Zuzu 'Pʋpaa wlawlali
12
‑Slɛɛn,
bheliaɩn,
‑li Zuzu 'Pʋpa wlaa,
ɩn 'yɩbha a yibheli we sazɔnʋ sa.
2 A ‑yi we 'ji nɩɩ,
da a 'nɩa ‑slɔ ‑Lagɔ 'wʋ ‑mɩ,
amɩaa 'dɛ a tidea 'yi,
yoyolagɔnya'a gbaa,
we 'bɩlanɔnʋe nya.
3 We 'gbʋ,
ɩn nɛɛ aɩn ‑ylaɛ:
nyɩmɛ ‑ɔ ‑ka ‑Lagɔɔ Zuzu 'wʋ ‑ka,
ɔ 'nɩ mneni ɔ 'ka gbaɛ:
«Mɛ kpa ‑Zezu»,
'ɩn nyɩmɛ yabhlogbɔɔ 'nɩ mneni ɔ 'ka gbaɛ:
«‑Zezu mɩ Nyɩmaa ‑Kanyɔ nya!»
'mʋ ɔ 'nɩ Zuzu 'Pʋpa 'wʋ ‑ka.
4 ‑Lagɔɔ Zuzuu wlawlali ‑zu 'wʋ,
'ɩn ‑Lagɔɔ Zuzu ‑bhlogbɔɔ wlaa we 'dɛ weee.
5 Nɩɩ,
‑Lagɔɔ libhoo 'yli ‑zu 'wʋ,
'ɩn Jejitapɛ ‑bhlogbɔɔ,
mɔ ‑yla ‑a nʋa we 'dɛ weee.
6 Nɩɩ,
‑Lagɔɔ libho ‑zu 'wʋ,
'ɩn ɔɔ ‑Lagɔɔ 'dɛbhlogbɔɔ nʋa we 'dɛ weee lɛ nyɩma weee 'wʋ.
7 ‑Ɔ ‑ka ‑mɩ ‑Lagɔ ka ɔ wlawlalu ‑mɔɔ 'nyɛ,
‑mɔɔ 'ka ‑Lagɔɔ Zuzuu 'tɩtɛ ‑slolu.
'Ɩn ‑mʋʋ mɩ nyɩma weee zʋzɔnʋʋ 'yɩyɩlu nya.
8 Nɩɩ,
‑Lagɔɔ Zuzu nyɛa nyɩmɛ yabhlo gbagbɩe gbʋyiloo sɔlʋ,
'ɩn ɔɔ Zuzu ‑bhloo dɛ nyɛa ‑gʋdʋ gbagbɩe,
nyɩma 'ka ‑Lagɔ yibheli.
9 'Ɩn ɔɔ Zuzu ‑bhloo dɛ nyɛa nyɩmɛ yabhlo dlɩzʋzʋe,
mɔ ‑bhloo dɛ nyɛa ‑gʋdʋ guzʋnyaa jipejipɩee se.
10 Nɩɩ,
ɔɔ Zuzu nyɛa 'yabhlo gwɛdigbʋʋ lɛnʋ se,
mɔ nyɛa 'yabhlo ‑Lagɔgbʋʋ ‑falɩpapɩee se,
mɔ nyɛ 'yaa 'yabhlo yoyozuzu ‑yɔ Zuzu 'Pʋpaa 'wʋsɩsalɩ se.
'Ɩn mɔ nyɛa 'yabhlo wɛlɩ ‑putunyaa gbagba se,
'ɩn mɔ nyɛa ‑gʋdʋ wee wɛlɩ ‑mɩnɩ 'jigbagbɩee se.
11 Nɩɩ,
ɔɔ Zuzu ‑bhloo dɛ nʋa we 'dɛ weee lɛ.
'Ɩn sa ɔ 'yɩbhaa,
'sa ɔ nyɛa nyɩma ‑bhlo ‑bhlo ‑Lagɔɔ wlawlalu ‑bhlo ‑bhlo ‑bhlo.
Ku ‑bhlogbɔɔɔ 'lali duun
12 Nɩɩ,
nyɩmɛɛ ku ‑bhlogbɔɔ,
'ɩn we 'lali duun.
Wee 'lalinya ‑zu 'wʋ,
'ɩn we nʋa ku ‑bhlogbɔɔ lɛ.
'Sa ‑bhloo 'dɛ Klisɩ mɩa.
13 Nɩɩ,
Zuifʋ ‑yɔ ‑wa 'nɩa Zuifʋoo,
galɩ ‑yɔ nyɩma ‑zɔnʋoo,
wa ka ‑a 'dɛ weee batizee Zuzu ‑bhlogbɔɔ nya,
'ɩn ‑a 'ka ku ‑bhlogbɔɔ ‑zɛ.
‑Lagɔ ka ɔɔ Zuzu ‑a 'dɛ weee yeli.
14 'Ɩn we 'nɩ 'lali ‑bhlogbɔɔ ku ka,
nɩɩ,
we 'lali ‑zu 'wʋ.
15 Bhʋ ‑ka yaa gba:
«Nɩɩ,
ɩn 'nɩ sɔ,
we 'gbʋ,
ɩn 'nɩ kuu ‑nʋ nya ‑mɩ»,
‑mʋʋ 'gbʋ we 'nɩa kuu 'lali yɩ?
16 'Ɩn yukwli ‑ka yaa gba:
«Nɩɩ,
ɩn 'nɩ 'yliya,
we 'gbʋ,
ɩn 'nɩ kuu ‑nʋ nya ‑mɩ»,
‑mʋʋ 'gbʋ we 'nɩa kuu 'lali yɩ?
17 Ku ‑kpabhie ‑ka yaa 'yliyaa 'dɛkpʋa nya ‑mɩ,
sa we 'ka 'nʋa?
'Ɩn we ‑ka yaa yukwlii 'dɛkpʋa nya ‑mɩ,
sa we 'ka ŋnɛ 'nʋa?
18 'Ɩn sa ‑Lagɔ 'yɩbhaa,
'sa ɔ zʋa kuu 'lali we ‑yɔ ‑bhlo ‑bhlo.
19 We ‑ka yaa nɩɩ,
we 'dɛ weee mɩ 'lali yabhlogbɔɔ nya,
‑zugba da kuu ‑kpabhie mɩa?
20 Nɩɩ,
kuu 'lali ‑zu 'wʋ,
'ɩn ku ‑bhlogbɔɔ.
21 Nɩɩ,
'yliya 'nɩ mneni we 'ka gba sɔ ‑ylaɛ:
«Ɩn 'nɩ ‑na gbʋ ‑ka!»
'Ɩn 'wlu 'nɩ mneni we 'ka gba bhʋnya ‑ylaɛ:
«Ɩn 'nɩ amɩaa gbʋ ‑ka!»
22 Kuu 'lalinya ‑a yɩa ‑yɔ nɩɩ,
we yɔlʋ 'wʋ,
we gbʋ ‑sua 'wʋ bhabha kuu ‑nʋ nya.
23 'Ɩn kuu 'lalinya ‑a yɩa ‑yɔ nɩɩ,
we 'nɩ 'nʋŋwɛ ‑zʋ sa ‑mɩ,
'mʋ ‑amɩa zʋa 'nʋŋwɛ bhabha.
'Ɩn kuu danya wa'a 'yɩa ‑yɔ,
‑mʋʋ ‑amɩa zʋa sazɔnʋ sa.
24 Nɩɩ,
kuu 'lalinya wa yɩa ‑yɔ,
‑mʋʋ sazɔnʋ saa zʋzʋe 'nɩ gbʋ 'wʋ ‑ka.
Nɩɩ,
‑Lagɔ ka ku lɛnʋ 'lalinyaa 'ylijɩjlɩe nya,
'ɩn we 'lalinya 'nɩa 'nʋŋwɛ ‑zʋ sa ‑mɩ,
ɔ yia we 'nʋŋwɛzʋzʋe 'kadʋ 'nyɛ.
25 Nɩɩ,
we ‑ka 'sa ‑mɩ,
'wʋdodoe 'nɩ kuu 'lalinya nyɩdɩ ‑mɩ.
'Ɩn zʋzlʋ wee 'lali zʋzlʋa 'nanʋʋ.
26 Nɩɩ,
kuu 'lali yabhlo ‑ka sɩada ‑mɩ,
we 'dɛ weee sɩa dabʋdʋ,
'ɩn wa ‑ka 'lali yabhlo 'ŋnɩkwalɩ,
we 'dɛ weee ‑yɔ we lia 'mʋna dabʋdʋ.
27 Nɩɩ,
amɩa,
Klisɩɩ ku a ‑mɩa.
'Ɩn wee kuu 'lali a ‑mɩa ‑bhlo ‑bhlo.
28 Nɩɩ,
leglizɩ 'wʋ sanɛɛ 'sa ‑Lagɔ palɩa nyɩma la:
tɩada,
‑Zezuu tietienya ɔ palɩa la,
we 'sɔnʋ nya ɔ palɩa ‑Lagɔgbʋʋ ‑falɩpanya la,
we tanʋ nya ɔ palɩa ‑Lagɔgbʋʋ ‑slolunya la.
‑Mʋʋ 'bɩgʋ gwɛdigbʋʋ lɛnʋnya,
'bhie guzʋnya jipenya ‑yɔ nyɩmaa 'wʋsanya,
we ‑yɔ nyɩmaa 'yugalɩnya.
'Ɩn nyɩma ‑wa gbaa wɛlɩ ‑putunya wa 'nɩa ‑yi,
ɔ yi 'yaa ‑maa lapalɩ.
29 Nɩɩ,
wa 'dɛ weee 'nɩ ‑Zezuu tietienya,
wa 'dɛ weee 'nɩ ‑Lagɔgbʋʋ ‑falɩpanya,
wa 'dɛ weee 'nɩ ‑Lagɔgbʋʋ ‑slolunya,
wa 'dɛ weee 'nɩ gwɛdigbʋʋ lɛnʋnya!
30 Wa 'dɛ weee 'nɩ guzʋnyaa jipenya,
wa 'dɛ weee 'nɩ wɛlɩ ‑putunya wa 'nɩa ‑yii gbagbanya,
'ɩn wa 'dɛ weee 'nɩ wee wɛlɩnya ‑mɩnɩɩ 'jigbanya!
31 'Ɩn,
‑Lagɔɔ wlawlali 'ylia ‑we ‑zia ‑bha 'wʋ,
amɩaa dlɩ nyni we 'wʋ.
Nɩɩ,
‑slɛɛn,
'yloogblʋ nanɩa 'yli ‑we ‑zia ‑bha 'wʋ,
'mʋ na yia aɩn 'klʋslolua.