeniaka todea topomparasaya ri ngata Tiatira iweꞌi:
Eꞌimo tesa nggari Ana nu Alatala to naria matana najela ewa apu pade kadana naralei ewa tambaga nitunu riara apu.
19 Ninjanikumo pura-pura pokainggu komi. Ninjaniku towemu bo pomparasayamu ka Aku. Ninjaniku bago komi mantulungi Aku pade ninjaniku iwenu komi nosabara tempo nipandasa. Pade ninjaniku bago komi mantulungi Aku weꞌi-weꞌi neliu nggadea nggari to nipowia komi tempo lako nomparasaya Aku.
20 Tapi danariapa sangele pokainggu komi to daꞌa ntoto nipodamba raraku. Etumo besi to nosanga ka Izebel to nompangaku korona sambaꞌa nabi nipaloga komi nompatuduki bo nombabagiu topantuki-topantuki Aku. Iꞌa nompatuduki ira mogau sala ante tau daꞌa rongo ira mboto pade manggoni panggoni to napalina sabana nipakoni ka pue-pue ntanina.
21 Niwaikumo loga ka iꞌa majea nggari ingguna nogau sala etu, tapi iꞌa daꞌa ntoto madota majea.
22 Jadi kitamo! Aku kana mompakajuꞌa iꞌa sampe iꞌa aga maturu ri paturuna. Pade ane ira to nantuki iꞌa nogau sala daꞌa majea nggari pokainggu ira to najaꞌa, ira kana kupawela kasusa bo kapari to najaꞌa mpuꞌu.
23 Pade ana-anana kana kupatesi sampe manoto ka pura-pura topomparasaya Akumo to nomparesa pekiri bo rara ntaꞌi manusia, pade Akumo to mombabalasi komi sambaꞌa bo sambaꞌa nantuki pokainggu-pokainggu komi.
24 Tapi naria woꞌu komi to Tiatira to daꞌa nantuki pepatuduki to najaꞌa etu pade daꞌa madota meguru to niuli ntau ‘pangginjani Magau nu Seta to nalontona’. Kuuli ka komi iweꞌi: Aku daꞌa mantambai parenta-parenta ntanina ka komi.
25 Aga sokomo mpakaroso pepatuduki to naria ri jaꞌi komi sampe Aku marata bali.
26-27 Isema-sema padagi bo to manggawia dotaku sampe ri kaopuna, kana kuwai ka kuasa nasimbayu ewa to nitarimaku nggari jaꞌi Umaku. Kana kuwai ka ira kuasa moparenta manusia ri njumaongu dunia. Ira kana moparenta ante maroso nasimbayu ewa karoso lembau ase. Pade ira kana mompakaropu bali ira nasimbayu ewa tau mompakarege kura tana. e
28 Pade kana kuwai ka ira betuꞌe pompaeo. f
29 Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata.”