Posambaya nasusa rara nanggita kagero Sapo Mpepue
74
Dade pepatuduki Asaf.O Alatala, nokuya Komi nompalasi kami sampe ri kasae-saena?
Nokuya Komi nobelisi gaga ka todea-Mu to nipiara-Mu ewa bimba-bimba-Mu?
2 Toramo todea-Mu to nipelisi-Mu nompamula nggari tempo nggaulu,
iramo tau-tau to nikabasaka-Mu tempo nipobatua ala majadi bagia-Mu mboto.
Toramo Bulu Sion,
to najadi petoꞌo-Mu.
3 Kamai kitamo petoꞌo to nagerona ntoto,
etumo Sapo Mpepue to naopu nigero nu bali.
4 Nongare-ngaremo bali-bali-Mu ri Sapo-Mu,
bo nompatido bandera-bandera tandaina ira padagi.
5 Ira nombawiataka baliu ira
nasimbayu ka tau nalau nombatowo kayu rampangale.
6 Pura-pura leru to nirandu mpakagaya ri Sapo-Mu,
nigero ira ante baliu bo palu-palu.
7 Sapo-Mu to nagasa naopu nipalabu ira,
petoꞌo mpepue ka Komi nipakatantoru iramo.
8 Ira notesa riara ntaꞌi, “Kamai rapandasata pura ira!”
Pade pura-pura petoꞌo mpepue ka Alatala ri tana eꞌi naopu nipalabu ira.
9 Mana ria tandai-tandai to nipogumaa,
mana ria nabi nompasimbayu tesa nggari jaꞌi Alatala,
bo daꞌa kamba sambaꞌa nggari kami
nanginjani sakuyapa kasaena majadi iwetu.
10 O Alatala, sakuyapa kasaena bali-bali mompongei-ngei Komi,
bo bate-batena manjalai sanga-Mu?
11 Nokuya Komi mana nantulungi kami?
Nokuya Komi aga nompunggu pale?
12 O Alatala, naupa iwetu, Komimo magauku nompamula nggari tempo nggaulu.
Nadea ngganimo Komi nompakasalama ngata kami.
13 Ante karoso to nabaraka Komi nombabingga tasi,
bo nompakarege balengga naga-naga riara ntasi.
14 Nipakarege-Mu balengga-balengga naga to niuli Lewiatan,a
bo watabakuna nipajadi-Mu panggoni binata-binata ri karawa baina.
15 Komimo to nompopoili ue bo binangga;
Komi nompakabai binangga to daꞌa naoti-oti uena.
16 Komimo to nompajadi eona bo nggawengina,
nipakatantu-Mu petoꞌo eo bo wula.
17 Komimo to nompakatantu pantaꞌa-pantaꞌa nu dunia,
bo nipowia-Mu tempo eo mpane bo tempo uja.
18 O PUE, toramo iwenu bali-bali nombasalai Komi;
tau-tau to daꞌa nomparasaya nompakakedi Komi.
19 Neꞌe Komi mombawai todea-Mu to daꞌa nompakule ri jaꞌi bali-bali to najaꞌa.
Neꞌe ntoto manggalinga todea-Mu to nipandasa.
20 Toramo pojanji to nipowia-Mu ante kami,
sabana ri petoꞌo-petoꞌo to narumau ri dunia eꞌi naria tau nowia kajaꞌana.
21 Neꞌe rapakamba tau to nipandasa rapakaeya tau ntanina;
perapi tau to nasusa katuwuna bo tau nakasiasi mantoiya Komi.
22 O Alatala, popokitamo ka todea-Mu aga Komimo to nakuasana.
Toramo iwenu tau-tau daꞌa nomparasaya nompongei-ngei Komi njaneo ntua.
23 Neꞌe rakalinga pongare bali-bali-Mu,
bo kagado ntau nangewa Komi
to nantambai kasaena nantambai kakananona!