Zɛkalɩdlɩ
13
'Ɩn,
ɩn ‑ka mneni ɩn 'ka nyɩmaa wɛlɩ gba,
'ɩn 'dɛbhie ɩn 'ka 'anzɩnyaa wɛlɩ gba,
ɩn 'nɩ nyɩmaa zɛkalɩ nɩ,
‑zugba ɩn 'wlʋ sa nɛtɛ wa mɩa bhlɩda 'tɩtɛɛ,
we wɛlɩ ‑yɔ ‑lili gbɔɔn wɛlɩ.
2 'Ɩn,
ɩn mneni ɩn 'ka ‑Lagɔgbʋʋ ‑falɩ 'pa,
ɩn mneni ɩn 'ka zizelu weee yibheli,
'ɩn,
ɩn 'ka we 'dɛ weee 'wʋlanʋ,
ɩn mneni ɩn 'ka dlɩ 'kadʋ zʋ,
‑we 'kaa ‑gɔgɔ 'kadɩ dawʋlasalɩ,
'ɩn,
ɩn 'nɩ nyɩmaa zɛkalɩ,
‑zugba ɩn 'nɩ ‑lu yabhlogbɔɔ nya ‑mɩ.
3 Ɩn ‑ka mneni ɩn 'ka na zʋzɔnʋ weee ŋwɔbhanya 'wʋladlili,
'ɩn ɩn 'ka na ku wla wa 'ka we sieoo,
ɩn 'nɩ nyɩmaa zɛkalɩ,
‑zugba ɩn 'na 'ka ‑lu yabhlogbɔɔ we 'wʋ 'yɩ.
4 ‑Ɔ ‑ka zɛkalɩdlɩ ‑ka,
ɔ dlɩtie,
zʋzɔnʋ ɔ nʋa lɛ,
ɔ dlɩɩ nyni nyɩmaa ‑lu 'wʋ zenyi sa,
ɔ'ɔ ‑slolu ɔ 'dɛ,
'ɩn ɔ'ɔ 'ylimanɩ ɔ 'dɛ.
5 ‑Ɔ ‑ka zɛkalɩdlɩ ‑ka,
ɔ'ɔ nʋ zʋbhalɩ gbʋ lɛ,
ɔ'ɔ ‑talɩ ɔ 'dɛbhlogbɔɔ zʋzɔnʋʋ da,
ɔ'ɔ 'pa 'cɛ,
ɔ'ɔ dɩlɩ nyɩmɛɛ gbɛgbɛɩn gbʋ dlɩɩ la.
6 ‑Ɔ ‑ka zɛkalɩdlɩ ‑ka,
‑we 'nɩa ‑mɩ tɩklɩɩ,
ɔ'ɔ li we 'mʋna,
nɩɩ,
gbʋzɔnʋ gbʋʋ 'mʋna ɔ lia.
7 ‑Ɔ ‑ka zɛkalɩdlɩ ‑ka,
nyɩmaa ‑yɔgbʋ ɔ tɩa 'wʋ,
gbʋ weee ɔ zʋa dlɩ ‑gʋ,
gbʋ weee ɔ dɩa dlɩ 'wʋ,
'ɩn ɔ slʋlʋa gbʋ weee 'wlu zɔ la.
8 Zɛkalɩdlɩ 'na 'ka cɩ labhɩa,
‑Lagɔgbʋʋ ‑falɩpapɩe yia labhʋa,
wɛlɩ ‑putunyaa gbagbɩe yia 'yligbea,
'ɩn ‑luyilo 'ka labhʋ.
9 Nɩɩ,
‑amɩaa ‑luyilo 'nɩ gbada ‑mɩ,
'ɩn ‑amɩaa ‑Lagɔgbʋʋ ‑falɩpapɩe 'nɩ gbada ‑mɩ.
10 Nɩɩ,
'ylɩ ‑we ka zlɩ ‑we mɩa gbada ‑ka yi,
‑we 'nɩa gbada ‑mɩ,
'ɩn ‑mʋʋ bhʋa la.
11 Nɩɩ,
da ɩn mɩa zlɩmɛ 'yɩslɔkpilɛ nya,
'yɩslɔkpilɛ 'bhisa na gbaa,
'yɩslɔkpilɛ 'bhisa na pʋpalɩa 'wlukʋʋn la,
'yɩslɔkpilɛ 'bhisa na sɩsalɩa gbʋ 'wʋ.
'Ɩn da ɩn ‑zɛa 'yligweladolunyɔ,
ɩn yia 'yɩslɔkpilɛɛ lɛnʋgbʋ 'bɩbhʋ.
12 Nɩɩ,
‑zɛɛn,
‑li ‑a 'yɩa ‑yɔ 'wluluu,
we 'wlʋ sa 'yligʋlabhʋ ‑vligni 'wʋ ‑a yɩ we ‑yɔ.
'Ɩn ‑yɔ ‑a yia 'yɩylɩa kpɛɛn kpɛɛn wee 'ylɩ nya.
Nɩɩ,
‑zɛɛn,
na ‑luyilo 'nɩ gbada ‑mɩ,
'ɩn wee 'ylɩ nya ‑Lagɔ na yia yibhelia kpɛɛn kpɛɛn,
sa ɔ 'dɛ ‑yia 'mɩ,
'sa.
13 ‑Slɛɛn,
wee ‑li ta ‑mɩnɩ mɩ la:
dlɩzʋzʋe,
dlɩwʋdɩdɩe,
zɛkalɩdlɩ.
'Ɩn wee ‑li weee ‑mɩnɩ glaa,
‑we 'ylia,
mʋ ‑wa zɛkalɩdlɩ.